L’Axencia Estatal de Meteoroloxía (AEMET) emitió un avisu nel que s’alvierte, mientres estos díes, de riesgu NOTABLE d’ádenes en Picos d’Europa a partir de 1.900 metros.
Según AEMET, esti vienres, 7 de xineru, podríen atropase unos 20-30 cm de nieve nuevo, cola cota en descensu, dende 1500 hasta 1100 metros. Con estes condiciones van ser frecuentes les purgues de nieve recién nes fasteres abondo inclinaes, polo xeneral de tamañu 1 (riesgu de cayíes) o 2 (capaz de soterrar a una persona), pero ensin refugar dalgunos de tamañu 3 (capaz de destruyir un vehículu), especialmente nes zones propenses a l’acumuladura, que frecuentemente s’atopen en vertientes sur y esti percima d’unos 1400-1500 metros.
En cotes altes, percima d’unos 1700-1900 metros, los fuertes vientos del oeste y noroeste xeneraren nueves plaques de vientu, preferentemente n’orientaciones sur, sureste, este, ya inclusive nordeste, anque nun se refuguen otres localizaciones, y que se van sumar a les yá esistentes neses mesmes aguaes. Toes estes estructures van caltenese inestables énte sobrecargues débiles, como ye’l pasu d’un solu esquiador, provocando ádenes de tamañu pequenu o medianu polo xeneral, anque tamién son posibles dalgunos de dimensión grande.
El sábadu nun s’esperen precipitaciones significatives. Les temperatures mínimes van baxar, pero les máximes van xubir, al igual que la cota de nieve, que va xubiŕ hasta unos 1700 metros. Amás, el vientu siguirá soplando fuerte o bien fuerte del oeste y noroeste, movilizando la nieve recién cayida. Van siguir siendo frecuentes los ádenes de nieve recién, ensuga n’aveseos, pero más húmeda en solanes, y tamién van siguir inestables les plaques de vientu, a les que se van sumar nueves estructures, polo que’l nivel de peligru va caltener ensin apenes cambeos.
El domingu espérense precipitaciones, que van poder ser persistentes, cola cota de ñeve n’ascensu hasta asitiase penriba de los visos, igualmente les temperatures van xubir, y van siguir soplando fuertes vientos del oeste y noroeste. Mientres esti día’l peligru por nieve recién tenderá a acutase a cotes bien altes, al empar que s’evoluciona a peligru por ñeve húmedo. Igualmente, les plaques de vientu van tender a estabilizase amodo. Sicasí, el nivel de peligru variará poco.
Nestes condiciones, dende’l Serviciu d’Emerxencies del Principáu d’Asturies (SEPA) alviértese que ye especialmente peligrosu realizar percorríos a cuerpu pel altu monte, según la práctica de deportes ivernizos como l’esquí de travesía o la esguilada en xelu.
