La vocera de Podemos nel Conceyu de Xixón, Olaya Suárez, va llevar esti vienres un ruegu a la Comisión d’Urbanismu, Obres Públiques y Mediu Ambiente pa que’l gobiernu municipal doble la vixilancia sobre los sondeos que lleva a cabu la empresa Minersa na zona rural xixonesa, venceyaos a la mina de fluorita de La Viesca.
En concretu, el pidimientu céntrase na denuncia vecinal de qu’unu de los sondeos, taría incumpliendo les condiciones de la so autorización, al desenvolvese nuna parcela distinta a la concedida na zona de Paniceres, na parroquia de Vega.
Por ello, Podemos Xixón reclama que’l gobiernu municipal compruebe si ta produciéndose tal incumplimientu, y y nesi casu, qu’intervenga pa paralizalo de momentu y aplicar les sanciones correspondientes. La empresa, que ye oxetu de continues quexes vecinales poles molesties y los riesgos que producen les sos actuaciones, yá foi sancionada a finales de 2024 poles irregularidaes detectaes n’otru sondéu na parroquia.
“Avisamos de que taríamos mui vixilantes y ye lo que faemos; nun vamos consentir nin ignorar posibles irregularidaes per parte de nenguna empresa”, aseguró Olaya Suárez, alvirtiendo que “si’l sondéu realmente tuviera realizándose nuna parcela distinta a l’autorizada, esta compañía sería reincidente y esperamos que la sanción seya mayor”.
La vocera morada recordó, amás, que “la vixilancia ambiental nun puede depender de los vecinos y vecines”, polo que “precisamos que dende disciplina urbanística o la unidá de vixilancia ambiental de la Policía Local se faiga siguimientu a les acciones d’una empresa que yá incurrió n’irregularidaes nel pasáu”.
