La vocera del Grupu Municipal Podemos Xixón nel Conceyu, Olaya Suárez, anunció esti miércoles delles iniciatives plenaries pa recoyer les reivindicaciones de les vecines y vecinos de Llavandera contra dos proyectos qu’amenacien “la redolada, la seguridá y la tranquilidá” de la población: l’ampliación de la mina de fluorita de La Viesca y un parque de bateríes.
La formación morada va encamentar al gobiernu municipal a refugar dambes instalaciones, establecer canales de comunicación coles persones afectaes ya impulsar, xunto coles alministraciones cimeres, les regulaciones pertinentes qu’eviten esti tipu de proyectos “invasivos y agresivos”, en palabres de la conceyala. Suárez llamentó cómo “la zona rural sigue demandando servicios públicos ya infraestructures básiques y non solo nun se-yos atiende, sinón que lo que se-yos lleva son estes instalaciones estractives pal beneficiu ayenu”.
Olaya Suárez axuntóse nel centru social de Llavandera cola asociación vecinal de la parroquia pa conocer de primer mano’l parque de bateríes qu’una empresa ta tratando d’instalar en suelu agroforestal y a 40 metros de viviendes. “Ye intolerable y tendríen d’asitiase puramente sobre suelu industrial”, aseveró la edil, denunciando que “nesta allugamientu produciría contaminación acústica y un grave riesgu de quema con dificultaes considerables pa la so estinción, poles característiques de les bateríes de litiu y la dificultá d’accesu de los equipos d’emerxencies”.
Antes, la conceyala morada asistió a una concentración vecinal xunto al llugar nel que se tán llevando a cabu dende esti branu les prospecciones mineres qu’afecten a múltiples poblaciones rurales del suroeste xixonés y tamién del conceyu de Siero. Suárez esplicó que “comprobemos les molesties y la esmolición que los vecinos lleven soportando cuatro meses”, y alvirtió que magar les prospecciones yá tán autorizaes, “si lleguen a reactivar l’actividá minera, arriesgaremos a grandes niveles de contaminación que xeneren enfermedaes como la fluorosis y podríen afectar a les agües que desagüen nel Piles”. Por ello, Podemos tamién esixe que les autoridaes determinen la afectación d’esti proyectu sobre’l procesu de renaturalización del ríu que ta en marcha.
