Entamu Blogue
Un artículu sobre l’usu del términu bullying en castellán y un poema d’Ángel González abren los exámenes de la PAU n’Asturies
La práctica totalidá de los 5.157 estudiantes inscritos n’Asturies na convocatoria de xunu de la Prueba d’Accesu a la Universidá (PAU) empezaron güei los exámenes de les asignatures de Llingua Castellana y Lliteratura II y Llingua Estranxera. Un artículu sobre l’usu en castellán del términu bullying, tituláu El acoso, por su nombre y robláu por Lola Pons en diariu El País, foi l’escoyíu pal exame de Llingua Castellana y Lliteratura. Nesta mesma prueba, incluyóse un poema publicáu pol poeta asturianu Ángel González, nel so primer llibru Áspero mundo. Los testos sobre les rellaciones familiares na adolescencia y les oportunidaes y los retos de la emigración a Australia son les opciones qu’apaecieron nel exame de Llingua Estranxera, na modalidá d’inglés.
Les pruebes, que s’enllarguen hasta’l xueves, desenvuélvense con normalidá nes 17 sedes, mayoritariamente universitaries, allugaes n’Uviéu, Xixón, Avilés, Mieres, Llangréu, Ribeseya, Cangas, L.luarca y Tapia. Anguaño inscribiéronse 44 estudiantes más que l’añu pasáu, cuando lo fixeron 5.113.
Alfonso López Muñiz, vicerrector d’Estudiantes y Empleabilidá, agradeció’l sofitu de toles persones implicaes na organización y sorrayó que “los exámenes empezaron nes 17 sedes con normalidá total”. Per otru llau, esplicó que l’alumnáu “ta encantáu” col usu, per primer vegada, de detectores de frecuencia y reconoció que, tal que se prevía, al entamu de la primer prueba nun se detectó nin un solu intentu de fraude.
El vicerrector tamién destacó que’l númberu de muyeres que s’enfrenta al exame ye mui superior al d’homes, 2.900 frente a 2.200, y que la modalidá de Bachilleratu con más inscritos ye la de Ciencies de la Salú y Tecnoloxía.
La PAU de la Universidá d’Uviéu asítiase percima del alcuerdu de mínimos de la Conferencia de Rectores d’España (Crue) no que fai a la competencialidá de les pruebes. La tasa de competencialidá ye del 80 al 100%. Con referencia a la optatividad, la Universidá d’Uviéu tien una tasa mínima de optatividad del 75%. Esto significa que tol temariu de les 32 materies pue ser oxetu d’exame, pero que dientro de cada bloque l’alumnáu va disponer de distintes opciones ente les qu’escoyer pa responder. Sobre les faltes d’ortografía, el vicerrector indicó que van restar de 0,1 hasta un máximu de 2 puntos les faltes ortográfiques en llingua española y un máximu de 1 puntu en llingua estranxera. En ciencies, nun se van aplicar criterios ortográficos.
Asturies baxa de les 50.000 persones paraes
Asturies algamó en mayu dos fitos pal mercáu llaboral: el paru baxó de les 50.000 persones y l’afiliación a la Seguridá Social asitióse a les puertes de les 400.000 cotizantes. L’ameyoramientu foi xeneralizáu, con un comportamientu especialmente positivu nos servicios y la industria. Amás, estos datos consoliden los meyores rexistros de paru y emplegu pa un mes de mayu en casi dos décades.
El presidente del Principáu, Adrián Barbón, afitárase como oxetivu superar anguaño esi doble llistón psicolóxicu: menos de 50.000 persones en desemplegu y más de 400.000 con trabayu, datos que nun s’algamaben dende la crisis financiera (la gran recesión). L’añu pasáu, Asturies consiguió amenorgar el desemplegu a 49.725 persones en xunu. El mayor rexistru d’afiliaciones llogróse nel mes d’agostu, con 399.453 ocupaos.
Los númberos conocíos güei dexen prever que los datos del 2026 seyan bastante meyores. Polo normal, tanto’l paru como l’afiliación tienen una evolución positiva mientres xunu y xunetu. Si la evolución sigue esti enclín, Asturies va averase a les sos marques históriques. El menor númberu de persones en paru rexistráu n’Asturies foi de 44.911 en xunetu del 2007. Tocantes a les afiliaciones, subieron a 411.452 n’agostu del 2008.
Conforme a los númberos de mayu, el desemplegu asítiase en 49.320 persones, tres baxar en 1.160 al respective d’abril, mientres que l’afiliación algama les 399.421, con 2.791 más que’l mes anterior. El datu del paru ye’l meyor pa un mes de mayu dende 2007, mientres que l’afiliación marca’l so nivel más altu pa esti períodu dende 2008.
En comparanza con mayu del 2019, la comunidá cunta agora con 20.877 paraos menos y 32.500 afiliaos más. En términos interañales, el desemplegu baxó en 2.425 persones, lo que supón una cayida del 4,69% al respective de mayu del 2025. Coles mesmes, l’afiliación aumentó en 8.035 ocupaos, con una medría del 2,05%. D’esta miente, Asturies encadena 62 meses consecutivos de descensu interañal del paru y crecedera de l’afiliación.
La evolución mensual del desemplegu foi positiva nel mercáu llaboral en términos xenerales, con descensos en tolos ámbitos económicos, tolos grupos d’edá y dambos sexos. Por sectores, la mayor baxada en mayu rexistróse nos servicios, con 970 paraos menos, siguíos pola industria (105), la construcción (64), y el colectivu de persones ensin emplegu anterior (8).
En comparanza col restu del país, Asturies rexistró en mayu un comportamientu especialmente positivu tocantes a la evolución del paru. La cayida mensual autonómica, del 2,3%, superó la media estatal, del 1,54%. Coles mesmes, l’afiliación a la Seguridá Social volvió crecer nel Principáu, en llinia cola evolución favorable del emplegu a escala nacional.
Nel detalle por sectores d’actividá, l’afiliación avanzó en mayu especialmente na hostelería, que sumó 556 cotizantes, siguida pola industria manufacturera (420), les actividaes alministratives y servicios auxiliares (326) y les actividaes sanitaries y de servicios sociales (302). Tamién rexistraron aumentos destacaos el comerciu (269 afiliaos más), l’Alministración pública (209), la construcción (176) y el tresporte y almacenamientu (172). Estes cifres reflexen la meyora del emplegu nos principales ámbitos d’actividá de la economía asturiana.
Unes 150.000 persones de la comarca d’Avilés van poder xestionar les sos cites n’atención primaria col asistente virtual Noah dende mañana
El Serviciu de Salú del Principáu (Sespa) estiende la implantación de Noah, l’asistente d’intelixencia artificial que dexa xestionar cites n’atención primaria, a la contorna d’Avilés.
A partir d’esti miércoles, unes 150.000 persones usuaries de los 10 centros de salú y 15 consultorios periféricos d’Avilés, Castrillón, Corvera, Cuideiru, Gozón, Illas, Muros de Nalón, Pravia y Sotu’l Barcu van poder pidir les sos cites y realizar trámites alministrativos de forma automatizada. El teléfonu, al que pue llamase les 24 hores del día, los siete díes de la selmana, ye’l 984 27 80 00.
Salú empecipió en marzu la implantación del asistente virtual nel valle del Nalón. A primeros de mayu, amplió la cobertoria del asistente virtual a Carreño, Xixón y Villaviciosa y agora a la contorna avilesina.
L’escritor Martín López-Vega va coordinar la Selmana de les Lletres Asturianes del 2027, dedicada a Xuan Bello
La Conseyería de Cultura, Política Llingüística y Deporte encargó al escritor, poeta y traductor asturianu Martín López-Vega la coordinación de la Selmana de les Lletres Asturianes 2027, una edición que va tar dedicada dafechu a la memoria y al legáu de Xuan Bello, autor, ente otres, de Hestoria universal de Paniceiros, una de les obres más influyentes de la lliteratura asturiana contemporánea.
La designación de Martín López-Vega asitia al frente d’esta conmemoración a una de les figures asturianes con mayor proyección cultural y lliteraria internacional. Nacíu en Po (Llanes) en 1975, ye llicenciáu en Filoloxía Española pola Universidá d’Uviéu y doctor en Lliteratura pola Universidá de Iowa. A lo llargo de la so trayectoria desenvolvió un llabor destacáu como poeta, ensayista, traductor, críticu lliterariu y xestor cultural, consolidándose como una de les voces más reconocíes de la lliteratura asturiana contemporánea tanto n’asturianu como en castellanu. Amás, ye l’albacea lliterariu de Xuan Bello, responsabilidá que-y foi confiada pola so esposa y la so fía.
Autor d’una amplia obra poética y ensayística, Martín López-Vega publicó títulos como Les coraes de la roca, Gótico cantábrico: poemas 2013-2017 o Ábrete, Sésamo: poemas nuevos y escogidos (1994-2024), amás de desenvolver una actividá intensa como traductor y articulista cultural. La so obra foi reconocida con dellos premios lliterarios y traducida a delles llingües, combinando una mirada fondamente vinculada a Asturies con una marcada vocación cosmopolita y europea.
Amás de la so trayectoria lliteraria, ocupó responsabilidaes nel Institutu Cervantes, onde foi director de Cultura n’España, director del gabinete de dirección y anguaño dirixe la sede de Mánchester.
Tres del fallecimientu de Xuan Bello, el Principáu anunció nel 2025 la dedicación de tol añu 2027 a la memoria y al legáu cultural del escritor de Paniceiros, nuna programación especial que va tener como exa central la celebración de la Selmana de les Lletres Asturianes. Nesi momentu, la conseyera de Cultura, Política Llingüística y Deporte, Vanessa Gutiérrez, destacó que nun se trata namás de dedica-y el día o la Selmana de les Lletres, sinón d’articular una programación anual que ponga en valor la so obra, el so pensamientu y el so papel como creador y dinamizador cultural.
L’homenaxe a la so figura va incluyir actividaes lliteraries, alcuentros, esposiciones, publicaciones especiales y delles iniciatives de divulgación destinaes a averar la obra, el pensamientu y la dimensión universal del autor a xeneraciones nueves de llectores, amás de reivindicar la so contribución decisiva a la dignificación y espardimientu de la lliteratura en llingua asturiana. Ente les acciones previstes figura tamién el reconocimientu institucional de la so figura cola denominación del IES La Florida col nome de Xuan Bello a partir del cursu próximu.
Xuan Bello, un escritor universal
Nacíu en Paniceiros, nel conceyu de Tinéu, en 1965, Xuan Bello ta consideráu una de les figures esenciales de la lliteratura asturiana contemporánea y ún de los autores que mayor promoción nacional y internacional dio a la creación lliteraria en llingua asturiana. Poeta, narrador, ensayista, traductor y articulista, desenvolvió una obra fondamente vinculada a la memoria, al territoriu, a la identidá y al poder evocador de la lliteratura como espaciu de resistencia cultural y emocional.
Con apenes dieciséis años publicó’l so primer poemariu, Nel cuartu mariellu, iniciando una trayectoria lliteraria qu’acabaría convirtiéndolo nuna de les voces más reconocibles del denomináu Surdimientu, el movimientu de recuperación y modernización de la lliteratura asturiana surdíu a partir de los años setenta y ochenta. La so obra poética, caracterizada por una gran sensibilidá llírica y una mirada fondamente humanista, siguió con títulos como El llibru de les cenices, Los nomes de la tierra, El llibru vieyu o Los caminos secretos.
Sicasí, diba ser con Hestoria universal de Paniceiros, publicada orixinalmente n’asturianu y depués traducida pol propiu autor al castellanu como Historia universal de Paniceiros, cuando Xuan Bello algamaría una reconocencia estraordinaria dientro de la lliteratura española contemporánea. La obra, gallardonada col Premiu «Ramón Gómez de la Serna» nel 2003, convirtió’l pequeñu universu rural de Paniceiros nun territoriu lliterariu universal, onde convivíen la tradición oral, la memoria familiar, la imaxinación, la cultura europea y les grandes preguntes sobre’l tiempu, la pérdida y la identidá.
Al traviés d’una escritura fragmentaria y fondamente personal, Xuan Bello consiguió construyir una de les propuestes narratives más orixinales de la lliteratura española de les últimes décades, demostrando que la lliteratura n’asturianu podía dialogar d’igual a igual con cualquier tradición europea contemporánea. La crítica destacó sobre manera la so capacidá pa tresformar lo local n’universal y p’asitiar la llingua asturiana n’espacios de prestixu lliterariu hasta entós inéditos.
Amás de la so producción lliteraria, desenvolvió una intensa actividá cultural como traductor, periodista y dinamizador de la cultura asturiana. Tradució al asturianu autores como Fernando Pessoa, Robert Louis Stevenson o Arthur Conan Doyle, collaboró en numberosos medios de comunicación y revistes culturales y foi director del selmanariu Les Noticies. Tamién participó activamente en proyectos editoriales y n’iniciatives fundamentales pal afitamientu de la lliteratura asturiana contemporánea.
Nel 2017 recibió’l primer Premiu Nacional de Lliteratura Asturiana concedíu pola Academia de la Llingua Asturiana, que destacó especialmente la so contribución a asitiar la lliteratura asturiana «nel mapa de la lliteratura nacional e internacional».
El fallecimientu de Xuan Bello en xunetu del 2025 supunxo una conmoción enorme pa la cultura asturiana y provocó un ampliu reconocimientu institucional, social y lliterariu a quien yá yera consideráu en vida ún de los grandes referentes culturales del país. La dedicación de la Selmana de les Lletres Asturianes 2027 y la estensión de les actividaes a tol añu busca precisamente reivindicar la dimensión universal de la so obra, averar el so legáu a xeneraciones nueves y reconocer la so contribución decisiva a la dignificación y modernización de la lliteratura asturiana.
La escritora Chelo Sierra ta na Residencia Lliteraria Xixón
L’autora madrilana yá tien fecha pa la presentación del so nuevu llibru El único animal esti llunes 1 de xunu a les 20 hores na Librería de Bolsillo, en Xixón.
La Residencia Lliteraria Xixón sigue cola so programación d’estancies creatives y actividaesculturales y tien dende esti mes de mayu a la escritora madrilana Chelo Sierra aprovechando al máximu la so estancia lliteraria. L’autora, gallardonada con numberosos premios, va realizar la presentación del so llibru “El único animal” el próximu llunes, 1 de xunu, a les 20 hores, na Llibrería de bolsillo (Xixón).
L’alcuentru va constar tamién d’un diálogu cola autora del llibru, onde va ilustranos más alrodiu del so procesu creativu. Chelo va tar acompañada por Inaciu Galán, director de la Residencia, con quien va charrar sobre la trayectoria de la so escritura. Mientres l’eventu, el públicu va poder conocer de primer mano los detalles del proyectu nel que Chelo tuvo trabayando, y lo que tien en mente darréu d’esta presentación.
Chelo Sierra nació en Madrid, foi una moza indecisa porque entamó Maxisteriu, Filosofía y Derechu pero terminó faciendoPublicidá. Exerció como creativa mientres más de quince años en distintes axencies de la capital p’anunciantes como L’Oreal, El Corte Inglés, La Primitiva, Zumosol, Leche Pascual, Land Rover o Hyundai. Más tarde, punxo en marcha’l so propiuhotel de campu n’Estremadura, proyectu nel que tuvo arreyadamientres nueve años.
Nel 2011 empecipió escribir ficción. Tuvo la oportunidád’introducise en distintos xéneros: microrrellatu, rellatu, poesía esperimental, novela curtia, artículos d’opinión…, y foipremiada en más d’una trentena de certames lliterarios: Ana María Matute de narrativa, Relatos en cadena, Ciudad de Coria de cuentu, Princesa Galiana, José Luis Castillo-Puche, Salvador García Aguilar, Ramiro Pinilla, Villa de Errentería, Ángel Guerra, ente otros.
L’homenaxe a Ígor Medio protagoniza les primeres anuncies del Arcu Atlánticu
El Festival Arcu Atlánticu va volver esti branu a Xixón con una amplia programación cultural que va convertir les cais y espacios emblemáticos de la ciudá n’escenariu de música, danza, teatru, cine y gastronomía ente’l 27 de xunetu y el 2 d’agostu. La cita, entamada pola Fundación Municipal de Cultura, Educación y Universidá Popular, va celebrar nel 2026 la so undécima edición, consolidándose como ún de los grandes alcuentros culturales del norte peninsular vinculaos a les identidaes atlántiques. El festival, nacíu nel 2012 y recuperáu nel 2024 tres de dellos años d’interrupción, vuelve apostar por una programación multidisciplinar inspirada tanto na tradición como na creación contemporanea de los territorios que conformen l’Arcu Atlánticu européu.
Les actividaes van arrancar yá’l sábadu 25 de xunetu col conciertu homenaxe “N’Alcordanza”, dedicáu a los músicos Ígor Medio y Carlos Redondo con motivu del ventiavu aniversariu del so fallecimientu. La Plaza Mayor va axuntar ente les 16.00 y les 22.30 hores a grupos como Llan de Cubel, Hermanos Castro, Felpeyu, Radiu Fox, Jaguares de la Bahía y Kactus Jack nuna xornada de folk y rock concebida como alcordanza colectiva a dambos artistes.
La inauguración oficial va tener llugar el llunes 27 de xunetu col espectáculu “A Residência”, proyectu conxuntu del cantante portugués Salvador Sobral y la banda First Breath After Coma. El conciertu, previstu pa les 22.00 hores na Plaza Mayor, va suponer la primer actuación n’España d’una propuesta nacida d’un procesu creativu compartíu y presentada enantes con llenu absolutu en distintos teatros de Portugal.
Enantes, a les 20.30 hores, la Plaza del Marqués va acoyer l’actuación de la compañía gallega Fran Sieira con “Un baile ceibe”, una pieza coreográfica que reflexona sobre’l xéneru y les tradiciones populares al traviés de la danza contemporanea.
La música tradicional atlántica va tener un pesu destacáu nesta edición. El martes 28 de xunetu va actuar nel Centru de Cultura Antiguu Institutu’l Leonard Barry Tríu, encabezáu por ún de los grandes intérpretes irlandeses de uilleann pipes, acompañáu por Martin Barry y Andy Morrow.
Pela so parte, el xueves 30 de xunetu va ser la vez del cuartetu bretón Talec Noguet, que va combinar repertoriu tradicional con influencies del jazz y la improvisación contemporanea.
Ún de los espectáculos más singulares va llegar el vienres 31 de xunetu cola compañía vasca Harrobi Dantza Bertikala, que va presentar “GEURE(R)A” sobre la fachada de la Torre del Reló. La propuesta, acompañada de vídeomapping y finalista de los Premios Max 2024, va ufiertar una reflexón poética sobre la memoria de les muyeres a lo llargo de la historia per aciu danza vertical y artes visuales.
Zapico afirma que Xixón evidencia’l “fracasu total y absolutu” de les polítiques de vivienda de la derecha
El conseyeru d’Ordenación del Territoriu, Urbanismu, Vivienda y Derechos Ciudadanos, Ovidio Zapico, afirmó güei nel plenu de la Xunta Xeneral que Xixón evidencia’l “fracasu total y absolutu” de les polítiques de vivienda que defende la derecha, y contrapunxo esi modelu a l’acción del Gobiernu d’Asturies p’ampliar el parque públicu, movilizar pisos disponibles y facilitar l’accesu a una residencia digna, afayadiza y algamadiza.
“En Xixón constatóse un fracasu total y absolutu de les polítiques de vivienda que la derecha defende”, aseguró Zapico, quien criticó especialmente los resultaos del Plan Llave y del programa Xixón confía arrendando, que’l so algame consideró insuficiente y de “resultaos paupérrimos” frente a otros modelos d’intervención pública desenvueltos n’Asturies, como l’impulsáu pol Conceyu d’Avilés o l’Alquilámoste, promovíu pol so departamentu.
Na so intervención, defendió una política activa de vivienda basada na promoción pública, la movilización de pisos vacíos, la cooperación institucional y la intervención sobre’l mercáu residencial.
Zapico sorrayó que, magar les dificultaes xenerales d’accesu a la vivienda, Asturies atópase en meyor situación que’l restu d’España. Asina, destacó que, según los primeros datos fiscales disponibles tres de la entrada a valir de la Llei de Vivienda estatal mientres un exerciciu completu, Asturies rexistró nel 2024 la menor xubida del preciu del arriendu d’España: un 2,7%.
Tamién señaló qu’estudios recientes asitien Asturies ente los territorios con meyor respuesta constructiva frente al déficit habitacional, al ocupar la cuarta posición nacional en capacidá de construcción en relación coles necesidaes detectaes.
El titular de Derechos Ciudadanos aportunó en que l’accesu a la vivienda constitúi’l principal retu social actual, de la que defendió la necesidá de cooperación institucional p’ampliar la capacidá de respuesta pública. Nesti marcu, esplicó’l protocolu suscritu ente’l Principáu y l’empresa pública estatal Casa47, que va dexar incorporar nueves viviendes al parque autonómicu. L’alcuerdu inclúi l’análisis de la viabilidá técnica, económica y xurídica del modelu de xestión; la identificación de viviendes susceptibles d’incorporase al sistema y la coordinación de ferramientes d’información pa garantizar una xestión eficaz y tresparente.
Según indicó, esti protocolu constitúi’l pasu previu a la firma d’un conveniu operativu nes próximes selmanes y respuende a la voluntá de sumar esfuerzos ente alministraciones pa evitar que viviendes disponibles permanezan cerraes mientres persisten necesidaes habitacionales. Nesti sentíu, recordó la recién axudicación de 37 viviendes de Casa47 en Mieres.
Abre la convocatoria del plan ‘Incorpórate al agro’ pa impulsar el relevu xeneracional nel campu
La Conseyería de Mediu Rural y Política Agraria abrió la convocatoria de la segunda edición del plan Incorpórate al agro, dotada con 8 millones, que sofita la llegada de moces y nuevos profesionales al sector primariu. El Gobiernu d’Asturies va poder ampliar esti creitu hasta los venti millones si fuera necesario p’atender la demanda. El periodu de solicitú d’estes ayudes va tar abiertu dende mañana hasta’l 1 de xunetu.
La cuantía de les ayudes asítiase en 50.000 euros. Sicasí, pue algamar los 100.000 nel casu de muyeres que se sumen a los llabores agrícoles y ganaderos, esplotaciones n’estensivu qu’adopten midíes preventives frente a los daños de la fauna selvaxe, producciones ecolóxiques o lláctees en zones de monte o producciones d’alimentos amparaos por una marca de calidá.
Medio Rural amplió l’añu pasáu esta convocatoria, qu’hasta entós beneficiaba a persones de 18 a 40 años, qu’agora tamién beneficia a nuevos llabradores de 41 a 56 años que nos dos exercicios previos a la solicitú nun llograren ingresos agrarios superiores a los 10.000 euros añales. Esti criteriu va caltenese na nueva edición del programa.
D’esta vuelta, como principal novedá, toles persones que quedaron en llista d’espera l’añu pasáu van poder optar a les ayudes ensin necesidá de realizar nuevos trámites, a cencielles van tener que ratificar la solicitú. D’esta forma, nun van tener qu’apurrir un nuevu plan empresarial nin documentación adicional. En total, van poder beneficiase d’esta midida 94 persones: 51 mozos y 43 nuevos llabradores y ganaderos.
Ente los dos períodos de solicitú que s’habilitaron l’añu pasáu recibieron ayudes 193 persones: 134 mozos y 59 nuevos profesionales, que recibieron una cuantía media de 67.000 euros.
El plan Incorpórate al agru fomenta la incorporación de nueves xeneraciones al campu, amás de promover esplotaciones más competitives, sostenibles y adaptaes a los retos del mediu rural. Amás, dexa compatibilizar les xeres agrícoles y ganaderes con otru tipu d’actividaes económiques. L’agricultura a tiempu parcial favorez la continuidá de les pequeñes esplotaciones y dexa incrementar la renta de los profesionales, de la qu’ayuda a afitar población y caltener el mediu rural.