Facebook Instagram Twitter
Entamu Blogue Páxina 3

Cultura divulga 21 proyectos cinematográficos asturianos na zona d’industria del Festival de Málaga

Por
xixonaldia
-
0

El Gobiernu d’Asturies participa pol segundu añu consecutivu nel área d’industria del Festival de Cine de Málaga, que se celebra hasta’l 13 de marzu. L’espaciu Mafiz d’esti eventu favorez la difusión y promoción de proyectos cinematográficos de les diferentes comunidaes autónomes. Na edición de 2025 acreditáronse p’acceder a esta zona cerca de 1.600 persones de 63 países.

La delegación asturiana, encabezada pola conseyera, Vanessa Gutiérrez, ta formada por 34 profesionales y empreses del sector audiovisual, a les que Cultura facilitó l’asistencia al alcuentru. Asturies cuenta de nuevu con un estand propiu nel Industry Club, un eventu que se realiza nel marcu de la vigésima edición del Spanish Screenings Content, la plataforma oficial pa la promoción internacional del audiovisual español.

Nesti marcu, baxo la marca Cine d’Asturies, va presentase un catálogu de 21 proyectos financiaos pol gobiernu l’añu pasáu, en diferentes fases de desendolcu, que busquen aliances pa llograr financiación o incorporar socios en coproducción o posproducción, distribución, ventes o presencia en festivales, ente otros fines.

Asturies tamién va tar presente na sección Neo Screenings de la plataforma de promoción del cine español, una sección diseñada p’amosar el cine nacional más arriesgáu, innovador y vanguardista, cola proyección de los siguientes llargometraxes sofitaos por Cultura: XY9, de David Huergo; Plaza Mayor, de Marcos M. Merino, y MCA, la llucha eterna, d’Alejandro Nafría.

Amás, güei celébrase la primer edición d’El Principitch d’Asturies, una sesión de pitching –presentación oral curtia y d’altu impactu pa dar a conocer una idea o un proyectu– na que van participar cinco proyectos en distintes fases de desendolcu: el curtimetraxe Benigno, de Luis Iglesias Rodríguez; el llargometraxe Los nueve baños de septiembre, cuyos guionistes son Alberto Rodríguez de la Fuente y Estefanía Salyers Naharro; Pasar el agua, un llargometraxe d’Irene Menéndez Palomino; el llargu Timidez botánica, de Mónica Arnanz; y Turtle Blues, un llargometraxe dirixíu por Asur Fuente.

Los representantes de los cinco proyectos escoyíos van tener la oportunidá de presentar el so trabayu ante potenciales productores, financiadores, distribuidores o programadores asistentes a Mafiz.

Pela tarde, tres l’alcuentru profesional Cine d’Asturies ente la delegación asturiana y profesionales, empreses ya instituciones sectoriales de tol Estáu, un xuráu escoyerá dos proyectos que van recibir hasta 1.500 euros caún.

Tranquilidá

Por
xixonaldia
-
0

Asina ye la campaña pa facilitar l’abonu del bonu social térmicu

Por
xixonaldia
-
0

El gobiernu d’Asturies pon en marcha una campaña informativa dirixida a les 13.700 persones beneficiaries del bonu social térmicu que tovía tienen pendientes pagos correspondientes a los años 2022, 2023 y 2024 —el 18% del total acumuláu—, col envís de que puedan actualizar los sos datos bancarios y acceder al cobru d’estes ayudes.

La iniciativa, un procedimientu de calter innovador, combina l’atención presencial reforzada na rede d’oficines de l’Alministración del Principáu con canales dixitales seguros que faciliten a la ciudadanía una xestión directa de los sos datos. L’oxetivu ye garantizar que los pagos lleguen correctamente y amenorgar les incidencies derivaes de cuentes bancaries incorrectes, inactives o non verificaes.

A lo llargo d’esti mes de marzu, la Conseyería de Derechos Sociales y Bienestar publicará tres llistaos coles persones que tienen de revisar los sos datos bancarios. El primeru ta disponible yá nos portales oficiales https://prestacionesasturias.es y https://socialasturias.asturias.es.

El gobiernu habilitó tres canales principales pa revisar o modificar la cuenta bancaria:

Vía electrónica. Al traviés del área personal del portal miPrincipado https://miprincipado.asturias.es, que ye la forma más rápida. La persona titular puede xestionar directamente’l so IBAN (códigu d’identificación del númberu de cuenta) con identificación segura.

Atención presencial personalizada. Cualquier persona puede dir, con documentu identificativu válidu y los datos de la cuenta na que figura como titular o cotitular, a los servicios d’atención al ciudadanu d’Uviéu, Xixón y Avilés, asina como a les sedes de los equipos territoriales de servicios sociales de Navia, Cangas del Narcea, Les Arriondes, Mieres y Llangréu.

Rexistru. Presentando’l modelu normalizáu de la ficha d’acreedor en cualesquier de les oficines de rexistru de l’Alministración del Principáu d’Asturies, oficines de Correos y representaciones diplomátiques. Pue descargase en https://miprincipado.asturias.es/utilidades/formularios-genericos.

El Principáu tamién va unviar comunicaciones directes per mensaxe SMS y correos lletrónicos. Les persones que a finales d’añu nun actualicen los sos datos polos canales establecíos van recibir un últimu requerimientu formal, per escritu, qu’indicará’l plazu máximu pa facelo. Nel casu de nun atender al avisu, va archivase l’espediente.

Les persones que tengan duldes pueden contactar cola conseyería al traviés del corréu electrónicu infobonotermico@prestacionesasturias.es o nel teléfonu 984 015 792.

Villaviciosa acueye esti domingu la manifestación feminista del 8M n’Asturies

Por
xixonaldia
-
0

El movimientu feminista asturianu va volver salir a les cais esti domingu, 8 de marzu, con motivu del Día Internacional de la Muyer Trabayadora. La manifestación principal n’Asturies va celebrase en Villaviciosa, convocada pola plataforma Asturies Feminista 8M.

La movilización ta convocada pa les 12:30 hores na cai Ramón Rivero Solares, dende onde partirá’l percorríu reivindicativu peles cais de la villa maliaya hasta’l parque d’El Pelambre.

La convocatoria va celebrase baxo’l llema “Nin la tierra nin les muyeres somos territoriu de conquista”, col que’l movimientu feminista quier poner l’accentu na defensa de los derechos de les muyeres y na realidá específica de les muyeres del mediu rural.

Dende la organización faise un llamamientu a la ciudadanía pa participar nuna xornada reivindicativa que busca visibilizar les desigualdaes que tovía sufren les muyeres. Ente les principales demandes tán la llucha contra la violencia machista, la defensa de los derechos llaborales y sociales y el reconocimientu del papel de les muyeres nel territoriu.

La movilización forma parte de les convocatories que se van celebrar en munches ciudaes y pueblos con motivu del 8M, una fecha dedicada a reivindicar la igualdá y los derechos de les muyeres en tol mundu. Dende la plataforma convocante animen a la población a participar nesta xornada de protesta y reivindicación pa siguir avanzando escontra una sociedá más xusta ya igualitaria.

Iniciativa pol Asturianu amuesa’l so sofitu al enzarru d’ADAE na defensa de la especialidá docente

Por
xixonaldia
-
0

L’Asociación de Docentes d’Asturianu y d’Eonaviegu (ADAE) entamó esta tarde un enzarru nel Colexu Públicu de Cabueñes de Xixón pa reclamar al Ministeriu d’Educación l’aprobación de la Especialidá Docente d’Asturianu. Dellos miembros d’Iniciativa pol Asturianu asistieron a la movilización pa mostrar el sofitu de la organización a esta protesta.

La presidenta d’Iniciativa pol Asturianu, Arantza Margolles, aprovechó la movilización pa recodar que “la especialidá docente ye una ferramienta imprescindible pa garantizar la calidá de la enseñanza de les llingües propies d’Asturies y que nun puede esperar más. Esta movilización cuenta col sofitu del profesoráu, de les families, del movimientu de reivindicación llingüística y de los sindicatos.”

Margolles consideró que “los docentes de l’asignatura de Llingua Asturiana son un exemplu pa siguir trabayando na reivindicación del nuesu patrimoniu llingüísticu. L’ausencia d’especialidá provoca que la materia nun cuente con un marcu específicu que garantice estabilidá, reconocencia profesional y planificación a llargu plazu. Amás, provoca rotaciones constantes, amás de dificultar la consolidación de plantiyes”.

Iniciativa pol Asturianu recuerda que la enseñanza del asturianu y del eonaviegu vien siendo una demanda social amplia y sostenida nel tiempu, y que’l trabayu del profesoráu resultó fundamental pa consolidar la presencia d’estes materies nel sistema educativu asturianu. Por ello, la organización considera xusto y necesario que s’atienda la reivindicación d’ADAE y se garantice una especialidá docente propia que dea estabilidá al colectivu docente y seguranza xurídica al futuru de la enseñanza d’estes llingües.

Amás, Iniciativa pol Asturianu volvió a facer un llamamientu al Gobiernu d’Asturies pa que s’implique na busca d’una solución que dea rempuesta a les demandes del profesoráu y que refuerce’l compromisu coles llingües d’Asturies. Margolles recordó que “va quince díes, la Xunta Xeneral refrendó, una vegada más, el sofitu a la creación de la Especialidá Docente. Pero´l compromisu nun puede quedar ehí. Ye’l momentu d’encabezar esta reclamación a la Ministra d’Educación, Milagros Tolón”.

Arantza Margolles quixo tamién llanzar un mensaxe de fuercia a tolos participantes na movilización apuntando que “güei toles falantes, tol movimientu de reivindicación, los y les estudiantes d’asturianu tamos con ADAE y col profesoráu d’asturianu. Tresmitimos fuercia, puxu y ánimu pa siguir nesti camín de movilizaciones pa llograr la xusta aprobación de la Especialidá Docente”.

L’hospital de Cabueñes consolida la neurosonografía como técnica pa la detección de patoloxíes fetales

Por
xixonaldia
-
0

El serviciu d’Obstetricia y Xinecoloxía del Hospital Universitariu de Cabueñes cuenta na so cartera de servicios cola neurosonografía, un procedimientu avanzáu que consiste nuna ecografía per mediu d’ultrasoníos d’alta resolución, que facilita’l diagnósticu prenatal de diverses patoloxíes rellacionaes col sistema nerviosu central.

Ye una técnica non invasiva yá consolidada nel equipamientu sanitariu xixonés, que, xunto col Hospital Universitariu d’Asturies (HUCA), ye centru de referencia pa la realización d’estes pruebes. Al procedimientu accédese una vegada que se llocalicen anomalíes mientres la ecografía del screening prenatal, según esplica la xinecóloga de Cabueñes Sheila Fernández.

Anque son pocos los casos de pacientes que se someten a estos estudios avanzaos (realícense ente trés y cinco cada mes, incluyíes les muyeres derivaes dende los hospitales de Xove y Les Arriondes), trátase d’una actuación fundamental pal diagnósticu prenatal. Per mediu d’ultrasoníos, nesti procedimientu analízase’l sistema nerviosu del fetu col oxetivu de facilitar el diagnósticu de les anomalíes detectaes con anterioridá. De manera paralela, dende Cabueñes tamién se lleven a cabu ecocardiografíes dirixíes, una prueba na que tamién s’utilicen ultrasoníos pa proporcionar, nesti casu, información sobre’l corazón del fetu.

El Hospital Universitariu de Cabueñes acueye mañana xueves, 5 de marzu, y el vienres 6 la decimoséptima edición del Congresu d’Atención Prenatal ¿Qué facer énte…?, nel que ta prevista l’asistencia de 140 profesionales d’esta especialidá. La cita ta entamada de manera conxunta pola Fundación Docente Xineco-obstétrica de Xixón y pol serviciu d’Obstetricia y Xinecoloxía del centru hospitalariu.

Nel congresu van participar facultativos de los hospitales La Paz y 12 d’Ochobre (Madrid), Sant Joan de Deu (Barcelona) y Valme (Sevilla). Amás, en representación del Hospital Universitariu de Cabueñes intervendrán la doctora Sheila Fernández, que disertará sobre los casos de fosa posterior anormal, y Esther Pérez Carbajo, que espondrá aspectos sobre l’apaición de mases, quistes y colecciones nel abdome. Les ponencies entamarán a les 15:15 del xueves nel salón d’actos del equipamientu sanitariu y van siguir a lo llargo de tola xornada del vienres.

Nel desenvolvimientu del programa del congresu, que tien calter formativu, ta previsto abordar les novedaes nel manexu de situaciones clíniques de diversa índole que se detecten a raigañu del screening prenatal que se practica a les muyeres embarazaes, como cardiopatíes, dilataciones nel tractu urinariu o hipertensión, ente otres.

Therians

Por
Efrén D'Andrés
-
0

LLABoral Centru d’Arte y Creación industrial convoca dos residencies a comuña col Puertu del Musel y La Benéfica de Piloña

Por
xixonaldia
-
0

El centru d’arte contemporaneu asturianu abrió dos nueves convocatories orientaes al sofitu de la creación artística y sonora nel territoriu: la Beca de Producción Artística Puerto del Musel – LLABoral y la residencia MURMULLU, centrada na producción de pódcast n’asturianu.

La Beca de Producción Artística desenvuélvese en collaboración cola Autoridá Portuaria de Xixón y propón un diálogu creativu col Puertu del Musel y el so entornu marítimu. La convocatoria ta dirixida a artistes visuales, tanto individuales como colectivos, residentes n’España. El proyectu escoyíu va cuntar con una dotación económica de 6.000 euros pa la so producción y va desenvolvese en formatu de residencia artística en LABoral, culminando nuna esposición pública.

Pela so parte, la residencia MURMULLU ta enfocada a mocedá d’ente 14 y 35 años residente n’Asturies y tien como oxetivu impulsar la creación de conteníos sonoros n’asturianu. La iniciativa ta entamada xunto a La Benéfica de Piloña, el Conseyu de la Mocedá d’Asturies y XtraRadio – Casa de les Radios. Les propuestes escoyíes recibirán una ayuda económica destinada a honorarios y gastos de producción, amás d’accesu a equipamientu técnicu, formación especializada y acompañamientu profesional.

Con estes iniciatives, LABoral refuerza la so llabor como espaciu de referencia pa la creación contemporánea n’Asturies, apostando tanto pola investigación artística venceyada al territoriu como pola promoción del usu del asturianu nos nuevos formatos de comunicación sonora.

Documenten n’Asturies los primeros rastros de llagartos xurásicos d’Europa

Por
xixonaldia
-
0

L’equipu científicu del Muséu del Xurásicu d’Asturies (MUXA), integráu por Laura Piñuela, Ángel García-Pérez y José Carlos García-Ramos, xunto al investigador Lida Xing, de la Universidá de Xeociencies de China, documentaron pela primer vez n’Asturies rastros de llagartos del Xurásicu, perescasos nel rexistru fósil post-Triásicu. L’artículu que recueye los resultaos de la investigación publicóse en llinia a últimos de febreru d’esti añu na prestixosa revista internacional Ichnos, del Grupo Taylor & Francis. El MUXA ye un equipamientu dependiente de la Conseyería de Cultura, Política Llingüística y Deporte

La investigación trata sobre dos nicios (T1 y T2) que se conserven como relieves abultaos (contramoldes) na base d’un estratu d’arenisca del Xurásicu Superior, con una edá alredor de los 152 millones d’años, procedente de los cantiles al este de la playa d’España (Villaverde, Villaviciosa). Anguaño formen parte de la colección del MUXA y exhíbense na sala del Xurásicu Asturianu.

Les icnites de les manes y de los pies, en dambos rastros, varíen de tetradáctiles a pentadáctiles, son asimétriques y la llonxitú de los deos aumenta progresivamente del I al IV, siendo esti últimu’l más llargu. La so conservación tan escelente y la morfoloxía que presenten estes buelgues dexa atribuyiles a un llagartu y asignales a Rhynchosauriodes. Esti icnoxéneru ampliamente distribuyíu pel Pérmicu y Triásicu, ye perescasu nel Xurásicu, representando los exemplos asturianos la so última apaición nel rexistru fósil global.

El rastru T1 ta formáu por 7 icnites (4 de manos y 3 de pies) y foi producíu por un llagartu d’alredor de 50 cm de llonxitú. El T2 tien 6 icnites (3 de manos y 3 de pies) y ye gracies a un individuu daqué más pequeñu, d’alredor de 30 cm de llargu.

Llama l’atención nel niciu T1 la presencia d’una estructura cuasique continua, ancha, recta, con perpocu relieve y sección en V que delles veces asítiase fuera d’ésti. La morfoloxía d’esta estructura dexa identificala como la marca de la cola qu’en condiciones de desplazamientu normal del llagartu diba asitiase paralela a la llinia media del rastru. Amás, obsérvase que la distancia ente les icnites de les manos y les de los pies varía a lo llargo del rastru, faciéndolu mui irregular.

Pa entender esta anomalía nel desplazamientu, reflexada na irregularidá del niciu, fixéronse dellos esperimentos con dos llagartos actuales, l’oceláu y el barbudu. Les pruebes, non invasives, realizáronse con exemplares en cautividá nun centru de la ciudá de Jiangyin na provincia de Jiangsu (China). Cuando los llagartos actuales, principalmente los exemplares xuveniles, pasaben d’un estáu estáticu a unu en movimientu realizaben xiros bruscos xenerando un rastru asemeyáu al exemplar fósil asturianu.

Los llagartos produxeron estes buelgues de la que se desplazaben per una llamarga semi-consolidada de los deltes de la dómina, los que desembocaben nuna mar interior desprovista de marees y protexida del folaxe tan fuerte por una barrera esterna que la estremaba de la mar abierta, lo que facilitó la conservación de les icnites.

Naz Noa, l’axente virtual que dexa pidir cita telefónica en primaria les 24 hores del día

Por
xixonaldia
-
0

L’axente virtual Noa, un modelu d’atención telefónica que permite llograr cites con profesionales de la rede d’Atención Primaria les 24 hores del día, los siete díes de la selmana, ye yá una realidá dende güei.

Noa entama a funcionar en fase piloto nos centros de salú de la cuenca del Nalón, onde va optimizar la xestión de cites y va permitir atender toles llamaes, inclusive nos momentos de mayor demanda. La previsión del Sespa ye estender progresivamente esti modelu al restu de les árees sanitaries.

Va permitir xestionar cites con profesionales de medicina, enfermería, pediatría, salú bucodental, trabayu social, matrones y personal alministrativu. Tamién va facilitar la organización de programes del Sespa como les vacunaciones, los cribaxes y otres actuaciones preventives. Nestos casos, va ser el propiu axente virtual el que contacte de manera proactiva cola población de referencia pa ufiertar la cita.

El nuevu sistema ufierta a la ciudadanía dos opciones: llamar directamente al númberu de citación automática de Noa: 984 27 80 00 o contactar, como hasta agora, col so centru de salú. En casu de que se saturen les llinies del centru, la llamada va redirixise automáticamente al axente virtual pa que nenguna quede ensin rempuesta.

La comunicación col axente virtual realízase esclusivamente per teléfonu, lo que va facilitar que tola población, independientemente de la so edá o conocencies tecnolóxiques, pueda utilizalu ensin dificultaes. El funcionamientu ye simple: dempués d’escuchar la solicitú, el sistema verifica la identidá de la persona al traviés del DNI o del númberu de la tarxeta sanitaria. De siguío, Noa ufierta los horarios disponibles y permite modificar la propuesta inicial pa escoyer el día y la hora que meyor s’afaigan a les necesidaes de cada persona. Una vegada escoyida la opción deseyada, la cita queda confirmada automáticamente.

A diferencia de los asistentes convencionales, Noa incorpora una tecnoloxía innovadora que procesa l’audiu de manera natural, ensin llendase a la trescripción de voz a testu. Esto permíte-y interpretar la entonación, les emociones y les interrupciones en tiempu real, lo qu’ufierta una interacción más fluida, natural y empática. Esta capacidá supón un avance significativu frente a les centralites tradicionales, yá que garantiza una atención inmediata y segura, afayadiza a les necesidaes de la ciudadanía y a les esixencies del sistema sanitariu públicu.

1234...406Páxina 3 de 406

Síguinos n'instagram @xixonaldia

Contáctanos: redaccion@xixonaldia.com
Facebook Instagram Twitter
© 2020 - Cuatro Gotes Producciones SL