Facebook Instagram Twitter
Entamu Blogue Páxina 406

Firida una senderista francesa al sufrir una cayida en Cabrales

Por
xixonaldia
-
0
L'helicóptero medicalizáu. / SEPA
L'helicóptero medicalizáu. / SEPA

El Grupu de Rescate de Bomberos del Serviciu d’Emerxencies del Principáu d’Asturies (SEPA), a bordo del helicópteru medicalizáu, evacuó a una muyer, de nacionalidá francesa y 67 años d’edá, que resultó mancada al sufrir una cayida cuando baxaba de la zona del Urriellu pela zona de La Tenerosa, en Cabrales. La senderista, que presentaba un traumatismu craneoencefálicu y policontusiones, foi treslladada al Hospital Universitariu Central d’Asturies (HUCA). Por cuenta de más pruebes y hasta nueva valoración médica’l so pronósticu ye reserváu.

El Centru de Coordinación d’Emerxencies recibió l’avisu a les 16:14 hores. Na llamada indicóse que yera un grupu d’unes 17 persones y una muyer tenía una fienda na cabeza y taba daqué desnortiada. Atopábense percima de La Tenerosa.

Nesi momentu movilizóse al equipu de rescate, a bordu de l’aeronave medicalizada. Una vegada na zona, el pilotu realizó una operación d’apoyu de patín del helicópteru pa que pudieren baxar el médicu-rescatador y un bomberu-rescatador. N’atendiendo ya inmovilizar a la senderista, qu’al paecer sufriera una cayida, procedióse al so izáu a l’aeronave. Pa ello executóse una operación de grúa, na que s’esplegaron unos 30 metros de cable, para izar al médicu-rescatador al pie de la camiya cola senderista mancada. Con tol equipu a bordu, evacuóse a l’afectada al HUCA.

El grupu de rescate dio por rematada la intervención a la so llegada a base a les 18:52 hores. La sala del 112 del SEPA informó del sucesu a la Guardia Civil, al Serviciu d’Atención Médica Urxente (SAMU) y a los 112 de Castiella y Llión y Cantabria.

Un incendiu xamusca un coche en Proaza

Por
xixonaldia
-
0
Los bomberos dieron per escastáu l'incendiu a les 6:38 hores. / SEPA
Los bomberos dieron per escastáu l'incendiu a les 6:38 hores. / SEPA

Efectivos de Bomberos del Serviciu d’Emerxencies del Principáu d’Asturies (SEPA), con base nel parque de Proaza, encaloraron la quema declarada nun turismu na AS-229, al altor de Caranga, en Proaza. El fueu xamuscó por completu’l coche y causó daños n’otros dos vehículos.

El Centru de Coordinación d’Emerxencies recibió l’avisu a les 5:52 hores d’esta mañana. Na llamada indicóse qu’había un turismu en llames. Movilizáronse trés efectivos de Bomberos del SEPA, con base nel parque de Proaza, que se treslladaron con un vehículu Defender y el primer salida.

Una vegada nel llugar, los bomberos atacaron les llapaes que xamuscaben un coche y que yá algamaren la parte trasera d’una furgoneta. La dotación encaloró’l fueu utilizando agua y darréu espluma. Los bomberos dieron per escastada la quema a les 6:38 hores. El fueu xamuscó’l turismu y causó daños na parte trasera d’una furgoneta. La temperatura alcanzao pola quema tamién causó daños a un tercer turismu aparcáu na zona.

Los efectivos de bomberos dieron per rematada la intervención a la so llegada a base, a les 7:06 hores. La sala del 112 del SEPA informó del sucesu a la Guardia Civil y al serviciu de caltenimientu de la vía.

«Ye necesario camudar el modelu del albergue de Serín»

Por
xixonaldia
-
0
Aurelio Martín y Alejandra Mier, durante l'alcuentru d'esti domingu.
Aurelio Martín y Alejandra Mier, durante l'alcuentru d'esti domingu.

Camudar el modelu de xestión del albergue d’animales de Serín pa garantizar la protección de los animales. Ye una de les propuestes de la coalición Xixón por la izquierda, formada por Izquierda Xunida y IAS, anunciaes esti domingu nun alcuentru dedicáu a esplicar la parte del programa dedicada a esta materia nel que participaron Aurelio Martín, candidatu a l’Alcaldía de Xixón como Alejandra Mier, activista na protección de los animales y componente de la llista municipal de la coalición.

Mier afirmó que les asociaciones protectores d’animales de Xixón llegaron a la conclusión de que la única alternativa a la «tarrecible xestión de Foro» nos últimos años nesta materia ye qu’a partir de 26 de mayu haya «un cambéu de gobiernu na ciudá nel que Xixón por la Izquierda asuma la xestión d’un área encargada del desenvolvimientu de les polítiques de protección y bienestar animal nel conceyu».

El candidatu a l’Alcaldía esbilló les propuestes en materia de bienestar animal conteníes nel programa electoral, destacando la puesta en marcha d’una Oficina de Protección y Bienestar Animal que centralice tolos servicios, programes, actividaes ya iniciatives nesta materia, la ellaboración d’un Plan Integral de Protección y Bienestar Animal que defina les actuaciones a desenvolver coles mires d’algamar l’abandonu cero, la meyora de l’ameyorar la tresparencia del Serviciu de Recoyida d’Animales, publicando los datos nel Portal de Tresparencia de la web municipal o la declaración de Xixón como ciudá comprometida col Maltratu Cero escontra los animales y, arriendes d’ello, la definición de nuevos usos para la Plaza de Toros d’El Bibio.

El Círculu Xixón desciende

Por
xixonaldia
-
0
Un momentu del partíu. / Círculu Xixón
Un momentu del partíu. / Círculu Xixón

Los nervios dente l’entamu del Teslacard Círculu Xixón provocaron munchos erros en defensa y nel ataque paecía que’l balón nun quería entrar. El conxuntu menorquín, a pesar de nun xugase nada, celebró con euforia cada anotación, remató’l primer periodu con una llixera ventaya del equipu visitante 15-23.

Nel segundu cuartu, el Círculu quería amenorgar cuanto antes les diferencies nel marcador pero eso causó más imprecisiones nel ataque y nun ameyoró l’aciertu a canasta causando qu’el Menorca dir al descansu con un 13 puntos de ventaya nel marcador. (31-44)

El Teslacard Círculo Xixón tenía dos cuartos pa intentar remontar el partíu y esperar a qu’unu de los sos rivales pincharen. El conxuntu xixonés salió con otru ritmu y Saúl Blanco demostrólo anotando dos triples siguíos que fixo non yá espertar al so equipu sinón a tolos aficionaos del Palaciu de Deportes. Paecía qu’una vegada más equipu y afición volvíen a sintonizarse. Pero’l Menorca nun se punxo nerviosu y llogró una merecida victoria. 72-80

A pesar de que’l Círculu tuvo nes sos manos la remontada nos dos últimos minutos del partíu, lo cierto ye que los sos rivales ganaron los sos alcuentros. En rueda de prensa Nachu Galán reconoció que “consuela saber que la victoria nun sirviera pa nada”. Tamién quixo dexar un mensaxe sobro’l futuru del club: “Dempués de ver cómo tuvo’l pabellón nun m’atrevería a baxar la persiana”.

Abierta una nueva convocatoria del Programa d’Artes Escéniques en Residencia de Llaboral

Por
xixonaldia
-
0
Vista del escenariu del Teatru de la Llaboral.
Vista del escenariu del Teatru de la Llaboral.

Llaboral Ciudá de la Cultura abre una nueva convocatoria del Programa d’Artes Escéniques en Residencia pal períodu de xunetu a avientu de 2019. Esti programa, dirixíu a compañíes profesionales asturianes, tien como oxetivu sofitar el procesu de desenvolvimientu de los sos proyectos escénicos, apurriendo los recursos materiales y humanos del Teatru de la Llaboral pa la concepción, creación y puesta n’escena de la obra.

Cada residencia de producción va tener una duración de cuatro selmanes, disponiendo mientres 21 díes de distintes sales d’ensayu y mientres un máximu de siete díes del espaciu escénicu del Teatru de la Llaboral. La compañía va cuntar con un responsable técnicu del equipu d’esti teatru pa dar soporte y cobertoria mientres el periodu de residencia, con un máximu de 110 hores, y va disponer de 30 hores de personal auxiliar pa cargar, descargar y mover escenografíes o materiales. Amás, les ayudes económiques pa les residencies van ser d’un máximu de 4.000 euros y de un mínimu de 1.000 euros por proyectu.

Les solicitúes pal Programa d’Artes Escéniques en Residencia pueden presentase hasta’l próximu 7 de xunu, a les 13 hores. Puede consultase la documentación necesaria y descargase l’impresu de solicitú a rellenar na web de Llaboral Ciudá de la Cultura.

El programa d’Artes Escéniques en Residencia enmárcase n’actividá del Centru de Recursos Escénicos, un proyectu con see na Llaboral qu’ufierta sofitu a la creación ya investigación escénica de los profesionales del país, poniendo a disposición de los creadores recursos económicos, instalaciones y medios técnicos que faciliten la consecución de los sos proyectos artísticos. Na última convocatoria fueron escoyíos los proyectos presentaos por La Texedora de Suaños, Zig Zag Danza, Saltantes Teatru, Ana Serna, Rodrigo Cuevas y Teatru del Norte.

Los frutos secos nel embaranzu tan venceyaos a un meyor desenvolvimientu neuropsicolóxicu

Por
xixonaldia
-
0
La Sociedá Española de Nutrición Comuñal encamienta ente trés y siete raciones de frutos secos per selmana. / IS Global
La Sociedá Española de Nutrición Comuñal encamienta ente trés y siete raciones de frutos secos per selmana. / IS Global

Los frutos secos ayuden a amenorgar el riesgu d’hipertensión, d’estrés oxidativu y de diabetes y podríen tener un efectu protector contra’l cayente cognitivu propiu de la edá. A esa llista d’efectos beneficiosos sobro la salú añedir agora la evidencia xenerada por un estudiu lideráu pol Institutu de Salú Global de Barcelona (ISGlobal): una dieta rica en frutos secos mientres el primer trimestre d’embaranzu ta rellacionada con meyor desenvolvimientu neuropsicolóxicu a llargu plazu de los neños.

La investigación, publicada nel European Journal of Epidemiology, realizóse n’España con más de 2.200 pareyes madre y fíu inscrites nes cohortes d’Asturies, Guipúzcoa, Sabadell y Valencia del Proyectu INMA.

La información sobro la inxesta de frutos secos sacóse de cuestionarios sobro vezos alimentarios que les madres respondieron nel primer y últimu trimestre del embaranzu. El desenvolvimientu neuropsicolóxicu de los neños y neñes evaluóse por mediu de diversos tests estándar validaos internacionalmente y realizaos añu y mediu, 5 y 8 años dempués de la nacencia. Les resultancies amosaron que los neños pertenecientes al grupu con un mayor consumu maternu de frutos secos mientres el primer trimestre d’embaranzu llograron meyores resultaos en tolos exames practicaos pa midir función cognitiva, capacidá d’atención y memoria de trabayu.

Los beneficios notáronse nel grupu que declaró un mayor consumu de frutos secos

“Este ye’l primer estudiu que s’ocupa de los posibles beneficios de la consumu de frutos secos mientres l’embaranzu sobro’l neurodesarrollu al llargu plazu. Puesto que’l celebru esperimenta una serie de procesos complexos mientres la fase de xestación, la nutrición materna ye un factor determinante pa un neurodesarrollu fayadizu del fetu con efectos al llargu plazu”, esplica Florence Gignac, investigadora de ISGlobal y primer autora del estudiu.

“Los frutos que tuvimos en cuenta son nueces, almendres, cacagüeses, piñones y ablanes. Pensamos que los efectos beneficiosos topaos podríen debese al so altu conteníu n’ácidu fólicu y, sobremanera, n’ácidos grasos esenciales, como por casu la omega-3 o la omega-6. Estos componentes tienden a atropase nos texíos nerviosos, principalmente nes árees fronteres del celebru, qu’inflúin na memoria y nes funciones executives”, añede.

Trés raciones de 30 gramos a la selmana

Los beneficios que describe esti estudiu observáronse nel grupu que declaró un mayor consumu de frutos secos, con una media selmanal de daqué menos de trés raciones de 30 gramos caúna, una cantidá llixeramente inferior a la encamentada pola Guía de l’alimentación saludable de la Sociedá Española de Nutrición Comuñal (SENC) [PDF], que ye d’ente trés y siete raciones per selmana.

“Esto fainos pensar que si s’afixera’l consumu mediu a los encamientos los beneficios podríen ser muncho más amplios”, afirma Florence Gignac. Magar ello, envalórase que’l consumu de frutos secos n’España ye de más del doble que la media europea (4,8 g frente a 2,2 g).

Más investigación

La investigación tamién analizó la inxesta de frutos secos mientres el tercer trimestre del embaranzu, anque nesti casu nun se repararon asociaciones col desenvolvimientu neuropsicolóxicu o les asociaciones topaes fueron más débiles. “Trátase d’un primer estudiu sobro la tema, polo que convién tomar les resultancies con precuru y tratar de reproducilos nel futuru con más estudios de y ensayos controlaos aleatorizaos”, sorraya Jordi Júlvez, investigador de ISGlobal y últimu autor del estudiu.

“Nun ye la primer vegada que reparamos que los efectos d’una determinada esposición son más pronunciaos cuando se dase nuna etapa concreta del embaranzu. Anque’l nuesu estudiu nun permite esplicar les causes d’esta diferencia ente’l primer y el tercer trimestre, na lliteratura científica especúlase cola idea de que’l ritmu de desenvolvimientu nun ye igual a lo llargo de tola xestación, esistiendo periodos d’especial sensibilidá escontra la dieta materna”, detalla Júlvez.

Juan Vázquez: “Vamos procurar ganar el 26 de mayu”

Por
xixonaldia
-
0
Juan Vázquez entama la campaña del 26-M en Xixón
Juan Vázquez entama la campaña del 26-M en Xixón

El candidatu de Ciudadanos (Cs) a la presidencia d’Asturies, Juan Vázquez, dixo güei “que vamos procurar ganar, vamos faer que’l día 26 de mayu verdaderamente abocane y n’Asturies salga’l sol”. Asina lo dixo mientres l’arranque de la campaña eleutoral, al pie de los miembros de la so candidatura y la llista de Ciudadanos a l’alcaldía de Xixón, nun actu celebráu na Plaza’l Marqués.

“Arrancamos con muncha ilusión por delles razones, primero porque tenemos unes bones mires, les últimes elecciones xenerales ponenlo de manifiesto, que somos una fuerza ascendente, una fuerza en crecedera en cada elección qu’hai, con unes mires favorables qu’inda vamos intentar ameyorar”.

Ye’l cometíu de Ciudadanos nesta campaña eleutoral, dixo Vázquez, “a partir d’esti momentu, y de esta nueche, salimos a les cais, a falar cola xente, a falar cola ciudadanía, venimos faciéndolo yá, pero dende güei con más enfotu, col convencimientu de que tenemos idees, tenemos discursu, que somos necesarios n’Asturies y que vamos procurar ganar”.

Nacho Cabo nun va siguir nel banquín de La Cruz

Por
xixonaldia
-
0
Nacho Cabo. / Unión Club Ciares
Nacho Cabo. / Unión Club Ciares

Nacho Cabo nun va siguir al frente del Unión Club Ciares una temporada más. El conxuntu teyeru y el técnicu xixonés pactaron nun anovar l’alcuerdu que los vinculaba. L’equipu zarra d’esta manera la segunda etapa del entrenador nel banquín de La Cruz.

«Dende l’Unión Club Ceares queremos agradecer tanto a Nacho Cabo, como a José Luis Egüén y a Javi González, la so profesionalidá y trabayu estes dos temporaes», destaca l’equipu nuna nota de prensa. «Nesta segunda etapa llograron mientres la temporada pasada una de les meyores clasificaciones na hestoria del club. Muncha suerte nel vuesu próximu proyectu», conclúi.

La Biblioteca de L’Arena, pesllada por obres

Por
xixonaldia
-
0
Estanteríes d'una biblioteca. / Pixabay
Estanteríes d'una biblioteca. / Pixabay

La biblioteca del Centro Municipal de L’Arena va permanecer pesllada al públicu hasta finales de mayu por obres d’acondicionamientu. Pel momentu, nun se conoz con exactitú la fecha de finalización de les obres, anque l’apertura de la biblioteca y de tolos servicios que se vieron afectaos pola avería va anunciase bien lluéu. La llectura de prensa caltiénse de llunes a vienres de 9 a 13 hores na sala 1 del Centru Municipal de L’Arena.

Topáu en Xixón un mensaxe grabáu n’una botella fai 1.600 años

Por
xixonaldia
-
0
Esquierda: Vidriu alcontráu na villa romana de Veranes (Xixón). Derecha: Botella completa del mesmu tipu (Isings 103) de la colección del Muséu del Louvre. / Arveiller-Dulong y Nenna [nota 22], pág. 335, nº 948, llámina 73
Esquierda: Vidriu alcontráu na villa romana de Veranes (Xixón). Derecha: Botella completa del mesmu tipu (Isings 103) de la colección del Muséu del Louvre. / Arveiller-Dulong y Nenna [nota 22], pág. 335, nº 948, llámina 73

Un pequenu vidriu, al qu’hasta agora apenes se-y diera importancia, resultó ser el fragmentu d’una botella que contenía un mensaxe hedonista, destinada a l’aristocracia de fai 1.600 años. La pieza foi alcontrada na villa romana de Veranes (Xixón), escavada dende 1997 por Carmen Fernández Ochoa, catedrática emérita d’Arqueoloxía de la Universidá Autónoma de Madrid (UAM), y Fernando Gil Sendino, de la Fundación UAM.

El vidriu, destináu al propietariu de la villa, acaba de ser datáu y puestu en valor gracies al pormenorizáu analís realizáu pol profesor d’Arqueoloxía de la UAM, Javier Salíu Domínguez, y pola arqueóloga Belén Madariaga, miembros del Equipu Arqueolóxicu Veranes. Los autores demuestren que quien grabó la botella pretendía unviar al señor de Veranes “un deséu hedonista de preste y esfrute de la vida”. Y esta conclusión ye frutu del mensaxe escritu nel so cuerpu: “Bebe y vive munchos años, bon home”.

Quien grabó la botella pretendía unviar al señor de Veranes “un deséu hedonista de preste y esfrute de la vida”

Según el trabayu, publicáu na revista Journal of Glass Studies, hasta la fecha nun se documentara una inscripción qu’axuntara n’una sola inscripción grabada les siguientes trés espresiones de bon deséu: dos en llatín (Mvltis Annis; Homo Bone) y una tercera en griegu (Pie Zeses), que tán perfectamente constataes de manera separada en recipientes vítreos similares. Eso permitió-yos pensar que dieron col mensaxe qu’un día llevó grabáu la botella.

Bona amuesa de la escepcionalidá de la pieza, aseguren los autores, ye “la escasez de pieces d’esti tipu topaes en territoriu de l’antigua Hispania. Amás, les llaborioses técniques de trabayu convertíen estos recipientes n’oxetos únicos y n’ocasiones personalizaos, lo que los estremen d’otres producciones seriaes como los contenedores soplaos en molde, lo que fai d’ellos oxetos raros y esclusivos solu accesibles a una élite económica y social”.

Ensin impureces

El vidriu vien de una unidá estratigráfica que contien materiales fechaos nel sieglu V d. C. (dellos exemplares de terra sigillata hispánica tardida y una moneda datada nel añu 383 d. C.). Según Javier Salíu Domínguez, trátase d’un fragmentu en vidriu incoloru, de 4 cm d’altu por 3 cm d’anchu y una grosez de paré de 0,33 a 0,125 cm, ensin impureces, pero con presencia de delles pequenes burbuyes. Esti analís púdose realizar gracies al SECYR (Serviciu de Caltenimientu, Restauración y Estudios Científicos del Patrimoniu Arqueolóxicu) de la UAM.

«Correspuende a una pieza soplada al aire llibre y la cualidá que la estrema ye precisamente la inscripción grabada que percuerre horizontalmente la so superficie. Tanto’l perfil del fragmentu, como la disposición de la inscripción y les llínees que la delimitan, inducen a pensar que correspondería a la parte cimera d’una botella de cuerpu globular«, amiesta’l profesor de la UAM.

La so escepcionalidá, la riqueza del so grabáu y l’altu valor de la so producción fai inclinar la balanza hacia’l convencimientu de que se trata d’un presente realizáu al propietariu de la villa o facienda romana.

1...404405406Páxina 406 de 406

Síguinos n'instagram @xixonaldia

Contáctanos: redaccion@xixonaldia.com
Facebook Instagram Twitter
© 2020 - Cuatro Gotes Producciones SL