El Principáu dobla la ufierta de formación d’Atención Primaria

La recuperación de la docencia de medicina y enfermería nos hospitales comarcales y l'aumentu n'otres árees permite disponer de 96 puestos, 48 más qu'en 2017

0
632
El Principáu dobla la ufierta de formación d'especialistes d'Atención Primaria
El Principáu dobla la ufierta de formación d'especialistes d'Atención Primaria

La ufierta pa la formación d’especialistes en medicina y enfermería d’Atención Primaria pal próximu cursu preve’l doble de places de les esistentes va dos años. La progresiva recuperación de la docencia en Medicina Familiar y Comunitaria nes árees I (Xarrio), II (Cangas), VI (Les Arriondes) y VII (Mieres) y l’aumentu de la capacidá docente nel restu de zones va permitir disponer de 96 places de formación. 62 d’elles de medicina (MIR) y 34 d’enfermería (EIR), el doble de les que s’ufiertaron nel cursu 2017-2018.

Pa garantizar la estructura y los recursos humanos necesarios pa cubrir les necesidaes d’anguaño y futures d’esti nivel asistencial, el Serviciu de Salú del Principáu d’Asturies (Sespa) facilitó la prórroga p’aquellos profesionales que quieran siguir trabayando y ta definiendo, xunto colos profesionales, les condiciones llaborales afayadices pa los médicos d’área que garanticen la estabilidá y faciliten la completa conciliación familiar.

Amás, ta previsto revisar los cupos de pacientes por facultativu y establecer midíes pa que nun tenga al so cargu más de 1.500 cartiyes, nel casu de los centros de salú qu’amás imparten docencia. La cifra llevántase a 1.700 nes unidaes non docentes. P’adaptar la estratexa a la realidá de caúna de les árees sanitaries y de los centros de salú, los responsables de la conseyería tán realizando una ronda de visites y xuntes colos conseyos de xestión de toles zones pa conocer les llinies de meyora nes que siguir avanzando.

Estes son dalgunes de les polítiques incluyíes en La estrategia para un nuevo enfoque de la Atención Primaria, un documentu robláu va dos años ente la Conseyería de Sanidá y les sociedaes científiques de medicina y enfermería familiar y comunitaria pa garantizar la estructura y dotación de recursos humanos estable nel Sespa, nun momentu d’escasez de profesionales.

Compromisu pa cola Atención Primaria

La directora xeneral de Planificación Sanitaria, Concepción Saavedra, que presentó güei el balance d’esti documentu, destacó’l compromisu del Gobiernu d’Asturies cola Atención Primaria, que se demuestra en que “somos la segunda comunidá autónoma en dotación económica pa primaria, con un 18,56% del nuestru presupuestu global, que ye de los mayores del país en gastu sanitariu por habitante, y con una inversión de 8,7 millones en reforma y construcción de nuevos dispositivos a lo llargo d’esta llexislatura”

Nel marcu d’esta estratexa tamién se desenvolvió un nuevu decretu d’equipos d’Atención Primaria que define cómo ha ser la so organización, les competencies de los profesionales y la estructura de los centros de salú. Con él búscase definir un modelu onde se reconoza’l papel de la Medicina Familiar y Comunitarial como exa vertebradora del sistema sanitariu públicu y que garantice la continuidá asistencial a lo llargo de tola vida de la persona.

Nel usu de tecnoloxíes y sistemes d’información, la conseyería empezó yá l’actualización de la estación clínica d’atención primaria y dáu un pasu a una historia clínica única y interoperable. La nueva ferramienta busca simplificar el trabayu de los profesionales y ameyorar les funcionalidades dientro y fuera de la consulta.

Tamién s’ampliaron y normalizaron los proyectos de telemedicina y desenvuelta la consulta virtual colaborativa, presente yá en cinco árees sanitaries y en 40 zones básiques de salú, lo que facilita la continuidá asistencial. Nos próximos meses, p’ameyorar la capacidá escuédiga, va avanzar na formación na ecografía clínica y nel aumentu progresivu de la dotación de nuevos equipos ecográficos.

La busca de la excelencia afiguróse al traviés d’una serie d’estratexes de calidá y seguridá de los usuarios, ente elles, garantiza una comunicación efectiva y ensin erros profesionales por aciu la implantación nes árees sanitaries del sistema de notificación y aprendizaxe pa la seguridá del paciente; implantar los encamientos basaos na evidencia denominaes no hacer;; actualizar y consolidar el plan autonómicu d’hixene de manes, y prevenir y menguar les resistencies antimicrobianas.

Orientación comunitaria

La conseyería reforzó la orientación comunitarial, na qu’Asturies ye un referente nacional, y les actividaes relatives a la promoción y prevención de la salú individual y colectiva. Tamién trabaya pa que l’atención primaria se convierta nun espaciu de xestión de la conocencia como una ferramienta pal desenvolvimientu profesional. Con esi fin creó, en collaboración cola Universidá d’Uviéu, la Unidá docente de Medicina de Familia y Comunitaria d’Atención Primaria na Facultá de Medicina.

Esta unidá va participar na formación de profesionales en competencies tresversales y mesmes de l’Atención Primaria pa dar a conocer la especialidá na formación pregráu y se convierta nuna opción deseable pa los estudiantes.

Amás, l’Institutu d’Investigación Sanitaria del Principáu d’Asturies (ISPA) cuntó nel so desenvolvimientu cola incorporación de dos árees d’investigación con especial protagonismu d’esti nivel asistencia: atención primaria y de cuidaos de salú.