El Gobiernu asturiano dio’l vistu bonu a la firma de dos convenios col Conceyu de Xixón pa la cesión de parceles municipales p’ampliar l’Hospital Universitariu de Cabueñes y la construcción del consultoriu periféricu de Nuevo Roces. Sobre’l primeru d’estos terrenos, que cunta con una superficie de 16.520 m², va llevase a cabu la primer fase de la reforma integral del Hospital de Cabueñes, na que ta previsto invertir 52 millones, ensin cuntar los equipamientos. El próximu añu van destinase 4.208.556 euros a l’axudicación d’esti proyectu y al entamu de les obres.
Nel segundu de los terrenos, de 3.200 m², va construyise’l consultoriu periféricu de Nuevo Roces. La inversión tresañal xube a trés millones y cunta con una dotación de 51.182 euros pa la redacción del proyectu de la obra nos presupuestos del próximu añu. Esti equipamientu va ameyorar l’accesibilidá a l’asistencia sanitaria de los 5.000 vecinos.
El presupuestu de la Conseyería de Salú pa 2020 destina 10 millones a ameyorar la funcionalidad de los centros de salú y hospitales. N’atención hospitalaria, y amás de la reforma de Cabueñes, va empecipiase’l Plan Director de la Reforma Integral del Hospital Monte Naranco. Tamién se van acometer meyores nos hospitales Carmen y Severo Ochoa de Cangas, San Agustín d’Avilés, Valle del Nalón, Francisco Grande Covián de Les Arriondes y en Xarrio. A esti últimu centru van destinase 905.065 euros.
El 47% d’estes inversiones (4.761.772 euros) va destinase a atención primaria con unes primeres actuaciones nos nuevos centros de salú de Sotrondio, Vega-La Camocha y Tapia de Casariego, ente otros, según nes reformes previstes en más d’una docena d’equipamientos d’esti nivel asistencial. Dientro d’esti capítulu, inclúyese la redacción del proyectu pal centru de Nuevu Roces.
