Xixón al día

Etiqueta: Izquierda Xunida

  • Suárez Llana propón una cocina municipal p’ameyorar la calidá de los comedores escolares

    Suárez Llana propón una cocina municipal p’ameyorar la calidá de los comedores escolares

    El candidatu d’IU a l’Alcaldía de Xixón, Javier Suárez Llana, propón poner en marcha un programa piloto de cocina municipal que dexe evaluar un modelu de xestión pública directa de los comedores escolares. “El Conceyu lleva años emprestando’l serviciu de comedor escolar al traviés d’empreses concesionaries y les resultancies nun son bones. Creemos que ye’l momentu de valorar una xestión directa al traviés d’un mediu propiu como pue ser una empresa pública”.

    Suárez Llana, que s’axuntó esta tarde con FAPAS-Xixón al pie de los tamién candidatos de IU Noelia Ordieres y Alejandro Farpón, considera que la xestión directa de los comedores escolares dexaría al Conceyu “garantizar non solo una alimentación saludable o l’usu de productos de proximidá, sinón tamién que los comedores escolares s’enmarquen nos proyectos educativos de los mesmos colexos, amás de dar estabilidá nel empléu y condiciones llaborales dignes a los trabayadores y les trabayadores”.

    Pa Noelia Ordieres, “el serviciu de comedor ye un serviciu fundamental non solo como ferramienta de conciliación y de equidad, si non como allongamientu del sistema educativu”. La candidata amuesa la so esmolición por datos como los que tresllada la presidenta de FAPAS sobre l’espilfarru de comida y lo que s’escuenden: si hai neñes y neños que nun comen hai qu’atopar los motivos”.

    Por ello, IU plantega la necesidá d’un cambéu de modelu al traviés d’una esperiencia piloto que dexe al curtiu plazu evaluar les ventayes de la xestión directa atendiendo al costu del serviciu, la calidá y la flexibilidá, y al mediu plazu estudie xuna xestión integral del serviciu de cocina y comedor en tolos colexos públicos de Xixón.

    “Izquierda Xunida nun arrenuncia a la xestión directa de los servicios públicos que caracterizó a la nuesa ciudá y estremar frente a otres de la nuesa redolada”, afirma’l candidatu a l’Alcaldía, pa quien “lo que comen les neñes y los neños nos colexos públicos nun puede tar condicionao a qu’haya empreses privaes que cumplan o non un contratu públicu. Eso puede sirvir pa una obra nuna cai, pero non pa la comida d’un neñu nun colexu”.

    Amás, en paralelu a la puesta en marcha del programa piloto de cocina municipal, Izquierda Xunida plantega la necesidá d’introducir cambeos na xestión del contratu de los comedores escolares p’ameyorar la calidá del serviciu. Nesti sentíu, la coalición propón clauses nos pliegos de llicitación qu’obliguen a les empreses axudicataries a utilizar productos de proximidá procedentes de l’actividá agropecuaria de Xixón y de conceyos estremeros y establecer controles de calidá qu’evalúen non solo los valores nutricionales sinón el cocináu y el sabor de les comíes.

  • Izquierda Xunida de Xixón presenta la so candidatura en Nuevu Roces

    Izquierda Xunida de Xixón presenta la so candidatura en Nuevu Roces

    El candidatu d’IX a l’Alcaldía de Xixón, Javier Suárez Llana, presentó nel barriu de Nuevu Roces la candidatura municipal resultante del procesu organizativo impulsáu por IX Asturies de cara a les elecciones municipal y autonómicu de mayu.

    Trátase de «una candidatura qu’apuesta de manera decidida y consciente pola incorporación d’una nueva xeneración a la política local, xuna candidatura abierta a la ciudá y a los sos barrios» destacó Suárez Llana. La candidatura ta configurada por perfiles reconocíos pola so trayectoria ya implicación nel ámbitu social, de la educación pública, de la solidaridá internacional y del movimientu xuvenil – ente los so primeres puestos la media d’edá nun supera los trenta y tres años de media – y con una importante presencia del mundu del trabayu y de cuadros de Comisiones Obreres.

    Pa Suárez Llana, la candidatura municipal d’IX Xixón ye «una candidatura de relevu que busca dar continuidá a un modelu de ciudá impulsáu primero pol PCE y dempués por Izquierda Xunida dende los primeros conceyos democráticos hasta güei». Nesi sentíu, el candidatu reivindicó «que’l Xixón de güei nun s’entendería ensin el trabayu de conceyales como Víctor del Busto, que promovio’l Patronatu Deportivu Municipal, de conceyales como Carmen Álvarez, impulsora de la Empresa Municipal de Vivienda, de conceyales como Jesús Montes Estrada “Churruca”, ensin el cual güei Xixón nun tendría un Xardín Botánicu Atlánticu – qu’esti próximu mes d’abril va cumplir venti años-, o de conceyales como Carmen Rúa, ensin la cual nun tendríamos güei la Rede d’Escueles d’Educación Infantil, como esta de Nuevu Raspies».

    Con esta candidatura, señaló Suárez Llana, “anovamos el compromisu d’Izquierda Xunida con Xixón y facémoslo simbólicamente nel barriu de Nuevu Roces, al qu’IX contribuyó a ‛amoblar’: equí construyimos viviendes públiques; engarramos por que tuviera una escuela d’educación infantil, trabayamos mientres esti mandatu p’ameyorar el modelu de movilidá del barriu, y consiguimos que’l Gobiernu d’Asturies, de la FSA, pasara de palabres a los fechos col consultoriu médicu o col colexu públicu que se va a construyir nesta mesma parcela. Esi ye’l compromisu que tien la candidatura, exemplificada nel barriu de Nuevu Roces, pero que ye col conxuntu de Xixón».

    Ye una candidatura que, en palabres del candidatu municipal d’IX, «promueve un relevu xeneracional pero tamién de continuidá col modelu de ciudá que defende Izquierda Xunida», afondáu nos últimos años dende l’acción de gobiernu. «El nuesu compromisu ye col Xixón verde y sostenible, col Xixón de la igualdá y col Xixón de los servicios públicos».

    Dende güei, IX Xixón va empezar a trabayar coles mires de sumar al conxuntu de la esquierda a perfiles independientes amestaos al ámbitu social de la ciudá pero non articulaos en proyectos de partíu, de trayectoria reconocida socialmente pol so compromisu profesional y asociativu, pero al que tamién quier sumar a otres fuerces polítiques de la esquierda local y autonómico pa configurar una candidatura al Conceyu de Xixón/Xixón, amplia y unitaria, que contribuya a dar continuidá a un gobiernu progresista na ciudá.

  • Izquierda Xunida y Más Asturies destaquen la so sintonía nuna xunta na que se comprometen a trabayar “a comuña” en Xixón

    Izquierda Xunida y Más Asturies destaquen la so sintonía nuna xunta na que se comprometen a trabayar “a comuña” en Xixón

    Izquierda Xunida de Xixón y Más Asturies caltuvieron esta tarde un alcuentru nel qu’intercambiaron analís sobre’l diagnósticu de la situación de Xixón y les estratexes polítiques de cara al próximu procesu electoral. Trátase de la primer d’una serie de xuntes qu’IX quier caltener a lo llargo de les próximes selmanes con distintes organizaciones de la esquierda político y social de la ciudá pa esquizar les posibilidaes d’un alcuerdu pa configurar una alternativa electoral.

    La coordinadora local d’IX, Ana Castaño, valoró de manera bien positiva la xunta y aseguró que “empecipiar esta primer ronda de contactos con Más Asturies nun ye casualidá. Compartimos non solo cultura política, sinón xuna especial coincidencia a la d’asitiar la igualdá, el medio ambiente, la participación y el bienestar social como una parte fundamental de les nueses axendes polítiques”.

    Castaño destacó amás una “bona sintonía” a la d’aterrizar estes prioridaes en Xixón. “Tenemos un diagnósticu compartíu de la ciudá, del balance de facer esti mandatu y tamién de la fueya de ruta que tendría de siguir Xixón nel futuru”.

    Pela so parte, Xabel Vegas, miembru del Grupu Motor de más Asturies, destacó que l’alcuentru d’esta tarde sirvió pa “estrechar entá más los llazos con Izquierda Xunida, con quien esiste una amplia sintonía nel diagnósticu de los principales problemes de Xixón y tamién el tratamientu necesariu para encetalos”. Les polítiques progresistes, verdes, feministes y sociales son dalgunes de les propuestes compartíes pelos dos espacios políticos.

    Vegas quixo amás reconocer l’acción de gobiernu d’IX mientres esti mandatu. “Asuntos capitales pa Más Asturies como la movilidá o’l medio ambiente son árees nes que reconocemos l’enorme trabayu que realizó nos últimos años Izquierda Xunida en Xixón”.

    Dambes organizaciones comprometiéronse a trabayar “a comuña” y con arrogancia mientres los próximos meses coles mires de compartir un proyectu de ciudá que siga ameyorando la calidá de vida de las xixoneses y los xixoneses.

  • Iniciativa pol Asturianu pide a Izquierda Xunida un esfuerciu pa nun dexar pasar esta oportunidá hestórica pa la oficialidá

    Iniciativa pol Asturianu pide a Izquierda Xunida un esfuerciu pa nun dexar pasar esta oportunidá hestórica pa la oficialidá

    El presidente d’Iniciativa pol Asturianu, Iván Llera, y el vocal de rellaciones institucionales de la organización, Inaciu Galán, aconceyaron esti miércoles con representantes del grupu parllamentariu d’Izquierda Xunida. Dientro del alcuentru, los representantes de la organización de reivindicación llingüística treslladaron a la formación qu’han de ser conscientes de la oportunidá hestórica pa la oficialidá que tenemos ente les manes. Alcontrámonos con una mayoría aritmética pa sacar alantre la reforma estatutaria cola oficialidá y nun podemos desaprovechala, porque nun sabemos si volverá a repitise.

    Anque podemos comprender qu’IX nun tea cómoda teniendo de participar de la toma de decisiones polítiques alloñaes de los sos principios ideolóxicos, pidímos-yos un esfuerciu de xenerosidá y nun dexar pasar esta oportunidá hestórica. La sociedá asturiana nun diba entendelo.  

    IX siempres amosó capacidá de negociar y llegar a alcuerdos nel pasáu, como cuando’l so antecesor políticu aceptó la monarquía pa consiguir una constitución democráctica y más recién, cola so entrada nel Gobiernu d’España, a pesar de les diferencies col partíu mayoritariu, buscando con pragmatismu avances nos sos principios programáticos. Pidimos agora lo mesmo, aplicar esa mesma voluntá d’alcuerdu pa consiguir la oficialidá, un puntu qu’Izquierda Xunida tien ente les sos reivindicaciones hestóriques, y qu’Iniciativa pol Asturianu agradez que llevara siempres por bandera. 

    Les condiciones de la negociación nun son les idónees, pues ta falándose de coses que queden fuera del marcu del Estatutu, pero esta ye la realidá cola que tenemos que trabayar. Ye’l momentu del alcuentru, el diálogu y el pactu, ya Izquierda Xunida nun pue quedar fuera d’él.

    Va una selmana reclamábemos xenerosidá a Foro y güei facemos esti llamáu a Izquierda Xunida pa llograr un alcuerdu sobre la oficialidá. Sabemos que ye un alderique complicáu y nel que toles fuercies tienen que poner del so llau. Esto inclúi tamién a la FSA, el partíu que tien la mayoría parllamentaria, al que-y pidimos un mayor esfuerciu pa xenerar consensu y liderar la reforma estatutaria. El Gobiernu y el presidente Barbón tienen que ser clave en llograr esi alcuerdu de cuatro partíos y 27 diputaos pa cumplir col mandatu constitucional qu’establez la oficialidá pa les llingües propies nel so artículu 3.2. Los demás partíos tán faciendo esfuercios y renunciando a parte de les sos reivindicaciones, y la FSA ha tar al altor tamién y buscar toles víes posibles, incluyendo la posibilidá d’un alcuerdu asimétricu pa la fiscalidá y l’Estatutu.

     

  • Izquierda Xunida sofita la declaración del Estáu d’Alarma ente la evolución de contaxos y l’aumentu d’ingresos en Cabueñes y Huca

    Izquierda Xunida sofita la declaración del Estáu d’Alarma ente la evolución de contaxos y l’aumentu d’ingresos en Cabueñes y Huca

    Ángela Vallina refuga’l dilema economía-salú al entender que la primera ye imposible ensin la segunda y Ovidio Zapico reclama midíes d’acompañamientu pa acompañar a los sectores más perxudicaos.

     

    La portavoz de Izquierda Xunida Asturies na Xunta Xeneral del Principáu, amosó güei el so respaldu al anunciu de nuevu Estáu d’Alarma realizáu pol Gobiernu del estáu. Al so xuiciu, tratase d’una midida «necesaria» si se tien en cuenta la evolución y cifres de los últimos díes y ello a pesar de les restricciones yá puestes en marcha col regresu a la Fase 2. «Tamos viendo cómo Cabueñes entama a saturase y tamién cómo empieza a ponese nuna situación de ciertu riesgu nel HUCA. Poro, yá hai que montar hospitales de campaña. La salú ta primero de too».

     

    Pa Vallina, esta decisión inscríbese nel panorama xeneral européu con un repique xeneralizáu. «Lo primero, la salú y la protección pa la nuesa xente. Como mui bien dixo la señora Merkel (n’alusión a la canciller alemana), ye falsu’l dilema economía-salú. Si nun hai salú nun hai economía. Y una fola con un zarru como se fixo la otra vegada, posiblemente, la economía nun la aguantaría. Polo tanto, tomemos midíes antes».

     

    Pa la formación, l’Estáu d’Alarma ye una una ferramienta imprescindible pa frenar la espansión de la pandemia y salvar el mayor númberu de vides posibles, nun modelu de toma de decisiones que, amás, tien de garantizar nun dexar a naide tras. Asina lo espresó tamién el coordinador xeneral de IX Asturies, Ovidio Zapico pa quien, al traviés d’un tuit, «llibertá y seguridá colectiva» tienen d’asitiase “percima d’egoísmos personales», daqué que puede garantizase meyor col Estáu d’Alarma. En cualesquier casu, añadió’l dirixente d’IX, «tienen d’implementase midíes p’acompañar a los sectores económicos más perxudicaos pa que naide quédese per detrás nesta crisis».

  • Los partíos ceden 54.666 euros de les sos asignaciones a programes sociales

    Los partíos ceden 54.666 euros de les sos asignaciones a programes sociales

    Pocos son los asuntos que davezu algamen l’alcuerdu unánime de tolos grupos políticos con representación na Casa Conceyu. Sicasí, les siete formaciones presentes n’actual corporación pactaron ceder dos mensualidaes de les sos asignaciones a programas sociales.  Esto ye, 54.666 euros. Trátase d’una partida que los grupos reciben pa desendolcar la so actividá como representantes de los ciudadanos. L’alcuerdu algamóse por unanimidá de los voceros municipales na comisión permanente celebrada’l vienres pela mañana.

    Nel conceyu, tamién se punxo fecha al viniente Plenu ordinariu. Va tener llugar el miércoles 27 de mayu. N’él, presentaránse les primeres modificaciones presupuestaries destinaes a programes venceyaos a la xestión de la crisis de la COVID-19. Otramanera, alcordose convocar el Conseyu Social de la ciudá pal viniente día 25. Nesti conceyu, informaráse de les midíes previstes pa recuperar l’actividá económica y l’empléu. Los voceros municipales tamién pactaron la torna de les comisiones municipales, que van celebrase de manera presencial nel Salón de Plenos.

  • PSOE y XP roblen un protocolu pal siguimientu del alcuerdu de coalición

    PSOE y XP roblen un protocolu pal siguimientu del alcuerdu de coalición

    El PSOE y Xuníes Podemos (XP) roblaron esti miércoles un protocolu de coordinación y siguimientu del alcuerdu de gobiernu de coalición algamáu ente dambes formaciones. El documentu suscritu pol Grupu Parlamentariu Socialista y pol Grupu Confederal de Xuníes Podemos inclúi unos principios básicos de funcionamientu, amás de la creación d’una comisión permanente de siguimientu que revise la so marcha y el cumplimientu los oxetivos que figuren nel pactu. Tamién recueye un compromisu de coordinación y unidá nel ámbitu parlamentariu, según una estratexa de comunicación conxunta y un procedimientu pal resolvimientu de posibles discrepancies.

  • La Comisión de Facienda da lluz verde al ‘IBI pa ricos’

    La Comisión de Facienda da lluz verde al ‘IBI pa ricos’

    La Comisión de Facienda dio lluz verde al proyectu d’ordenances fiscales pal próximu añu 2020, colos votos a favor de PSOE, Podemos-Equo ya Izquierda Xunida. La conceyala del ramu, Marina Pineda, comunicó ayeri que l’equipu de Gobiernu algamó un alcuerdu con Podemos-Equo qu’inclúi «pequenos cambeos del proyectu, pero nun alteria la esencia del mesmu».

    Nesti sentíu caltien el tipu de IBI diferenciáu del 0’79, según la medría del tipu para Bienes con Característiques Especiales y les tarifes propuestes para EMA, EMULSA, EMTUSA y el Patronatu Deportivu Municipal, por casu. El gobiernu municipal aceptó les enmiendes presentaes por Podemos-Equo pa caltener la bonificación pa vehículos históricos y de más de 25 años; caltener la tarifa de ORA pa residentes; y acometer axustes na organización del serviciu d’ayuda a casa. Tampoco se va xubir la tasa por tenencia d’animales de races potencialmente peligroses.

    El gobiernu municipal algamó un compromisu con Podemos-Equo para encetar l’alderique presupuestariu «ensin llínees encarnaes nin chantaxes», esplicó. Pineda tamién señaló que, sicasí, la negociación presupuestaria ta abierta al restu de grupos políticos municipales.

  • Barbón pide a Podemos y Cs que «desbloquien» la investidura de Sánchez

    Barbón pide a Podemos y Cs que «desbloquien» la investidura de Sánchez

    El secretariu xeneral de la FSA-PSOE y presidente del Gobiernu asturianu, Adrián Barbón, participó esti domingu na tradicional bonitada socialista de Tapia. Ellí, refirióse a la situación de la contorna del Noroccidente, una zona a la que «los socialistes sentímonos especialmente venceyaos. Sentímonos identificaos col territoriu. Sabemos que ye una de les contornes nes que se sigue más de cerca la necesidá d’unos servicios básicos de calidá, que nós enmarcamos dientro del retu demográficu».

    Asina, pidió a los partíos de la oposición que vean más allá del tacticismo, «de xugar a ver quién propón qué». «Sentémonos a analizar les cuestiones que puedan plantegase, ensin prexuicios», dixo. Barbón recordó los pasos empecipiaos pol Gobiernu asturianu pa buscar soluciones al problema demográficu, como la creación d’una comisión específica. Nel casu concretu del Noroccidente, Barbón recordó’l so apueste por que la zona «acueya actividá industrial, non solo amestada al sector ganaderu sinón tamién con otros proyectos como la necesaria ampliación d’ENCE».

    El secretariu xeneral de la FSA aluyó tamién a les consecuencies de la falta de Gobiernu n’España. Barbón cuantificó en 200 millones d’euros los fondos qu’Asturies dexa de poder invertir al traviés del nuevu financiamientu autonómicu: «Pido a Xuníes Podemos y Ciudadanos que desbloquien la investidura de Sánchez pa poder encetar la cuestión del despoblamientu y la falta de financiación».

  • La militancia d’IX sofita’l preacuerdo de Gobiernu col PSOE

    La militancia d’IX sofita’l preacuerdo de Gobiernu col PSOE

    Lluz verde al alcuerdu de gobiernu de PSOE ya IX. La militancia de la coalición dio’l vistu bonu a la entrada d’Aurelio Martín nel equipu de Gobiernu como conceyal de Movilidá y Mediu Ambiente. La consulta celebrada esti domingu tuvo marcada pola baxa participacion. Un total de 180 persones exercieron el so derechu a votu d’un total de 785 llamaos a participar, el 22% del total. La resultancia del escrutiniu reflexó qu’un 92,22% de votos a favor del la propuesta, el 6,66% votó en contra, y el 1,11% votaron pola astención.

    Faustino Sabio, coordinador local, valoró la resultancia de la consulta positivamente: «El conxuntu d’IX Xixón manifestóse por abrir un nuevu ciclu políticu d’esquierdes na ciudá y empobinala escontra’l desenvolvimientu de polítiques centraes n’ameyorar la vida del conxuntu de la ciudadanía, dar respuesta a los retos económicos, ecolóxicos y sociales que tienen güei les nueses sociedaes, y pallo consideraron indispensable la participación d’IX nel Gobiernu de Xixón».