Puño Dragón van ser los protagonistes del Conciertu Cimbla Mahou” de VESU esti próximu sábadu 31 de mayu en Kuivi Almacenes. La banda asturiana de rock alternativu, integrada por Rafa Tarsicio, Germán Mingote, Manu Huertas y Erik Iglesias, va xubise asina al escenariu d’esta Fiesta de presentación del festival, aperitivu de lo que podrá vivise en xunu na sesta edición d’esta cita yá imprescindible.
El particular imaxinariu musical de Puño Dragón nútrese del rock tradicional, pero añede sonoridaes que nos lleven a un estilu más propiu del presente; una conxunción que los llevó a denominase a sí mesmos “vieyos pero modernos” dientro de la escena underground actual.
A finales de 2022 llanzaron el so discu homónimu, Puño Dragón, compuestu por 10 temes cargaes de fuerza ya influencies clásiques y, al empar, muncha personalidá nel so soníu. Con esti primer álbum, el grupu dio a conocer el so característicu enfoque musical, directu, ácidu y valiente, marcando asina l’espunte inicial de la so carrera.
Agora, xiren col so segundu discu: Juegos Violentos, col que dan un pasu más nel so provocador soníu. Compuestu, producíu, entemecíu y masterizáu por ellos cola collaboración de Víctor Fisherman na producción y guitarres, esti últimu trabayu ye una amuesa más del soníu enérxicu y potente que caracteriza a los asturianos. Una vegada más consiguieron crear una atmósfera intensa llena de ritmos contundentes, con lletres bien cuidaes que davezu aborden temes fondes y emocionales, non ensin cierta ironía, daqué que-yos otorgó la etiqueta de “rock honestu”.
