Reparáu’l Camín de Los Enebros de Somió que da accesu al Autocine

El presupuestu d'execución material xube a los 23.323 euros

0
650
Camín de los Enebros

El Conceyu de Xixón reparó’l firme del camín de los Enebros asitiáu na parroquia de Somió. Trátase d’un fondu de sacu de 7,16 metros d’anchu mediu que da serviciu a siete parceles, ente les que s’atopa la del Autocine. Presentaba frayatos, baches y parte del trazáu taba parcheáu con distintos materiales.

La obra del camín, que s’empecipió en payares y remató’l 20 d’avientu, realizóse con personal procedente de los planes d’empléu. En total, pavimentáronse 142 metros de llargor y 966,75 m2 de superficie utilizando formigón y base d’escoria granosa según pequenes obres de fábrica necesaries pa dotar al camín d’una rede de drenaxe d’agües superficiales. El presupuestu d’execución material xube a los 23.323 euros.

A la recepción final del proyectu asistió’l conceyal de Distritu Rural, Ramón Tuero, la presidenta de l’Asociación de Vecinos de Somió, Soledá La Fuente, brigaes rurales del Conceyu y el personal de la obra. Tuero señaló que se trata d’un claru exemplu del apueste del gobiernu por reparar los caminos de les zones rurales del conceyu que s’atopen en mala traza.