Rescaten ilesu a un mozu que se despeñó na Ruta’l Cares

L'afectáu, de 23 años, taba enriscáu y prácticamente colgando d'un árbol nuna paré de gran verticalidá

0
96

L’helicópteru medicalizáu de Bomberos d’Asturies rescató a un home que s’espeñó unos 30 metros cuando realizaba la ruta del Cares. Los fechos asocedieron na zona de la canal de Sabugo, en Cabrales.  L’home, un varón de 23 años, resultó ilesu. Foi rescatáu, en siendo alcontráu, por aciu una complicada operación de grúa dáu’l llugar onde s’atopaba.

El Centru de Coordinación d’Emerxencies del 112 Asturies recibió dellos avisos, el primeru a les 15.02 hores. Nes llamaes indicaben que taben escuchando a una persona pidir ayuda, pero nun llograben alcontralo. Nun la víen. Unos dicíen que les voces procedíen percima de la sienda y otres persones allugar frente a la canal de Culiembro, al otru llau del ríu n’una zona arbolada, pola canal que xube a Amuesa.

La Sala 112 del SEPA movilizó l’helicópteru medicalizáu de Bomberos d’Asturies y al Grupu de Rescate del que forma parte un médicu-rescatador. En llegando a la zona, l’helicópteru realiza dellos vuelos para intentar alcontrar al afectáu, ensin ésitu. Ún de los bomberos-rescatadores amiya y entrevístase con numberoses persones que tán realizando la ruta. Una d’elles, con un prismáticu, cree qu’alcontró al afectáu.

A les 17.30 hores informen qu’alcontraron al afectáu. Taba enriscáu y prácticamente colgando d’un árbol nuna paré de gran verticalidá. Deciden evacualu cola grúa del helicópteru. La operación resulta bien complexa non yá porque’l senderista s’atopa en metá de la paré y metíu ente les cañes d’un árbol sinón porque hai vientu desfavorable de cola. N’aportando unu de los bomberos-rescatadores hasta él, asítia-y el triángulu de rescate y evacualu a l’aeronave con una grúa na que s’esplegaron 30 metros de cable.

L’afectáu taba ilesu y namás presentaba dellos rascuños polo que lu treslladaron hasta Poncebos, localidá na qu’aparcara’l so vehículu.