Según los datos recoyíos pol Institutu d’Investigación Sanitaria del Principáu (ISPA) en collaboración de los centros de salú, Roces y Montevil son les zones con mayor tasa d’incidencia de coronavirus. Los datos acumulaos de los últimos 14 díes hasta’l pasáu martes 17 de payares, esta zona básica de salú de l’área de salú V Xixón ye la más castigada en toa Asturies con 1.466 casos sobre 100.000 habitantes.

Magar de consiguir amenorgar esta cifra, pasando de 1.819 el día 11 de payares a 1.466, nun dexa de ser un datu esmolecedor pa Sanidá. Quepe recordar que pa la ellaboración d’esti mapa d’incidencia Covid, tómense casos confirmaos, sospechosos y probables.

En Xixón, les demás zones de salú amenorgaron la so tasa d’incidencia al igual que n’Avilés. Sicasí, n’Uviéu presenta un enclín a l’alza en nueve de les sos once zones básiques de salú.

Laviada (833 casos por 100.000 habitantes) y Perchera (903/100.000) son les zones que menor tasa d’incidencia tien. Nel otru llau asítiense la mentada zona de Roces y Montevil, -y siguen-y Coto-Ceares-Viesques con 1.454/100.000 y El Llanu con 1.389/100.000.

Resulta difícil atopar unes razones de pesu pa la diferencia d’incidencies según les zones y árees pero lo espertos apunten a motivos demográficos y socioeconómicos como la edá, el sexu, el promediu mediu de los habitantes d’una vivienda, el tamañu de la mesma o’l trabayu que desempeñen.