Les sableres de San Llorienzo, Poniente y L’Arbeyal recibieron esti viernes la Q de calidá. El director xeneral de Comerciu y Turismu, Julio González Zapico, participó en Madrid na entrega d’estos distintivos qu’otorga l’Institutu para la Calidá Turística Española (ICTE). El Principáu vuelve cuntar anguaño con seis banderes Q de calidá.
Los arenales de Toró y Palombina (Llanes), Santa Marina (Ribesella) y les de San Llorienzo, Poniente y L’Arbeyal (Xixón) revalidaron anguaño les sos banderes. Con esti reconocimientu, garantízase’l cumplimientu de los estándares de calidá d’una norma internacional consensuada por más de 90 países.
Zapico sorrayó que la mariña asturiana ye la meyor caltenida d’España y destacó la so contribución al turismu. «Non yá les sableres, sinón les villes marineres, la gastronomía y una redolada privilexada configuren unu de los nuesos productos turísticos más potentes», señaló. Amás, recordó que nos dos últimes selmanes la mariña asturiana recibió 13 banderes azules y el Premiu Condé Nast Traveler al meyor destín nacional a la mariña occidental.
