Santurio dará la batalla pa facese col Premiu al Pueblu Exemplar d’Asturies 2020. La de la parroquia xixonesa ye una de les venticinco candidatures fueron presentaes al galardón na so trixésima primer edición. El plazu de presentación de propuestes remató’l pasáu xueves. El xuráu encargáu de la concesión del Premiu axuntará’l día 1 de setiembre. La Fundación Princesa d’Asturies convoca esti galardón dende 1990. Ta dotáu con venticinco mil euros.
El Premiu al Pueblu Exemplar d’Asturies ye una de les iniciatives de la Fundación de meyor acoyida n’Asturies. El galardón reconoz «al pueblu, aldega, núcleu de población, espaciu paisaxísticu o grupu humanu d’Asturies que destacara de manera notable na defensa y caltenimientu de la so redolada natural, ambiental, del so patrimoniu históricu, cultural o artísticu, n’iniciatives d’impulsu económicu y social o na realización d’obres comunales o otres manifestaciones de solidaridad sobresalientes».
El reglamentu del galardón establez que van poder presentar candidatures al Premiu les instituciones, centros culturales, asociaciones de vecinos, entidaes, empreses, según los ciudadanos que lu deseyen. Los Reis alleguense a la localidá premiada pa faer entrega del galardón un día dempués de la ceremonia d’entrega de los Premios Princesa nel teatru Campoamor d’Uviéu.
Les candidatures
- Ríu Sella
- Parroquia de Santurio (Xixón)
- Asociación ‘Amigos de Cudillero’
- Cofradía de Pescadores de Santa Ana (Llanes)
- Comunidad vecinal de San Cucufate de Llanera
- Llugones (Siero)
- Xentes de la villa de Salas
- Valle del Samuño (Llangréu)
- Santa María del Puerto (Somiedu)
- Valdesoto (Siero)
- Arroes (Villaviciosa)
- Pezós
- Llaviana
- Suarías (El Valle Baxu de Peñamellera)
- Somao (Pravia)
- Pimiango (Ribadedeva)
- Ruta de senderismu Brañes Vaqueires del conceyu de Cuideiru
- Comunidá vecinal de Casu
- Banduxu (Proaza)
- Asociación vecinal Ríu Fontoria (Piloña)
- Coviella (Cangues d’Onís)
- Coya (Piloña)
- Fitoria y su Sociedá de Festexos San Antonio de Fitoria y Villamaxil (Uviéu)
- La Puela (Ayande)
- Movimientu asociativu y comunidá vecinal de Riosa
