Xixón al día

Categoría: Economía

  • El Principáu empecipia mañana la segunda fase del programa de bonos de descuentu pal pequeñu comerciu

    El Principáu empecipia mañana la segunda fase del programa de bonos de descuentu pal pequeñu comerciu

    El Gobiernu d’Asturies entama mañana la segunda fase del programa de bonos de descuentu pal pequeñu comerciu Bono Comerciu Asturies, al que destina 1.285.190 euros.

    Les persones interesaes van poder descargar los bonos, a partir de mañana y hasta el 15 d’ochobre –si nun s’escosen enantes- por aciu la so inscripción nel portal: https://bonoscomercioasturias.com. El plazu pa trocalos tamién empieza mañana y va rematar el 30 de payares.

    Al tratase de la segunda fase del programa, los 1.200 comercios xuníos son los mesmos que participaron nos meses de mayu y xunu.

    Pa les persones interesaes en consiguir los bonos, el programa va funcionar de la mesma que na primer fase. El sistema de descuentos articúlase al traviés de la plataforma web, na que los usuarios, una vegada rexistraos, van poder descargase los bonos. Estos van tener formatu dixital, van cuntar con un códigu QR y van poder utilizase por aciu una aplicación que dexa pagos dixitales.

    Cada persona va poder descargase, a lo más, 5 bonos de 10 euros, y va poder utilizar unu por cada 30 euros de compra. El Gobiernu d’Asturies va poner en circulación un total de 125.819 cupones, que son los que nun se consumieron nos meses de mayu y xunu.

    Al respective de la participación, aquellos usuarios que se fixeron colos bonos en primavera, namás van poder disponer de los que nun trocaren nes sos compres, pa lo que tendrán de volver a solicitalos. Si yá consumieron toos, nun van poder participar nesta segunda fase. D’esta forma, quien gastara dos cupones mientres la primer fase va disponer agora d’otros trés, ente que quien nun trocara nengún va poder emplegar los cinco nuevos bonos.

    La directora xeneral d’Empresa y Comerciu, Arantxa González Montell, confía en que la estensión del programa Bono Comercio Asturies tenga’l mesmu ésitu que la primer convocatoria y contribuya, una vegada más, a impulsar les ventes nos pequeños establecimientos.

    La iniciativa, promovida pola Conseyería de Ciencia, Industria y Empléu, sofita les ventes del comerciu minorista en periodos de baxa demanda y contribúi a estimular la economía. Na so primer fase, trocáronse 171.481 bonos por importe de 1,71 millones, que se traduxeron nun volume de ventes de 6,81 millones nesti tipu d’establecimientos.

     

  • Valnalón distingue una propuesta de güertu ecolóxicu col premiu al Meyor Proyectu Empresarial

    Valnalón distingue una propuesta de güertu ecolóxicu col premiu al Meyor Proyectu Empresarial

    Un proyectu pa desenvolver un güertu ecolóxicu foi’l galardonáu col Premiu a la Meyor Propuesta Empresarial del semilleru de proyectos de Valnalón. El conseyeru de Ciencia, Industria y Empléu, Borja Sánchez, apurrió les distinciones d’esta XXIII edición, na que destacó’l papel crucial del emprendimientu nel crecimientu del texíu económicu.

    Nel certame participaron 152 proyectos, de los que nueve llegaron a la final. Los escoyíos centráronse en sectores como agricultura, moda y complementos, turismu alternativu, arte, repostería y eventos audiovisuales.

    El premiu al Meyor Proyectu Empresarial recayó en Manuel López, por Ecohuerta Vital, una iniciativa destacada pol xuráu pola so viabilidá económica, el so raigañu col ámbitu rural y el compromisu col territoriu. El galardón al Afitamientu Empresarial, qu’estrema a les empreses nel crecimientu de los sos proyectos, foi pa Yolanda Basante, por Novalreeves, una iniciativa de diseñu de moda destacáu pola so creatividá y capacidá pa reorientar la so actividá nuevos nichos de mercáu.

    La reconocencia a la Empresa Comprometida con Valnalón foi pa Bango Racing Cars, mientres que’l de la Meyor Presentación de Proyectu Empresarial concedióse a The Paper Conservation Lab, un taller de restauración y caltenimientu d’obres d’arte en papel desenvueltu por Alicia García.

  • Activistes pola paz bloquien la entrada a la Fábrica d’Armas de Trubia col mensaxe “El Xenocidiu empieza equí”

    Activistes pola paz bloquien la entrada a la Fábrica d’Armas de Trubia col mensaxe “El Xenocidiu empieza equí”

    L’acción empezó a les 10 de la mañana y enllargóse mientres una hora y media, mientres la cual la entrada y salida de vehículos tuvo bloquiada afectando a delles decenes de camiones.

    Los participantes del bloquéu señalaron de que Elbit Systems, la principal suministradora del exércitu israelín, ye provisora de componentes a la Fábrica d’Armas y que «l’esterminiu en cursu fixo crecer obscenamente los sos beneficios». «Imaxinemos lo que supondría un embargu, un boicó efectivu con sustentu de los Tribunales Internacionales qu’investiguen el xenocidiu» preguntaben los activistes.

  • El gobiernu asturianu va movilizar más de 30 millones pa paliar l’efectu de los aranceles de Trump y asegurar l’empleéu nes empreses

    El gobiernu asturianu va movilizar más de 30 millones pa paliar l’efectu de los aranceles de Trump y asegurar l’empleéu nes empreses

    El Gobiernu d’Asturies va movilizar más de 30 millones pa sofitar a les empreses qu’esporten de manera habitual a Estaos Xuníos, col fin de desaniciar los efectos de los aranceles impuestos por Donald Trump y asegurar l’empléu. El presidente, Adrián Barbón, celebró esta mañana un alcuentru cola patronal y los sindicatos pa presenta-yos les propuestes y afrontar de manera conxunta la repercusión de la guerra comercial sobre les compañíes asturianes.

    Barbón realizó un llamamientu a la unidá pa facer frente a esta situación: “Actuemos xuníos, dexemos de llau’l partidismu y pensemos solo n’Asturies y nos intereses de los asturianos y asturianes porque tán en xuegos munchos empleos”. Según un estudiu de Regiolab, esta política arancelaria va repercutir nel 2% de la economía del Principáu, lo que supón “poner en riesgu 7.500 empleos pola decisión del presidente d’Estaos Xuníos”, alvirtió.

    En 2024, el númberu d’empreses esportadores a Estaos Xuníos llegó a 438. D’elles, 98 vienden al país de manera habitual, añu tres d’añu. Cerca de la metá son pequenes compañíes dedicaes al comerciu online y solo 24 esporten percima de los 500.000 euros. En xunto, representen el 4% de les vientes asturianes al esterior. Sicasí, el Gobiernu d’Asturies tien la obligación de velar poles compañíes de la comunidá, pola so actividá y poles sos plantiyes.

    Les acciones concretes que se van poner en marcha dende’l Gobiernu asturianu, como complementu a les ayudes yá anunciaes pola Unión Europea y el Gobiernu d’España, suponen un gastu de 17,3 millones y son les siguientes:

    • Dotación estraordinaria de 300.000 euros pa la Sociedá de Promoción Esterior Principáu d’Asturies (Asturex). El 10% del presupuestu añal de la empresa pública va destinase a fomentar l’apertura de nuevos mercaos ya impulsar les relaciones comerciales con Mercosur y el sureste asiáticu. Con esti fin, van programase misiones comerciales mientres el segundu semestre d’anguaño y el primeru del próximu.

    • Llinia d’asistencia financiera al traviés de Asturgar, dotada con siete millones. Los fondos van dedicar a actuaciones venceyaes cola diversificación de mercaos y la internacionalización.

    • Llinia de préstamu por un máximu de diez millones. Van reorientase fondos de distintes partíes pa financiar proyectos de diversificación de mercaos y internacionalización.

    Al marxe d’estes nueves iniciatives, el Gobiernu d’Asturies tamién decidió reorientar delles actuaciones y partíes, por un valor global de 12,9 millones, p’afondar nel sofitu a les empreses perxudicaes pola política arancelaria de Trump. Trátase de les siguientes:

    • Reorientación de les actividaes y misiones comerciales de Asturex. La sociedá pública va poner a disposición de les compañíes afectaes un abanicu de servicios y acciones de promoción internacional pa paliar no posible l’impactu de los aranceles.

    • Asesoría dende la Oficina d’Atención a les Empreses, col sofitu de les Cámares de Comerciu. Estes entidaes van asesorar a les firmes asturianes, por casu, sobre los distintos escenarios económicos, l’impactu de les nueves tarifes, la esploración de nuevos mercaos y l’ellaboración de planes de continxencia.

    • Ayudes directes p’ameyorar la competitividá y la busca de nuevos mercaos. Esti paquete, yá previstu nel presupuestu de l’Axencia Sekuens p’anguaño, inclúi delles llinies:

    – Convocatoria pa proyectos tractores d’inversión y diversificación de grandes empreses, financiada con 5.868.238 euros del Fondu de Transición Xusta (FTX).

    – Convocatoria pa proyectos d’inversión y diversificación de pymes, financiada tamién pol FTJ y con un presupuestu de 2.685.882 euros.

    – Convocatoria d’ayudes a empreses pa la promoción internacional, dotada con un millón.

  • El Serviciu Públicu d’Empléu pon en marcha la campaña ‘Trabayamos pa que nun pares’

    El Serviciu Públicu d’Empléu pon en marcha la campaña ‘Trabayamos pa que nun pares’

    El Serviciu Públicu d’Empléu d’Asturies (Sepepa) punxo en marcha la campaña Trabayamos pa que nun pares, cola que busca dar un xiru a la so imaxe pa reforzar el so papel como organismu clave na intermediación llaboral. L’oxetivu ye poner el focu nos menores de 30 años, aumentar la población activa y sofitar a les empreses asturianes que precisen incorporar personal.

    La campaña enmárcase nel procesu de modernización y reforma entamáu pol serviciu públicu que se concentra en cuatro exes básiques: polítiques actives d’empléu, formación, orientación llaboral ya intermediación.

    La directora xeneral destacó l’apueste de la Conseyería de Ciencia, Empreses, Formación y Empléu por averar el Sepepa a la sociedá y dar a conocer tolos servicios y programes qu’ufierta. Unu de los oxetivos ye llegar a mozos menores de 30 años, ente quien el serviciu d’empléu ye menos conocíu que pa otros colectivos prioritarios, como les persones vulnerables, paraos de llarga duración y mayores de 45 años.

    Flórez indicó que “queremos llegar tanto a mozos que nun tienen empléu nin se tán formando, como a los que tán buscando trabayu o a puntu d’acabar la so formación y entrar nel mercáu llaboral”.

    La directora xeneral aludió a la bona evolución del mercáu llaboral asturianu nos últimos años y la necesidá d’incidir nel aumentu de la población activa. Pa ello, fixo fincapié nel papel del serviciu d’empléu como correa de tresmisión ente la empresa y la persona demandante de trabayu.

    El pasáu añu, el Sepepa publicó 12.600 ufiertes llaborales n’Asturies y más de 2.500 empreses con actividá na comunidá autónoma utilizaron los sos servicios pa buscar personal. La directora xerente del serviciu d’empléu, Begoña López, apuntó como oxetivu llegar a toles empreses asturianes con trabayadores, pa que “conozan les posibilidaes qu’ufiertamos, tanto en formación a la carta como n’intermediación”.

    La campaña incide especialmente na formación, un exe fundamental de les polítiques d’empléu públicu. Los datos acoten que la formación profesional, el bachilleratu y les titulaciones universitaries son víes más segures escontra l’empléu.

  • L’eurodiputáu Jonas Fernández esixe midíes inmediates pa frenar la competencia deslleal nel sector del aceru

    L’eurodiputáu Jonas Fernández esixe midíes inmediates pa frenar la competencia deslleal nel sector del aceru

    El Parlamentu Européu dedicó l’alderique prioritariu de l’actual selmana de Plenu n’Estrasburgo a analizar la situación de la industria del aceru na Unión y, en concretu, la situación de dificultá qu’encara debío, ente otres razones, al efectu que l’escesu de capacidá de países ayenos a la Unión Europea tien nel nuesu mercáu.

    L’eurodiputáu asturianu, Jonás Fernández, denunció esta situación na Eurocámara y esixó a la Comisión Europea que tome midíes inmediates que-y pongan frenu: “La situación del sector del aceru n’Europa ye crítica. Dende la Unión Europea aprobemos programes d’ayudes mui ambiciosos pa la reconversión del sector, tanto pel llau de les ayudes directes como de la protección de la industria, pero tenemos de facer más. La Comisión Europea tien d’imponer midíes inmediates que protexan al nuesu sector frente a la competencia deslleal de terceros países”, manifestó.

    Fernández refierse, en concretu, a la revisión de la política comercial y al llevantamientu de les moratories de les sanciones sobre los desbastes (slabs), procedentes fundamentalmente de Rusia: “China trabaya con un escesu de capacidá qu’usa p’anubrir mercaos como l’européu con aceru barato; de la mesma, Rusia ta beneficiándose de moratories en diversos productos sobre les sanciones que-y impunximos pola so guerra illegal n’Ucrania. Esto afecta directamente a plantes siderúrxiques como les asturianes. La Comisión tien de responder endureciendo la so política comercial con terceros países y poniendo fin a les moratorias de les sanciones sobre forgues que tán ablayando’l nuesu mercáu, d’otru”, esixó.

    Pal eurodiputáu asturianu, el “ampliu consensu” esistente na Eurocámara sobre esti asuntu tien de sirvir como motivu al Executivu comuñal pa tomar midíes cuanto antes. “Nun hai qu’esperar a que se forme la próxima Comisión; tien d’actuar yá”, manifestó. Tamién reivindicó les actuaciones en marcha, como’l Mecanismu d’Axuste en Frontera por Carbonu, aprobáu y anguaño en fase de implementación, y que la so aplicación a partir de 2026 va desaniciar otra de les desventaxes competitives de la industria europea, al obligar a pagar derechos d’emisión de CO2 tamién a compañíes que produzan fuera de la UE.

    De la mesma, Fernández volvió aportunar nel so pidimientu a la compañía Arcelor Mittal de que cumpla’l memorandu d’entendimientu alcordáu ente’l Gobiernu d’España, el Gobiernu d’Asturies y la compañía: “Sigo solicitando qu’Arcelor Mittal cumpla’l so compromisu y empecipie yá les inversiones alcordaes coles que foi posible llograr l’aprobación de la Comisión Europea d’una ayuda de cerca de 500 millones d’euros pa impulsar la descarbonización na planta d’Asturies”.

  • El Musel mueve 11,8 millones de tonelaes no que va d’añu

    El Musel mueve 11,8 millones de tonelaes no que va d’añu

    A finales de setiembre moviérense nel puertu xixonés 11,8 millones de tonelaes, que suponen un amenorgamientu del 21% respecto al mesmu periodu del añu anterior.

    Per capítulos, los graneles llíquidos crecen el 59% -hasta 1,4 millones – debío, sobre manera, a les operaciones con GNL, qu’algamaron les 813.000 tonelaes. Los graneles sólidos nos muelles comerciales mengüen el 42% poles menores importaciones y esportaciones de carbón, 2,8 millones menos de tonelaes, y tamién el tráficu de cereales pierde cien mil tonelaes con referencia al añu anterior. Ye de reseñar la crecedera de productos dolomíticos – el 234%-, hasta cuatrocientes trenta y cinco mil tonelaes. En total, los graneles sólidos suponen nesti periodu 3,7 millones de tonelaes frente a los 6,3 millones de los nueves primeros meses de 2023.

    La mercancía xeneral crez un 18%, impulsada poles movides en contenedor -797.000 tonelaes, el 29% más- y caltiénense estables les correspondientes a los productos siderúrxicos, casi 600.000. El tráficu en EBHISA mengua’l 19%, 1,3 millones de tonelaes menos, lastráu pol amenorgamientu del carbón térmicu. D’esta forma, el total de tonelaes movíes algamó los 11,8 millones, frente a los 15 millones movíes nel exerciciu anterior, lo que supon un amenorgamientu del 21%

  • El semilleru de proyectos de Valnalón llogra que cada euru destináu pol Principáu movilice una inversión diez vegaes mayor

    El semilleru de proyectos de Valnalón llogra que cada euru destináu pol Principáu movilice una inversión diez vegaes mayor

    • Más del 75% de les iniciatives atendíes pola sociedá en 2023 desenvolvieron un plan d’empresa completu.
    • El director xeneral Ignacio Iglesias destaca les acciones de sofitu al emprendimientu nel ámbitu escolar, que llegaron a 10.000 estudiantes.

    Cada euru invertíu pol Gobiernu del Principáu nel semilleru de proyectos de Valnalón llogra una torna de diez euros, lo que favorez l’emprendimiento empresarial. En concretu, colos 24.000 euros de financiamientu qu’apurrió’l Principáu en 2023 movilizáronse 240.000 euros n’inversiones directes ya indirectes. Asina se recueye na memoria de la sociedá pública presentada pol director xeneral d’Empreses, Pymes y Emprendedores, Ignacio Iglesias, y la directora de Valnalón, Marta Pérez, tres la xunta celebrada pol so conseyu d’alministración.

    Ente los datos más destacaos del balance de la so actividá en 2023 asítiase la creación de 41 empreses gracies a les acciones de promoción entamadora, un 78% más que l’añu anterior. Amás, daqué más del 75% de les iniciatives atendíes desenvolvieron un plan d’empresa completu. Tamién s’asesoró a 185 entamadores y desenvolviéronse más de mil tutoríes individuales.

    La formación sigue siendo una pieza clave p’ameyorar la viabilidá de los proyectos empresariales. L’añu pasáu impartiéronse 23 talleres, sobremanera, en formatu presencial, con 332 asistentes y celebráronse más de mil sesiones d’asesoramientu.

    Polo que respecta a la área d’educación emprendedora, el númberu d’alumnos colos que se trabayó superó los 10.000 en tolos niveles educativos y cuntóse cola collaboración de casi 400 profesores. Tamién nesti ámbitu enmárcase la rede d’empreses comprometíes, qu’en 2023 axuntó a 223 compañíes y 597 alumnos y alumnes que compartieron charres, retos, asesoramientos, orientaciones, etc.

    Iglesias apuntó como novedaes p’anguaño, en collaboración cola Conseyería d’Educación, un nuevu proyectu pa potenciar les capacidaes del alumnáu de 2º, 3º y 4º d’Educación Primaria. Coles mesmes, va desenvolvese un programa pilotu pa llegar a centros educativos en conceyos del occidente d’Asturies y trabayar con nuevos territorios nos qu’anguaño nun se cunta con presencia.

  • EDP y Electra Norte van instalar en terrenes de les antigües mines de Ibias y Zarréu los mayores parques solares en suelu d’Asturies

    EDP y Electra Norte van instalar en terrenes de les antigües mines de Ibias y Zarréu los mayores parques solares en suelu d’Asturies

    EDP y Electra Norte van llevantar en terrenes de les antigües mines a cielu abiertu de Tormaleo (Ibias) y Zarréu (Degaña) los dos mayores parques fotovoltaicos d’Asturies allugaos en suelu. Dambos proyectos, en fase inicial de formalización, constitúin les primeres actuaciones previstes pa enllantase nes zones qu’anguaño ta restaurando la empresa Tragsa por encargu del Gobiernu d’Asturies, con financiamientu procedente del Institutu para la Transición Xusta y los avales de restauración incautaos pol Principáu.

    EDP preve la instalación en Zarréu d’un parque de xeneración d’enerxía fotovoltaica de 27 MW, mientres qu’Electra Norte proxecta una instalación similar n’Ibias de 1,6 MW. Les compañíes yá solicitaron accesu y conexón a la distribuidora, como primeros pasos pal desenvolvimientu de los proyectos. Los terrenes son propiedá de xuntes vecinales.

    Les actuaciones previstes por EDP y Electra Norte enmárquense dientro de los oxetivos del Gobiernu d’Asturies y del ITJ pa la implantación de nueves actividaes nes antigües esplotaciones mineres del suroccidente, que los sos terrenales tán siendo restauraos con dos oxetivos: la recuperación medioambiental d’estos espacios, bien degradaos pola actividá minera, y la posibilidá d’allugar nuevos usos que dexen xenerar impactos sociales y económicos positivos en territorios consideraos de transición xusta.

  • Asturies remató setiembre con 56.337 personas en paru

    Asturies remató setiembre con 56.337 personas en paru

    La finalización de la temporada de branu traducióse nun aumentu del desempléu y una cayida de les afiliaciones a la Seguridá Social. Según los datos fechos públicos pol Serviciu Públicu d’Empléu, Asturies remató setiembre con 56.337 persones en paru -1.920 más que n’agostu, lo que supón una medría del 3,53%- y 378.944 afiliaes a la Seguridá Social -6.122 menos que n’agostu, equivalentes a un 1,59%.

    Los indicadores negativos esplíquense bien en bona midida pol comportamientu coyuntural de los servicios, afectaos pol términu de les contrataciones braniegues na hostelería y demás actividaes rellacionaes col turismu. Hasta tal puntu, qu’el 82% de la medría del paru concentrar nesti sector. En númberos absolutos, suma 1.575 de los 1.920 paraos.

    La repercusión tamién se comprueba xeográficamente. Asina, Xixón rexistra una medría porcentual percima de la media y los conceyos turísticos son los qu’atropen los mayores porcentaxes de paru.

    Setiembre acostuma a ser un mal mes pal empléu. Sicasí, l’enclín de fondu del mercáu llaboral asturianu sigue siendo positiva. Si se toma como referencia 2022, el Principáu tien 5.452 persones en paru menos (un amenorgamientu del 8,82%) y 6.127 afiliaes más a la Seguridá Social (un aumentu del 1,64%).

    Con una perspectiva más amplia, la bona evolución faise más evidente. El mercáu llaboral ufierta meyores cifres qu’en septiembre de 2019, cuando empezó l’anterior llexislatura: 11.200 paraos menos y 11.300 más con trabayu. Ello ye que’l númberu de persones en desempléu ye’l más baxu pa setiembre dende 2008, y la cantidá d’afiliaes a la Seguridá Social, la más elevada dende 2010.

    La nueva directora del Serviciu d’Empléu del Principáu (Sepepa), Begoña López, indica que los datos de zarru de setiembre van en sintonía col enclín habitual del final de branu.