Xixón al día

Categoría: Economía

  • 91 empreses asturianes van beneficiase de les ayudes del Idepa pa favorecer la so internacionalización

    91 empreses asturianes van beneficiase de les ayudes del Idepa pa favorecer la so internacionalización

    L’Institutu de Promoción Económica del Principáu d’Asturies (Idepa) concedió 939.758 euros en subvenciones pal desenvolvimientu de 93 proyectos empobinaos a impulsar la internacionalización d’empreses asturianes.

    Estes ayudes enmárquense na convocatoria de subvenciones de promoción internacional y diversificación de los mercaos que xestiona l’Idepa. D’alcuerdu cola resolución alministrativa, concediéronse subvenciones a 91 empreses y los proyectos movilicen una inversión inducida pa la nuestra rexón de 2,6 millones.

    L’oxetivu d’esta convocatoria ye sofitar la promoción internacional y la diversificación de los mercaos y impulsar les actuaciones destinaes a consolidar la internacionalización de les empreses rexonales. Con esta llinia favorezse la promoción esterior de productos y servicios, la participación en programes internacionales, la cooperación con empreses estranxeres y la inversión nel esterior, garantizando la competitividá y la productividá del sector empresarial.

    En total presentáronse 134 proyectos, de los que 93 aprobáronse al traviés de los dos programes de la convocatoria:

    •El programa PINT pa proyectos individuales de promoción internacional, nel que s’aprobaron 89 solicitúes.

    •El programa TCEX pa la contratación de Técnicos de Comerciu Esterior, pal que s’aprobaron 4 solicitúes.

    Ente los conceptos subvencionables d’estes ayudes a la promoción internacional atópense’l desenvolvimientu de páxines web, la edición de material promocional, la participación en feries y eventos promocionales, viaxes de prospección, llicitaciones internacionales, gastos en consultoría, xestión, publicidá y la contratación de personal como técnicos de comerciu esterior.

    A efectos alministrativos, la publicación de la resolución nel BOPA ta prevista pal 26 de payares.

  • El Principáu va invertir 42,8 millones n’actualizar la estructura de telecomunicaciones, clave p’avanzar na transformación dixital de l’Alministración autonómica

    El Principáu va invertir 42,8 millones n’actualizar la estructura de telecomunicaciones, clave p’avanzar na transformación dixital de l’Alministración autonómica

    El Gobiernu d’Asturies va invertir 42.818.176 euros nos próximos cuatro años p’actualizar la estructura de telecomunicaciones, un factor clave p’avanzar hacia’l tresformamientu dixital de l’Alministración autonómica. Estos fondos van dexar ameyorar les comunicaciones n’anchu de banda, llatencia, robustez y seguridá, amás de fortalecer los servicios en movilidá, la conexón a internet y los sistemes de videoconferencia.

    La contratación para encarar la renovación de les telecomunicaciones va estremase en diez llotes distintos, en función de les tecnoloxíes qu’hai qu’implementar y los departamentos de l’Alministración a los qu’afecten. Ente otros aspectos, va incluyir los servicios de telefonía y datos, la rede de respaldu, l’accesu a internet, los equipos de telecomunicaciones, la tecnoloxía de videoconferencies, el soporte técnicu y l’atención al usuariu.

    Toes estes iniciatives son fundamentales p’avanzar hacia la modernización de los servicios que’l Principáu empresta a la ciudadanía, que constitúi ún de los principales oxetivos pa esta llexislatura. El cambéu busca, ente otros fines, aumentar la eficacia y l’eficiencia, desaniciar la fienda dixital y facilitar l’accesu a redes d’alta capacidá por toa Asturies. Tamién pretende impulsar una xestión sofitada nel usu de datos pa tomar les decisiones más afeches en cada momentu y ufiertar prestaciones de mayor calidá.

    Nesti marcu, el Principáu va dotar de dos llaboratorios públicos d’innovación abierta de cobertoria 5G Stand Alone, la fase más revolucionaria d’esta tecnoloxía, que dexa implementar servicios que namás son posibles con llatencies ínfimes na la tresmisión de datos, como la conducción autónoma o la ciruxía a distancia. Tamién fai posible la segmentación de la rede principal en subredes con distintes velocidaes de tresmisión, velocidá y llatencia, conque puede dase prioridá a comunicaciones crítiques como les rellacionaes coles emerxencies, la implantación de nueves tecnoloxíes nel campu de la robótica, la ciruxía a distancia y la tresmisión de paquetes enormes de datos nos ámbitos de la salú y l’investigación científica y técnica.

    Esta tecnoloxía tamién va implicar meyores nos ámbitos de la xusticia, la educación y los servicios sociales, amás de meyores na tramitación alministrativa, yá que se va poner a disposición de la ciudadanía una plataforma de servicios dixitales que va facilitar el contactu cola Alministración al traviés de medios electrónicos más eficientes, rápidos y seguros.

    La renovación dixital va ser un elementu clave nel tresformamientu de la sociedá y de la economía na próxima década. Nesti contestu, el Principáu aspira a liderar y promover el cambéu. L’internet de les coses, la intelixencia de datos (big data), la robótica, la realidá virtual y l’ultra alta definición van ser el aceleradores d’esa transición, sofitaos sobre redes y servicios 5G.

    Esta iniciativa coincide nos sos oxetivos con unu de los cinco proyectos estratéxicos escoyíos pol Executivu autonómicu pa optar a los fondos europeos, en concretu, cola iniciativa Asturies, territoriu dixital, liderada pola iniciativa pública y con un importe envaloráu de 81 millones. La so finalidá ye afondar na modernización de l’Alministración autonómica y, coles mesmes, entornar recursos na digitalización de les pymes asturianes.

  • El empléu vuelve crecer n’Asturies, pero cola crítica de sindicatos

    El empléu vuelve crecer n’Asturies, pero cola crítica de sindicatos

    El empléu volvió medrar n’Asturies según los datos asoleyaos pol Gobiernu d’España, con un aumentu nes afiliaciones a la Seguridá Social de 1.593 persones (+0,43%) n’ochobre y un fuerte repunte de la contratación, especialmente de calter indefiníu. Estos datos suponen tamién 6.000 nuevos afiliaos en rellación con ochobre del añu pasáu.

    Esta evolución positiva compruébase tamién col analís de les cifres mensuales de contratación, con un incrementu del 8,84%. Esto supón que se firmaron n’Asturies de media 1.005 contratos diarios. Ochobre tamién remató con un mínimu de 3.233 persones n’ERTE, con 1.434 homes y 1.799 muyeres, 675 menos qu’al rematar setiembre.

    Sicasí, el desempléu rexistráu n’Asturies subió en 1.548 persones (2,41%) respecto a setiembre, hasta situase en 65.756, lo que supón el númberu más baxo de demandantes pa ochobre dende 2008. El paru aumentó en tolos tramos d’edá y en tolos sectores, menos na construcción.

    Énte estos datos, el portavoz d’USO-Asturies incide en que “cotizar a la Seguridá Social y tener namás un empléu que seya suficiente pa vivir nun ye lo mesmo”. Per otra parte, dende UGT, remarquen el so «rechazu a les condiciones llaborales que sufren les muyeres, son les que peores condiciones tienen, les que más precariedá y parcialidá sufren y Asturies sigue situándose a la cabeza en brecha salarial. Por ello, nel ámbitu de la concertación vamos proponer midíes que contribuyan a un crecimientu
    económicu igual ente muyeres y homes y tamién potenciar la figura de les axentes d’igualdá p’acabar cola brecha salarial.

  • 328 mozos desempleaos van incorporase’l 1 d’avientu al programa Ocúpate financiáu pol Sepepa

    328 mozos desempleaos van incorporase’l 1 d’avientu al programa Ocúpate financiáu pol Sepepa

    328 mozos inscritos nel Ficheru Nacional de Garantía Xuvenil van incorporase’l 1 d’avientu a una segunda edición del programa Mozu Ocúpate financiáu pol Serviciu Públicu d’Empléu del Principáu d’Asturies (Sepepa) con una aportación de 4.266.467 euros.

    Al traviés d’esti programa, que cunta con financiamientu del Fondu Social Européu, el Sepepa refuerza les acciones p’ameyorar l’inxertamientu llaboral de persones moces, sobre manera aquelles con niveles baxos de formación o que-yos falta dalguna titulación.

    D’esta manera, al traviés del programa, conceyos y entidaes ensin ánimu d’arriquecimientu imparten a lo llargo de 9 meses formación teórica combinada con práctiques que van dexar a les persones participantes sacar certificaos de profesionalidá de nivel 1 de cara a facilitar la so incorporación al mercáu llaboral y fomentar ente los participantes actitúes proactives.

    Esti programa enmárcase nes directrices de la Estratexa Europea 2020, nel Plan Nacional de Garantía Xuvenil, y nel Plan de choque pol empléu mozu aprobáu pol gobiernu de la nación pal periodu 2019-2021. Según Pilar Varela, directora xeneral del Sepepa, el Programa de Garantía Xuvenil Mozu Ocúpate tien una importancia especial porque va destináu a mocedá mayor de 16 años y menores de 30 ensin estudios o que los dexaron de manera temprana, y en situación de desempléu. Un colectivu, polo tanto, con dificultaes especiales d’inxertamientu a los qu’esta iniciativa ufierta una oportunidá pa formase.

    A esta segunda edición del Mozu Ocúpate presentárense un total de 35 proyectos, de los que 24 correspuenden a entidaes locales, concretamente a 19 entidaes locales y 11 proyectos presentaos por 8 entidaes ensin ánimu d’arriquecimientu.

    Aprobáronse 23 proyectos de 18 entidaes locales que van beneficiar a 229 alumnos y 10 proyectos de 8 entidaes ensin ánimu d’arriquecimientu con 99 participantes. En total, 328 alumnos van participar en 33 proyectos.

    Con esta convocatoria nueva del programa, la segunda qu’impulsa’l Sepepa anguaño, el Gobiernu d’Asturies refuerza les polítiques actives d’empléu y da continuidá al compromisu d’habilitar fondos públicos y acciones pa lluchar contra’l desempléu. A la primer convocatoria, na que participaron 300 mozos, destinárense 3,8 millones. El programa desenvuélvese en 21 conceyos y por 9 entidaes ensin ánimu d’arriquecimientu.

    En xunto, el Sepepa va destinar anguaño alredor de 8 millones a esti programa d’inxertamientu llaboral xuvenil que va beneficiar a 628 mozos desempleaos.

  • Asturies ye, según la USO, la comunidá más inactiva

    Asturies ye, según la USO, la comunidá más inactiva

    Los datos de la tercer oleada de la EPA reflexen una evolución bona de los datos d’empléu n’Asturies que, sicasí, tienen un fondu demográficu prietu. Baxa’l paru y medren los ocupaos. Sicasí, faenlo sobre un datu de población activa insostenible.

    El Principáu d’Asturies caltiense a la cola de l’actividá n’España y los sos datos siguen empeorando. Énte’l cuasi 67% de les Islles Baleares, que llidera la tasa d’actividá, Asturies queda nel 51,05% tres rexistrar una baxada nueva. Ye, dempués de Madrid, la segunda comunidá autonoma que más persones actives pierde esti semestre según la EPA (-1200); pero nel casu del Principáu supón un guelpe mayor en términos rellativos.

    «Siempres ye positivu en términos xenerales qu’aumente la ocupación baxe’l paru, pero son cifres que se dan sobre una fuercia de trabayu cada vegada más mermada. Les primeres polítiques d’empléu qu’hai que facer son les demográfiques: ensin población activa, tamos destinaos a ser una rexón pensionada» avisa Miguel Rivero, portavoz d’USO-Asturies.

    Añu y mediu dempués del aniciu del andanciu, la recuperación nun camuda igual en tolos sectores. «Les muyeres siguen siendo les más penalizaes polos efectos socioeconómicos de la covid. Hai 20.000 ocupaos más y menos paraos. La tasa d’actividá ente les muyeres nun algama nin siquier el 47%. Hai un pelligrosu retornu al llar por obligaciones de cuidaos qu’amenaza con desaniciar lo que s’avanzara n’igualdá de xéneru», llamenta Rivero.

    Nesti sen, el portavoz d’USO remite a los datos del tercer trimestre previu a la crisis: «entós, la tasa de paru yera mui asemeyada nos dos xéneros, 14,17% ente los homes y 14,71 de muyeres. Güei el paru femenín ta dos puntos per enriba del masculín: 13,29% énte’l 11,43%. Amás, ente los homes hai 6.600 ocupaos más qu’entós, mientres qu’ente les muyeres esa cifra cayó en 800».

     

  • La Fundación Jóvenes Empresarios anuncia les menciones de los Premios AJE Asturies 2021

    La Fundación Jóvenes Empresarios anuncia les menciones de los Premios AJE Asturies 2021

    La Fundación Jóvenes Empresarios da a conocer sus menciones que serán reconocidas en la gala  de los Premios AJE Asturies 2021 que va celebrase’l  3 de payares nel Teatru Palacio Valdés d’Avilés a les 19.00 hores.

    Na presente edición les distinciones van dir pa: 

    • TRAYECTORIA EMPRESARIAL: Belarmino Feito, Asturfeito
    • RESPONSABILIDÁ SOCIAL CORPORATIVA: Fundación Caja Rural de Asturias
    • Mención d’Honor a la resiliencia: OTEA Asturias

    Mientres la gala va desvelase tamién la mención especial que va otorgar el xuráu de los  Premios a los ganadores de les categoríes restantes: Premiu Emprendimientu Xoven, Premiu AJE Junior y Premiu AJE del añu.

    Xunto al ganador del Accésit a la Internacionalización y del Accésit a la Innovación, van ser desvelaos el 3 de payares na propia gala de los premios tres la decisión que tome’l xuráu que va reunise’l próximu vienres 29 d’ochobre nel Espacio Maqua de Avilés. 

    Estos premios, que nel 2020 nun se celebraron por mor del Covid19, convóquense y tán enmarcaos dientro de les actividaes que desarrolla la Fundación Jóvenes Empresarios,  promovida por AJE Asturies nun actu de reconocencia de les meyores iniciatives de los xóvenes empresarios y empresaries de la rexón y que añu tres añu se consolida como ún de los puntos d’alcuentru más importantes dientro del mundu empresarial asturianu.

  • L’Idepa concede 681.250 euros n’ayudes a autónomos y pymes pa favorecer el desarrollu empresarial y la innovación

    L’Idepa concede 681.250 euros n’ayudes a autónomos y pymes pa favorecer el desarrollu empresarial y la innovación

    L’Institutu de Desarrollu Económicu del Principáu (Idepa) concedío 681.250 euros n’ayudes a 151 proyectos empresariales que van movilizar una inversión inducida de 1,3 millones.

    Les subvenciones van enmarcase nel Programa de Cheques, orientáu a ameyorar la competitividá de las firmes medianes y pequeñes al travíes de la contratación de servicios tecnolóxicos y de consultoría ufiertaos per centros o empreses especializaes nos campos de la Estratexia de Especialización Intelixente (S3). Esta planificación prioriza les llinies d’actuación de les polítiques del Gobiernu d’Asturies nes árees económiques nes que la rexón tien ventaxes competitives.

    La convocatoria cunta con dos llinies complementaries. La primera correspuende a los cheques d’innovación, con acciones subvencionables qu’incluyen asesoramientu tecnolóxicu, dixitalización de la empresa y consultoría pa la certificación y diseñu.

    La segunda, denominada cheques pal desarrollu empresarial, inclúi la xestión del protocolu familiar, la profesionalización na xestión, el crecimientu y el siguimientu empresarial.

    Pa la primera modalidá aprobáronse 129 solicitudes con una subvención global de 621.250 euros, mientres que nel apartáu de desarrollu empresarial destináronse 60.000 euros a 22 iniciatives. Son resultaos asemeyaos a los algamaos na convocatoria del añu pasáu.

  • El Gobiernu d’Asturies autoriza la prórroga de 868 ERTE Covid

    El Gobiernu d’Asturies autoriza la prórroga de 868 ERTE Covid

    La Dirección Xeneral d’Empléu y Formación, como autoridá llaboral nel Principáu, autorizó la prórroga de 868 espedientes de regulación d’empléu rellacionaos cola covid-19, qu’impliquen a 6.748 persones trabayadores.

    D’ellos, 809 correspuenden a causes de fuerza mayor y 59, a motivaciones económiques, técniques, operatives o productives (ETOP). En dambos casos trátase de prórrogues solicitaes poles mesmes empreses d’alcuerdu col Real Decretu 18/2021 de midíes urxentes pa la protección del empléu, la recuperación económica y la meyora del mercáu de trabayu, que dexa la estensión de los ERTE vinculaos a la pandemia hasta febreru del 2022.

    Por sectores, los servicios concentren les más de les prórrogues (747), siguíos pola industria (111) y la construcción (10). Sicasí, por persones implicaes produzse ciertu equilibriu ente servicios e industria, porque nesti últimu sector concéntrense los espedientes ETOP, menores en númberu que los de fuerza mayor pero qu’incluyen a más persones trabayadores.

    Por actividaes, el 26,54 % de los trabayadores afectaos tán rellacionaos con empreses d’hostelería y hotelería y el 25,6 %, a compañíes del sector metalúrxicu y la fabricación de productos metálicos.

    El númberu total de trabayadores incluyíos nos ERTE (6.748 persones) correspuende a los datos declaraos nes sos solicitúes poles empreses, que nun tienen la obligación de comunicar a l’autoridá llaboral autonómica, y sí al Ministeriu de Trabayu, la llista de persones afectaes. Sicasí, el Principáu incluyó nel modelu de solicitú un espaciu onde facilitar esta cifra pa tener una estimación de les persones incluyíes. Por ello, los trabayadores identificaos nes solicitúes aprobaes nun tienen por qué tar necesariamente en regulación d’empléu, sinón que namás les empreses tienen l’autorización pa ello en función de les sos necesidaes.

    El director xeneral d’Empléu y Formación, Pedro Fernández-Raigoso, esplicó qu’estos datos representen “un descensu claru nel númberu d’espedientes que van estendese hasta’l 28 de febreru, tanto si se compara col de les autorizaciones vixentes como colos espedientes utilizaos efectivamente el mes pasáu”.

    Según los datos de la Seguridá Social, el 30 de setiembre había n’Asturies 1.814 empreses con ERTE autorizaos y 3.908 persones trabayadores efectivamente regulaes d’empléu.

  • El tráfico de mercancíes n’El Musel crez más del 10%

    El tráfico de mercancíes n’El Musel crez más del 10%

    El puertu xixonés peslló’l mes d’agostu con un movimientu de mercancíes mientres los ocho primeros meses del añu de 11.321.813 tonelaes, lo que supón un 10,18% más que nel mesmu periodu de 2020.

    A esti resultáu contribuyó de forma significativa’l crecimientu en dos millones de tonelaes de la importación de mineral de fierro al traviés de la EBHI, mientres que l’incrementu de los gráneles líquidos –básicamente combustibles– nun 11,4% amuesa una mayor actividad económica.

    Pola so parte, los muelles comerciales, con 5.073.033 toneladas, vieron como la so actividá amenorgó cuasi un 18%, debío, en gran midida, a un menor tráficu de carbón. Tamién los contenedores cerraron a la baxa, con una coyuntura internacional nesti segmentu negativa, con 30.577 TEUS que suponen un 2,57% menos.

    A lo último, y anque tráficu de carbón térmicu continua a la baxa, el crecimientu en más de dos millones de tonelaes del mineral de fierro impulsó a EBHISA hasta les 6.248.780, lo que supón un incrementu del 52,14% respecto al mesmu periodu del año anterior.

  • Asturies va coordinar les comunidaes de la España Verde cola mira de reactivar el mercáu internacional na cornisa cantábrica

    Asturies va coordinar les comunidaes de la España Verde cola mira de reactivar el mercáu internacional na cornisa cantábrica

    Asturies va coordinar l’añu que vien el trabayu de les cuatro comunidaes que formen parte de la marca España Verde coles mires de reactivar el mercáu internacional na cornisa cantábrica y retomar la medría del turismu estranxeru tres del impactu de la pandemia.

    La viceconseyera de Turismu, Graciela Blanco, participó esta selmana nuna xunta de siguimientu celebrada colos directores xenerales del ramu de Galicia, Nava Castro, y de Cantabria, Marta Barca; el viceconseyeru d’Euskadi, Jesús María García, y la subdirectora xeneral de Marketing Esterior de Turespaña, Blanca Pérez-Sauquillo. Nesi alcuentru afitáronse les llinies de trabayu principales pal exerciciu viniente.

    “La España Verde va reactivar la so promoción internacional, reforzando los productos colos que trabayemos de manera conxunta nestos últimos años, como la gastronomía, el surf, la naturaleza y los itinerarios del Norte del Camín de Santiago”, esplicó Blanco.

    Amás, a esta estratexa va sumase una iniciativa nueva: La gran ruta de la España Verde, que busca dar más proyección a les cuatro comunidaes del norte al traviés d’un itinerariu de percorríu llargu.

    España Verde ye la marca territorial llanzada en 1989 por Galicia, Asturies, Cantabria y Euskadi, col sofitu de Turespaña, p’asitiar la cornisa cantábrica como destín turísticu alternativu nel mercáu internacional. Estes cuatro autonomíes son líderes nel turismu de naturaleza y cunten con 14 reserves de la biosfera, 25 parques naturales, cuasi 2.000 quilómetros de costa y 2.800 agospedamientos rurales.