Categoría: Espor

Alberto Menéndez, nuevu entrenador del UC Ciares

Alberto Menéndez ‘Fontoria’ toma les riendes del UC Ceares. El club teyeru ta acabante d’anunciar el fichaxe del nuevu entrenador. Nacíu en Ḷḷuarca en 1980 formóse nel fútbol base del occidente asturianu, pa darréu entrenar na cantera del Llano 2000 hasta llegar a categoría xuvenil. Nel fútbol senior entrenó en Segunda División femenina al Barcia C.F. y al Xixón Fútbol Femenín, y yá en categoría masculina los dos últimes campañes al Candás C.F. de Rexonal Preferente.

Siguiendo la llínea habitual d’esta última etapa teyera, va ser el quintu entrenador del UC Ciares en debutar na categoría dende 2012. Nun ye nuevu nel club yá que dende fai casi una década ye collaborador en distintos ámbitos técnicos del Xixón Fútbol Femenín.

El fichaxe d’Alberto Ménendez ‘Fontoria’ como nuevu entrenador del UC Ciares pa la viniente temporada llega depués de la marcha de Nacho Cabo. El conxuntu teyeru y el técnicu xixonés pactaron nun anovar l’alcuerdu que los vinculaba.

28/05/2019
L’asturianu Fernando González corona Nepal

El montañeru asturianu Fernando González Rodríguez ta acabante de cumplir un suañu. La selmana pasada coronó los 6.189 metros del picu Imja Tse, más conocíu como Island Peak. Trátase d’una montaña asitiada na cordillera del Himalaya nepalí, nel valle del Solokhumbu, xusto tres la paré sur del Lhotse. Anque esti picu nun ye «nada comparao colos 8000 que tien al lláu», nun foi un retu nada cenciellu. «Tien pasos complicaos nel glaciar y tramos de másima pendiente nuna parede de xelu», esplica.

«Salimos a la una la madrugada con una xelada tremenda pa, depués de dir ganando metros per un pedreru infernal, metemos pel glaciar y dir pasando grietes coles escaleres y pa rematar, los 200 metros caberos enantes de llegar a l’arista», rellata. Una aventura de nueve hores de xubida «mui dura» dende’l campamentu base que, pa González Rodríguez, paga la pena. «Foi xugar a ser himalayista, pero nun quiero nin camentar lo que tien que ser escalar un ocho mil».

Fernando González, mientres la xubida al picu Imja Tse.

28/05/2019
Poniente acueye esti sábadu’l XI Triatlón Xixón

El Club Triatlón Academia Civil-CNSO y la Federación de Triatlón del Principáu d’Asturies, cola collaboración del Patronatu Deportivu Municipal Conceyu de Gijon, entamen esti sábadu 25 de mayu dende les diez de la mañana na sablera de Poniente‘l XI Triatlon Xixón – Gran Premiu Telefurgo, prueba puntuable para’l super ranking Liberbank FTPA y el ranking de triatlón en distancia sprint y estándar, y Campeonatu d’Asturies en distancia sprint.

Esta competición deportiva dispútase’l sábadu pela redolada del paséu de la sablera de Poniente. Ta formada por dos categoríes: sprint con 300 places (con salida a les 10 hores pa los homes y cinco minutos más tarde nel casu de les muyeres) y per otru llau olímpica, con 100 places (con salida a les 11.30 hores pa los homes y tamién 5 minutos más tarde nel casu de les muyeres).

Cabe recordar que’l triatlón na so modalidá sprint ta compuestu por un circuitu de natación de 750 metros, trés vueltes en bicicleta a un circuitu d’asfaltu y llanu de 5,95 km que suma un total de 17,85 km y, a lo último, dos vueltes a pie sobroe otru circuitu de 2,50 km qu’algama un total de 5 km. Mientres que en distancia olímpica, sobro los mesmos circuitos son más vueltes y ta formáu por dos vueltes al circuitu de natación que se convierte en 1,50 km, siete vueltes en bicicleta al circuitu que suma 41,37 km y, a lo último, cuatro vueltes a cuerpu al circuitu qu’algamen los 10 km.

Les inscripciones pa tomar parte nesti eventu deportivu van tar abiertes un par de díes más, concretamente hasta les 23 hores del próximu miércoles 22 de mayu. La organización va faer entrega d’un sobre por participante compuestu de: un gorru látex, pegatines (cascu, bici y guardarropa) y dorsal.

La celebración de la prueba va provocar delles restricciones del tráficu, qu’afectarán especialmente a La Calzada y El Natahoyo. Los cortes van allargase dende les diez de la mañana hasta les dos de la tarde.

20/05/2019
Un final inéditu en La Cubilla pa les etapes asturianes de La Vuelta

La decimosesta etapa de La Vuelta, que va tener llugar el 9 de setiembre, va rematar nel altu de La Cubilla (Ḷḷena), tres un percorríu de 155 kilómetros que va empezar en Pravia y qu’inclúi dos puertos de tercer categoría (altos de Mallecina y de La Cabruñana) y trés de primera (puertu de Marabio, La Cobertoria y La Cubilla).

El director xeneral de Comerciu y Turismu, Julio González Zapico, que presentó güei la carrera xuntu cola alcaldesa de Ḷḷena, Gema Álvarez, y el director de La Vuelta, Javier Guillén, destacó la importante promoción qu’ufierta al Principáu una competición col prestíu y espardimientu de La Vuelta. «Contribúi a afayar pal gran públicu enclaves que se converten n’auténticos iconos pal ciclismu, daqué qu’esperamos qu’asoceda tamién cola Cubilla», apuntó.

Los itinerarios asturianos de La Vuelta 2019 entienden zones de mariña y monte, urbanes y rurales, del oriente, del centru y del occidente del país. Les trés etapes van desenvolvese los díes 7, 8 y 9 de setiembre colos siguientes percorríos: San Vicente de la Barquera-Uviéu, Tinéu–Santuariu del Xardón y Pravia–alto de La Cubilla.

17/05/2019
Espectacular accidente de Fernando Alonso n’Indianápolis

El pilotu asturianu de Fórmula 1, Fernando Alonso, salió ilesu d’un espectacular accidente na segunda xornada d’entrenamientos llibres de les 500 milles d’Indianápolis. Na curva 2 del circuitu, l’uvieín perdió’l control del so McLaren y chocó hasta tres veces col muru. «Vamos volver más fuertes. L’equipu ta asegurándose de que too tea llisto pa mañana. Toi llistu pa mañana. Nun tengo mieu, vamos volver a ser rápidos de nuevu», declaró tres lo asocedío.

16/05/2019
Lindsey Vonn, Premiu Princesa d’Asturies de los Deportes

La esquiadora estadounidense Lindsey Vonn foi galardonada col Premiu Princesa d’Asturies de los Deportes 2019, según fixo públicu güei n’Uviéu‘l xuráu encargáu de la so concesión. Ye la muyer con más victories na hestoria de la Copa del Mundu d’esquí alpín. En 2016, al consiguir el so trunfu númberu 63, superó’l récord qu’ostentaba Annemarie Moser-Pröll dende los años setenta. La so candidatura foi presentada por Theresa Zabell, presidenta de la Fundación Ecomar.

Lindsey Vonn nació’l 18 d’ochobre de 1984 en Saint Paul (Minnesota, Estaos Xuníos) n’una familia d’esquiadores. Debutó nesti deporte con 7 años y con 9 disputó les sos primeres pruebes internacionales. Con 14 años foi la primer estadounidense en ganar el Troféu Topolino (Italia) y en 2001 consiguió la so primer victoria n’una competición oficial de la Federación Internacional d’Esquí. Na temporada 2004-05 remató en primer posición seis pruebes de la Copa del Mundu y debutó nel Campeonatu del Mundu, pero foi la so incorporación al Proyectu Especial d’Atletes de Red Bull, dirixíu por Robert Trenkwalder, entrenador que cooperaba col equipu estadounidense d’esquí, lo que supunxo una gran progresión na so carrera. L’añu 2009 marcó l’ascensu d’esta al proclamase doble campeona del mundu en descensu y supergigante y revalidar el de campeona na xeneral de la Copa del Mundu.

El xuráu d’esti Premiu convocáu pola Fundación Princesa d’Asturies tuvo presidíu por Abel Antón Rodrigo ya integráu por Alejandro Blanco Bravo, Vicente del Monte González, marqués de Del Bosque, Miguel Carballeda Piñeiro, María Paz Corominas i Guerin, Alex Corretja Verdegay, Joaquín Folch-Rusiñol Corachán, Ernest Folch i Folch, Juan Ignacio Gallardo Tomé, Joan Llaneras Roselló, Sylvana Mestre Alexandre, Luis Nieto Tortuero, Santiago Nolla Zayas, Edurne Pasabán Lizarribar, Paloma del Río Cañadas, Sitapha Savané Sagna, Alberto Suárez Laso y Patricia García Rodríguez (secretaria).

15/05/2019
El Círculu Xixón desciende

Los nervios dente l’entamu del Teslacard Círculu Xixón provocaron munchos erros en defensa y nel ataque paecía que’l balón nun quería entrar. El conxuntu menorquín, a pesar de nun xugase nada, celebró con euforia cada anotación, remató’l primer periodu con una llixera ventaya del equipu visitante 15-23.

Nel segundu cuartu, el Círculu quería amenorgar cuanto antes les diferencies nel marcador pero eso causó más imprecisiones nel ataque y nun ameyoró l’aciertu a canasta causando qu’el Menorca dir al descansu con un 13 puntos de ventaya nel marcador. (31-44)

El Teslacard Círculo Xixón tenía dos cuartos pa intentar remontar el partíu y esperar a qu’unu de los sos rivales pincharen. El conxuntu xixonés salió con otru ritmu y Saúl Blanco demostrólo anotando dos triples siguíos que fixo non yá espertar al so equipu sinón a tolos aficionaos del Palaciu de Deportes. Paecía qu’una vegada más equipu y afición volvíen a sintonizarse. Pero’l Menorca nun se punxo nerviosu y llogró una merecida victoria. 72-80

A pesar de que’l Círculu tuvo nes sos manos la remontada nos dos últimos minutos del partíu, lo cierto ye que los sos rivales ganaron los sos alcuentros. En rueda de prensa Nachu Galán reconoció que “consuela saber que la victoria nun sirviera pa nada”. Tamién quixo dexar un mensaxe sobro’l futuru del club: “Dempués de ver cómo tuvo’l pabellón nun m’atrevería a baxar la persiana”.

12/05/2019
Nacho Cabo nun va siguir nel banquín de La Cruz

Nacho Cabo nun va siguir al frente del Unión Club Ciares una temporada más. El conxuntu teyeru y el técnicu xixonés pactaron nun anovar l’alcuerdu que los vinculaba. L’equipu zarra d’esta manera la segunda etapa del entrenador nel banquín de La Cruz.

«Dende l’Unión Club Ceares queremos agradecer tanto a Nacho Cabo, como a José Luis Egüén y a Javi González, la so profesionalidá y trabayu estes dos temporaes», destaca l’equipu nuna nota de prensa. «Nesta segunda etapa llograron mientres la temporada pasada una de les meyores clasificaciones na hestoria del club. Muncha suerte nel vuesu próximu proyectu», conclúi.

07/05/2019