El Conceyu de Xixón pon en marcha’l programa de Biciescuela, un nuevu recursu de formación vial ciclista col que busca promover l’usu de la bicicleta na ciudá como mediu de tresporte cotidianu y fomentar aptitúes ciclistes segures y responsables.
El programa presentólu esti llunes el conceyal de Mediu Ambiente y Movilidá, Aurelio Martín, que lu enmarcó na estratexa del Conceyu pa fomentar la movilidá ciclista na ciudá. Señaló, amás, que se ta trabayando pa producir un cambéu nos vezos de desplazamientu de los y les xixoneses, «nos que queremos que la bicicleta pase a formar parte del día ente día».
Trátase, nesti sentíu, d’una midida más que se suma a les yá desenvueltes o en marcha, como la creación de nuevos carriles bici, el calmu del tráficu cola implantación de les cais 30” en gran parte de la ciudá o la señalización de ciclocarriles nes principales exes viarios.
Martín destacó tamién que la bicicleta “ye un mediu sanu, seguru y sostenible, característiques que cobren especial importancia nun contestu de pandemia como’l que tamos viviendo”.
Biciescuela
El programa de Biciescuela Municipal va desenvolvese a partir del mes de marzu al traviés d’una Biciescuela Adulta y una Biciescuela Escolar. La primera va ufiertar 18 cursos prácticos de dos hores de duración en trés niveles de dificultá: deprendizaxe -pa deprender a montar en bicicleta-, habilidá -pa desenvolver habilidaes ciclistes básiques-, y circulación -empobináu a consiguir una circulación segura pela calzada. Va haber tamién una sesión de formación en llinia p’adquirir conocencies en materia de normativa y seguridá vial.
Los cursos van llevar a cabu de marzu a payares en trés zones de la ciudá dependiendo del nivel de dificultá: na redolada del Palaciu los Deportes de La Guía, nel Cascayu, al altor de la escalera 14 del Muro de San Llorienzo, y nes cais del ámbitu de la Plazuela San Miguel.
La Biciescuela Adulta ta dirixida a persones mayores de 16 años y el númberu previstu de participantes ye de 180. La inscripción puede realizase al traviés d’Internet (https://actividaes.gijon.es, app iGijon y caxeros ciudadanos) y de forma presencial nes Oficines d’Atención a la Ciudadanía del Conceyu.
Tocantes a la Biciescuela Escolar, tratar d’un programa educativu empobináu a la comunidá escolar que busca fomentar una movilidá sana y sostenible ente la población infantil y xuvenil, inspirándose n’esperiencies previes como los programes Bikeability1 y Pro Velo2, que lleven décades desenvolviéndose en Reinu Xuníu y Bélxica, respectivamente. Tamién ciudaes del estáu como Vitoria-Gasteiz, Pamplona o Barcelona cunten dende va años con programes de los Conceyos de formación ciclista pa escolares.
La Biciescuela Escolar van tener llugar esti cursu, mientres los meses de marzu, abril y mayu, en trés colexos públicos de la ciudá: Evaristo Valle, Pumarín y Miguel de Cervantes, llegando a 141 alumnes y alumnos de sestu de Primaria. El proyectu pretende ampliase a más centros educativos a partir del próximu cursu.
El programa va tener una duración de cuatro sesiones, d’un total de cinco hores, que se van completar con un cursu pa deprender a montar en bicicleta pal alumnáu que lo precise, y con marches ciclistes d’ociu en familia mientres les fines de selmana.
