Categoría: Salú

Una trentena de sableres asturianes disponen de desfibriladores tres l’activación del Plan de Salvamentu del Principáu (Plan Sapla) que coordina’l Serviciu d’Emerxencies. Estos dispositivos tán allugaos nos puestos de socorrismu y tán a disposición del personal qu’empresta serviciu nos arenales, que cunta con formación en reanimación cardiopulmonar (RCP) y nel usu d’estos aparatos.

D’esta miente, aumenten les posibilidaes de supervivencia en casu de que dalgún bañista sufra una parada cardiaca, yá que los primeros minutos d’atención son cruciales y pueden marcar la diferencia ente la vida y la muerte. Les sableres cardioprotexíes, por conceyos, son les siguientes:

• Caravia: La Espasa y La Isla.
• Carreño: Xivares.
• Castrillón: Salinas, Santa María del Mar y El Sablón.
• Castropol: Arnao y Penarronda.
• Coaña: Arnelles.
• Colunga: La Griega
• Cuideiru: Cueva.
• El Franco: Porcía.
• Gozón: Verdicio y Xagó.
• Llanes: Vidiagu, Toró, Palombina, Barru y San Antolín.
• Muros de Nalón: Aguilar.
• Navia: Frexulfe y Navia.
• Ribadeva: La Franca.
• Sotu’l Barcu: Los Quebrantos.
• Tapia: Los Campos y Serantes.
• Valdés: Outur.
• Villaviciosa: Rodiles y La Ñora.

L’área sanitaria VIII, con cabecera en Llangréu, punxo en marcha un aula innovadora de formación y simulación clínica nel Hospital Valle del Nalón coles mires de reforzar la capacitación profesional y ameyorar la seguridá del paciente.

El nuevu recursu, enmarcáu na estratexa del Serviciu de Salú del Principáu (Sespa) pa reforzar la calidá asistencial per aciu l’usu de ferramientes tecnolóxiques avanzaes, va contribuyir a modernizar los procesos docentes dirixíos a profesionales sanitarios, residentes, estudiantes y persones cuidadores de la área.

La infraestructura dexa entrenar habilidaes clíniques y non clíniques nuna contorna segura, utilizando simuladores d’alta fidelidá que recreen situaciones reales ensin poner en riesgu al paciente. La formación per aciu simulación favorez una transición progresiva dende la conocencia teórica escontra la práctica asistencial y dexa al alumnáu perfeccionar técniques, ameyorar competencies y adquirir esperiencia antes d’enfrentase a escenarios reales. Amás, va dexar entrenar otres habilidaes, como la toma de decisiones, la comunicación clínica o’l trabayu n’equipu.

L’aula va tar dotada tecnolóxicamente con un maniquín clínicu completu de simulación n’enfermería, que reproduz múltiples funciones fisiolóxiques y dexa la práctica de destreces esenciales como la canalización de víes, alministración de medicación, toma de constantes, valoración de signos clínicos o realización de técniques de reanimación.

Tamién dispón d’un monitor de paciente simuláu con pantalla táctil, totalmente compatible col maniquín de reanimación cardiopulmonar avanzada. Esti dispositivu facilita la enseñanza del soporte vital básicu y avanzáu, clave p’actuar con eficacia en situaciones de parada cardiorrespiratoria. La formación específica en reanimación considérase un elementu esencial p’ameyorar la respuesta énte emerxencies tanto nel ámbitu hospitalariu como nel d’atención primaria.

L’actuación supunxo una inversión cercana a los 25.000 euros, que se suman al esfuerzu que ta realizando la conseyería en tola rede sanitaria asturiana pública pa incorporar espacios y tecnoloxíes que favorezan una formación siguida cde calidá. D’esta forma, contribuye a aumentar l’enfotu profesional, amenorgar l’estrés en situaciones clíniques complexes y reforzar la seguridá del paciente.

El Principáu avanza na tramitación del conveniu cola Xunta de Galicia pa la prestación d’asistencia sanitaria en zones de llende de dambes comunidaes. La conseyera de Salú, Concepción Saavedra, informó güei na Xunta Xeneral sobre esti alcuerdu, que yá recibió’l vistu bonu del Conseyu de Gobiernu’l 19 de xunetu, como trámite previu a la so aprobación pol Senáu, últimu pasu antes de la firma.

“La tramitación d’esti conveniu evidencia la importancia de cooperar ente comunidaes fronterices en daqué tan esencial y necesario como la salú de les persones”, señaló Saavedra. “El Serviciu de Salú, como serviciu públicu, universal, accesible y de calidá, tien de procurar les meyores prestaciones a la so población”, amestó.

El documentu, consensuáu por dambes alministraciones, afecta a los vecinos de la parroquia de Os Coutos, en Ibias, que van poder recibir atención na provincia de Lugo, pol so mayor proximidá. Ellí van tener accesu a servicios d’atención primaria, urxencies, atención hospitalaria y tresporte sanitariu. Les localidaes que se beneficiaren del conveniu son les siguientes: Folgueiras Os Coutos, Lagúa, La Muria, Parada, Santa Comba Os Coutos, Valdeferreiros, Vilarello, Villaselande y Viñal.

En concretu, el conveniu asigna a estes poblaciones al centru de salú de Navia de Suarna, a la zona especial d’urxencies d’este mesmu conceyu (de 15:00 a 22:00 hores) y al puntu d’atención siguida de Becerrea (de 22:00 a 08:00 hores. Como centru de referencia establez l’Hospital Universitariu Lucus Augusti de Lugo.

L’alcuerdu, con una duración de cuatro años, preve que’l Serviciu Gallegu de Salú tenga accesu a les hestories clíniques de los pacientes y que’l Sespa compense a la sanidá gallega polos gastos en qu’incurra pol desplazamientu de los sos profesionales sanitarios o por necesidaes de refuerzu del so personal.

Pa beneficiase d’esti conveniu, ye necesariu que les persones interesaes llogren una tarxeta d’asistencia a movíos nel centru sanitariu gallegu más próximu a la so casa. Amás, van caltener la tarxeta sanitaria d’Asturies.

Nel casu de que precisen dalguna prestación ortoprotésica o terapia respiratoria domiciliaria, el pidimientu va realizalo’l facultativu qu’empreste l’asistencia y va tener validez n’Asturies, onde’l Sespa va encargase d’asumila y financiala.

El documentu tamién recueye la creación d’una comisión de siguimientu compuesta por cuatro miembros, dos de cada serviciu de salú, y un representante de caúna de les xerencies que se beneficien d’esti alcuerdu.