Xixón al día

Categoría: Salú

  • Asturies va prohibir les bébores enerxétiques a los menores de 16 años con una llei autonómica

    Asturies va prohibir les bébores enerxétiques a los menores de 16 años con una llei autonómica

    El conseyeru d’Ordenación del Territoriu, Urbanismu, Vivienda y Derechos Ciudadanos, Ovidio Zapico, treslladó na tarde d’ayeri al Ministeriu de Derechos Sociales, Consumu y Axenda 2030 la intención del gobiernu d’Asturies d’ellaborar una llei autonómica pa la prohibición de la venta y consumu de bébores enerxétiques a menores de 16 años. A la xunta, celebrada nel Institutu Nacional de Consumu, asistieron tamién la viceconseyera de Derechos Ciudadanos, Beatriz González, y el director xeneral de Consumu, Faustino Zapico.

    Nel alcuentru, Zapico adelantró que la previsión del so departamentu ye contratar una asistencia técnica nel primer trimestre del próximu añu pa la redacción d’esta normativa. “La prohibición d’estes bébores pa menores de 16 años ye una demanda compartida por profesionales de la salú, docentes y padres y madres, que nos treslladaron la so esmolición polos efectos negativos na salú d’esti tipu de bébores y la facilidá d’accesu de los neños y neñes a les mesmes”, indicó’l conseyeru.

    Ovidio Zapico recordó que dende la Dirección Xeneral de Consumu realizóse una ronda de consultes con tolos colectivos afectaos “coles mires de llograr el máximu consensu al rodiu d’esta regulación” y sorrayó l’ampliu respaldu amosáu pola inmensa mayoría de los colectivos qu’entendieron la necesidá d’actuar pa caltener la salú de los neños asturianos.

  • Rescaten a un home que se mancó nuna carrera de monte n’Onís

    Rescaten a un home que se mancó nuna carrera de monte n’Onís

    Efectivos del Grupu de Rescate del Serviciu d’Emerxencies del Principáu d’Asturies (SEPA), a bordu del helicópteru medicalizáu rescataron a un home que se mancó mientres participaba nuna carrera de monte n’Onís. Al afectáu, que presentaba una ferida abierta nuna pierna, treslladáronlu al Hospital Comarcal de Les Arriondes.

    Nel avisu indicóse que’l corredor sufriera un corte importante y díxose que lu atendiera un médicu que valoraba la necesidá de la so evacuación. Nesi momentu, movilizóse al equipu de rescate, a bordu de l’aeronave medicalizada.

    Una vegada na zona, la meteoroloxía de la zona torgó al helicópteru aportar hasta l’abellugu de Vega d’Ariu onde esperaba l’afectáu. N’esperando nel helipuertu de Cangues d’Onís, ensin que les condiciones meteorolóxiques ameyoraren, optaron pol regresu de l’aeronave a La Morgal, mientas que dos bomberos-rescatadores, xunto con trés efectivos de bomberos del parque cangués empecipiaron el rescate per tierra. Tamién s’informó al GREIM de la situación y sumóse al operativu.

    Mientres los llabores d’accesu a la zona, una llixera meyora de les condiciones meteorolóxiques fixo que los rescatadores optaren por solicitar la presencia del helicópteru pa intentar de nuevu los llabores de rescate. Finalmente asina pudo facese y treslladóse al mancáu al Hospital Comarcal de Les Arriondes a les 16:13 hores.

  • L’HUCA incorpora una técnica innovadora qu’utiliza la conxelación pa destruyir mancadures tumorales complexes

    L’HUCA incorpora una técnica innovadora qu’utiliza la conxelación pa destruyir mancadures tumorales complexes

    Los servicios de Radiodiagnóstico y Traumatoloxía del Hospital Universitariu Central d’Asturies (HUCA) incorporaron una técnica innovadora que dexa destruyir mancadures tumorales complexes en músculos y güesos por aciu l’empléu de gas argón a temperatures d’hasta -120ºC. Esti métodu qu’amplía la cartera de servicios del HUCA, conocíu como crioablación empuesta por imaxes radiolóxiques, consiste na extirpación al traviés de fríu intenso, ye mínimamente invasivu, seguru y eficaz.

    Los especialistes empleguen una aguya de finu calibre (criosonda) que s’asitia al traviés de la piel na espesura de la mancadura pa destruyila al traviés del fríu estremu. P’algamar el llugar precisu y la posición afayadiza de l’aguya utilícense sofisticaos sistemes d’imaxe médica, como la tomografía computarizada, la ecografía o’l anxógrafu. Una vegada algamáu’l puntu esactu de la mancadura, aplícase’l gas argón pa provocar la destrucción de les célules.

    Esti métodu aprovecha l’efectu analxésicu del fríu, polo que requier menos fármacos y dexa efectuar numberosos procedimientos so sedación y anestesia local, a diferencia d’otres técniques mínimamennte invasives como la radiofrecuencia y les microondes, que s’usen pa l’ablación de tumores hepáticos, pulmonares, óseos, renales y nódulos tiroideos.

    El dolor post tratamientu tamién ye menor, polo que ye posible amenorgar o inclusive evitar l’usu d’analxésicos potentes pa eliminalu. Calcúlase que, primeramente, podrán beneficiase d’esta técnica de 6 a 10 pacientes al añu.

  • L’área sanitaria III participa nel primer proyectu pilotu nacional de cribáu de cáncer de pulmón al travies d’una prueba d’imaxe

    L’área sanitaria III participa nel primer proyectu pilotu nacional de cribáu de cáncer de pulmón al travies d’una prueba d’imaxe

    La área sanitaria III, con cabecera n’Avilés, foi escoyida pa participar nel primer proyectu pilotu nacional de cribáu de cáncer de pulmón. L’estudiu pretende midir la eficacia d’una prueba d’imaxe, concretamente un escáner de baxa dosis de radiación, pa la detección precoz de la enfermedá en fumadores de llarga duración y exfumadores, lo que favorecería l’amenorgamientu de la mortalidá.

    El proyectu, conocíu como Cassandra -del inglés Cancer Screening, Smoking Cessation and Respiratory Assessment- céntrase nel paciente, al qu’apurre una oportunidá única pa la formación, la prevención y l’abandonu del vezu.

    El xerente del Serviciu de Salú (Sespa), Aquilino Alonso, caltuvo güei una xunta de trabayu col xerente de la área III, Miguel Rodríguez, pa tratar sobre esti programa asistencial, lideráu pola comunidá científica dedicada al diagnósticu, tratamientu ya investigación del cáncer de pulmón, en collaboración con asociaciones de pacientes.

    Cassandra consta de delles exes d’actuación, ente los que destaquen la integración de la deshabituación tabáquica nel peneráu, la realización de pruebes funcionales respiratories y l’aprovechamientu de la información qu’apurre la tomografía computarizada de baxa dosis (TCBD) pa completar una valoración global del fumador o exfumador.

    Pa poner en marcha’l programa piloto va convidar a participar a persones asintomátiques, de 50 a 75 años, que cumplan los criterios d’inclusión: fumadores o exfumadores que nun lleven más de 15 años d’astinencia y que consuman o consumieren a lo menos 20 paquetes de pitos al añu.

    Los participantes tendrán de permanecer estables dende un puntu de vista respiratoriu, ensin síntomes compatibles cola presencia d’un cáncer de pulmón. Amás, la so situación ha dexar la realización de pruebes diagnóstiques o terapéutiques, incluyendo la resección pulmonar.

    Los pacientes que refieran un empeoramientu de la so tos habitual, afonía de nueva apaición, hemoptisis, y/o perda de pesu ensin causa aparente van ser escluyíos y derivaos a otru estudiu.

  • L’Hospital de Cabueñes pon en marcha una consulta monográfica pa ufiertar atención personalizao a muyeres con endometriosis

    L’Hospital de Cabueñes pon en marcha una consulta monográfica pa ufiertar atención personalizao a muyeres con endometriosis

    El Serviciu de Obstetricia y Xinecoloxía del Hospital Universitariu de Cabueñes incorporó una consulta monográfica pa muyeres con endometriosis, que va dexar emprestar una atención más personalizao a les pacientes con sospecha o diagnósticu confirmáu d’esta patoloxía, según a les que sufren dolor coxal crónicu.

    La primer consulta programóse l’últimu martes de febreru y dexó atender a doce muyeres nuna sesión. Trátase de pacientes que requieren tiempu y esploraciones más frecuentes y complexes, polo que’l númberu d’usuaries tien de ser llin+dáu.

    L’equipu ta formáu por trés profesionales de la área de Obstetricia y Xinecoloxía que pasen consulta los martes alternos, cada quince díes, anque nun se refuga aumentar esta prestación al curtiu plazu y ufiertar cites selmanales.

    La derivación puede realizase dende cualquier consulta de xinecoloxía na que s’estableza unu barruntu de diagnósticu de endometriosis. Tamién dende atención primaria, al traviés de la consulta colaborativa virtual, cuando’l médicu de familia atienda a pacientes con clínica compatible.

    Mañana, 14 de marzu, conmemórase’l Día Mundial de la Endometriosis, una patoloxía frecuente que sufren aprosimao’l 10% de les muyeres n’edá reproductiva y que de normal ta infradiagnosticada. Envalórase que’l retrasu del diagnósticu puede algamar los diez años a partir de los primeros síntomes, unu de los cualos suel ser el dolor cola menstruación (dismenorrea secundaria) nos primeros años d’edá fértil.

    En munchos casos, la enfermedá pasa inalvertida. Amás, un eleváu porcentaxe de muyeres sufren dolor crónicu, alteraciones dixestives y urinaries o esterilidá secundaria, que precisen d’un siguimientu enllargáu o riquen d’un equipu específicu, estable y accesible, que se dedique n’esclusiva a esta dolencia.

    Ello ye que les guíes clíniques encamienten habilitar consultes y unidaes monográfiques para estes pacientes. Nesti sentíu, esta patoloxía rique d’un enfoque multidisciplinar qu’integre árees como anestiosología (unidá del dolor), ciruxía xeneral, rehabilitación y salú mental. En Cabueñes, toos estos recursos van coordinase al traviés de la nueva consulta monográfica.

  • Asturies va presentar la so candidatura p’acoyer la see de l’Axencia Estatal de Salú Pública

    Asturies va presentar la so candidatura p’acoyer la see de l’Axencia Estatal de Salú Pública

    El Gobiernu d’Asturies va presentar la so candidatura para ser see de l’Axencia Estatal de Salú Pública aprobada ayeri pol Conseyu de Ministros y que se va encargar de la vixilancia de la salú de la población, la información y comunicación pública de riesgos, entamar una respuesta común de tol Sistema Nacional de Salú pa crisis sanitaries y el refuerzu global de la salú pública en tol territoriu, ente otros asuntos.

    La conseyera de Salú, Concepción Saavedra, asegura que “Asturies ye un bon llugar p’allugar esta axencia porque ye dende va años un referente en munches aries rellacionaes cola salú pública, la promoción de la salú y la prevención d’enfermedaes, un trabayu que se vio mientres la pandemia colo que se conoció como la respuesta d’Asturies”.

    “L’Observatoriu de Salú p’Asturies, los nuesos programes d’educación afectivu sexual, el trabayu que llevamos años desenvolviendo sobre determinantes sociales de la enfermedá o na área de la salú mental pueden convertinos en firmes candidatos p’acoyer esa axencia”, aseguró la conseyera.

  • Salú confía en que la reordenación sanitaria ameyore l’asistencia y potencie los hospitales comarcales

    Salú confía en que la reordenación sanitaria ameyore l’asistencia y potencie los hospitales comarcales

    La Conseyería de Salú afirma que la reordenación del mapa sanitariu va ameyorar l’asistencia, va potenciar los hospitales comarcales y va facer más curiosos pa los profesionales. Asina lo esplicó esta tarde la conseyera Concepción Saavedra tres axuntase colos representantes de los colexos profesionales del ámbitu sanitariu pa tresllada-yos la propuesta. La conseyera aseguró que “nun va haber nenguna torga” nes prestaciones y servicios de los centros de salú y hospitales comarcales, y qu’estos postreros van salir beneficiaos col nuevu mapa sanitariu, al aumentar la so cartera de servicios.

    Otra de les ventayes de la reordenación alministrativa ye, según Saavedra, “que los centros hospitalarios comarcales van ser más afayadizos pa los profesionales sanitarios”. Amás, la conseyera de Salú pidió tranquilidá a los usuarios, que “nun van notar una diferencia. Van allegar al so centru de salú y hospital de siempre, y cuando la situación seya más complexa van allegar a un centru de mayor complexidá”. La intención ye “entainar los circuitos asistenciales” p’ameyorar l’atención sanitaria y amenorgar los tiempos de demoranza.

    El gobiernu presentó’l pasáu sábadu la reorganización del mapa sanitariu y esta selmana empecipió una ronda de contactos con tolos axentes implicaos col enfotu de que’l documentu base llegue a la so fase de tramitación col mayor consensu posible. Tres la xunta d’ayeri colos sindicatos, la conseyera de Salú caltuvo un alcuentru colos representantes de los colexos profesionales sanitarios, que trescurrió en “un ambiente distendíu” y de “diálogu”.

  • El mázcaru va ser obligatoriu diez díes más en centros sanitarios y farmacies

    El mázcaru va ser obligatoriu diez díes más en centros sanitarios y farmacies

    La Conseyería de Salú decidió prorrogar l’usu del mázcaru en tolos centros de salú y nes oficines de farmacia mientres diez díes más, mientres vos que s’envalora que va siguir habiendo una alta circulación de virus respiratorios (gripe A, sincitial y covid, básicamente).

    La conseyería adoptó esta midida va dos selmanes. Magar tuvo l’impactu positivu esperáu, considera necesariu caltenela otros diez díes.

    La decisión xustifícase en trés razones. El virus del gripe sigue teniendo una circulación elevada, con tases de positividad cimeres a los niveles aconseyaos. Coles mesmes, constatóse un aumentu de casos ente la población infantil (n’edá preescolar y en primaria). Y, a lo último, sigue habiendoxuna tasa elevada d’infecciones agudes que precisen hospitalización.

    El Gobiernu d’Asturies toma esta decisión con calter preventivu. Anque les afecciones graves menguaron la última selmana, ye precisu conocer la evolución mientres dellos díes más antes d’optar pola retirada de la obligatoriedá.

  • La campaña de vacunación va enllargase pa tolos grupos de riesgu mientres se caltenga la circulación de virus respiratorios

    La campaña de vacunación va enllargase pa tolos grupos de riesgu mientres se caltenga la circulación de virus respiratorios

    La Conseyería de Salú va enllargar la campaña de vacunación 2023-2024 pa toles persones incluyíes nos grupos de riesgu mientres se caltenga la circulación de virus respiratorios estacionales.

    La profilaxis ta indicada pa quien cumplieren 60 años y más, persones que viven en residencies y centros de discapacidá, menores de 60 años con condiciones de riesgu, pacientes con enfermedaes cróniques, muyeres embaranzaes y persones que conviven con otres que tienen un altu grau de inmunosupresión, amás de fumadores y trabayadores de servicios esenciales.

    Nun momentu nel que ta aumentando la circulación de virus respiratorios, les autoridaes sanitaries animen a vacunase a toos estos grupos. Les persones interesaes tienen de solicitar cita nel so centru de salú.

    Dende la segunda selmana d’avientu percíbese un medría de les infecciones respiratories agudes graves, sobre manera n’adultos, pero tamién n’edaes pediátriques. La tasa asítiase en daqué más de 31 casos por cada 100.000 habitantes, nel casu de la población adulta, y daqué más de 59 ente los pacientes n’edá pediátrica. La inmensa mayoría de los virus respiratorios aisllaos, cerca del 50%, son del gripe, que sigue creciendo, de la qu’aumenta la covid en determinaos sectores de población y baxa’l virus respiratoriu sincitial.

  • Salú inmuniza al 92,3% de los bebés nacíos dende’l 1 de abril frente al virus sincitial

    Salú inmuniza al 92,3% de los bebés nacíos dende’l 1 de abril frente al virus sincitial

    La Conseyería de Salú hai inmunizado yá a 2.212 neonatos frente al virus sincitial, principal causa de la bronquiolitis y d’infecciones respiratories en menores d’un añu y población adulta. En concretu, recibió la vacuna’l 92,3% de los 2.397 bebés nacíos dende’l 1 d’abril.

    Si se toma como referencia temporal el períodu a partir del 2 d’ochobre, fecha na qu’empezó la primer campaña d’esti tipu que se realiza n’Asturies, la vacunación llegó al 96,7% de los 326 neños nacíos de magar, esto ye, a 315. Estes cifres demuestren que l’aceptación foi prácticamente unánime: solo 11 families refugaron la inmunización.

    Nos primeres 25 díes de campaña, del 2 al 27 d’ochobre, aplicáronse 2.212 dosis a menores de seis meses y 70 más a neños y neñes mayores d’esa edá, un total de 2.282. El tratamientu ta indicáu para la infancia con altu riesgu d’enfermedá grave pol virus sincitial: bebés prematuros de menos de 35 selmanes, pacientes con cardiopatíes conxénites o daos a carecer bronquiolitis.

    Salú preve inmunizar a lo llargo d’esta temporada a cerca de 4.500 neños y neñes, ente los que s’inclúin los bebés nacíos dende abril y tolos que vaigan naciendo hasta’l 31 de marzu de 2024, col fin de completar un añu de vacunaciones. D’esta miente, espérase evitar cuatro de cada cinco ingresos por bronquiolitis.