Xixón al día

Categoría: Sporting

  • Carmona: «Sálese trabayando’l doble y corrixendo erros»

    Carmona: «Sálese trabayando’l doble y corrixendo erros»

    Carmona, capitán del Sporting, el xugador con más llargu percorríu de tiempu nes files roxiblanques, asumió con responsabilidá la situación actual del equipu. «Pasé por tou tipu de momentos y de esto sálese trabayando’l doble y corrixendo erros», espunxo. Asume que «tamos n’una dinámica negativa, con ocho goles en contra en trés partíos, y tenemos que volver ser defensivamente l’equipu que fuimos de primeres de temporada: sólidos y contundentes, pero non yá como responsabilidá de la llínea defensiva, sinón de toos».

    Apuesta por llograr un «cambéu de dinámica, que se llogra con resultancies», pa «poder siguir creciendo». Considera que «ye’l momentu de demostrar qu’ésti ye un bon vestuariu: yo confío nos mios compañeros y nel míster». Por eso señala Carmona que «tenemos que dar un pasu alantre y ufiertar toos más».

  • Álvaro Vázquez: «Tenemos que siguir siendo fuertes n’El Molinón»

    Álvaro Vázquez: «Tenemos que siguir siendo fuertes n’El Molinón»

    Álvaro Vázquez, quien se somitiera esti xueves a un trabayu específicu de descarga muscular, espera nun tener problemes para tar dafechu a disposición esti próximu sábadu: «La evolución ye bona». Sobro cómo s’atopa el Sporting, diz que «tranquil y con enfotu nel trabayu que tamos faciendo». No personal atópase tamién «bien contentu en Xixón», ensin que quiera marcase una cifra de goles a marcaro, porque «lo importante ye ayudar al equipu». «Tenemos que siguir siendo fuertes n’El Molinón«, espunxo, consciente del sofitu que ta teniendo l’equipu.

    Sobro la diferencia de xugar en casa a faelo fora, destaca que na Segunda los equipos fáense fuertes como locales y mentó’l casu del Fuenlabrada, que «lleva un añu invictu nel so campu». «La semana foi totalmente normal, lo que nun quitar pa que falemos y trabayemos na corrección d’erros». Considera que «la regularidá llógrase con trabayu y l’equipu ye consciente de lo que quier».

  • José Alberto: «Quedo cola conexón ente l’equipu y la grada»

    José Alberto: «Quedo cola conexón ente l’equipu y la grada»

    José Alberto confesóse «feliz» pola victoria del Sporting n’El Molinón. Tábalo por munchos motivos: «Quéodme cola conexón ente l’equipu y la grada, porque pa nós ye daqué perimportante; danos muncha fuerza y cuando se vive ye daqué increíble». Tamién lo taba porque «precisábamos esti trunfu pa que la xente garre enfotu y se suelte». Considera que l’equipu fixo «una gran primer parte y una bona segunda metá».

    Al respective de «la clave del partíu», espunxo que «tuvo na eficacia énte la portería rival, anque detrás hubo un gran esfuerzu, nel que l’equipu tuvo ordenáu y solidariu». Añedió que se vio la versión d’equipu qu’escuerre, pero repostió que yá se vio tamién n’otros alcuentros, lo qu’asocede que nesta ocasión más siguida».

    Cree que se vio un partíu guapu, pero tien claro que «hai que ser humildes, folgar y empezar a trabayar otra vegada, porque’l domingu tenemos otru alcuentru pa poder siguir sumando y ameyorando». Sobro otros partíos, respondió que ye’l mesmu equipu, pero «l’equipu rival ta tamién ende; nós plantegamos los partíos igual nunos casos y n’otros».

  • Mayra Olvera, nueva incorporación del Sporting Femenín

    Mayra Olvera, nueva incorporación del Sporting Femenín

    La xugadora internacional por Ecuador Mayra Olvera convirtióse na última incorporación del Sporting femenín. Mayra ye una mediocampista de 27 años que la pasada temporada militó nel CD Lugo – PM Friol, col que llogró l’ascensu a la nueva 2ª división. Con anterioridá, Mayra xugó tamién nel Espe, nel Rocafuerte, nel Club 7 de febreru y nel Independiente del Valle, d’Ecuador; na Deportiva Campera y nel CD Patriotes Boyaca de Colombia para acabar recalando n’España nel equipu lucense la pasada temporada 2018-2019.

    La nueva xugadora foi internacional con Ecuador en categoríes inferiores dende 2008. Llegó a xugar cola sub 17 y sub 20, hasta llegar a la selección absoluta. Con ella ya xugó la Copa del Mundu de Canadá 2015, y la Copa América hasta en 2010, 2014 y 2018.

  • El Sporting, pendiente de Javi Fuego

    El Sporting, pendiente de Javi Fuego

    Dellos xugadores del Sporting tornaron con golpes y sobrecargues de Málaga. El que nesti momentu caltien más pendientes a los servicios médicos del club ye l’estáu del todíu derechu de Javi Fuego, aquexáu d’un esguince. El sierense fai trabayu rexenerativu, al igual que los que más minutos xugaron en La Rosaleda, magar se somete a un extra de tratamientu y fisioterapia.

    El próximu partíu va ser el xueves n’El Molinón, a los siete de la tarde, cola visita del Almería. Pa esti alcuentru, José Alberto volverá tener a disposición a Unai Medina, que dexa atras los problemes musculares que-y fixeron ser baxa la pasada xornada. En xugando’l xueves, l’equipu roxiblancu apenes va tener tiempu más que pa pensar nel siguiente alcuentru, que va ser el domingu, a les dolce del mediudía en Fuenlabrada.

  • José Alberto: «Somos un equipu fiable»

    José Alberto: «Somos un equipu fiable»

    José Alberto defendió na sala de prensa de Mareo que’l Sporting ye «un equipu fiable, que sigue en construcción, pero con pasu firme, avanza». Añedió qu’énte’l Dépor gustó-y la so escuadra: «Fixo un gran partíu, qu’empañó’l gol; hubo más imprecisión na primer parte, porque fuimos atrevíos y ye un riesgu que tienes qu’asumir si quies actuar con esi estilu, pero la segunda foi una gran parte, y l’equipu esfrutó». Espunxo tamién que, como parte del fútbol, «cuando nun cierres un partíu, cuerres riesgos hasta’l final».

    Entiende que la visita a Les Palmes ye complicada, porque «tien una plantiya escelente» y sobro si puede ser un bon momentu p’allegar ellí, señaló que nunca lo ye cuando vas visitar a un gran equipu y máxime cola fuerza qu’esibe na so casa». Considera que tamién ta en construcción, en plena evolución: «El so xuegu ye intensu, ta bien definíu». «Agora mesmu prohibimos mirar la clasificación», señaló, en defensa del día ente día, del entrenamientu diariu, del partíu a partíu y de la selmana a selmana».

    José Alberto defendió a los xugadores que nun entraron na convocatoria: «Los que se queden tán trabayando perbién y pueden entrar en cualquier momentu; hai muncha competitividá nestos momentos».

  • Djuka renueva col Sporting hasta 2023

    Djuka renueva col Sporting hasta 2023

    Djuka robló l’ampliación del contratu que tenía como xugador del Sporting por otra campaña más. L’alcuerdu que tenía suscritu l’atacante serbiu hasta’l 30 xunu de 2022 estiéndese agora hasta’l 2023.

  • Babin: «Nel vestuariu somos una familia y eso treslládase al campu»

    Babin: «Nel vestuariu somos una familia y eso treslládase al campu»

    Nun cree Babin qu’hasta’l domingu l’equipu sintiérase presionáu por nun ganar hasta entós, anque cree que «la victoria apúrrenos confianza, especialmente agora que vamos a un campu tan difícil como’l del Uesca, que tien xugadores d’enforma nivel». Considera que «esta temporada la Segunda dio un pasu importante alantre, qu’hai equipos que se reforzaron perbién». Sicasí, alvierte de que «siempres hai dalguna sorpresa, porque’l presupuestu nun lo ye too».

    Respectu al pasáu domingu, considera que «l’equipu tuvo bien ensin y con pelota, xugó un partíu completu». Foi más allá cuando señaló que «facía tiempu que nun me divertía tanto xugando como na segunda metá, con un ambiente que ponía’l pelo de punta». Destaca que «nel vestuariu somos una familia, lo que se tresllada al campu». Sobre’l motivu, piensa qu’ayuda que «hai munchos asturianos, lo que xenera enraigono», de la mesma manera que tamién merez la so considerancia l’amiestu de veteranos y nuevos».

    Tien bones sensaciones nuna temporada na que se ve ilusionáu. Prevé coses bones, qu’asume «dende la responsabilidá de sabeme ún de los más veteranos del equipu».

  • El Sporting viaxa a tierres aragoneses

    El Sporting viaxa a tierres aragoneses

    Tres l’entrenamientu d’esta mañana en Mareo, a puerta zarrada, José Alberto dio a conocer la llista de convocaos con vistes al partíu del próximu domingu (12 hores) n’Uesca. Primeramente, el Sporting va faer escala esta nueche en Zaragoza, onde tien previstu entrenase nuevamente mañana a les 10.30 hores na Ciudá Deportiva del equipu capitalín.

    La relación d’espedicionarios quedó integrada por Damián Pérez, Marc Valiente, Borja López, Babin, Aitor García, Álvaro Vázquez, Carmona, Diego Mariño, Nacho Méndez, Molinero, Manu García, Unai Medina, Javi Fuego, Cristian Salvador, Pablo Pérez, Djuka, Pedro Díaz y Christian Joel.

  • Ternera Asturiana prorroga’l so compromisu col Sporting

    Ternera Asturiana prorroga’l so compromisu col Sporting

    El Conseyu Regulador de la I.X.P. Ternera Asturiana y el Sporting, dos de los más relevantes embaxadores d’Asturies, caltienen un estrechu llazu de collaboración, que se volvió a roblar esti xueves en Mareo cola estensión por una temporada más del so compromisu de patrociniu. Protagonizaron la firma del alcuerdu’l vicepresidente del club xixonés, Javier Martínez, y el vicepresidente del Conseyu Regulador, Rubén Fernández García.