La diseñadora xixonesa Carlota Barrera ta acabante de proclamase ganadora del Who’s on Next 2019, el mayor premiu de la moda española. Esti galardón tien una dotación económica de 100.000 euros y supón la inscripción automática na Asociación de Ceadores de Moda d’España (ACME), la posibilidá de participar na siguiente edición de Mercedes-Benz Fashion Week Madrid. Quedaron finalistes el diseñador sevillanu Ernesto Naranjo y la pareya madrilana Oteyza.
La directora de Vogue, Eugenia de la Torriente, señaló, en declaraciones recoyíes por Europa Press, que «el nivel d’esta octava edición de Who’s On Next foi estraordinariu, dende la primer selección hasta la final con trés propuestes netamente ganadores». Jean Paul Gaultier, como presidente del xuráu, foi l’encargáu de desvelar el nome de la ganadora.
Trátase d’un importante reconocimientu pa l’asturiana. Esti premiu va suponer un importante emburrión a la carrera profesional de Carlota Barrera, como ya asocediera con ganadores d’años anteriores como Marcela Mansergas, Juan Vidal, Maria Ke Fisherman, ManéMané, Moisés Nieto, Leandro Cano y Palomo Spain.
Carlota Barrera formóse nel Reinu Xuníu. Graduada na London College of Fashion y formóse profesionalmente en delles cases de moda de prestixu. En xunetu presentó la colección masculina ‘El Matador y el Pescador’ pa esti branu coincidiendo col llanzamientu de la so marca. El sellu esplora figures modernes pa crear colecciones qu’amuesen les técniques clásiques de confección y artesanía con un diseñu nuevu. Les prendes funden los conceutos de patrimoniu y luxu que los imbúin de la estética contemporanea del home modernu.
TSK va encargase de construyir en Marruecos la que va ser la planta solar más avanzada del mundu. El consorciu formáu pola eléctrica francesa EDF, la compañía Masdar d’Abu Dhabi y l’empresa marroquina Green of Africa escoyó a la inxeniería con sede en Xixón pal diseñu y construcción d’esta novedosa planta solar. La obra va suponer una inversión que perpasa los 700 millones d’euros.
Cinco consorcios internacionales fueron preseleccionaos na llicitación pal proyectu híbridu que combina enerxía solar fotovoltaica y termosolar (CSP). Foi la ufierta del consorciu EDF-MASDAR-Green of Africa la que resultó ganadora.
La obra va suponer una inversión que perpasa los 700 millones d’euros
El proyectu va cuntar col financiamientu d’entidaes como’l Bancu Alemán de Desenvolvimientu KFW, el Bancu Mundial, el Bancu Africanu de Desenvolvimientu (BAD), el Bancu Européu d’Inversiones (BEI), l’Axencia Francesa de Desenvolvimientu, la Comisión Europea y’l Clean Technology Fund.El proyectu consta d’una planta híbrida fotovoltaica termosolar que va sumar 800 MW de potencia. Diseñada dafechu por TSK, va ser la primera nel mundu qu’integre les dos tecnoloxíes nuna única instalación. Per un llau, la tecnoloxía termosolar, que permite xenerar eletricidá en cualquier momentu del día d’una manera xestionable, al tener la capacidá d’almacenar enerxía a gran escala. La tecnoloxía fotovoltaica, pela so parte, ufre una gran competitividá en costu d’inversión y caltenimientu. La planta va poder xenerar eletricidá les 24 hores del día a un costu que-y permite competir coles enerxíes convencionales.
TSK cerró l’añu con unes vientes de 1.107 millones d’euros. D’esta manera, la compañía xixonesa convirtióse nuna de les principales empreses d’inxeniería y construcción del sector. La so actividá internacional representa más del 96% de les vientes. Anguaño atópase executando proyectos en más de trenta países en cuatro continentes.
El grupu de folk avilesín Tejedor dexa los escenarios depués de más de dos décades de trabayu, cuatro discos y delles xires internacionales. «Baxamos el telón depués de bien d’años n’activo, munchos bonos momentos y grandes amigos atopaos pel camín», anunció la banda nuna publicación na so páxina de Facebook.
«Agradecemos-yos munchísmo a caún de los que dalguna vez se molestaron en sentir la nuestra música, a toos esos organizadores que nos dieron la oportunidá de xubir al escenariu nesos más de 600 conciertos, a tolos músicos que nos fixeron medrar, lletristes, arreglistes, a toos esos técnicos que nos lo punxeron más fácil y n’especial a los más importantes, la nuestra xente más averao», escriben.
Tejedor dexa los escenarios depués de más de dos décades dedicaos dafechu a la música tradicional d’Asturies. El grupu nació en 1995 de la mano de los hermanos José Manuel, Javier y Eva Texedor. Nesi momentu entamaron a componer el so propiu repertoriu. Cuatro años más tarde debutaron con ‘Texedores de Suaños‘, discu producíu pol músicu escocés Phil Cunningahm. Depués llegaron ‘Llunáticos‘ (2003), ‘Música na maleta‘ (2006) y ‘Positivu‘ (2011), esti últimu trabayu ya ensin Eva Tejedor.
Nos últimos años Texedor participó nos más prestixosos Festivales Europeos, como’l Festival Intercélticu de Lorient en 1999, 2003 y 2007,. Tamién percorrieron mediu planeta con conciertos en países estremaos como Estaos Xuníos, Canadá, México, Venezuela, Kuwait, Francia, Italia, Portugal, Holanda, Bélxica, Escocia ya Irlanda. Amás, fueron teloneros de Van Morrison en Valencia y Xixón y de Sinead O’Connor en Lorient.
La escritora estadounidense Siri Hustvedt (Northfield, Minnesota, EE. UU., 19 de febreru de 1955) foi galardonada col Premiu Princesa d’Asturies de les Lletres 2019, según fixo públicu güei n’Uviéu‘l xuráu encargáu de la so concesión. Novelista, ensayista y poeta, d’oríxenes noruegos, llicenciada n’Hestoria nel St. Olaf College, doctoróse en 1986 en Lliteratura Inglesa pola Universidá de Columbia con una tesis sobre Charres Dickens na que yá apaecen los sos autores de referencia, ente otros, Kierkegaard, Emile Benveniste, Roman Jakobson, Mikhail Bakhtin, Freud, Lacan, Mary Douglas, Ricoeur o Julia Kristeva. Esperta en neurociencia y psicoanálisis, la so primer publicación foi un poema en The Paris Review. En 1982 publicó una colección de poesía, ‘Reading to You’. Conoció a Paul Auster –Premio Príncipe d’Asturies de les Lletres 2006– nuna llectura de poemes en 1981 y casáronse al añu siguiente.
Estudiosa ya intelectual que s’ocupa de les cuestiones fundamentales de la ética contemporanea y l’epistemoloxía y conocida tamién pola so militancia feminista, contribuyó cola so obra al diálogu interdisciplinariu ente les ciencies y les humanidaes. Publicó ensayos y artículos en revistes académiques y científiques, ente otres en Contemporary Psychoanalysis, Seizure: European Journal of Epilepsy, Neuropsychoanalysis y Clinical Neurophysiology. La so colección de 32 conferencies y artículos pronunciaes y publicaos respectivamente ente 2005 y 2011, Living, Thinking, Looking, 2012 (Vivir, pensar, mirar, 2013) ye una amuesa del so ampliu y fondu aprendizaxe en delles disciplines. Nellos desenvuelve dalgunos de les sos temes preferíes, rellacionaos cola lliteratura, la filosofía, la psicoloxía, el psicoanálisis y les neurociencies.
Conocida tamién pola so militancia feminista, contribuyó cola so obra al diálogu interdisciplinariu ente les ciencies y les humanidaes
Traducida a más de trenta idiomes, Hustvedt publicó en 1992 la so primer novela, ‘The Blindfold’ (‘Los güeyos vendaos’) y cola so tercer obra, ‘What I Loved’ (‘Too cuanto amé’, 2003) consiguió sonadía internacional. En 2010 publicó l’ensayu ‘The Shaking Woman or A History of My Nerver’ (‘La muyer trémbole o la hestoria de los mios nervios’, 2010). Bien interesada tamién pola pintura, impartió charres sobro esta tema nel Muséu del Prau y nel Metropolitan Museum of Art de Nueva York y publicó un volume d’ensayu, ‘Mysteries of the Rectangle: Essays on Painting’ (‘Los misterios del rectángulu’, 2005). Otres obres sos son ‘The Enchantment of Lily Dahl’ (‘El conxuru de Lily Dahl’, 1996), ‘The Sorrows of an American’ (‘Escoyía pa un americanu’, 2008), ‘The Summer Without Men’ (‘El branu ensin homes’, 2011), ‘The Blazing World’ (‘Un mundu esllumante’, 2014), ‘Reading to You’, 1983 (‘Lleer pa ti’, 2007), ‘Yonder’ (‘En llontanza’, 1998) y ‘A Plea for Eros’, 1997 (‘Una súplica pa Eros’, 2005). El so últimu ensayu publicáu ye ‘A Woman Looking at Men Looking at Women’, 2016 (‘La muyer que mira a los homes que miren a les muyeres’, 2017).
Doctora honoris causa pola Universidá Stendhal de Grenoble (2015), en 2004 recibió’l Premiu de los Llibreros de Quebec por Tou cuanto amé y en 2012, el Premiu Internacional Gabarrón de Pensamientu y Humanidaes gracies a el so llabor investigador y les sos idees sobro filosofía, neurociencia y psicoloxía.
El xuráu tuvo presidíu por Santiago Muñoz Machado ya integráu por Xosé Ballesteros Rey, Xuan Bello Fernández, Blanca Berasátegui Garaizábal, Jordi Gracia García, Lola Larumbe Doral, Antonio Lucas Herrero, Carmen Millán Grajales, Rosa Navarro Durán, Leonardo Padura Fuentes, Pablo Remón Magaña, Laura Revuelta Sanjurjo, Ana Santos Aramburo, Íker Seisdedos García, Diana Sorensen, Juan Villoro y Fernando Rodríguez Lafuente (secretariu).
Los Premios Princesa d’Asturies tán destinaos a galardonar «el llabor científicu, técnicu, cultural, social y humanitariu realizáu por persones, instituciones, grupos de persones o instituciones nel ámbitu internacional”. Conforme a estos principios, el Premiu Princesa d’Asturies de les Lletres concédese «al llabor de cultivu y perfeccionamientu de la creación lliteraria en tolos sos xéneros».
Nesta edición allegábense un total de 28 candidatures procedentes de 17 países. Este foi’l quintu de los ocho Premios Princesa d’Asturies que se conceden anguaño, en que cumplen el so trixésimu novena edición. Enantes fueron otorgaos el Premiu Princesa d’Asturies de les Artes al dramaturgu británicu Peter Brook, el de Comunicación y Humanidaes al Muséu Nacional del Prau, el de Cooperación Internacional al matemáticu ya inxenieru estadounidense Salman Khan y Khan Academy y el de los Deportes a la esquiadora estadounidense Lindsey Vonn. Nes próximes selmanes van fallase los correspondientes a Ciencies Sociales, Investigación Científica y Técnica y Concordia. Caún de los Premios Princesa d’Asturies ta dotáu con una escultura de Joan Miró, un diploma, una insinia y 50.000 euros.
El divulgador científicu Eduard Punset morrió esti miércoles en Barcelona a los 82 años d’edá. Foi la so propia familia quien comunicó la noticia nel perfil de Twitter del economista, xurista, periodista y políticu: «Nel día de güei, 22 de mayu, finó en Barcelona, tres una una llarga enfermedá, Eduard Punset». Al traviés d’esta rede social, la so familia quixo rendí-y’l so propiu homenaxe. «A lo llargo de tola so vida dedicó’l so magníficu talentu y enerxía a divulgar y compartir idees y conocencies, sofitándose na so insaciable curiosidá y el so eternu optimismu».
y homenaje a quien a lo largo de toda su vida dedicó su formidable talento y energía a divulgar y compartir ideas y conocimientos, apoyándose en su insaciable curiosidad y su eterno optimismo. pic.twitter.com/23NVhZzENG
Eduard Punset foi Conseyeru d’Economía y Finances de la Xeneralidá de Cataluña ente 1978 y 1980 y darréu Ministru pa les Relaciones coles Comunidaes Europees d’España, cargu que sería depués suprimíu. Tamién foi diputáu per Barcelona nel Congresu y ocupó un escañu nel parlamentu européu ente 1987 y 1994. Algamó gran popularidá como director y presentador del programa ‘Redes‘ de La 2 de TVE, onde mientras más d’una década se trataben dellos temes científicos, como socioloxía, medicina, psicoloxía, bioloxía y astronomía.
La diputada del PSOEMeritxell Bater foi proclamada presidenta del Congresu de los Diputaos de la XIII Llexislatura, al algamar, col sofitu de 175 diputaos, la mayoría necesaria na segunda vuelta, na que compitió cola so antecesora nel cargu, Ana Pastor, al nun llograr la mayoría absoluta necesaria na primer votación.
La Sesión Constitutiva del Congresu de los Diputaos empezó esti martes a les diez de la mañana y foi conducida, acordies con los artículos 2 a 4 del Reglamentu de la Cámara, por una Mesa d’Edá presidida pol diputáu más vieyu, Agustín Javier Zamarrón, diputáu del PSOE, y coles más nueves, Marta Rosique, de Esquerra Republicana, y Lucía Muñoz, de Xuníes Podemos, como como secretaries.
Los diputaos fueron llamaos unu a unu per orde alfabéticu para empezar la primera votacion, para la presidencia de la Cámara. Esta votación ye secreta y n’urna. Cada parllamentariu escribió un nome y depositó la so papeleta. Tres el recuentu, les diputaes más votaes fueron Meritxell Batet y Ana Pastor, anque nenguna d’elles llogró la mayoría absoluta necesaria (176 votos) para ser escoyida nesta primer ronda.
Na segunda vuelta na que los diputaos teníen qu’optar ente les dos diputaes más votaes, acordies con el procedimientu establecíu nel artículu 37 del Reglamentu de la Cámara, Meritxell Batet foi proclamada presidenta al llograr el sofitu de 175 diputaos. Ana Pastor foi sofitada por 125 diputaos. La elección de los cuatro vicepresidentes realizar con una única votación, na que cada diputáu escribió un solu nome y resultaron escoyíos, por orde socesivu, María Gloria Elizo, Alfonso Rodríguez Gómez de Félix, Ana Pastor y José Ignacio Prendes, los cuatro más votaos.
El Congresu de los Diputaos celebra esti martes el Plenu de constitución de la XIII Legislatura. La sesión, na que s’escueye a la presidencia y al restu de miembros de la mesa de la cámara, entamó cola imaxe de los nuevos diputaos de Vox ocupando los escaños nos qu’habitualmente se sienten los representantes del PSOE. Santiago Abascal, líder de la formación, sentóse na siella que tradicionalmente ocupa la vocera del grupu socialista, Adriana Lastra.
Los venticuatro diputaos de la formación d’ultraderecha accedieron al hemiciclu a les 8.30 horas pa garrar los escaños situaos a la izquierda de la mesa. El diputáu del PSC, José Zaragoza, trató d’evitar la xugada de los representantes de Vox y llogró sentase ente Santiago Abascal e Iván Espinosa de los Monteros.
Miguel Montes morrió la pasada madrugada, víctima d’una llarga enfermedá oncolóxica. Ocupara prácticamente tolos posibles cargos deportivos nel Sporting, dende futbolista hasta entrenador del filial y del primer equipu, según los de máximu responsable de Mareo y de la secretaría técnica.
Miguel Ángel Montes naciera n’Uviéu‘l 28 de febreru de 1939. Como futbolista, defendió los colores del Atlánticu, Revillaxixéu, Hispania, Siero, Sporting, Las Palmas y Real Oviedo. Pol Sporting fichó en 1959 y xugó nuna primer etapa hasta 1961, cuando tuvo que realizar el serviciu militar, tiempu nel que militó na UD Las Palmas. Tornó al añu siguiente para siguir como sportinguista hasta 1969. Foi’l xugador del Sporting qu’intervieno en más partíos en Segunda División, 217. En total, xugó como sportinguista 259 partíos y marcó 68 goles; 224 en Lliga y 35 en Copa.
Como técnicu entrenó al Xixón Industrial, Avilés, Llangréu, Zamora, Palencia, Lleonesa, Arosa y Endesa de Ponferrada. Dirixió al Sporting Atléticu en 1984, foi director de la Escuela de Fútbol de Mareo en 1986, secretariu técnicu dende 1988 hasta 1990 y entrenador del primer equipu dende finales de la campaña 1996-97 hasta empiezos en 1997-98. Foi-y concedida la insinia d’oru de l’Asociación de Veteranos.
El funeral de cuerpu presente por Miguel Montes tendra llugar na Ilesia Parroquial del Corazón de María, a les cinco de la tarde de mañana martes y, de siguío, el so treslláu al Tanatoriu de Xixón-Cabueñes, onde los sos restos mortales van ser incineraos. El veloriu ta asitiáu na sala 8 del Tanatoriu Xixón-Cabueñes.
La decimosesta etapa de La Vuelta, que va tener llugar el 9 de setiembre, va rematar nel altu de La Cubilla (Ḷḷena), tres un percorríu de 155 kilómetros que va empezar en Pravia y qu’inclúi dos puertos de tercer categoría (altos de Mallecina y de La Cabruñana) y trés de primera (puertu de Marabio, La Cobertoria y La Cubilla).
El director xeneral de Comerciu y Turismu, Julio González Zapico, que presentó güei la carrera xuntu cola alcaldesa de Ḷḷena, Gema Álvarez, y el director de La Vuelta, Javier Guillén, destacó la importante promoción qu’ufierta al Principáu una competición col prestíu y espardimientu de La Vuelta. «Contribúi a afayar pal gran públicu enclaves que se converten n’auténticos iconos pal ciclismu, daqué qu’esperamos qu’asoceda tamién cola Cubilla», apuntó.
Los itinerarios asturianos de La Vuelta 2019 entienden zones de mariña y monte, urbanes y rurales, del oriente, del centru y del occidente del país. Les trés etapes van desenvolvese los díes 7, 8 y 9 de setiembre colos siguientes percorríos: San Vicente de la Barquera-Uviéu, Tinéu–Santuariu del Xardón y Pravia–alto de La Cubilla.
