Tolos servicios de tresporte públicu n’autobús al aeropuertu d’Asturies dende Xixón, Uviéu, Avilés y Castrillón tan suspendíos dende esta mañana. Esta decisión tomóse nel actual contestu de supresiones masives de rutes y frecuencies aérees como midíes de contención del coronavirus COVID-19. La declaración d’estáu d’alarma obliga a llindar la movilidá a desplazamientos.
El serviciu de tresporte públicu n’autobús al aeropuertu volverá tar operativu en cuanto recupérese la normalidá. Dende la pasada selmana asocediéronse les cancelaciones de vuelos de resultes de la crisis sanitaria. El númberu d’usuarios baxó de casi’l 90% d’un periodu normal al 27% del pasáu domingu. Les compañíes qu’operen n’Asturies viéronse obligaes a realizar axustes énte esta situación escepcional. Asina, Vueling, que tenía programaes 36 frecuencies selmanales dende Asturies preve una operativa llindada na ruta a Barcelona so revisión diaria. Esti itinerariu nun tien vuelos programaos hasta’l llunes 23 de marzu.
Pela so parte, Air Europa, que realizara un primer axuste de la so ruta a Madrid pasando de los cuatro vuelos diarios a dos, va cancelar temporalmente esta llínea a partir de mañana. Polo que respecta a Iberia, qu’opera hasta cinco vuelos diarios con Madrid, va caltener namás unu o dos vuelos, mientres que Volotea canceló tamién la mayor parte de los viaxes mientres marzu.
