En febreru del 1986, el qu’esto escribe asoleyó un llargu artículu nuna permodesta publicación periódica n’asturianu (Arfueyu) entituláu “L’Asturianu: llingua oficial”. En talu artículu reclamábase la oficialidá plena pa la llingua asturiana sofitándose na Constitución española; y yera la primera vegada que se facía tala demanda con argumentos xurídicos, más p’allá del voluntarismu militante y utópicu.
Ensin saber cómo, l’artículu llegó a los círculos dirixentes del PSOE asturianu; y el Gobiernu que per aquel entós presidía D. Pedro de Silva encargó-y d’esmenu un informe a un xurista del so partíu (el profesor Tolivar Alas) pa “desmontar” l’argumentación ellí afitada.
L’informe del profesor Tolivar paez que tranquilizó al PSOE y al so Gobiernu; pero otros informes que vinieron darréu, encargaos pola Academia de la Llingua Asturiana, sofitaron el valir de l’argumentación constitucionalista pa la demanda d’oficialidá.
De magar entós, les munches manifestaciones que se ficieron a favor de la oficialidá llevaron siempres, na pancarta de cabecera, l’entítulu d’aquel artículu: “L’asturianu, llingua oficial”; y el discursu de les organizaciones entamadores cincaron una y otra vuelta que’l pidimientu d’oficialidá pa la nuesa llingua ampáralu dafechu la Constitución española en vigor.
Hebio avances perimportantes de magar entós: l’aprobación d’un marcu llegal européu (la Carta Europea de les Llingües Rexonales y Minoritaries, soscrita pol Estáu español), per un llau; la promulgación de la Llei d’Usu y Promoción del Asturianu, per otru; los bultables avances na normativización y enseñanza del idioma, frutu del trabayu de l’Academia de la Llingua, los escritores y les instancies educatives; ansina como tamién la tímida presencia del asturianu nos medios de comunicación, too ello fizo que la mayoría de la sociedá asturiana vea anguaño como una anomalía democrática y social que la nuesa llingua seya la única nel Estáu español que sigue ensin plena oficialidá, enrestrando 40 años de retrasu y discriminación en comparanza coles demás llingües españoles.
Ansina que, nestos díes nos que rescampla la incapacidá de los partíos políticos con representación na Xunta Xeneral pa pactar una mínima reforma del Estatutu d’Autonomía que, ensin afondar daveres nel autogobiernu, corrixa polo menos l’anomalía democrática siñalada y el desamparu llegal de los falantes d’asturianu y eonaviego, nun ta de más remembrar l’argumentación constitucionalista formulada fai más de 35 años; una argumentación qu’esclaria los drechos llingüísticos del conxuntu los españoles y, poro, tamién de los asturianos.
De fechu, la Constitución española, aprobada en referendum nel añu 1978, ye mui clara en materia de drechos llingüísticos: Nel so Preámbulu Xeneral (nel que se sopelexa “l’espíritu” de la Llei de lleis), dizse testualmente que “La nación española (…) proclama la so voluntá de(…): Protexer a tolos españoles y pueblos d’España nel exerciciu de los drechos humanos, les so cultures y tradiciones, llingües ya instituciones (…)”.
Esto ye: la protección del usu de la llingüa propia ye un drechu individual (“tolos españoles”), y tamién colectivu (“y pueblos d’España”), proclamáu pola Constitución dende’l mesmu Preámbulu Xeneral y desendolcáu nel so Artículu 3, que reza ansina:
Artículu terceru:
3.1.- El castellán ye la llingua española oficial del Estáu. Tolos espoañoles tienen el deber de conocela y el drechu d’emplegala.
3.2.- Les demás llingües españoles serán tamién oficiales nes sos respectives Comunidaes Autónomes d’alcuerdu colos sos Estatutos.
Ye dicir, la Constitución española dispón que los Estatutos d’Autonomía de les Comunidaes Autónomes con llingua propia distinta del castellán reconozan la oficialidá de “les demás llingües españoles” nel ámbitu territoral que-yos correspuende. Tien de quedar claro que la fórmula “serán tamién oficiales” afita un mandáu y una certeza, non una simple posibilidá optativa, pos nesi casu la redacción del artículu sería “podrán ser tamién oficiales”.
Nun podía ser d’otra manera, pos l’Artículu 14 de la Carta Magna afita la plena igualdá de tolos españoles énte la Llei; polo que, si unos españoles tuvieren garantizáu’l drechu al usu oficial de la so llingua (los de llingua castellana) y otros españoles non, entós taría vulnerándose a les clares el citáu Art. 14, que ye un artículu fundamental del Estáu democráticu de drechos.
Y, de fechu, les Comunidaes Autónomes con llingua propia distinta del castellán cumplieron pa col mandáu constitucional, recoyendo espresamente nel articuláu de los sos Estatutos la plena oficialidá de les sos llingües propies; menos la Comunidá Autónoma asturiana, que birló’l cumplimientu del mandáu constitucional por mediante una fórmula de protección voluntarista que torga a los asturianos el plenu exerciciu de los drechos llingüísticos que consagra la Constitución, y que mos causa un agraviu comparativu que s’allonga nel tiempu de manera inxusta, inxustificada ya insufrible.
Ye ñidio, polo yá sopelexao, que posicionase pa torgar la oficiualidá de la llingua asturiana ye posicionase pa torgar el cumplimientu de la Constitución española en vigor. Ye dicir, quien ta a la escontra de la oficuialidá (del asturianu o de cualaquiera otra llingua española) ta a la escontra de la Constitución. D’ehí vien l’encabezamientu d’esti artículu.
Nun ye sorpresa denguna que partíos políticos como VOX o Ciudadanos se posicionen a la escontra de la oficualidá del asturianu: nun oculten el so noxu escontra l’Estáu autonómicu, que tamién consagra la Constitución, nin la so intención de baltalu.
Pero qu’un partíu como’l PP, que se diz defensor incondicional de la Constitución y que gobierna en comunidaes con llingua propia oficial, como la vecina Galicia, se ponga a la escontra de la oficialoidá del asturianu (escontra l’espíritu y la lletra de la Constitución, como vimos) rescampla como una absoluta incongruencia y una auténtica perversión ideolóxica y política.
Mención aparte merez el casu de FORO que, tres redefinise como partíu rexonalista (y, polo tanto, se supón que centráu na defensa de lo asturiano) paez que ta dispuestu a torgar el posible alcuerdu d’amplia mayoría de 3/5 que faría posible la reforma estatutaria y la oficialidá del asturianu y del eonaviegu.
Tala postura (que nun fai otro que llograr que VOX faiga la so política por mediante un axente teledirixíu al que va comer orgánica y electoralmente darréu), amás de ser una traición a bona parte de la so militancia y electoráu, desvela una bultable ceguera política, pos va ser el más flacu favor que FORO puede facer a la so yá de por sí difícil sobrevivencia como partíu.
Seya como fuere, el Presidente Adrián Barbón y el so partíu faríen bien dándo-y forma y metiendo a trámite parllamentariu la so propuesta de reforma del Estatutu d’Autonomía, forzando a los demás partíos a votar a favor o a la escontra de la Constitución; ye dicir, a favor o a la escontra de la oficialidá; y allá ellos cola so responsabilidá histórica y el so réditu electoral. Si nun lo fai, la so credibilidá política va mermar enforma énte munchos miles d’electores; yá que, nesti casu, “una retirada a tiempu” va vivise como una derrota; demientres que lluchar ensin desmayu hasta l’últimu minutu pue vese como un avictoria moral polos que defienden/defendemos un drechu constitucional inrrenunciable.
Y ye qu’esta triba de batalles gánense cuando, cargaos de razón, caltenemos la nuesa posición nel tiempu ensin dar un pasu atrás, poniendo n’evidencia la floxera argumental del alversariu y aguiyando les sos contradiciones internes.
Ánimu, entós, y p’alantre.
