Xixón al día

Etiqueta: Asturies

  • Asturies va movilizar más de 200 millones en polítiques de vivienda hasta 2026

    Asturies va movilizar más de 200 millones en polítiques de vivienda hasta 2026

    El Gobiernu d’Asturies va destinar más de 200 millones a polítiques de vivienda hasta 2026, col fin de facilitar l’accesu de la población a esti recursu básicu, avanzar na meyora de los edificios, tantu públicos como privaos; fomentar l’arriendu ya impulsar la eficiencia enerxética y l’accesibilidá universal, ente otros oxetivos prioritarios.

    P’avanzar escontra estos fines, l’Executivu autonómicu aprobó güei la firma d’un conveniu de collaboración col Ministeriu de Tresportes, Movilidá y Axenda Urbana que va dexar desenvolver el Plan d’Accesu a la Vivienda y va movilizar ayudes per valor de 56,2 millones. A la partida económica prevista nesti plan suman otros 13,2 millones destinaos al Bono Arriendu Nuevu, una subvención estatal que facilita l’accesu a la vivienda y l’emancipación y que n’Asturies va beneficiar a más de 1.700 persones d’hasta 35 años.

    Per otra parte, tamién nel ámbitu de la vivienda, los fondos europeos NextGenerationUE representen hasta agora pal Principáu les siguientes cantidaes:

    • 47,6 millones del Programa de Rehabilitación Enerxética d’Edificios (PREE) pa rehabilitación de fachaes.
    • 800.000 euros del Programa de Rehabilitación Enerxética d’Edificios 5.000 (PREE 5.000) pa edificios en conceyos de menos de 5.000 habitantes.
    • 27,9 millones p’actuaciones de rehabilitación d’edificios a nivel de barriu.
    • 12,1 millones pa la promoción de vivienda algamadiza en suelu públicu.
    • 1,4 millones p’acciones d’accesibilidá en viviendes del parque públicu.
    • 33,7 millones p’actuaciones de rehabilitación d’edificios y a nivel de barriu.
    • 12,3 millones pa la promoción de vivienda algamadiza en suelu públicu.

    D’últimes, van movilizase recursos por un montante que supera los 205 millones pa siguir avanzando en polítiques prioritaries pa los sectores más vulnerables de la población.

  • El Conseyu de Gobiernu de la Universidá d’Uviéu aprueba 65 places nueves de profesoráu

    El Conseyu de Gobiernu de la Universidá d’Uviéu aprueba 65 places nueves de profesoráu

    El Conseyu de Gobiernu de la Universidá d’Uviéu aprobó, na sesión celebrada esta mañana, la Ufierta Pública d’Empléu 2021 y delles places entá pendientes d’Ufiertes Públiques d’Empléu previes (de 2019 y 2020) En concretu, aprobóse un total de 65 places, partíes de la siguiente manera:

    – 13 places de Catedráticu Universitariu de la OPE 2021

    – 14 places de Titular Universitariu (13 d’elles de la OPE 2021 y 1 plaza por discapacidá de la OPE 2019)

    – 33 places de Profesor Contratáu Doctor (30 d’elles de la OPE 2021 y 3 places por discapacidá de la OPE 2020 y de la OPE 2021)

    – 3 places de Titular Universitariu + I3 (1 plaza de la OPE 2020 y 2 places de la OPE 2021)

    – 2 places de Profesor Contratáu Doctor + I3 de la OPE 2020

    Amás, el máximu órganu de decisión universitariu dio’l vistu bonu a la primer convocatoria de bolses d’empléu temporal de la Universidá d’Uviéu, qu’implica la puesta en marcha de 119 concursos. “Esta convocatoria surde tres l’aprobación, en Conseyu de Gobiernu del 29 d’abril, del procedimientu para la ellaboración de bolses d’empléu temporal de personal docente ya investigador, que s’articulen como un preséu al que puede recurrise para atender les necesidaes docentes urxentes n’árees que les sos circunstancies enzanquen la cobertoria de vacantes”, esplicó Pedro Alonso, vicerrector de Polítiques de Profesoráu.

    Per otru llau, el Conseyu tamién aprobó la propuesta de cambéu del Primer Conveniu del Personal Llaboral de la Universidá d’Uviéu, que’l so conteníu cuenta col vistu bonu del comité d’empresa. Según manifestó’l xerente, José Antonio Díaz Llagu, “esti cambéu ye un pasu más para avanzar nel procesu de estabilización de places de personal temporal nel que s’atopa somorguiáu la institución académica”.

  • Podemos señala que los convenios de La Vega vulneren la llegalidá

    Podemos señala que los convenios de La Vega vulneren la llegalidá

    Podemos Asturies reclamó esti vienres al Ministeriu de Defensa que devuelva los terrenes de l’antigua fábrica de La Vega n’Uviéu “porque nun-y pertenecen”. Asina lo aseguraron en rueda de prensa’l voceru parlamentariu de la formación morada, Rafael Palacios, y la vocera municipal de Somos Uviéu, Ana Taboada. Y que l’alcuerdu robláu por Barbón, Canteli y Margarita Carbayos “vulnera la llegalidá”.

    Amás, manifestaron que “por más que se-y pida a Defensa qu’acredite la titularidá, nun hai nin documentu, nin escritura que lo demuestre”. Nesi sentíu, Palacios pidió que’l ministeriu “debería non solo devolver La Vega a la ciudadanía sinón pagar pelos años d’abandonu d’esti espaciu”. Dende la formación morada espliquen que “vamos faer tolo posible para paralizar un conveniu que va contra los intereses de la ciudadanía” y, n’ese sentíu, anunciaron que tán trabayando n’estudiu xurídicu que revierta estos planes. Nesa llínea, la edil morada afirmó que Defensa “inscribió apocayá esos terrenes”.

    El voceru parlamentariu de Podemos Asturies, llamentó la falta d’información per parte de les alministraciones “en tolos anuncios que van faciendo en prensa sobre esti espaciu”. Y criticó que “los planes pa La Vega seríen un desastre pa la ciudá. El futuru nun puede destruyir la hestoria pa beneficiu d’unos pocos que, amás, son los de siempre”. Y preguntó a la conseyera de Cultura del Gobiernu asturianu “si va siguir con esta desdexación de funciones col patrimoniu asturianu”.

    A lo último, Ana Taboada pidió a Adrián Barbón, a Margarita Carbayos y a Alfredo Canteli,
    que “recapaciten” y que “paralicen unos planes que van en contra de los intereses xenerales”.

  • España Verde aspira a convertise nel mayor corredor d’ecoturismu d’Europa

    España Verde aspira a convertise nel mayor corredor d’ecoturismu d’Europa

    Les cuatro comunidaes que conformen la España Verde decidieron presentar un proyectu conxuntu que-yos dexe convertise nel mayor corredor d’ecoturismu d’Europa. Pa ello, van ufiertar esperiencies turístiques sostenibles dientro de los espacios naturales protexíos de Galicia, Asturies, Cantabria y Euskadi.

    Esta iniciativa, que va allegar al programa Experiencia Turismo España, representa una inversión d’alredor de 800.000 euros que se va destinar a la creación d’una rede d’axentes collaboradores nel territoriu, la formación a empreses y xestores de recursos, el diseñu y creación d’esperiencies, productos y servicios basaos en modelos verdes y sostenibles, según la producción de recursos pa llevar a cabu l’espardimientu del proyectu. Pa la so execución, España Verde va cuntar col trabayu de l’Asociación d’Ecoturismu d’España.

    Los representantes de les cuatro comunidaes tomaron esta iniciativa ayeri en Llaboral Ciudá de la Cultura (Xixón). Trátase de “el mayor apueste turísticu plantegada pola España Verde nel so conxuntu nos sos más de 30 años de vida”, según manifestó la viceconseyera de Turismu del Gobiernu d’Asturies, Graciela Blanco. Nel alcuentru, tamién participaron la directora xeneral de Turismu de Cantabria, Marta Barca; el viceconseyeru de Comerciu y Turismu d’Euskadi, Jesús María García de Cos; y la directora de Turismu de Galicia, María Nava Castro, acompañaos de técnicos de turismu y marketing de les cuatro comunidaes.

    Na xunta avanzóse tamién nel programa d’acciones promocionales d’España Verde, qu’en 2022 va cuntar con un presupuestu de 400.000 euros (el doble que n’años precedentes). Viaxes de periodistes, blogueros y turoperadores, campañes dixitales, asistencia a feries especializaes y la edición de la nueva guía La Gran Ruta de la España Verde son dalgunes de les acciones que se van llevar a cabu anguaño pa reactivar el turismu internacional nes cuatro comunidaes. Naturaleza, senderismu y cicloturismu destaquen ente les propuestes temátiques nes que se desenvuelve’l programa operativu d’España Verde pal presente añu.

  • 15 rutes pa percorrer el patrimoniu cultural y natural asturianu col programa D’itinerarios pol Patrimoniu

    15 rutes pa percorrer el patrimoniu cultural y natural asturianu col programa D’itinerarios pol Patrimoniu

    15 rutes para percorrer el patrimoniu cultural y natural asturianu conformen el programa D’itinerarios pol Patrimoniu qu’empieza esti sábadu 12 de marzu. Esti programa busca dende 2018 visibilizar y facilitar l’accesu del públicu al numberosu y variáu patrimoniu presente en tola xeografía asturiana.

    La celebración de los 1.300 años de la Batalla de Cuadonga y del Xacobéu tienen especial protagonismu nestos percorríos que se van desenvolver hasta’l 18 de xunu tolos sábados (sacante’l día 16 d’abril). Asina, los participantes van poder visitar el Santuariu y la Basílica de Cuadonga y Cangues d’Onís o enfusase nos conceyos de Cabrales y el Valle Altu de Peñamellera, amás de percorrer monumentos y conceyos que’l pelegrín atopa al so pasu nes distintes rutes xacobees que traviesen el Principáu. Tamién va haber rutes polos Valles del Osu, pol Parque Natural de Redes, per Ponga y Piloña, por Boal y un itinerariu p’afayar el patrimoniu de Llaviana.

    Les entraes pa participar en cada ruta, con places llindaes, tienen un preciu de 18 euros o de 15 euros para públicu infantil ente 4 y 11 años, grupos de más de 10 persones, visitantes con Pasaporte Cultural o con tarxeta del Club Cultura Principáu d’Asturies. Les localidaes pueden adquirise presencialmente nes oficines de Curin Servicios Integrales de Turismu, de llunes a vienres n’Uviéu, y al traviés de la web www.hazteunbus.es. La salida y llegada de tolos itinerarios va realizar n’Uviéu y dalguna de les rutes inclúi parada n’Avilés o en Xixón.

    Percorríos
    12 de marzu. El Camín de Santiago de la Mariña pela zona central, Avilés y Contorna.
    19 de marzu. El Camín de Santiago Primitivu venceyáu a la Cultura Vaqueira.
    26 de marzu. Camín del Salvador.
    2 d’abril. Valles del Osu.
    9 d’abril. Parque Natural de Redes.
    23 d’abril. El Camín de Santiago de la Mariña pela zona oriental venceyáu a pueblos marineros.
    30 d’abril. El Camín de Santiago pol Occidente.
    7 de mayu. El Camín de Santiago Primitivu.
    14 de mayu. Ponga y Piloña.
    21 de mayu. El Camín de Santiago pola Mariña pela zona occidental venceyáu a pueblos marineros.
    28 de mayu. El Camín de Santiago de la Mariña pol Baxu Nalón: indianos y mar.
    4 de xunu. El desconocíu patrimoniu de Llaviana.
    11 de xunu. Ruta conmemorativa del 1.300 aniversariu de la Batalla de Cuadonga: Cangues d’Onís.
    18 de xunu. Ruta conmemorativa del 1.300 aniversariu de la Batalla de Cuadonga: Arenes de Cabrales y Valle Altu de Peñamellera.
    25 de xunu. Escontra l’interior de la Cuenca del Navia: Bual.

  • UXT gana una nueva batalla a Glovo n’Asturies

    UXT gana una nueva batalla a Glovo n’Asturies

    UXT ta acabante de ganar una nueva batalla a la empresa Glovo n’Asturies. La sentencia considera como fechu probáu l’actuación de la Inspección de Trabayu. La situación na que se celebró esti xuiciu afectaba a 150 repartidores d’Asturies nel periodu entendíu del 17 d’ochobre de 2017 a 3 de xunu de 2018. Nos primeres de díes de febreru, yá se celebrara en distintes ciudaes d’España manifestaciones de dellos repartidores que proclamaben la so autonomía como repartidor y oponíense a la futura regulación que se taba aldericando nel Diálogu Social. Recordemos que llegaron a manifestase énte’l Ministeriu de Trabayu y qu’esi llamamientu nació d’una videoconferencia que promovieron los dirixentes de Glovo.

    Este yera’l contestu y por eso, dende UXT, quieren destacar ciertos aspeutos de la sentencia qu’estrocen los argumentos remanaos tantu por Glovo como por dellos repartidores pro-plataformes nes distintes manifestaciones. Sobro la organización de los repartidores diz:” … escarecen d’organización empresarial propia, nun cunten nin con locales nin con estructura alministrativa, nin personal contratáu, solo usen pal so trabayu materiales de la so propiedá como son teléfonos móviles y vehículos.”

    Sobro Glovo que repitió insistentemente que solo ye una empresa intermediaria y que xestiona xna aplicación informática: “El productu que s’ufierta a los veceros qu’apuerten a l’aplicación nun ye la vienta d’una plataforma informática y el so accesu a ella, sinón que lo que s’ufierta ye la repartida de productos de comercios de la zona onde moren, que se contrata al traviés de la plataforma, siendo por tantu xna ferramienta imprescindible pal encargu per parte de el consumidores y pal trabayu de el repartidores.”

    Y a lo último, sobro quien ye’l que xenera la orde de trabayu, y por tanto, nun esiste esa famosa llibertá que tantu repitíen los dirixentes de Glovo: “Esiste ajenidad desque’l repartidor nun tien contactu dalgunu col usurario qu’encarga’l productu y difícilmente puede entendese que sía’l so mandatariu verbal.” Tou esto lleva a una sola conclusión: la relación qu’hai ente les persones repartidores y Glovo ye una relación llaboral como se dixo yá en más de cincuenta sentencies en tol territoriu español. A Glovo namás-y queda cumplir cola sentencia del Tribunal Supremu y cola llei Rider.

  • Asturies opta a ser una de les sedes de la Mobile Week p’averar les nueves tecnoloxíes dixitales a la sociedá

    Asturies opta a ser una de les sedes de la Mobile Week p’averar les nueves tecnoloxíes dixitales a la sociedá

    Asturies va optar a ser una de les sedes de la Mobile Week, un eventu centráu nel acercamientu de les nueves tecnoloxíes de conectividad móvil a la ciudadanía. El conseyeru de Ciencia, Innovación y Universidá, Borja Sánchez, participa estos díes nel Mobile World Congress de Barcelona, onde s’axuntó con responsables de la fundación qu’entama esti eventu mundial paestudiar un alcuerdu de collaboración.

    La Mobile Week ufierta un espaciu de reflexón y participación sobre’l tresformamientu dixital. Ye unu de los proyectos que promueve la fundación Mobile World Capital (MWC) Barcelona, con ediciones en ciudaes como Málaga, Ourense o Alcalá de Henares, y que xira al rodiu de conferencies, talleres y actividaes p’averar les nueves tecnoloxíes móviles a la sociedá, amás de sirvir de puntu d’alcuentru pa empreses piqueres nel sector tecnolóxicu.

    El Gobiernu d’Asturies amosó’l so interés en cuntar con una edición d’esti eventu nel Principáu. Borja Sánchez, acompañáu polos directores xenerales d’Innovación, Investigación y Tresformamientu Dixital, Iván Aitor Lucas, y de Seguridá y Estratexa Dixital, Javier Fernández, axuntóse con responsables de la Mobile Week p’avanzar na organización d’esta selmana dedicada a la tecnoloxía móvil n’Asturies mientres 2023. Pel momentu, alcordóse la collaboración nel diseñu d’un programa y queden por definir les feches y el llugar onde se va celebrar esti eventu.

    El conseyeru aprovechó tamién la visita al Mobile World Congress pa celebrar distintos alcuentros con empreses de telefonía móvil coles que s’avanzó n’alcuerdos de collaboración, como ye’l casu de la compañía Cellnex Telecom.

    El Principáu preve poner en marcha un plan piloto d’internet de les coses IoT (Internet of Things, nes sos sigles n’inglés) de la mano de Cellnex y venceyáu a la Cátedra Thin5G impulsada pola Conseyería de Ciencia. Trátase d’un proyectu pa probar sensores y software inalámbricu. Esti programa va sirvir de complementu al desenvolvimientu de la rede LoRa na que trabaya’l Principáu, xuna rede de comunicación inalámbrica por aciu les torres de TDT que va dexar la conexón ya intercambiu de datos ente dispositivos electrónicos.

  • Cultura celebra’l Día Internacional de la Llingua Materna con actividaes nel Muséu Arqueolóxicu, Tito Bustillo y La Llaboral

    Cultura celebra’l Día Internacional de la Llingua Materna con actividaes nel Muséu Arqueolóxicu, Tito Bustillo y La Llaboral

    La Conseyería de Cultura, Política Llingüística y Turismu entama la fin de selmana próxima diversos actos enmarcaos nel Día Internacional de la Llingua Materna, que la Unesco celebra cada 21 de febreru pa recordar la importancia de protexer y favorecer el multilingüismu.

    Les actividaes promovíes pola Conseyería de Cultura van celebrase nel Centru d’Arte Rupestre Tito Bustillo (Ribeseya), el Muséu Arqueolóxicu d’Asturies (Uviéu) y el Teatru de la Llaboral (Xixón), acordies col programa siguiente:

    –       Sábadu 19. 12.00 hores: Estrenámonos n’asturianu. CAR Tito Bustillo.

    El Centru d’Arte Rupestre Tito Bustillo presenta la versión en llingua asturiana de los sos recursos y conteníos, tanto físicos como virtuales. Asina, los visitantes van poder disfrutar esta xornada d’una visita guiada n’asturianu a les instalaciones del centru museográficu, qu’incorpora dende esta fecha dellos recursos gratuitos n’asturianu: audioguíes, mesmo pa públicu infantil que pa persones adultes, guía de mano del centru y cuadernu d’actividaes infantiles.

    –       Domingu 20. 12.00 hores: presentación del llibru Entaína a escribir. Muséu Arqueolóxicu d’Asturies.

    El llibru Entaína a escribir recopila los testos premiaos nes seis ediciones celebraes del concursu de microrrellatos improvisaos n’asturianu pa la xente mozo (2016-2021). Con ilustraciones d’ Alberto Pieruz, esta publicación inclúi 18 microrrelatos de los que son autores Raquel Fernández Menéndez, Inaciu Galán y González, Ánxela Gómez d’Ávila, Claudia Gutiérrez Lueje, Alma Hidalgo Lucena, Gonzalo Llamedo Pandiella, Pelayo Martínez Olay, Xurde Menéndez Caravia y Solinca Turbón.

    –       Domingu 20. 17.30 horas: Vamos al teatru! en llingua asturiana. Teatru de la Llaboral (Xixón).

    La compañía Kamante Teatru pon n’escena Con M mayúscula, obra qu’a partir d’una serie de situaciones corrientes en clave d’humor cavilga sobre cuestiones como l’amor posesivu, la incomunicación y l’anulación del otru. Empobinada a públicu familiar dende los 5 años, la obra recibió una Residencia del Programa d’Artes Escéniques del Centru de Recursos Escénicos del Principáu d’Asturies.

  • Asturex y Caxa Rural suscriben un conveniu nuevu pa impulsar la internacionalización de les empreses asturianes

    Asturex y Caxa Rural suscriben un conveniu nuevu pa impulsar la internacionalización de les empreses asturianes

    La Sociedá Rexonal de Promoción Esterior Principáu d’Asturies (Asturex) y Caxa Rural d’Asturies firmaron güei un nuevu conveniu de collaboración en virtú del cual la entidá bancaria va ufiertar a les empreses asturianes productos y servicios especialmente diseñaos pa sofitar la so internacionalización. L’alcuerdu foi suscritu por Enrique Fernández, conseyeru d’Industria, Empléu y Promoción Económica y presidente d’Asturex, y pol director xeneral de Caxa Rural n’Asturies, Antonio Romero.

    El nuevu conveniu contempla la concesión de préstamos pa financiar gastos acomuñaos a proyectos d’internacionalización, hasta un importe de 120.000 euros, a un interés fixu del 1,45%, mesmo qu’otres ferramientes habituales na operativa esterior de les empreses.

    El conseyeru d’Industria señaló que’l testu da respuesta “a la necesidá de consolidar ya incrementar el númberu d’empreses asturianes esportadores, tanto de sectores tradicionales como de nuevos ámbitos”. “La internacionalización ye un vector fundamental p’avanzar nel procesu de reactivación de la economía y de les sos empreses y, a última hora, un elementu de xeneración de riqueza, actividá y empléu”, aseguró.

    Tamién incidió en que’l nuevu alcuerdu pon en valor la positiva evolución de les esportaciones asturianes en 2021, qu’asitien al Principáu como la segunda comunidá con mayor crecimientu interañal de ventes al esterior. Según cifres oficiales, aumentaron el 31,8% ente xineru y payares, con un volume de negociu de 4.767,5 millones, cifres bien próximes a los máximos alcanzaos en 2019.

    Estos datos tradúcense nun aumentu del 58,2% de les ventes a los diez primeros países destinatarios de les esportaciones asturianes y tamién de les empreses esportadores, hasta un total de 2.820 (+42,5%), y de les que realicen actividaes de comerciu esterior de manera regular, que sumen 621 sociedaes (+2,3%).

    Conteníu del alcuerdu

    Amás de creitos pal financiamientu de planes d’esportación, Caxa Rural va ufiertar a les empreses asturianes una gama de productos y servicios específicos de negociu internacional ente los que figuren creitos documentarios, forward en divisa, financiamientu d’importaciones y esportaciones, avales o remeses. La entidá va estudiar toles operaciones que se-y presenten, col compromisu de contestar nun plazu máximu de quince díes.

    Otramiente, dambes partes comprométense a impulsar acciones conxuntes pa potenciar el conveniu por aciu la creación, polo menos, de dos grupos de trabayu empobinaos a la promoción y desenvolvimientu del negociu internacional.

    Asturex y Caxa Rural tienen una llarga tradición de collaboración. El nuevu alcuerdu afonda nesa linia y ye’l frutu de los esfuerzos de dambes instituciones por sofitar a les empreses na so internacionalización, nesti casu, cuntando con condiciones de creitu o anticipu de gastos más favorables que les habituales del mercáu.

  • El desempléu aumenta n’Asturies en 1.491 persones en xineru

    El desempléu aumenta n’Asturies en 1.491 persones en xineru

    El númberu de persones ensin empléu aumentó n’Asturies en 1.491 en xineru hasta asitiase en 66.289. Esta medría (+ 2,30%) ye la mas pequena pal primer mes del añu dende 1999, esto ye, el más baxu de los postreros 23 años, según los datos publicaos esta mañana pol Ministeriu de Trabayu y Economía Social.

    Nos postreros trés exercicios, les xubíes del paru en xineru fueron cimeros a la rexistrada’l mes pasáu, concretamente del 4,09% en 2019, del 4,30% en 2020 y del 3,20% en 2021.

    Al respective d’avientu, el desempléu baxa nel colectivu ensin trabayu anterior en 129 persones (-2,09%), na construcción en 58 (-1,14%) y n’agricultura y pesca en 3 (-0,22%). La industria rexistra un leve aumentu de 19 persones (0,39%), mientres que’l sector servicios concentra les mayores xubíes, con 1.662 sacupaos más (+3,52%), en bona midida pol fin de la campaña navidiega, na qu’aumenta la ocupación.

    En términos interañales, si se comparen les cifres de demandantes d’empléu al respective de xineru de 2021, el paru esperimenta un marcáu descensu, con 18.405 persones menos (-21,73%). Amás, los rexistros baxen en tolos sectores, especialmente nos servicios (-28,77%), la industria (-25,55%) y na construcción (-23,99%).

    Tamién na comparanza interañal, el desempléu mengua de manera significativa en dambos sexos y en tolos tramos d’edá, especialmente ente menores de 25 años. Asina, nel últimu añu abandonaron les llistes del desempléu 2.477 mozos, lo que supon un descensu del 37,54%.

    Tocantes a la contratación, el Real Decreto Llei 32/2021, de Midíes Urxentes pa la Reforma Llaboral, la Garantía de la Estabilidá nel Empléu y el Tresformamientu del Mercáu de Trabayu impulsó de manera notable los contratos indefiníos, cola firma de 3.459, el 14,80% del total. D’esta miente, xineru asítiase como’l meyor mes de la serie histórica nesti indicador, escluyendo les conversiones de contratos temporales. Amás, supon una medría del 95,87% sobro’l mesmu mes de 2021.

    Pela so parte, les afiliaciones a la Seguridá Social baxaron un 0,97% xineru. Sicasí, Asturies cerró’l mes con 10.568 ocupaos más que nel mesmu períodu del añu pasáu (+2,97%).