Etiqueta: Ayuntamientu de Xixón

Xixón anicia la tercer campaña de recoyida de plásticos agrarios

L’Ayuntamientu de Xixón empecipia güei, llunes 31 d’ochobre, la tercer campaña municipal de recoyida de plásticos agrarios.

Van instalase contenedores específicos pa esti tipu de borrafes nes distintes parroquies rurales mientres una selmana al mes de forma rotatoria, empezando por Serín, San Andrés de los Tacones, Montiana y Puao, esto ye, pela zona oeste. La próxima selmana va ser la vez de la zona centro (L’Abadía Cenero, Porceyo, Ruedes, Granda, Samartín de Güerces y Llavandera) y la siguiente de la zona este (Santurio, Somió, Cabueñes, Llorio, Vega, Caldones y Castiellu).

La campaña, que’l so oxetivu ye dar serviciu a más de 200 esplotaciones agrícoles y ganaderes del conceyu y facilitar el reciclaje, va rematar el 30 d’abril.

Quepe señalar que na campaña anterior recoyéronse casi 93 tonelaes de plásticos agrarios na zona rural del conceyu pal so correctu tratamientu nel Consorciu para la Xestión de les Borrafes Sólides d’Asturies (COGERSA), 56 tonelaes más que na primera.

31/10/2022
Xixón pon en marcha Trasn4Life, el programa pa impulsar la empleabilidá na xente mozo

El Conceyu de Xixón pon en marcha’l programa Trans4Life de mentorización para impulsar la empleabilidá en mozos menores de 30 años qu’anguaño nun tean trabayando nin estudiando.

Esta iniciativa, impulsada dende l’Axencia Local d’Empléu nel marcu del Programa d’Activación Xuvenil, tien como oxetivu ayudar a les y los participantes a incorporase al mercáu llaboral, tantu a quien busquen un primer empléu como a quien quieran tresformase profesionalmente y adquirir nueves conocencies.

Cada persona va disponer d’un mentor o mentora que, al traviés de sesiones personalizaes, va compartir la so esperiencia y va collaborar na definición d’una estratexa para la busca d’empléu y la realización personal y profesional.

Les mentorías van empezar a desenvolvese’l día 11 de payares con una duración de cuatro selmanes. Una vegada rematen, va realizase un eventu de clausura onde se van esponer les conclusiones.

Les inscripciones p’aquellos profesionales que quieran participar en Trans4Life tán abiertes nel siguiente enllaz Programa Trasn4Life (attitudeacademy.es)

28/10/2022
Xixón, finalista pa ser capital europea del turismu intelixente en 2023

Xixón representa la vanguardia de les práutiques de turismu intelixente nos destinos turísticos europeos. Asina lo considera la Comisión Europea, qu’incluyó a la ciudá asturiana ente los siete finalistes del certame Capital Europea del Turismu Intelixente 2023.

La Capitalidá Europea de Turismu Intelixente ye una forma de premiar a les ciudaes europees con práutiques turístiques destacaes, anovadores y sostenibles y busca fortalecer el desendolcu anovador xenerao pol turismu nes ciudaes europees y la so redolada, aumentar la so prestancia y fortalecer el medru económicu y la creación d’emplegu.

L’alcaldesa de Xixón, Ana González, y el direutor de Visita Xixón, Daniel Martínez Junquera, van aportar el 9 de payares viniente a Bruxeles pa defender la candidatura y demostrar les práutiques turístiques anovadores de Xixón nes estayes d’accesibilidá, sostenibilidá, dixitalización, padremoñu cultural y creatividá. Ta previsto que’l xuráu faiga públiques les dos Capitales Europees del Turismu Intelixente de 2023 esi día mesmu a hora última de la tarde.

Xixón enfréntase nesta fase final a Aarhus (Dinamarca), Pafos (Xipre), Porto (Portugal), Donostia (España), Sevilla (España) y Zagreb (Croacia).

Fortaleces de Xixón

“Vamos poner el focu nes personas, el verdaderu atractivu de la ciudá, y vamos amosar al xuráu cómo Xixón pasó de ser eminentemente industrial a una ciudá que supo reinventase, convirtiéndose en referente del turismu de calidá, base d’empreses tecnolóxiques y d’innovación (Parque tecnolóxicu) y de centros d’investigación (Milla del conocimientu)”, esplica l’alcaldesa Ana González. Xixón va sorrayar l’amplia esperiencia de so en programes de calidá, sostenibilidá, accesibilidá y anovación, l’apueste por eventos culturales internacionales, la dixitalización y l’emplegu de les nueves teunoloxíes y la xestión turística y de congresos de la ciudá, ente otros aspeutos.

Los ganadores del títulu de Capital Europea del Turismu Intelixente 2023 van recibir sofitu en comunicación y desendolcu de marca pa promocionar el destín, una escultura en forma de hashtag xixante pal centru la ciudá, un videu promocional que represente’l destín y práutiques de turismu intelixente y aiciones publicitaries diseñaes dafechu pa elevar el perfil de la ciudá a nivel internacional y aumentar el númberu de visitantes.

La Capital Europea del Turismu Intelixente ye una iniciativa de la UE, financiada anguaño pol programa COSME, empobináu a promover el turismu intelixente na Xunión Europea premiando ciudaes polos enfoques anovadores n’accesibilidá, dixitalización, sostenibilidá y padremoñu cultural y creatividá. Basada na esperiencia esitosa d’una aición preparatoria propuesta pol Parlamentu Europeu, la iniciativa busca fomentar un desendolcu turísticu novedosu, inclusivu y sostenible, asina como l’espardimientu ya intercambiu de buenes práutiques.

20/10/2022
Xixón anicia la roza de les siendes Fluvial, Peñafrancia y de la Vía Verde
El Conceyu de Xixón empecipia esta selmana los llabores de roza y caltenimientu de la sienda Fluvial y del Peñafrancia y de la Vía Verde. Los trabayos van llevase a cabu ente les 8.00 a 16.00 hores, siendo necesariu cortar el tránsitu nesi horariu sacante nos tramos compartíos con carretera. Un equipu d’ente ocho y nueve persones va encargase d’acometer les actuaciones con motoesbrozadores, sopladores, dos segadores y/o un tractor esbrozador.

El cronograma previstu ye’l siguiente:
- Sienda del Peñafrancia:
Xueves 13 d’ochobre: Tramu entendíu ente’l Llavaderu de Deva y el campu de fútbol L’Arenal

Vienres 14 d’ochobre: Tramu entendíu ente’l campu de fútbol L’Arenal y l’Universidá
- Sienda Fluvial:
Llunes 17 d’ochobre: Dende la Área La Camocha y los Güertos d’Ociu hasta l’entamu del tramu circular de les alisedas pantanoses.

Martes 18 d’ochobre: Ramal de sienda paralelu a la canal de Los Molinos, dende’l Parque Fluvial hasta l’encruz col camín del Quemaderu.

Miércoles 19 d’ochobre: Ramal de sienda paralelu al ríu Piles, dende’l camín de Granda a Cabueñes (parque del Caballón) hasta la pasarela piatonal de Vega sobre la carretera AS-248.

Xueves 20 d’ochobre: Tramu de sienda dende la pasarela piatonal de Vega hasta les instalaciones deportives de La Camocha y el tramu circular de les alisedas pantanoses.
- Vía Verde:
Llunes 24 d’ochobre: Dende la Área de La Camocha hasta l’encruz col camín de La Quintana o encruz de Mareo (primer encruz pasáu’l túnel).

Martes 25 d’ochobre: Dende l’encruz col camín de La Quintana hasta l’aparcamientu del Polígonu de Roces (cai Louis Pasteur).

Miércoles 26 d’ochobre: Dende l’aparcamientu del polígonu de Fregadures hasta’l final de la Vía Verde.
11/10/2022
L’alcuentru internacional sobre l’acondroplasia va aconceyar en Xixón a 600 persones
Del 9 al 11 d’ochobre va celebrase en Xixón el VII Congresu Internacional al rodiu les ADEE (Acondroplasia y otres displasies esquelétiques con enanismu). La cita, entamada pola Fundación ALPE -medalla de la ciudá en 2022-, va ser nel Palaciu de Congresos del Recintu Ferial Luis Adaro y ta prevista la participación d’ente 500 y 600 persones.

Los asistentes son grupos familiares qu’acuden al alcuentru porque, nel so marcu, se presenten los avances caberos sobro tolo qu’atañe a l’acondroplasia (enanismu) y a los problemes -non solo médicos- qu’esta conlleva y porque s’ufre a los/es asistentes la posibilidá de consultar el so casu, o el del so familiar, de baldre, con dalgún/a de los/es espertos/es qu’aporten a Xixón. Les families van ser, mayoritariamente, españoles, pero tamién acudirán d’otros países.

El congresu va entamase en meses de discusión d’espertos, talleres y actividaes paraleles, ente les que ta la entrega de los V Premios ALPE al meyor llabor en favor de les persones con ADEE y conceyos ente dellos grupos d’organizaciones del mundu.

Nel congresu, va desendolcase una actividá intensa de gran impautu p’algamar munchos d’esos oxetivos:
- el desendolcu y medru personal de neños/es, xente mozo y adultos/es con ADEE;
- la formación de los pas y mas y de la xente mozo en tolo que tien de ver cola so condición, médica y socialmente;
- l’intercambéu de conocencia y bones práutiques ente profesionales de campos estremaos;
- la concienciación d’estos/es profesionales sobro la importancia efeutiva de l’atención y curiáu na calidá de vida de los pacientes;
- l’accesu de pacientes a l’atención clínica in situ qu’especialistes prestixosos/es ufren esos díes;
- L’espardimientu na sociedá nel so conxuntu d’una imaxe real de les persones con enanismu, alloñada d’estereotipos dañinos;
- L’analís de la problemática y temes d’interés actuales pa la definición d’oxetivos próximos qu’organicen l’esfuerciu de toos.
La Fundación ALPE tien la misión d’ameyorar la calidá de vida de les persones con ADEE, acondroplasia y otres displasies esquelétiques con enanismu, en tol mundu.
07/10/2022
L’Ayuntamientu de Xixón encarga un estudiu del impactu de les viviendes d’usu turísticu

“Primer informe d’analís sobro l’impautu social y económicu xeneráu poles Viviendes d’Usu Turísticu (VUT) nel conceyu de Xixón. Añu 2022”. Esi ye’l títulu provisional del estudiu que’l Conceyu de Xixón encargó a la Universidá d’Uviéu p’analizar l’impautu de les VUT na ciudá. La entrega del informe ta prevista pa febreru de 2023.

Santos Tejón Llaneza, concejal de Promoción Económica, Empleo, Turismo y Comercio; Natalia González, concejala de Bienestar Social; y Loli Patón, concejala de Urbanismo, presentaron esti proyeutu nuevu güei na Casa Conceyu. Na presentación tamién s’afayó’l profesor de Socioloxía y responsable del equipu investigador de la Universidá d’Uviéu, Sergio González Begega.

L’envís xeneral del proyeutu ye la ellaboración d’un documentu d’informe téunicu sobro la situación de les VUT nel conceyu de Xixón, con atención especial nes sos implicaciones sociales y económiques. La finalidá del documentu d’informe téunicu ye orientar llinies posibles d’actuación en materia de política pública municipal. El proyeutu va dar a los téunicos del Ayuntamientu de Xixón un fundamentu empíricu pa orientar les decisiones de xestión de la VUT, respondiendo asina a les perspeutives de crecimientu d’esta ufierta d’agospiu nos años vinientes.

L’equipu investigador del proyeutu va tar compuestu pol profesor de la Universidá d’Uviéu Sergio González Begega, coordinador del proyeutu, y Claudia Suárez Arbesú, analista de datos ya investigadora de la Fundación Universidá d’Uviéu. Amás, el proyeutu va cuntar cola participación de los tamién profesores del departamentu de Socioloxía de la Universidá d’Uviéu José Pablo Calleja Jiménez y Arturo Colina Vuelta, como miembros del comité asesor y d’auditoría interna de calidá.

07/10/2022
Visita Xixón presenta «Xixonomía», la campaña nueva de promoción turística

Son les 8 de la mañana d’un día cualesquier d’inviernu. La temperatura nun supera los 10 graos. Maru, de 76 años, báñase col so grupín tolos díes na sablera de San Llorienzo, concretamente na escalera 2, a la que nomen, cariñosamente, la rampina. Da igual el tiempu que faiga, seya branu o iviernu. El ritual repítese tolos díes. “Ye lo meyor del día”, asegura.

Esta escena ye una de les que se representen na campaña nueva de promoción turística propuesta por Visita Xixón, Xixonomía, y que güei presentaron l’alcaldesa de Xixón, Ana González, y el direutor de Visita Xixón, Daniel Martínez Junquera, nun actu celebráu nel Muséu del Pueblu d’Asturies.

La campaña quier poner en valor a les persones, el xeitu meyor valoráu de los y les turistes que visiten Xixón, y quier ser un paragües nuevu sol que s’amuese la imaxe de la ciudá a visitantes y posibles turistes. “Así somos los gijoneses y gijonesas. Alegres, generosos, nobles, simpáticos… grandones, con una curiosa forma de entender la vida y también de expresarlo. Gijón/Xixón es una ciudad diferente, peculiar, con un carisma especial… Y lo es, sobre todo, por su gente”, esplica Daniel Martínez Junquera.

Los y les xixoneses falen con frescura, con xeitu, con ciertu descaru… y con remangu. Y ser asina ¡tien la so ciencia! Y esa ciencia Visita Xixón bautizóla como Xixonomía, una forma de ser, de vivir y de sentir Xixón. Ye una pasión… una obsesión. Ye’l compendio de lo que somos y lo que ye la nuestra ciudá.

El tratáu de Xixonomía

Poro, Visita Xixón ta ellaborando un completu Tratáu de Xixonomía, un estudiu antropolóxicu… y antolóxicu de Xixón, los sos requexos, les sos costumes y, sobre manera, los sos especímenes tan interesantes.

La Xixonomía estructúrase al traviés de Principios Fundamentales, un conxuntu de lleis que rixen la vida de Xixón y de les y los sos habitantes. Frutu d’años d’observación y estudiu, los Principios Fundamentales son básicos pa entender el carácter y los vezos d’estos personaxes peculiares. Na so ellaboración collaboraron mentes y escueles de la ciencia y la filosofía. (Bono, más que collaborar, robámos-yos dalguna idea).

Agora, namás se desendolcó’l principiu primeru (Arquímedes): «Tou cuerpu somorguiáu nun fluyíu esperimenta un subidón que pa qué». El spot, nel que participen les persones que se bañen a diario na escalera 2 de la sablera de San Llorienzo, pue vese en https://youtu.be/c9ed3tws3RI.

Col tiempu, pasín ente pasu, van dir completando el Tratáu de Xixonomía, desvelando los secretos de caún de los Principios, conociendo especímenes nuevos, descubriendo sitios y retratando comportamientos. Los principios del Tratáu de Xixonomía van espublizase na web www.xixonomia.es y, con ellos, hestories y personaxes del día a día en Xixón.

10/03/2022
Xixón recupera la tradicional Feria de San Antonio

L’Ayuntamientu de Xixón recupera la tradicional Feria de San Antonio, tres dos años ensin celebrase por cuenta de la pandemia derivada de la COVID-19. Va desenvolvese del 10 al 13 de xunu d’esti añu nel recintu Ferial Luis Adaro.

Tal que señaló’l conceyal de Distritu Rural, Ramón Tuero, l’oxetivu d’esta cita ye homenaxar y poner en valor les xeres y llabores de la zona rural xixonesa, amestada a la ganadería y a l’agricultura, y dar un impulsu económicu al sector.

Pa ello, amás de feria ganadera y el concursu rexonal de raza frisona y asturiana de los valles, va haber un mercáu de preseos, artículos pal campu y productos de la tierra. Tamién se van programar una serie d’actividaes, como son talleres artesanales y exhibición d’animales pa escolares, previstes pal primer día de feria.

10/03/2022
Estos son los cortes de tráficu que se van facer pola manifestación del 8M

Por cuenta de la manifestación del Día Internacional de la Muyer, que se va celebrar a partir de les 19.00 hores de mañana martes, 8 de marzu, van producise restricciones al tráficu.
Va salir dende la plaza de toros de Xixón y va siguir pela carretera de la Costa y cai Palacio Valdés hasta’l parque del Tren de la Llibertá, poro, la circulación va permanecer cortada por esti itinerariu mientres dure’l pasu de manifestantes. Tamién va tar prohibíu l’estacionamientu de vehículos na Cai Sanz Crespo sentíu salida de la ciudá y l’estacionamientu allegante al Solarón.

Amás de les indicaes, la manifestación implica otra serie de midida rellacionaes cola circulación:
– Los vehículos procedentes de l’avenida de Pablo Iglesias y que circule en dirección escontra la Carretera de Villaviciosa van ser esviaos pola cai Anselmo Solar.
– Los procedentes de l’avenida Constitución van ser esviaos pela aveníes de Manuel Llaneza y Pablo Iglesias
– El tráficu procedente de les places del Carmen y del Humedal tamién va ser empuestu a víes alternatives.
– Suxúrese la usu de Ronda Sur-N-632 que los sos accesos y salíes nun van sufrir nenguna restricción.

07/03/2022
L’Ayuntamientu de Xixón remata la pavimentación de los tramos de dos caminos de Deva y Caldones que dan accesu a viviendes

El Conceyu de Xixón remató la pavimentación de trés tramos del Camín de Ruseco en Deva y d’un del Camín de Bobies en Caldones, esto ye, d’aquellos puntos nos qu’hai viviendes pa evitar, d’esta miente, les emisiones de polvu que xeneraba la zahorra de diches víes.

En concretu, en Deva actuóse sobre una superficie de 1245’3 metros2 y 220 metros de llargor con una inversión total de 51.858’57 euros. Nel Camín de Bobies en Caldones, pavimentáronse 75 metros y 431’032 con una inversión de 18.781’41 euros, lo que supon un total de 70.639’98 euros pa dambes intervenciones.

Les obres realizáronles un xefe d’equipu, trés oficiales de segunda y cuatro peonos ordinarios, personal procedente del Plan d’Empléu 2021/2022 del Conceyu de Xixón. Consistieron nel saneamientu de enanchar, hormigonar el firme, construyíu de cunetes y tubos so la calzada pa dotar a los caminos d’una rede de drenaxe de les agües superficiales.

El conceyal de Distritu Rural, Ramón Tuero, y el conceyal d’Empléu, Santos Tejón, visitaron la finalización de los trabayos ya incidieron en que se trata d’una de les munches meyores que’l Conceyu sigue realizando na zona rural del conceyu, teniendo en cuenta les demandes vecinales y les necesidaes de les parroquies.

04/03/2022