Etiqueta: Conseyeria de Cultura Política Llingüística y Turismu

Principáu y conceyos impulsen l’aprendimientu d’asturianu y eonaviegu p’adultos al traviés de Falamos

– El programa puestu en marcha por Cultura al traviés de la FACC abre la segunda edición con un aumentu del 52 % nel so presupuestu hasta algamar los 131.000 euros

– L’añu pasáu más de 300 persones participaron nos cursos gratuitos y semipresenciales que s’entamaron en 16 conceyos asturianos

El programa Falamos, impulsáu pola Conseyería de Cultura, Política Llingüística y Turismu y desenvueltu pola Federación Asturiana de Conceyos (FACC), arranca la segunda edición con un presupuestu que medra nun 52 por cientu al respective del añu pasáu y algama los 131.500 euros. La ufierta de cursos gratuitos y semipresenciales p’adultos p’adquirir nociones básiques d’asturianu o eonaviegu tuvo una respuesta bien bona l’añu pasáu, superando llargamente los 300 participantes.

El director xeneral de Política Llingüística, Antón Garcia presentó esta mañana la segunda edición del programa xunto a la presidenta de la FACC, Cecilia Pérez. Esti añu Falamos va desenvolvese ente los meses d’abril y avientu y ta previsto convocar alredor de 30 cursos per toa Asturies en collaboración colos conceyos. Ello ye que ya tán programaos pola FACC los seis cursos d’esta edición: cinco d’asturianu (Uviéu, Candamu, L’Infiestu, Lluanco y Tinéu) y ún d’eonaviegu n’A Veiga. Los primeros n’empezar van ser los d’Uviéu y A Veiga, el 20 d’abril.

La programación de la ufierta de cursos de Falamos ye flexible y va acomodándose a la demanda qu’existe en cada llugar. L’añu pasáu punxéronse un total de 19 cursos, 16 d’asturianu y tres d’eonaviegu, en 16 conceyos asturianos. Nel casu d’Uviéu y Mieres del Camín, la demanda tan alta de participantes fixo que se doblara la ufierta.

La llingua del día a día

El plan Falamos busca que l’alumnáu adquiera nociones básiques que dexen a les persones que quieran desenvolvese en situaciones cotidianes usando l’asturianu o l’eonaviegu. Los cursos, de 42 hores llectives tienen formatu mistu (22 online y otres 20 presenciales dividíes n’ocho sesiones) y facilítase al alumnáu material didáctico impreso y accesu a una plataforma de formación online.

Los temarios de Falamos ellaboráronse con una estructura cenciella y dinámica y incluyen aspectos vinculaos al vocabulariu y la gramática de dambes llingües pa poder manexalos en situaciones del día a día. Términos y estructures rellacionaes col ámbitu personal y corporal, emocional y familiar; casa, pueblu y ciudá; comerciu y alimentación; trabayu y tiempu llibre. Tamién incluyen recursos llingüísticos sobre entornos naturales, viaxes, multiculturalidá, internet y medios de comunicació

03/04/2023
Asturies va acoyer la reunión de directores del Institutu Cervantes del 11 al 14 de xunetu

Asturies va acoyer la primer vez la Reunión Anual de Directores del Institutu Cervantes, un cumal que va axuntar unos setenta directivos d’esta institución. Va celebrase del 11 al 14 de xunetu n’Uviéu, Xixón y Avilés, según anunciaron güei la conseyera de Cultura, Política Llingüística y Turismu, Berta Piñán, y el director del Institutu Cervantes, Luis García Montero, depués de firmar un alcuerdu de collaboración ente dambes instituciones.

Neses reuniones periódiques, los responsables máximos del Institutu Cervantes n’España y en tolos sos centros repartíos pel mundu estudien la marcha y los retos del organismu que promociona la llingua española y les llingües cooficiales y divulga la cultura de los países hispanofalantes. Son una cita destacada na axenda del organismu del Ministeriu d’Asuntos Esteriores, que pela primer vez va facese nel Principáu d’Asturies.

Dende’l 2005 les reuniones de directores del Cervantes fixéronse tolos años en delles ciudaes d’un total de diez comunidaes autónomes: Andalucía, Castiella y Llión, Castiella-La Mancha, Madrid, Cantabria, Estremadura, La Rioja, Galicia, País Vascu y Comunidá Valenciana.

L’anuncia diéronla esta mañana en Xixón Berta Piñán y Luis García Montero depués de firmar un conveniu de collaboración ente dambes instituciones pa fomentar la difusión de la cultura y la llingua asturianes y integrar la llingua asturiana nes actividaes que lleva a cabu l’Institutu Cervantes. L’alcuerdu contempla qu’autores en llingua asturiana participen na programación nacional y internacional del Institutu pa divulgar la realidá plurillingüe d’España y d’Asturies.

La Conseyería de Cultura, Política Llingüística y Turismu va poder intervenir na escoyeta de persones del ámbitu de la cultura y la llingua asturianes pa participar nes actividaes que se programen, teniendo en cuenta factores como ganar dalgún de los premios que convoca’l Gobiernu d’Asturies pa reconocer les meyores obres escrites n’asturianu y eonaviegu.

Pela so parte, l’Institutu Cervantes va poder disponer de los espacios culturales que seyan de titularidá del Principáu d’Asturies y de la Casina de la Traducción de Cadavéu pa realizar toa clas d’actividaes culturales, como esposiciones, alcuentros, talleres, cursos o charles, fomentando lo más posible la participación d’artistes asturianos.

El conveniu quier impulsar proyectos rellacionaos colos fines de dambes instituciones nos ámbitos cultural y académicu.

20/03/2023
El faru de Tapia va acoyer una residencia artística

El faru de Tapia va convertise nuna residencia pública p’artistes de distintes disciplines. La Conseyería de Cultura, Política Llingüística y Turismu y l’Autoridá Portuaria d’Avilés impulsen conjuntamente el proyectu Al Faru, que va acondicionar l’inmueble históricu p’allugar un centru d’estancies temporales pa creadores, que va ser xestionáu pol Gobiernu d’Asturies. Les obres de caltenimientu y adecuación del equipamientu van suponer una inversión per parte de l’Autoridá Portuaria de más d’un millón.

La conseyera de Cultura, Política Llingüística y Turismu, Berta Piñán, y el presidente de l’Autoridá Portuaria d’Avilés, Santiago Rodríguez Vega, visitaron güei l’inmueble acompañaos pola alcaldesa de Tapia, Ana Vigón. Piñán destacó que se trata de “un proyectu ilusionante, que marca un finxu nel sofitu que s’empresta a los y les artistes dende l’Alministración pública”. “Cuenta con una redolada envidiable y supón recuperar pa la cultura un patrimoniu históricu y singular. Al Faru quier reivindicar Tapia y l’occidente como un enclave únicu para proxectar l’arte asturiano escontra’l mundu”, añedió.

Pela so parte, el presidente de l’Autoridá Portuaria d’Avilés, Santiago Rodríguez Vega, señaló la singularidá de l’actuación que se va a acometer nel faru de Tapia, onde a diferencia de les actuaciones previstes nos de Cuideiru, L.luarca y Vidio, la inversión va correr al cargu de la mesma autoridá portuaria, mientres que Cultura va asumir la xestión por aciu un conveniu que van suscribir dambos organismos.

El proyectu de rehabilitación ellaboráu pol Gobiernu d’Asturies contempla que l’inmueble caltenga les sos funciones de señal marítima y combínense con un espaciu de residencia artística nel que creadores asturianos convivan con artistes nacionales ya internacionales al traviés d’intercambios con entidaes y equipamientos similares d’otros llugares. El proyectu Al Faru va funcionar por aciu programes de residencies a lo llargo de tol añu, y van cuntar con financiamientu tanto pública como privada.

Les nueves instalaciones del faru van cuntar con seis amplies habitaciones/camarotes pa ufiertar agospiamientu a otros tantos artistes, una cocina-comedor, que va funcionar tamién como llugar d’alcuentru y xunta; biblioteca, sala de música insonorizada y un taller d’artes plástiques. El diseñu arquitectónicu xira alrodiu del patiu central como elementu protagonista pa componer un esquema coherente cola hestoria del edificiu. La distribución busca xenerar espacios d’intercambiu nes zones comunes, con un planteamientu flexible p’atender usos distintos.

La restauración va siguir el criteriu de la mínima alteración de los materiales trataos y va caltener no posible la so naturaleza y aspectos orixinales, respetando en tou momentu l’espíritu de la construcción. Les obres nun van modificar en términos de volume la envolvente esterior, la composición de fachaes, la configuración xeneral o la estructura básica. Pa la reestructuración, van acometese baltaderes parciales. L’actuación pretende poner en valor l’edificiu y restituyir los sos valores orixinales.

Les obres de rehabilitación van solucionar, amás, los problemes de capilaridá qu’afecten al inmueble, espuestu davezu a condiciones atmosfériques severes. Pa ello, va trabayase n’especial na envolvente del faru pa devolve-y la so condición material en tolos elementos de piedra, despintaos y falseaos col usu de pintures plástiques. L’actuación va desenvolvese nel mesmu edificiu del faru y nel edificiu amiestu y la urbanización xeneral de la redolada.

17/03/2023
Asturies destina 250.000 euros a la promoción d’actividaes artístiques y culturales na zona rural

El Gobiernu d’Asturies destina 250.000 euros a sofitar el desenvolvimientu de proyectos artísticos y culturales en zones rurales. Amás, la Conseyería de Cultura, Política Llingüística y Turismu llanzó tamién la convocatoria empobinada a fomentar el desenvolvimientu d’actividaes culturales d’interés rexonal, dotada con 125.000 euros, un 25% más que l’añu pasáu.

Estes midíes súmense a les siete convocatories de subvenciones abiertes na actualidá, por valor de más de 1,7 millones, pa sofitar acciones venceyaes al patrimoniu y la cultura. Estes llinies sofiten la promoción de proyectos y actividaes culturales na zona rural, l’actividá creadora, el caltenimientu y espardimientu del patrimoniu o les meyores n’equipamientos culturales, ente otros fines.

La convocatoria pa proyectos culturales singulares prioritariamente nel ámbitu rural tien por oxetu la promoción de la ufierta d’espectáculos, esposiciones y actividaes de cualquier disciplina en conceyos non urbanos. La programación tamién pretende algamar un impactu positivu na igualdá de muyeres y homes. Estrémense dos llinies específiques d’actuación:

Llínea 1. Entidaes ensin ánimu d’arriquecimientu (100.000 euros)
Llínea 2. Profesionales y empreses privaes (150.000 euros)

El financiamientu p’actividaes culturales d’interés rexonal aumenta anguaño un 25%. Sofita proyectos artísticos singulares, como acciones de formación y movilidá, col fin de fomentar xires d’espectáculos y l’asistencia a cursos y actividaes de formación venceyaes a les distintes manifestaciones artístiques. Tamién financia actividaes d’espardimientu d’artes plástiques y audiovisuales al traviés de proyectos espositivos, según l’asistencia a feries, festivales y eventos. Van poder allegar a la convocatoria particulares, fundaciones culturales privaes y asociaciones.

26/01/2023
El programa Asturies, Cultura en Rede va ufiertar 500 actividaes per Asturies nel primer semestre del añu
Los circuitos d’artes escéniques, música, lliteratura, cultura tradicional, artes visuales y Autores nel Camín formen parte d’esti proyectu de la Conseyería de Cultura, Política Llingüística y Turismu, fechu en collaboración colos Conceyos asturianos y xestionáu pola Sociedá Pública de Xestión y Promoción Turística y Cultural del Principáu d’Asturies.

Les cifres detallaes de cada circuitu pal primer semestre del añu espónense de siguío:
- Circuitu d’artes escéniques: 139 espectáculos de 59 artistes, compañíes y empreses en 48 conceyos, con una inversión superior a los 300.000 euros.
- Circuitu de música: 36 artistes y grupos van dar 56 conciertos en 43 conceyos. Cultura destina alredor de 137.000 euros a esti circuitu.
- Circuitu de lliteratura: 74 eventos de 30 creadores van llegar a 32 conceyos. El circuitu dispón d’una inversión superior a los 50.000 euros.
- Circuitu de cultura tradicional: 32 profesionales van protagonizar 50 eventos en 34 conceyos, con un presupuestu alredor de los 51.000 euros.
- Circuitu d’artes visuales: tán yá programaes 12 esposiciones de 9 artistes y galeríes en 6 conceyos, escoyíes nes dos últimes convocatories d’esti circuitu. Los costos de producción de los 14 proyectos de 14 creadores y galeríes producíos l’añu pasáu superen los 85.000 euros.
- Circuitu Autores nel Camín: 70 eventos en 27 conceyos colos creadores y artistes asturianos gallardonaos colos premios lliterarios y escénicos convocaos o promovíos pola Conseyería de Cultura, Política Llingüística y Turismu. Esti circuitu, financiáu dafechu pol Principáu, tien un presupuestu anual de más de 51.000 euros.
A esta programación súmase’l ciclu de cine itinerante de La Cinemateca Ambulante, con 99 proyecciones en 24 conceyos de xineru a marzu y un presupuestu de 28.000 euros pal primer trimestre del añu.
26/01/2023
Asturies da’l relevu a Euskadi na coordinación de la España Verde

El Gobiernu d’Asturies dio güei el relevu institucional al mandu de la coordinación d’actividaes de la España Verde al Executivu d’Euskadi, que va ser l’encargáu d’entamar les actividaes de la marca que xunta a Asturies, Cantabria, Galicia y País Vascu a lo llargo de 2023. El estand d’Asturies en Fitur acoyó esta tarde l’actu, nel que tuvieron presentes representantes de les cuatro comunidaes y nel que la conseyera de Cultura, Política Llingüística y Turismu, Berta Piñán, trespasó les funciones al so homólogu vascu, Javier Hurtado.

Piñán amosóse bien satisfecha del trabayu desenvueltu l’añu pasáu dientro del senu de la España Verde. “En 2022 la España Verde llogró probablemente unu de los finxos más importantes de la so hestoria como proyectu común de les cuatro comunidaes: la captación de fondos europeos Next Generation pa convertise nel mayor corredor d’ecoturismu d’Europa”, destacó la conseyera de Cultura Política Llingüística y Turismu.

El proyectu de la España Verde enmárcase dientro del programa Experiencia Turismo España y va recibir de los fondos europeos el 98% de la inversión total, envalorada en 954.073 euros. El plan va tener como beneficiaries directes a más diez asociaciones y 250 empreses turístiques aniciaes n’espacios protexíos de 16 destinos de la España Verde, que van poder participar nes acciones de formación y certificación n’ecoturismu y nes diverses iniciatives de promoción que se van desenvolver en 2023.

Piñán sorrayó que la marcha turística fundada fai 34 años poles cuatro comunidaes “ye la hestoria d’un ésitu asitiáu na capacidá de cooperar y xunir fortaleces trabayando con rigor y llealtá”. La conseyera reafitó’l compromisu del Gobiernu d’Asturies pa siguir trabayando nel senu de la España Verde p’avanzar na proyección y la imaxe de la marca.

Pela so parte, la viceconseyera de Turismu, Graciela Blanco, fixo balance de la intensa actividá desenvuelta mientres 2022 cola celebración de cuatro xuntes presenciales y el desenvolvimientu de diverses actividaes promocionales y formatives.

19/01/2023
Cultura edita’l primer mapamundi n’asturianu

La Conseyería de Cultura, Política Llingüística y Turismu editó’l primer mapamundi n’asturianu. El planu, con un formatu de 70 x 100 cm y una tirada de mil exemplares, recueye los nomes de los países y de les sos capitales n’asturianu.

El Principáu va repartir de mano esti material en centros educativos, servicios municipales de normalización llingüística y instituciones culturales y académiques. Nel casu de les escueles, l’oxetivu ye que’l mapa resulte d’utilidá tanto pa docentes como pal alumnáu nel procesu d’enseñanza y aprendimientu de la llingua asturiana, y qu’anime a toles persones a descubrir el mundu dende la so llingua y cultura propies.

La edición del primer mapamundi n’asturianu enmárcase dientro de les iniciatives de promoción de la llingua asturiana y financióse con fondos procedentes del Ministeriu de Cultura y Deporte destinaos a sofitar l’espardimientu de les llingües protexíes pola Carta Europea de les Llingües Rexonales o Minoritaries.

El planu editóse usando la proyección Hobo-Dyer, que nun tien distorsión norte-sur nin este-oeste, amás de mostrar el tamañu relativu de los países d’alcuerdu cola superficie de caún. Los nomes de los países y les sos capitales siguen la nomenclatura establecida pola Academia de la Llingua Asturiana.

13/01/2023
El Gobiernu d’Asturies destina 474.000 euros de fondos europeos a modernizar equipamientos culturales
El Gobiernu d’Asturies va destinar 474.691 euros provenientes de los fondos europeos del Plan de Recuperación, Tresformamientu y Resiliencia a sofitar actuaciones de modernización y xestión sostenible de les infraestructures de les artes escéniques y musicales.

La convocatoria inclúi cuatro llinies específiques de financiamientu en función del beneficiariu:
- Particulares, asociaciones y entidaes ensin ánimu d’arriquecimientu (28.500 euros)
- Profesionales y empreses privaes (47.300 euros)
- Entidaes Locales (301.391 euros)
- Fundaciones y organismos públicos dependientes de l’alministración autonómica (97.500 euros)
El plazu de presentación de solicitúes va enllargase dende’l 20 de xineru hasta’l 17 de febreru. Les actuaciones tendrán de completase a lo llargo del 2023. Les ayudes van destinase a inversiones dedicaes a la modernización dixital, transición verde y tresformamientu de los equipamientos.

Les actuaciones que van poder realizase con cargu estos fondos van ser, ente otres, obres pa promover que los edificios tengan un consumu d’enerxía casi nulu, la modernización de sistemes dixitales d’audiu y comunicaciones en rede o de los sistemes de lluz o vídeu dixitales. Tamién se va sofitar la xestión dixital de maquinaria escénica y la modernización de les ferramientes y sistemes dixitales de xestión artística y de producción d’espectáculos nos escenarios escénicu y musical.

Na primera de les convocatories que la Conseyería de Cultura, Política Llingüística y Turismu promovió pa esti fin en 2022 financiáronse meyores nuna docena d’equipamientos culturales por toa Asturies con una inversión de 259.000 euros.
09/01/2023
El Gobiernu d’Asturies llanza les ayudes pa rehabilitar y caltener horros, paneres y cabazos, qu’aumenten hasta 350.000 euros

El Gobiernu d’Asturies llanzó la convocatoria d’ayudes pa la realización d’obres de caltenimientu, restauración o rehabilitación n’horros, paneres y cabazos, qu’anguaño alza la so dotación presupuestaria hasta 350.000 euros. Estes subvenciones formen parte del primer Plan d’Horros, impulsáu dende la Conseyería de Cultura, Política Llingüística y Turismu, qu’inclúi una batería de midíes para promover la meyora nel caltenimientu y rehabilitación d’estos elementos de valor patrimonial y etnográficu.

El Boletín Oficial del Principáu d’Asturies (Bopa) publica güei la convocatoria, que va tar abierta dende mañana hasta’l día 25 de xineru. Nun van poder allegar a la mesma aquellos elementos que seyan Bienes d’Interés Cultural o los que formen parte del Inventariu del Patrimoniu Cultural d’Asturies.

D’esta miente, pa optar a los fondos, los horros, paneres, cabazos o otros elementos d’interés etnográficu tendrán de tar incluyíos nos catálogos urbanísticos municipales aprobaos con posterioridá a la entrada a valir de la Llei de Patrimoniu Cultural de 2001 (llei 1/2001), con un nivel de protección integral.

En casu de tar allugaos en conceyos que nun cunten con un catálogu aprobáu con posterioridá a la citada llei, los elementos tendrán de ser anteriores a 1940 y constituyir amueses notables pola so talla, decoración, característiques constructives o por formar conxuntos.

05/01/2023
Seronda Moza avera l’asturianu a los más mozos al traviés de la cultura y l’ociu

El Gobiernu d’Asturies suma un recursu nuevu p’averar la llingua asturiana al públicu más mozo. Seronda Moza naz como una cita n’asturianu onde los más xóvenes pueden atopar una ufierta cultural y d’ociu desarrollada n’asturianu y gratuita. La primer edición de Seronda Moza va celebrase esti sábadu 26 de payares nel IES de Posada, en Llanera.

El programa d’actividaes, diseñáu dende la Conseyería de Cultura, Política Llingüística y Turismu, va ufiertar a lo llargo de tola xornada un mercáu cultural y d’asociaciones onde van participar empreses y entidaes que desenvuelven la so actividá n’asturianu. Amás, van facese dellos talleres y la ufierta musical va incluyir una jam session coral p’adaptar dos temes tradicionales n’asturianu y un conciertu de Llevólu’l Sumiciu.

Tola programación ye de baldre, pero la participación nos talleres precisa la inscripción previa nesti formulariu. Nun ye menester cuntar con conocimientos d’asturianu pa participar en cualquiera de les actividaes que se van llevar a cabu.

El programa de talleres previstos a lo llargo de la mañana van tratar asuntos tan variaos como la cocina, l’actividá física, la creación de complementos, la composición d’un rap o la ellaboración d’un cosplay al traviés del reciclaxe de dellos elementos. A too ello puedes apuntate equí.

21/11/2022