Xixón al día

Etiqueta: Conseyería de Mediu Ambiente

  • Mediu Ambiente autoriza l’aprovechamientu d’escories metalúrxiques como grebos industriales pa distintos usos

    Mediu Ambiente autoriza l’aprovechamientu d’escories metalúrxiques como grebos industriales pa distintos usos

    La Conseyería d’Alministración Autonómica, Mediu Ambiente y Cambéu Climáticu aprobó un resolvimientu que regula les condiciones pa dexar la reutilización de les escories metalúrxiques, de tala forma que s’aprovechen como grebos industriales. Col cumplimientu de los requisitos que figuren na norma, esti tipu de materiales van dexar de tener la condición de borrafes. Na actualidá, añalmente deposítense nel vertideru 250.000 tonelaes d’esta escoria.

    Les escories metalúrxiques son la resultancia de los procesos de fabricación d’aceru de la siderurxa integral. D’equí p’arriba, van pasar a ser materies aptes ambientalmente, con distintes llimitaciones, pa numberosos usos. Asina, van poder aprovechase como materia prima na fabricación de materiales de construcción, amiestos bituminosos, rellenos, cubrición de vertideros, taludes de terraplenes, subbalastu de víes ferriales, apantallamientos sónicos pa estructures viarias, zahorras artificiales, drenaxes, filtros pa depuradores o enmiendes pa la meyora de suelos con fines agrícoles, forestales y recreativos.

    La viceconseyera de Mediu Ambiente y Cambéu Climáticu, Nieves Roqueñí, señaló qu’esta iniciativa “dexa avanzar con una importante midida d’economía circular, que va amenorgar los impactos acomuñaos a la estracción y procesáu de materies primes y va evitar el depósitu en vertideru d’un productu al que se-y puede dar una segunda vida”. Europa recicla anguaño cerca del 82% d’estes escories, principalmente como capes de firme de carreteres.

    Roqueñí indicó que’l resolvimientu cumple colo establecío nel plan estratéxicu de borrafes del Principáu, que pretende amontar la valorización material y embrivir les borrafes que van al vertideru, y tamién va na llínea de la estratexa de la economía circular. Al so xuiciu, esta midida va impulsar l’usu de les escories como grebos industriales y va ufiertar seguridá a operadores públicos y privaos.

  • Mediu Ambiente invierte más de dos millones n’obres de saniamientu en Llaviana

    Mediu Ambiente invierte más de dos millones n’obres de saniamientu en Llaviana

    La Conseyería d’Alministración Autonómica, Mediu Ambiente y Cambéu Climáticu invirtió 2.047.447 euros en delles actuaciones pa dotar de saniamientu a los núcleos de San Pedro, La Caúcia, El Fabariegu, El Castrillón, Los Barreros y delles zones de La Pola Llaviana.

    Les obres, que tán na fase final, van dexar recoyer los vertíos pa conducilos por gravedá a la rede de colectores xenerales, que conecten col colector interceptor d’El Río Nalón, pal so tratamientu na estación depuradora de Frieres.

    La viceconseyera de Mediu Ambiente y Cambéu Climáticu, Nieves Roqueñí, visitó esta mañana los llabores executaos n’El Fabariegu, acompañada pola directora xeneral del Agua, Vanesa Mateo, y l’alcalde de Llaviana, Julio García.

    L’actuación global supunxo la execución de 4.580 metros de tubería, la instalación de 155 pozos de rexistru, la conexón de 45 ramales existentes interceptaos a pozos y la construcción de 82 arquetes p’acometíes domiciliaries a viviendes. Tamién incluyó la reposición de servicios afectaos y de pavimentos nuna superficie total de 8.200 metros cuadraos.

    Asina, nel valle del Tiraña construyéronse 1.775 metros de colector que va recoyer l’agua residual de San Pedro pa incorporalo al interceptor d’El Río Nalón, mentes que nos núcleos de La Caúcia y El Fabariegu executóse la rede de saniamientu, con un total de 700 metros de tubería, pa incorporar l’agua residual al colector d’El Ríu Villoria. Tocante a l’actuación en Los Barreros, creóse una conexón nueva con más capacidá pa evitar alivios a El Ríu Tiraña.

    N’El Castrillón y La Brañueta construyéronse 1.340 metros de conducción de tubería pa incorporar l’agua residual a un colector en La Pola Llaviana, onde tamién se recueye l’agua residual qu’hasta agora vertíen al regueru de San Xulián, incorporándolo a la rede d’alcantarelláu municipal.

    El 75 % del costu del proyectu financióse con cargu a los fondos mineros y el 25 % restante, con partíes propies de la conseyería.

    Roqueñí destacó la importancia d’actuar tanto nel mediu rural como nel urbanu, dando solución a los problemes de vertíos. Nesti sentíu, afirmó que’l Plan Director de Saniamientu y Depuración del Principáu, anguaño n’información pública, “recueye como ún de los sos oxetivos principales acabar colos vertíos d’agua residual al mediu natural”. “Inversiones como les realizaes en Llaviana ponen de manifiestu’l compromisu del gobiernu pa contribuyir a que les nuestres mases d’agua tengan la mayor calidá”, amestó la viceconseyera. ​​​​​​​​​​​​​

  • Mediu Ambiente destina 289.000 euros a la reparación del tramu del colector del Seya dañáu poles riaes

    Mediu Ambiente destina 289.000 euros a la reparación del tramu del colector del Seya dañáu poles riaes

    La Conseyería d’Alministración Autonómica, Mediu Ambiente y Cambéu Climáticu va invertir 289.352 euros nes obres d’emerxencia empezaes esta selmana pa reparar l’interceptor de saniamientu que va pela oriella derecha d’El Ríu Seya, estropiáu poles riaes nun tramu de 150 metros asitiáu ente Les Roces, en Cangues d’Onís, y Les Arriondes.

    Cola mira de reponer la infraestructura hidráulica y evitar vertíos d’agua residual va ponese una tubería nueva de 800 milímetros de diámetru pela zona firme de la vega. Amás, va protexese’l terrén afectáu y van aplicase técniques d’inxeniería biolóxica pa la recuperación medioambiental. La obra va beneficiar a 3.000 habitantes.
    El plazu calculáu de los trabayos, qu’impliquen la ocupación de 48 finques na oriella derecha del ríu, ye de cuatro meses.

    L’avería detectóse a últimos d’avientu, desque baxó’l caudal del ríu, qu’invadió terrenos colindantes. La riada movió la tubería y afectó tanto al colector de saniamientu de Cangues d’Onís como a la canalización de gas.​​​​

  • Mediu Ambiente conclúi les obres d’anovación del colector de Sames, n’Amieva

    Mediu Ambiente conclúi les obres d’anovación del colector de Sames, n’Amieva

    La Conseyería d’Alministración Autonómica, Mediu Ambiente y Cambéu Climáticu invirtió 160.645 euros nes obres de renovación del colector de Sames, nel conceyu d’Amieva, realizaes con calter d’emerxencia.

    La infraestructura, que da serviciu a 70 habitantes, yá ta totalmente operativa, mientres que l’asfaltáu de la cai nel tramu afectáu pol frayatu ta a puntu de concluyir. Amás, el tráficu ta restituyíu.

    Por cuenta de los desperfectos causaos polos episodios d’intenses agües, Mediu Ambiente decidió anovar el colector. Les obres consistieron na construcción d’una nueva canalización pa regar, la reposición del colector de saneamientu afectáu pol frayatu de la canalización y l’execución de los pozos de rexistru necesarios pal caltenimientu de la infraestructura, amás de la sustitución completa del firme de la cai.

  • Mediu Ambiente saca a llicitación un contratu p’analizar dellos enclaves potencialmente contaminaos

    Mediu Ambiente saca a llicitación un contratu p’analizar dellos enclaves potencialmente contaminaos

    La Conseyería d’Alministración Autonómica, Mediu Ambiente y Cambéu Climáticu sacó a llicitación un contratu pa la caracterización de siete allugamientos potencialmente contaminaos, por un importe de 101.208 euros y un plazu máximu d’execución de cuatro meses.

    Los análisis van realizase nel depósitu de residuos de La Cavada (Carreño), escombreres y suelos de Llumeres (Gozón), depósitos de residuos inertes/non peligrosos de Deva (Xixón), Piedramuelle (Uviéu), Careses (Siero), Perdones (Gozón) y El Tarronal (Mieres).

    L’oxetivu d’estos estudios ye caracterizar estos allugamientos y determinar si suponen riesgos de contaminación na so redolada, lo que va determinar la so aptitú y condiciones pa otros usos.

    Nos casos de Xixón, Uviéu, Siero, Mieres y el depósitu de Perdones, en Gozón, l’estudiu va esclariar si existen nicios nesos allugamientos de la existencia de materiales contaminaos, yá sían peligrosos o non peligrosos, a partir de la recoyida de muestres d’agües. Otra manera, en Carreño y la escombrera de la vieya mina de Llumeres, en Gozón, los trabayos van dexar conocer tamién con mayor detalle la caracterización de los residuos de los vertideros.

    Les empreses interesaes, que cumplan los requisitos de solvencia técnica y económica pa participar na llicitación, tienen de plazu hasta’l 3 de febreru pa presentar les sos propuestes.

    El detalle de la llicitación ta disponible nel portal de llicitaciones del Principáu (https://sede.asturias.es/licitaciones-adjudicaciones) y na plataforma de contratación del sector públicu d’España.

  • Mediu Ambiente axudica en 907.976 euros les obres de conexón del saneamientu d’Andrín, en Llanes

    Mediu Ambiente axudica en 907.976 euros les obres de conexón del saneamientu d’Andrín, en Llanes

    a Conseyería d’Alministración Autonómica, Mediu Ambiente y Cambéu Climáticu axudicó en 907.976 euros les obres de conexón del saneamientu d’Andrín, en Llanes. L’actuación, que cunta con un plazu d’execución de 20 meses, va beneficiar a 1.022 habitantes.

    Los trabayos van permitir conducir, por aciu un bombéu y la so tubería d’ impulsión, les agües residuales d’Andrín a la rede de saneamientu de San Roque l’Acebal pa la so depuración na estación de Llanes.

    N’Andrín van instalase dos bombes pa propulsar les agües residuales del núcleu urbanu por aciu una tubería d’impulsión. Pal so treslláu hasta San Roque l’Acebal construyirá otra tubería de 400 milímetros de diámetru y 1.330 metros de llargor.

    En cruciando per debaxo de l’autovía na redolada de San Roque l’Acebal, les agües residuales van dirixise en gravedá por una conducción de 580 metros hasta incorporase al saneamientu d’esta localidá.

    La inversión, cofinanciada pol Fondu Européu de Desenvolvimientu Rexonal (Feder), distribúyese en dos añalidaes: 850.000 euros esti añu y 57.976 en 2023.

    Nel conceyu de Llanes, la conseyería tamién ta executando les obres que van permitir tratar les agües residuales de Balmori y Posada na estación depuradora de San Xurde, antes del so arramáu al mediu natural. A esta actuación, Medio Ambiente destinó 1.567.162 euros.

    Igualmente, Medio Ambiente ta realizando les obres d’adecuación  y renovación de les estaciones de bombéu de Cué, Toró, Celoriu, Niembru y Borizu, toes elles pertenecientes al sistema de la estación depuradora de Llanes con una inversión de 1.079.035 euros.

  • El Principáu caltién activu’l protocolu por contaminación atmosférica per cuartu día al persistir los niveles de partícules na zona d’Uviéu

    El Principáu caltién activu’l protocolu por contaminación atmosférica per cuartu día al persistir los niveles de partícules na zona d’Uviéu

    • La estación del Palacio de los Deportes sigue rexistrando valores elevaos de PM2,5 y PM10.

    La Conseyería d’Alministración Autonómica, Mediu Ambiente y Cambéu Climáticu caltién activu per cuartu día consecutivu’l protocolu por episodios de contaminación nel so nivel preventivu na zona d’Uviéu, al persistir niveles altos de partícules en suspensión na atmósfera.

    El dispositivu actívase nel so nivel 0 cuando la concentración de partícules na atmósfera ye superior a 25 microgramos por metro cúbicu (µg/m3) de PM2,5 (partícules de diámetru inferior a 2,5 micres) o de 45 µg/m3 pa les PM10 (con diámetru inferior a 10 micres), por trés díes, en polo menos una estación de la zona y simultáneamente existe previsión de fenómenos meteorolóxicos qu’enzanquen l’espardimientu de contaminantes na atmósfera (estabilidá atmosférica, inversión térmica y ausencia d’agües).

    La conseyería decidió caltener activu’l protocolu 24 hores más por precuru, a pesar de que les previsiones de l’Axencia Estatal de Meteoroloxía (Aemet) apunten a que la ventilación na área d’Uviéu va ser favorable a lo llargo del día, polo que se daríen les condiciones pa desactivalu. Túvose en cuenta pal allongamientu del protocolu que los díes previos rexistráronse valores elevaos y prevese que güei van ser asemeyaos. La aglomeración de la área d’Uviéu inclúi, amás d’esti conceyu, los de Noreña, Siero, La Ribera, Llanera y la zona industrial de Morcín.

    El restu d’estaciones de la rede de control de calidá del aire del Principáu nun presenten al empar valores de concentración de partícules en suspensión y condiciones desfavorables de ventilación qu’esixan l’activación del protocolu.

    La Conseyería de Mediu Ambiente publicó’l l xueves l’activación del protocolu a los representantes de les alministraciones afectaes, al traviés de los miembros de la comisión de valoración y siguimientu del mesmu.

    Coles mesmes, comunicóse l’activación del protocolu a los servicios competentes en materia de salú pública y atención sanitaria.

    Nel casu de persones especialmente sensibles (adultos o neños con problemes respiratorios, patoloxíes cardiaques, EPOC, y muyeres embarazaes y lactantes) encamiéntase planiar l’actividá física y amenorgala si esperimenten síntomes. Tamién se-yos aconseya apartase de les víes con más tráficu.

  • El Principáu participa nun simulacru de busca y rescate de fauna marino afectao por un vertíu d’hidrocarburos en Xixón

    El Principáu participa nun simulacru de busca y rescate de fauna marino afectao por un vertíu d’hidrocarburos en Xixón

    La playa del Arbeyal va acoyer güei, de 11:00 a 14:30 hores, un simulacru de rescate y atención a fauna marino afectao por un vertíu d’hidrocarburos. Nel exerciciu participaren una docena d’axentes y técnicos de les direcciones xenerales de Mediu Natural y Planificación Rural y de Pesca Marítima, del Conceyu y del Puertu de Xixón.

    El simulacru ye un exerciciu prácticu pa entamar un operativu de busca y rescate. A pie de playa va instalase’l centru de mandu y van establecese dellos equipos de trabayu. Ún d’ellos va centrase en montar la carpa y organizar les xeres y el restu va encargase de peñar la zona en busca de la fauna afectada pol arramáu.

    Los animales, n’atopándolos, van llevalos a la carpa onde van recibir los primeros cuidaos y va rexistrase la información de cada exemplar. Si se tratare d’un accidente real, darréu diben treslladase a un centru d’acoyida pa siguir cola so recuperación.

    El de güei va ser el primer exerciciu prácticu d’estes característiques que se desenvuelve n’Asturies y forma parte del proyectu formativu Responder, pa meyorar la respuesta énte fauna marino petroliao. Ye una iniciativa de la entidá Submon, que cunta col sofitu de la Fundación Biodiversidá, del Ministeriu pa la Transición Ecolóxica y el Retu Demográficu, en collaboración cola Conseyería de Mediu Rural y Cohesión Territorial y el departamentu d’Acción Climática, Alimentación y Axenda Rural de la Generalitat de Cataluña.

    Les persones que van participar nel simulacru recibieron primeramente un cursu de formación teórica qu’agora van completar cola práctica.

    El proyectu Responder inclúi acciones de formación rellacionaes cola asistencia a fauna afectada por arramaos y básase nel sistema de la rede europea Eurowa (European Oiled Wildlife Assistance). La so intención ye crear una malla de profesionales n’Europa, con formación homoxénea, que pueda intercambiase ente países en casu d’emerxencia, trabayando colos mesmos estándares de calidá y protocolos d’actuación.

    El vertíu accidental o intencional d’hidrocarburos o otros compuestos químicos al mar pue causar serios daños a los animales marinos más delicaos, como les aves o tortugues marines, por cuenta de que pasen munchu tiempu na superficie del agua, onde flota l’hidrocarburu, pa descansar, somorguiase en busca de comida o salir a alendar. Anque munchos animales petroliaos muerren n’alta mar, dalgunos puen llegar a la mariña, lo que supón un retu de xestión importante. Por esti motivu, actuar de forma coordinada, con rapidez, conocencia y eficacia ye importante pa menguar los daños.

  • Mediu Ambiente va acabar a primeros del 2022 les obres de restauración del suelu de lo que yeren los Talleres del Conde, en Llangréu

    Mediu Ambiente va acabar a primeros del 2022 les obres de restauración del suelu de lo que yeren los Talleres del Conde, en Llangréu

    El vicepresidente y conseyeru d’Alministración Autonómica, Mediu Ambiente y Cambéu Climáticu, Juan Cofiño, anunció güei que los trabayos de recuperación ambiental del suelu de los antiguos Talleres del Conde, en Llangréu, a los que’l so departamentu destina 136.000 euros, van acabar a primeros del 2022.

    De la que visitaba les obres, Cofiño esplicó qu’anguaño ta faciéndose la roza y la demolición de les lloses de formigón allugaes nel terrenu. Tamién indicó que se ta tramitando la documentación alministrativo pa tresportar los residuos contaminaos a Coxersa. De mano, ta previsto que’l treslláu empiece a últimos d’esti mes pa, depués, volver facer otru análisis del suelu y rellenalu. Desque se remate la restauración, el Conceyu de Llangréu, propietariu del terrenu, va acondicionar la parcela cola mira de da-y dellos usos, ente ellos, la construcción d’un recintu ferial.

    Amás del proyectu actual de rehabilitación ambiental, l’Alministración local yá sacó a llicitación el proyectu pa executar los accesos al recintu, que van ser soterraños y van pasar per debaxo de les víes del tren. Desque se rematen estes actuaciones, el conceyu va urbanizar la parcela.

    P’acabar, en toes estes iniciatives van invertise camín de los seis millones, financiaos al traviés de convenios de los fondos mineros.

    Mediu Ambiente axudicó n’agostu’l proyectu de recuperación medioambiental de Talleres del Conde, onde se desenvolvió una actividá metalúrxica intensa nos sieglos XIX y XX. L’actuación, qu’empezó en setiembre, afecta a una superficie d’unos 500 metros cuadraos, con una fondura mínima de 25 centímetros, qu’incluye la capa de tierra vexetal.

    El proyectu tamién incluye la escavación d’alredor de 515 metros cúbicos de tierra, la demolición y llevantáu de 300 metros cuadraos de pavimentu de formigón en masa y el rellenu de zanxes con material de la escavación, amás de la xestión y tresporte de los residuos.

    Otres intervenciones centrar na retirada de suelos contaminaos, xeneraos pol allugamientu de distintes actividaes siderúrxiques na parcela, como un taller de calderería. Les resultancies de los analises realizaos evidencian la presencia nos terrenes de metales pesaos, sobremanera arsénicu y chombu, según otros compuestos orgánicos. En total, envalórase que se van retirar 400 metros cúbicos de suelu.

  • El Principáu y l’Ayuntamientu de Cangues d’Onís firmen el conveniu p’acometer el saneamientu de Mestas de Con, con una inversión de cuasi dos millones

    El Principáu y l’Ayuntamientu de Cangues d’Onís firmen el conveniu p’acometer el saneamientu de Mestas de Con, con una inversión de cuasi dos millones

    Juan Cofiño, vicepresidente y conseyeru d’Alministración Autonómica, Mediu Ambiente y Cámbeu Climáticu y l’alcalde de Cangues d’Onis, José Manuel González, firmaron ayeri’l conveniu de collaboración p’ameyorar el sistema de saneamientu y depuración d’agües residuales de Mestas de Con enantes del so vertíu al ríu Güeña. Les dos alministración van invertir 1.950.054 euros nesta iniciativa.

    La Conseyería de Mediu Ambiente va encargase de la financiación y execución del proyectu de saneamientu, al que va destinar 1.539.195 euros y les obres van contar con financiación del programa operativu del Fondu Européu de Desarrollo Rexonal (FEDER).

    En virtud del acuerdo, la Consejería de Medio Ambiente se encargará de la financiación y ejecución del proyecto de saneamiento, al que destinará 1.539.195 euros distribuidos en varias anualidades: 250.000 este año, 786.000 en 2022 y 503.195 en 2023. Las obras contarán con financiación del programa operativo del Fondo Europeo de Desarrollo Regional (Feder). Esti proyectu tamién inclúi un bombéu y un aliviaderu, infraestructures hidráuliques necesaries pal bon funcionamientu del sistema de saneamientu.

    L’Ayutamientu de Cangues d’Onís va financiar con 160.619 euros el proyectu d’anovación de los colectores de la zona, qu’incluyen l’interceptor del ríu Tabardín, l’aliviaderu y los colectores embaxo del ríu Güeña, que recueyen los vertidos de les edificaciones situaes nel borde del calce, al so pasu per Mestas de Con. El plazu d’execución previstu ye de cuatro meses.