Xixón al día

Etiqueta: Conseyería de Sanidá

  • Salú triplica la inversión pa los sistemes d’información d’atención primaria y vixilancia epidemiolóxica, hasta los 985.000 euros

    Salú triplica la inversión pa los sistemes d’información d’atención primaria y vixilancia epidemiolóxica, hasta los 985.000 euros

    La Conseyería de Salú va usar 985.000 euros nel 2022, cuasi’l triple de la inversión actual, nel desenvolvimientu de sistemes d’información, sobre too n’atención primaria y vixilancia epidemiolóxica, de manera que van poder encarase proyectos vinculaos a la intelixencia artificial que van ayudar a la toma de decisiones clíniques y de xestión, a la investigación y a la docencia.

    Destaca la implantación d’un sistema d’información de vixilancia epidemiolóxica, interoperable cola historia clínica electrónica, que va facilitar el rexistru sistemáticu de les enfermedaes de declaración obligatoria y los sos determinantes por área xeográfica. Salú Pública va disponer asina d’una ferramienta que va dexar establecer estratexes y adoptar decisiones de manera antemanada énte brotos.

    El desenvolvimientu de la interoperabilidá y l’accesibilidá de la documentación clínico ye una de les grandes meyores que van percibir los usuarios del sistema sanitariu públicu, porque van poder acceder a la so historia clínica de manera áxil, confidencial y segura.

    Tamién se va implantar un sistema informáticu de llaboratoriu únicu pa tol Serviciu de Salú (Sespa) y una plataforma d’integración que va facilitar l’accesibilidá a la información clínica. Amás, va avanzase na teleasistencia y na dotación de funcionalidaes nueves pa la estación clínica d’atención primaria (ECAP).

    El conseyeru de Salú, Pablo Fernández Muñiz, destacó l’esfuerciu inversor nos sistemes d’información na presentación del proyectu de presupuestos del so departamentu pal 2022 na Xunta Xeneral. La conseyería va cuntar con 1.998.356.567 euros, un 2,34 % más qu’anguaño (+45.658.291 euros), pa impulsar l’atención primaria y la tecnoloxía de vanguardia. Amás, el Principáu vuelve aumentar el segundu añu siguíu la inversión en salú por habitante, hasta algamar los 1.975,5 euros, una de les más altes del país.

    1.958,7 millones pal Sespa

    El Sespa va xestionar la mayor parte del presupuestu de la cartera, 1.958,7 millones, una cifra que va dexar atender la demanda asistencial y caltener una respuesta afayadiza énte la pandemia del coronavirus.

    Les cuentes recueyen 27,5 millones pa inversiones, financiao lo más d’ello con fondos europeos. Esta cantidá, la más elevada de los últimos años, va dexar desenvolver el portal del paciente, la historia embarcada de les UVI móviles y atención en casa, la renovación y modernización de los equipamientos d’endoscopia dixestiva y la dixitalización de toles sales de rayos, amás de la compra de dos equipos de ciruxía robotizada pal Hospital Universitariu Central d’Asturies (HUCA) y pal Hospital Universitariu de Cabueñes, d’ecógrafos pa primaria y del equipamientu pa implantar terapies de CART-T contra’l cáncer. A estes actuaciones súmase la renovación d’equipos d’alta tecnoloxía, dientro del plan Inveat, que va facilitar l’adquisición de 7 TAC, 5 resonancies magnétiques, 2 anxógrafos, un PET-TAC, y una sala d’hemodinámica.

    Más fondos p’atención primaria y salú mental

    Una de les prioridaes de Salú ye la rede d’atención primaria, que va percibir 322 millones nel 2022, 30 más qu’anguaño (+12,5 %). Amás, el Sespa va destinar el 25 % del so presupuestu pa personal a la plantiya de los centros de salú. Nestos equipamientos va crease la figura de los directores d’equipu y va reforzase la plantiya con 30 enfermeres y 16 coordinadores sociosanitarios y escolares.

    El Sespa cunta con una partida de 35,6 millones pa contratar 170 facultativos y 213 enfermeres -tanto d’atención primaria, como de salú mental y d’asistencia hospitalaria- y a 70 auxiliares alministrativos pa primaria.

    En total, el Serviciu de Salú va dedicar el 47,96 % del so presupuestu a personal, lo que supon 938 millones. D’esa cantidá, 13 van empobinase a les convocatories nueves de carrera y desenvolvimientu profesional y otros 2 al Decretu d’Atención Primaria, la exención de guardies de profesionales de más de 55 años y los módulos de tarde de primaria y del Samu. Amás, va potenciar a los especialistes en formación (MIR y EIR), con una partida de 40 millones (5,4 más qu’anguaño).

    Otra de les exes ye la rede de salú mental, que’l so presupuestu aumenta un 4,35 % pa reforzar la so estructura y recursos. Nel 2022 va contratar otros cuatro psiquiatres y un terapeuta ocupacional, amás d’a dos psicólogos p’atención primaria, aparte de consolidar la decena de profesionales incorporaos anguaño.

    Otra manera, asígnense 5 millones a los programes especiales del plan de choque de llistes d’espera y 3,2 a refuerzos de personal pa l’atención covid: rastrexadores, técnicos de llaboratoriu y asistencia en puntos autocovid y de vacunación.

    208 millones pa fármacos y 13,8 pa vacunes

    El Sespa destina 613 millones a gastos corrientes, de los que 208 correspuenden a l’adquisición de fármacos y 13,8 a la compra de vacunes. Amás, otros 26,6 dedíquense a tresporte sanitariu y 86 a les derivaciones a la rede hospitalaria concertada y privada, incluyíes les intervenciones del plan de choque pa menguar les llistes d’espera.

    Aparte, acútense 312 millones pa la receta electrónica d’atención primaria y hospitalaria, especialmente pa melecines rellacionaes con patoloxíes cróniques.

    Un 38 % más pa obres n’equipamientos sanitarios

    La conseyería aumenta un 38,16 % la partida destinada a los equipamientos sanitarios, que xube a 22.900.010 euros, lo que supón 6,3 millones más qu’anguaño. Estos fondos van dexar acometer obres en centros de salú y hospitales de toles árees sanitaries. Más de la metá de la cuantía, 12.278.000 euros, va dexar encarar la primer fase de les obres d’ampliación y reforma del Hospital Universitariu de Cabueñes.

    Asina mesmo, contémplase empezar los trabayos de construcción de los centros de salú nuevos de Sotrondio (Samartín del Rei Aurelio), Roces Nuevo (Xixón) y La Pola (Ḷḷena), amás de la redacción del proyectu del de Tapia y intervenciones n’hospitales comarcales como Xarrio, Carmen y Severo Ochoa de Cangas del Narcea, San Agustín d’Avilés, el Francisco Grande Covián, en Les Arriondes, y el Valle del Nalón.

  • La supervivencia de les asturianes de 45 a 64 años al cáncer de mama algama’l 92%

    La supervivencia de les asturianes de 45 a 64 años al cáncer de mama algama’l 92%

    La supervivencia de les muyeres de 45 a 64 años con cáncer de mama algama n’Asturies el 92% al llustru del diagnósticu. Son datos del Rexistru de Tumores del Principáu, dependiente de la Conseyería de Salú. Nos últimos exercicios amenorgóse la mortalidá por esta causa en toles franxes d’edá, especialmente ente les más moces.

    Anguaño rexístrense cerca de 800 nuevos casos añales nel Principáu, lo que convierte al de mama nel tumor más frecuente ente les muyeres. Les campañes de detección temprana fixeron posible’l diagnósticu n’estadios más tempranos. Más del 75% de la población diana; esto ye, muyeres de 50 a 69 años, participa nel programa de detección precoz, que consiste na realización d’una mamografía. Con esta prueba detéctase la patoloxía en cuatro muyeres de cada mil que participen nel programa. El 70% d’elles nun tien afectación de ganglios y unu de cada trés tumores mide menos d’un centímetru, lo que trai un meyor pronósticu y tratamientos menos agresivos.

    La Conseyería de Salú actualizó la información sobre esti peneráu, que per primer vegada reflexa los sos resultaos p’ayudar a les muyeres a decidir sobre la so participación nel programa. Esti añu yá se repartieron más de 13.000 folletos nes distintes zones sanitaries, a les que se va sumar nes próximes selmanes l’área III, que correspuende a Avilés y contorna. Per otra parte, Asturies va acoyer el 39º Congresu de la Sociedá Española de Senoloxía y Patoloxía Mamaria, que se va celebrar n’Uviéu n’ochobre de 2020, y nel que van participar unos 600 especialistes de too el país.

  • La campaña de vacunación del gripe entama’l 21 d’ochobre

    La campaña de vacunación del gripe entama’l 21 d’ochobre

    La campaña de vacunación antigripal 2019-2020 adelantráse al 21 d’ochobre para mayores de 65 años y muyeres embarazaes. A partir del 4 de payares, inmunizaráse al restu de grupos de riesgu, ente los que per primer vegada inclúyense ñácaros prematuros mayores de 6 meses y menores de dos años. La Conseyería de Sanidá encamienta la vacunación a les muyeres embarazaes pa protexer a los ñácaros, cuidao que hasta pasaos los seis meses de vida nun pueden recibir la profilaxis. El contaxu d’esta enfermedá amonta’l riesgu de complicaciones nos naciellos.

    El director xeneral de Salú Pública, Rafael Cofiño, presentó esta iniciativa nel centru de salú d’El Llano, en Xixón, onde destacó’l papel de la rede d’atención primaria na prevención y la promoción de la salú. Pela so parte, el xefe del Serviciu d’Epidemioloxía de la conseyería, Ismael Huerta, aportunó na importancia de que’l personal sanitariu y sociosanitariu se vacune pa prevenir contaxos a pacientes y grupos de riesgu. La vacuna ta encamentada pa mayores de 65 años, persones inmunodeprimíes o con enfermedaes cróniques, obesidá y muyeres embarazaes, que presenten más riesgu de complicaciones.

    Novedaes p’anguaño

    La campaña va rematar el 31 d’avientu. Ente les novedaes figura l’alministración de trés tipos de vacuna, ente les que s’inclúi per primer vegada la tetravalente de cultivu celular, indicada pa xestantes y persones con alerxes graves al güevu y a los antibióticos. A los mayores de 65 años inocularáse-yos la trivalente reforzada, que llogra una meyor respuesta inmune nesti sector de la población, y al restu de los grupos de riesgu, dende los seis meses hasta los 64 años, va alministráse-yos la tetravalente clásica, que protexe de los dos tipos de virus A y les dos variantes del B. Salú adquirió 244.000 dosis de vacuna, que supunxeron xuna inversión de 1.194.710 euros. Del total, 170.000 son de trivalente reforzada, 72.000 de la tetravalente clásica y 2.000 de tetravalente de cultivu celular.

    Esta selmana distribuyirán les dosis nos distintos puntos de vacunación y va espublizase la campaña con cartelos y folletos. Amás, per primer vegada va ellaborase un documentu d’entrugues frecuentes sobro’l gripe p’ayudar a estremar los síntomes d’un gripe de los d’un resfriáu.

    Balance de la campaña pasada

    La cobertoria vacunal na pasada campaña ente los grupos de riesgu algamó les 211.742 dosis alministraes de les 228.295 distribuyíes. En total, el Serviciu d’Epidemioloxía rexistró 3.816 andaes de gripe per cien mil habitantes, frente a los 4.390 del exerciciu anterior. Por grupos de riesgu, el 57% de les persones de más de 65 años recibieron la vacuna, de manera que se superó’l 55,2% de la campaña previa. Nesti grupu, rexistráronse 1.061 casos de gripe per cien mil habitantes, menos de la metá que na temporada anterior, cuando se rexistraron 2.597. Sicasí, encamiéntase que se vacune siquier el 65% d’esti colectivu p’amenorgar la morbilidad y la mortalidá. Al respective de les xestantes, l’añu pasáu inmunizáronse’l 44%, frente al 32% de la temporada anterior. Tamién s’amontó la cobertoria ente’l personal sanitario: del 32% al 50%.

  • José Ignacio Altolaguirre va asumir la Dirección de Seguridá Alimentaria, Sanidá Ambiental y Consumu

    José Ignacio Altolaguirre va asumir la Dirección de Seguridá Alimentaria, Sanidá Ambiental y Consumu

    José Ignacio Altolaguirre (Madrid, 1958) va facese cargu de la Dirección de Seguridá Alimentaria, Sanidá Ambiental y Consumu. Veterinariu y funcionariu de carrera, ye espertu européu na xestión de la calidá de los servicios sanitarios y tien una esperiencia amplia nes materies que va exercer. Tamién desempeñó delles responsabilidaes na Alministración.

    La Conseyería de Salú, dirixida por Pablo Fernández Muñiz, ta estructurada en cuatro direcciones xenerales: Salú Pública; Política y Planificación Sanitaria; Calidá, Tresformación y Xestión de la Conocencia y, a lo último, Curiaos, Humanización y Atención Sanitaria. L’últimu Conseyu de Gobiernu yá aprobó’l nomamientu de los sos titulares. Van ser, respectivamente, Rafael Cofiño, Lidia Clara Rodríguez, Elena Llorente y Sergio Valles. L’Executivu tamién alcordó que María Concepción Saavedra asuma la xerencia del Serviciu de Salú del Principáu (Sespa).

    El nomamientu de José Ignacio Altolaguirre va facese efectivu esta selmana próxima. La so dirección, dependiente de Salú Pública, va sustituyir a l’Axencia de Sanidá Ambiental y Consumu. Altolaguirre (axúntase currículum) yá ocupó puestos de responsabilidá na mesma, como xefe del serviciu de riesgos ambientales y alimentarios y responsable de programes de control oficial d’alimentos. Miembru del Comité Permanente de Seguridá Alimentaria de l’Axencia Española de Seguridá Alimentaria y Nutrición y de la Comisión de Seguridá Alimentaria del Colexu de Veterinarios d’Asturies, tamién participó nel desenvolvimientu del Plan de Salú del Principáu.

  • Asturies rexistra un casu de listeriosis ensin vinculación cola carne mechada

    Asturies rexistra un casu de listeriosis ensin vinculación cola carne mechada

    L’Hospital Universitariu Central d’Asturies (HUCA), n’Uviéu, rexistró un casu de listeriosis nun paciente de 64 años ingresáu na Unidá de Cuidos Intensivos (UCI). Trátase d’un casu clínicu aislláu d’afección pola bacteria Listeria monocytogenes, que nun guarda nenguna relación col biltu aniciáu n’Andalucía por consumu de carne mechada de la marca La Mechá. L’enfermu permanez na UCI, ta recibiendo tratamientu y evoluciona favorablemente.

    El conseyeru de Salú, Pablo Fernández Muñiz, axuntóse esti miércoles nel HUCA col xerente de la área IV, Luis Hevia, el director xeneral de Salú Pública, Antonio Molejón, y el xefe del Serviciu de Microbioloxía, Fernando Vázquez, para recibir información sobro’l casu.

    El 10% de la población ye portadora de la bacteria ensin qu’haya riesgu pal so salú. Nesta ocasión, trátase d’un enfermu inmunodeprimíu, con tratamientos antibióticos previos pa tratar otros xermes. L’hospital echó voz del casu al serviciu de Vixilancia Epidemiolóxica, como marca’l protocolu n’enfermedaes de declaración obligatoria (EDO). Amás, como en tolos casos d’afección por esta bacteria, el HUCA va unviase una amuesa del cultivu tomáu al Institutu Carlos III pa que faiga un tipaxe del xenoma del xerme, que se va incluyir na so base de datos. Mientres anguaño, rexistráronse 13 casos aisllaos por listeriosis n’Asturies.

  • Pablo Ignacio Fernández Muñiz, conseyeru de Sanidá

    Pablo Ignacio Fernández Muñiz, conseyeru de Sanidá

    Pablo Ignacio Fernández Muñiz (Avilés, 1966) ye’l nuevu conseyeru de Sanidá del Gobiernu d’Asturies. Llicenciáu en Medicina y Ciruxía pola Universidá d’Uviéu, empecipió la so trayectoria profesional como médicu d’accidentes na mina de Tormaleo y darréu nel serviciu d’Urxencies d’Atención Primaria d’Avilés. En cursando’l MIR na especialidá de Ciruxía Xeneral y del Aparatu Dixestivu, incorporóseó al Hospital Xeneral d’Asturies, onde trabayó dende 1992 hasta 1996 y onde llogró xuna beca de l’Asociación Española de Ciruxanos pa formación específica en Ciruxía Hepato-Bilio-Pancreática. Tamién exerció como ciruxanu nel Hospital Valle del Nalón (1997-2010) y nel Hospital San Agustín hasta 2016. Anguaño ocupaba’l cargu de director de la área IV del Serviciu de Salú del Principáu (Sespa), qu’inclúi la xestión del Hospital Monte Naranco y l’Hospital Universitariu Central d’Asturies (HUCA).

    Ye miembru del Comité de Bioética d’España y del Comité Científicu de la Sociedá Internacional de Bioética (SIBI). Como docente, dende 2016 exerció como director del Máster d’Especialización en Patoloxía Mamaria de la Universidá Autónoma de Madrid. Ye espertu en ciruxía oncoplástica y reconstructiva de la mama, especialista n’ecografía mamaria, máster en Bioética poles Universidaes del País Vascu, Zaragoza, La Llaguna, Les Palmes de Gran Canaria y Rovira i Virgili, máster en Dirección y Alministración d’Empreses pola Universidá Camilo José Cela, y máster en Dirección y Alministración d’Empreses (MBA) y especialidá en Xestión Sanitaria por IMF Business School.

  • Sanidá remata l’arreglu de la cubierta del centru de salú de Laviada

    Sanidá remata l’arreglu de la cubierta del centru de salú de Laviada

    La Conseyería de Sanidá remató les obres de restitución y arreglu de la cubierta metálica del centru de salú de Laviada. Estos trabayos supunxeron una inversión de 300.000 euros. La intervención, que cuntó con financiación de la Unión Europea al traviés del Fondu Européu de Desenvolvimientu Rexonal (Feder), consistió nel arreglu integral del teyáu, de más de dos décades d’antigüedá.

    L’estáu anterior de la cubierta favorecía les filtraciones pola so escasa rimada y una insuficiente rede d’evacuación de les agües pluviales. Estos defectos causaron daños na estructura qu’obligaron a sustituyila por una nueva, con un diseñu reformáu de les baxantes que facilita la recoyida de l’agua.

  • Asturies amplía a tola etapa d’Infantil el programa de salú bucodental

    Asturies amplía a tola etapa d’Infantil el programa de salú bucodental

    El Gobiernu d’Asturies actualizó los conteníos y materiales del programa de salú bucodental ‘La conquista de la boca sana’ y amplió la so cobertura. Va beneficiase tol alumnáu d’Educación Infantil y Primaria; esto ye, de 3 a 12 años, cuando hasta agora empezaba a los 5. Esta actuación, implantada va diez años, ye un plan de sofitu a l’acción educativa que, nel marcu de la Estratexa d’atención a la salú oral, llogra meyores significatives na infancia y nos primeros años de l’adolescencia.

    Los directores xenerales de Salú Pública, Antonio Molejón, y d’Ordenación Académica y Innovación Educativa, Francisco Laviana, presentaron esti miércoles el proyectu anováu. El programa busca ameyorar los vezos d’hixene oral del alumnáu y ufiertar les conocencies fundamentales pal cuidáu de la boca na población d’hasta 12 años.

    ‘La conquista de la boca sana’ busca ameyorar los vezos d’hixene oral del alumnáu

    La conquista de la boca sana consta d’una parte teórica que profesoráu y alumnáu trabayen nel aula. Incluye información sobre l’anatomía y fisioloxía de la boca, la patoloxía oral y la prevención d’enfermedaes. La parte práctica contempla talleres de cepilláu nes aules impartíos por profesionales. Realízase con cepiyos de dientes pa cada neñu y boques xigantes y cepiyos xigantes suministraos a los centros pola Conseyería de Sanidá.

    Alredor del 60 % del alumnáu de los centros públicos d’Asturies participa nesti programa, una cifra qu’en delles árees sanitaries supera’l 80 % y n’otres raspia’l cien por cien. La conseyería quier ampliar estes cobertures nos años vinientes, sobre manera nes zones onde se caltienen más baxes: III (Avilés), IV (Uviéu) y V (Xixón).

    La salú bucodental n’Asturies

    Les 38 unidaes de salú bucodental del Serviciu de Salú del Principáu (Sespa) atienden cada añu 145.000 consultes. La implantación de la estratexa d’atención a la salú oral fai más de dos décades supunxo una meyora real. Asina, anguaño, el 42% de los escolinos presenta dalguna caries a los 12 años, una cifra sensiblemente menor al 74% d’entós.

    Ún de los indicadores que tamién evolucionó ye’l CAO, qu’evalúa la media de dientes cariaos, ausentes por caries y obturaos na población esplorao. En 1992, amosaba nel Principáu una tasa de 3,33 n’escolinos de 12 años, mentes que na última evaluación baxa hasta’l 1,17.Nes unidaes de salú bucodental, desplegaes en 58 consultes, desenvuelven l’actividá 38 dentistes, 26 hixenistes y 12 técnicos en cuidaos auxiliares d’enfermería, que revisen anualmente a alredor de 4.000 muyeres embaranzaes y 24.000 escolinos.

    El programa de salú bucodental ye una iniciativa de calter preventivu, que propón la revisión de los menores en dellos momentos de la edá escolar pa evitar daños nes pieces o amenorgar el so impactu cuando se producieron. Estes unidaes tamién atienden a persones adultes pa procedimientos agudos y ciruxía menor y impulsen programes de meyora de la salú oral de muyeres embaranzaes y de la población con discapacidá intelectual.