El Serviciu de Salú del Principáu (Sespa) entamó la citación a la población de riesgu pa l’alministración de la vacuna del gripe, que va empezar el martes 2 de payares. Per segundu añu consecutivu, toles árees van realizar una captación proactiva pa protexer a los colectivos vulnerables énte esti virus respiratoriu, polo que nun ye mester llamar al centru sanitariu de referencia.
Los equipos d’enfermería d’atención primaria inocularán les dosis a pacientes crónicos nos centros de salú. Asina, a los mayores de 70 años va aplicáse-yos simultáneamente esta profilaxis cola de refuerzu frente a la covid -una en cada brazu- nos centros de salú, quitando nel área sanitaria IV, con cabecera n’Uviéu, onde van recibir la vacuna contra la covid nel Hospital Monte Naranco y nel serviciu d’Estracciones del Hospital Universitariu Central d’Asturies (HUCA).
Pela so parte, na área V, con cabecera en Xixón, van alministrase dambes dosis nos puntos de vacunación masiva habilitaos nel Palaciu de Deportes de La Guía, na Conservera de Candás y nel Atenéu Obreru de Villaviciosa. Les persones de 65 a 69 años namás van recibir nos puntos de vacunación masiva la profilaxis antigripal, ente que les mayores de 70 van recibir los dos (la del gripe y el refuerzu frente a la covid).
El xefe de Vixilancia Epidemiolóxica, Ismael Huerta, y el xefe de Xestión Asistencial del Sespa, Óscar Suárez, presentaron esta tarde l’operativu de la campaña 2021-2022. Huerta sorrayó la importancia de la inmunización de los grupos de riesgu “porque la coinfección del gripe cola covid dobla’l riesgu de muerte na población vulnerable”.
Grupu diana pa la vacunación antigripal
La vacuna antigripal ta indicada pa mayores de 65 años, persones inmunodeprimíes, con enfermedaes cróniques o obesidá y embarazaes, que presenten mayor probabilidá d’entueyos. Tamién s’aconseya a quien convive con persones d’altu riesgu, estudiantes en práctiques de centros sanitarios y sociales, y trabayadores de servicios públicos esenciales, como policíes, bomberos y voluntarios de Protección Civil, etcétera.
Salú encamienta la dosis a les muyeres embarazaes en cualesquier momentu pa protexer a los ñácarosal nun poder recibir la profilaxis hasta pasaos los seis meses de vida. L’andada del gripe incrementa’l riesgu d’entueyos pa los naciellos y provoca ingresos y casos graves equipables a los qu’afecten a les persones mayores de 65 años. Esti encamientu tamién s’estiende nel puerperiu, hasta los seis meses tres el partu, a quien nun recibieren antes la profilaxis.
Otramiente, la vacuna ta indicada pa menores de 6 meses a 2 años que nacieren con menos de 32 selmanes de xestación.
Les autoridaes sanitaries tamién aportunen na importancia de que’l personal sanitariu y sociosanitariu se vacune pa prevenir andaes a pacientes y usuarios de los centros residenciales de mayores.
Oxetivu: llegar al 75% de la población vulnerable
La Conseyería de Salú confía en que la cobertura vacunal algame al 75% de la población diana, pa lo qu’adquirió 440.000 dosis, que supunxeron una inversión de 5.090.280 euros, al traviés d’un procesu centralizáu entamáu pol Ministeriu de Sanidá.
Per segundu añu consecutivu van alministrase cuatro tipos de vacunes tetravalentes, incluyida la de cultivu celular, polo que protexen ante los dos tipos de virus A y los dos variantes del B que tán circulando na actualidá.
A los mayores de 65 años van inoculáse-yos dos tipos de profilaxis distintes, dependiendo de si viven nuna residencia o na so casa. Asina, quien tean institucionalizaos van recibir la tetravalente con adyuvante, que llogra una meyor respuesta inmune nesti colectivu. Tamién se-yos va espachar mayor cantidá de dosis p’ampliar la protección.
Al igual que na campaña anterior, al restu d’adultos de los grupos de riesgu, ente los 14 y los 64 años, va alministráse-yos la tetravalente clásica de cultivu celular, ente que pa edaes pediátriques va usase la clásica tetravalente.
Midíes hixéniques
Salú Pública sorraya que la vacunación antigripal añal ye la meyor estratexa pa la prevención del gripe y los sos entueyos, de la qu’encamienta delles midíes hixéniques cola fin d’evitar la tresmisión del virus de persona a persona:
- Tapase la boca y la ñariz con un pañuelu de papel, utilizando la cara interna del coldu al espirriar o tusir, y refugar el pañuelu recién usáu.
- Utilizar mázcara énte síntomes compatibles col gripe, especialmente nes relaciones con persones vulnerables.
- Llavar les manes con frecuencia, especialmente en sonándose o espirriar, al dir al aséu y antes d’inxerir alimentos.
- Nun compartir vasos, cubiertos, toalles y otros oxetos que pudieren tar en contactu con cuspia y secreciones respiratories.
La Conseyería de Salú ellaboró un documentu d’entrugues frecuentes sobre’l gripe que ta disponible na páxina de Astursalud (
www.astursalud.es) p’ayudar a estremar ente los síntomes d’un gripe y los d’un resfriáu.
