Xixón al día

Etiqueta: DOP Sidra d’Asturies

  • Presenten el proyectu Sidra d’Asturies LAB

    Presenten el proyectu Sidra d’Asturies LAB

    Esti miércoles, nel edificiu ‘Spaces’ de Xixón, el Conseyu Regulador de la DOP Sidra d’Asturies presentó’l proyectu ‘Sidra d’Asturies Lab’. Trátase de la creación de grupos
    de trabayu protagonizaos por mozos asturianos ente 18 y 30 años, y que’l so retu foi afondar sobre esti productu representativu de la gastronomía y la cultura asturiana.

    Con estes dinámiques pretendióse, per un sitiu, conocer les esmoliciones de les nueves xeneraciones y, por otru, definióse un plan d’iniciatives de marketing orixinal. Esto ye, un espaciu onde mozos amigos de la sidra y la mazana asturiana collaboraron cola DOP Sidra d’Asturies coles mires d’ellaborar un plan de promoción de la Sidra con Denominación d’Orixe Protexida.

    Mientres la presentación, los mozos participantes tomaron voz pa ilustrar les idees más orixinales puestes de en común mientres les sesiones de trabayu. Munches d’elles empobinaes a potenciar esti productu en festivales, redes sociales, esperiencies gastronómiques o mientres el Dia Mundial de la Sidra.

  • Preséntase un llibru infantil dedicáu a la Cultura Sidrera Asturiana

    Preséntase un llibru infantil dedicáu a la Cultura Sidrera Asturiana

    Esti xueves 10 de payares presentóse, na see del Conseyu Regulador de la DOP Sidra d’Asturies, el llibru La Sidra d’Asturies, una bébora mui nuesa. Con testos de David Acera ya ilustraciones de Raquel Lagartos atópase empobináu al públicu infantil coles mires d’empecipialos na conocencia de la Cultura Sidrera Asturiana, candidata española a Patrimoniu Inmaterial de la Humanidá énte la UNESCO. Na obra detállense los métodos de producción y ellaboración, les tradiciones lúdicu y festivu, el calter sostenible del sector y la manera en que los neños participen del nuesu elementu más identitario.

    “Esti llibru ye un viaxe nel tiempu. Los cuentos sirven pa conectar col pasáu, cola cultura sidrera asturiana que sigue bien viva y qu’hai de tresmitise de xeneración en xeneración”, manifestó l’autor del cuentu, David Acera.

    «La función del Conseyu Regulador de la DOP Sidra d’Asturies ye promocionar y defender la Sidra d’Asturies, que ye l’orixe de la cultura sidrera asturiana. Caltener esta cultura nos neños ye necesariu pa que se familiaricen coles nueses tradiciones y caltengan esti patrimoniu”, espresó el presidente del Conseyu Regulador de la DOP Sidra d’Asturies, Guillermo Guisasola.

    “Esta publicación de la Cátedra de la Sidra d’Asturies atópase empobinada al públicu infantil coles mires d’empecipialos na conocencia de la cultura sidrera asturiana, candidata española a ser reconocida como Patrimoniu Cultural Inmaterial de la UNESCO, llueu”, amestó Luis Benito, director de la Cátedra de la Sidra d’Asturies de la Universidá d’Uviéu.
    Esta publicación en dixital va xubir a les páxines web de dambos organismos y va distribuyise físicamente a tolos colexos nel primer nivel de primaria 6- 10 años. Tamién s’editó una versión n’asturianu.

  • La DOP Sidra d’Asturies celebró, un añu más, el so tradicional ‘Esperiencia Collecha’

    La DOP Sidra d’Asturies celebró, un añu más, el so tradicional ‘Esperiencia Collecha’

    Un añu más, el Conseyu Regulador de la DOP Sidra d’Asturies celebró la so tradicional ‘Esperiencia Collecha’. Una decena de periodistes de dellos medios de comunicación, tanto xeneralistes como especializaos en gastronomía, pudieron esfrutar d’una actividá empuesta que’l so oxetivu yera vivir una esperiencia real de la campaña de recoyida de la collecha de la mazana. Una xornada entamada p’afondar na conocencia del productu y los sos raigaños y nel sector agrícola ya industrial del que forma parte la Denominación d’Orixe Protexida d’Asturies.

    Nesta edición, l’allugamientu escoyíu foi’l plantíu Llamedo CB, en Nava. Los sos propietarios, José María y Nachu Llamedo empunxeron a tolos periodistes asistentes por una pumarada de base vertical que supera los más de 10.000 metros cuadraos, y la cual produz añalmente más de 180 tonelaes de mazana, partíes en seis variedaes. Padre y fíu esplicaron cómo se produz la recoyida de variedaes en plantíu en semienano, les particularidaes de cada campaña, los momentos de la recoyida según maduración de les mazana, el so treslláu al llagar y los controles que sobro los mesmos fai’l Conseyu Regulador de la DOP Sidra d’Asturies.

    La Esperiencia Collecha’ siguió nel Llagar Arbesú (Santa Marina) cola yá tradicional espicha ente los asistentes. Nun faltó la Sidra d’Asturies acompañada d’otros productos de la tierrina, entendiendo’l calter bonable d’esti tipu d’acontecimientos, que refrenden unu de los aspeutos más importantes de la imaxe de la nuesa comunidá: gastronomía calidable y enraigono nel orixe y col bon ambiente de la calidez de los asturianos.

  • Recorchu, el nuevu proyectu de reciclaxe del corchu

    Recorchu, el nuevu proyectu de reciclaxe del corchu

    La xeneración de borrafes crez día ente día na nuesa sociedá, la necesidá d’amenorgar la so producción, lo mesmo que de convertilos en recursos tres la so vida útil, pasa pola fayadiza sensibilización de la ciudadanía sobre la importancia del amenorgamientu na xeneración de borrafes (amenorgar y reutilizar) y el recicláu de los mesmos acordies con el Plan d’acción de la Xunión Europea d’Economía Circular, el Plan estratéxicu de borrafes del Principáu d’Asturies y les estratexes d’economía circular d’España y Asturies. Énte’l retu de reciclar el corchu de la sidra, una borrafa güérfana”, la DOP Sidra d’Asturies, Cetemas
    y l’Asociación Arramaos Cero punxeron en marcha’l proyectu “Recorchu” coles mires d’analizar la viabilidá de la recoyida de los corchos de la sidra nos llagares y el so tresformamientu n’otros oxetos; concenciando de los beneficios de la so recoyida y evaluando los sos potenciales usos. El primer pasu foi la creación d’un video divulgativu centráu n’Amenorgar, Reutilizar y Reciclar les borrafes derivaes de l’actividá del sector de la sidra como exemplu d’economía circular.

    La so presentación nel marcu de FIDMA 2022 vieno acompañada de la recoyida voluntaria de los corchos xeneraos mientres el desenvolvimientu de la Feria pa evitar el so depósitu en vertideru, col so consiguiente aforru d’emisiones de CO 2 . La prueba piloto realízase
    con dos sidreríes nes que se recoyeron más de 20 quilos de tapones de corchu. Estimamos la collaboración de ciudadanos y voluntarios que participaron viviegamente nel depósitu de los corchos nos contenedores habilitaos pa la recoyida de los mesmos. La próxima acción va tener llugar nes xornaes Xixón de Sidra d’Asturies, del 13 al 23 d’ochobre, nel que s’espera valorizar más de 100.000 corchos gracies a la collaboración de 35 sidreríes.

  • La ellaboración de la sidra n’Asturies como atractivu turísticu

    La ellaboración de la sidra n’Asturies como atractivu turísticu

    Ayeri presentóse nel llagar de Sidra Cortina’l primer eventu entamáu pol Club de Productu Sidraturismo Asturies: “Mayando con Sidraturismo Asturies”, que va a desenvolvese del 21 d’ochobre al 1 de payares. Una propuesta que naz col enfotu de aprovechar la dómina de recoyida de mazana y ellaboración de Sidra d’Asturies para ufiertalo al turista como un curiosu turísticu, al traviés de distintes actividaes y escapaes pa poder esfrutar, de la forma más completa posible, de la dómina de seronda que tanta relevancia tien na sidra asturiano.

    Esti Club de Productu realizó un completu programa nel que participen más de 34 miembros xuntaos. A lo llargo del so desenvolvimientu, podrá esfrutase de paseos ente pumares por delles pumaradas onde la mazana ta na so mayor rellumanza, d’esperiencies de mayáu afayando los rellabicos de la ellaboración de la sidra, en llagares, onde l’ambiente güel a mazana y sidra dulce, de menúes sidreros especiales ellaboraos pa esta dómina dende les sidreríes xuntaes, poder dormir n’agospiamientos que cunten con delles opciones p’amosar los sos toques sidreros dedicáu al veceru más allegáu a esta bébora.

    Les fines de selmana van ser escenariu de delles actividaes especiales, como ye’l casu d’una xornada formativa onde tean presentes la mazana, sidra y cultura sidrera asturianes, de visites empuestes pol cascu antiguu d’Uviéu y Villaviciosa con guíes acreditaos que va rematar con un final sidreru, de rutes en bici entre pumaradas y llagares pela zona de Siero y Villaviciosa o de dos amagüestos, unu d’ámbitu más tradicional onde habrá una actuación musical tradicional y otru enfocáu a families y xente molona, onde la diversión ta asegurada, amás va cuntase con nueve escapaes sidreres nes que podrá dormise n’unu de los agospiamientos con encantu sidreru xuntu a una actividá onde la sidra y la mazana tean más que presentes.

  • Carlos Franganillo va ser nomáu Embaxador de la Sidra d’Asturies solidaria 2022″

    Carlos Franganillo va ser nomáu Embaxador de la Sidra d’Asturies solidaria 2022″

    El próximu vienres 30 de setiembre, la Fundación Sandra Ibarra y el Conseyu Regulador de la Denominación d’orixe Sidra d’Asturies van celebrar la tradicional ‘Espicha Solidaria Frente al Cáncer’, qu’anguaño cumple la so octava edición. Nella, va premiar al periodista uvieín Carlos Franganillo col títulu de ‘Embaxador de la Sidra d’Asturies solidaria 2022’, reconociendo’l so llabor como difusor de la cultura y raigaños asturianos en tol territoriu nacional. Va Siguir asina’l camín d’otros pernomaos asturianos como José María García, Arturo Fernández, Roberto Álvarez, Víctor Manuel o’l Padre Ángel.

  • Asturies apuesta en FITUR pola candidatura sidrera a patrimoniu mundial inmaterial de la Unesco

    Asturies apuesta en FITUR pola candidatura sidrera a patrimoniu mundial inmaterial de la Unesco

    L’estand del Principáu na Feria Internacional de Turismu (Fitur) allugó güei una mesa redonda sobro la cultura sidrera asturiana, que va ser la candidata que va representar a España en marzu énte la Unesco pa la so inclusión na Llista Representativa del Patrimoniu Mundial Inmaterial.

    El director xeneral de Cultura y Patrimoniu, Pablo León, foi l’encargáu de moderar l’alcuentru, nel que participaron el director de la Cátedra de la Sidra de la Universidá d’Uviéu, Luis Benito García; el presidente de la Denominación d’Orixe Protexida (DOP) Sidra d’Asturies, Guillermo Guisasola; Ana Soberón, representante del Club de Productu Sidraturismo, y Saúl Moro, presidente de l’Asociación d’Escanciadores, en nome de la patronal Otea.

    Mientres l’alderique, Luis Benito García esplicó’l procesu siguíu pa optar a la declaración de patrimoniu mundial y detalló les principales característiques de la cultura sidrera: el so referente simbólicu como parte esencial de la identidá colectiva y d’una cultura con personalidá propia, los elementos que lu integren y les sos distintes manifestaciones.

    Guillermo Guisasola, pela so parte, apurrió información sobro la situación actual de la producción sidrera n’Asturies, y ufiertó datos del universu sidreru, como’l númberu de llagares, los tipos de sidra o los llugares de consumu fuera del Principáu.

    Les intervenciones d’Ana Soberón y Saúl Moro contestualizaron la presencia de la sidra na actividá turística. Asina, la representante de Sidraturismo esplicó la relevancia del caldu rexonal como elementu fundamental nesti sector. Pela so parte, Saúl Moro refirióse al escanciáu, un elementu esclusivu qu’apurre mayor grau de diferenciación.

    Los participantes na mesa redonda coincidieron en valorar la posibilidá de que la cultura sidrera pase a formar parte de la llista de patrimoniu inmaterial, daqué que contribuyiría a espublizar unes práctiques y tradiciones qu’apurrien sostenibilidá al mundu rural autóctonu. Amás, ayudaría a revitalizar les actividaes amestaes a la producción d’esta bébora y a dinamizar el sector, de la qu’impulsaría les actividaes turístiques y hosteleres.

  • Asturies amplía’l so espaciu en Fitur

    Asturies amplía’l so espaciu en Fitur

    El Gobiernu d’Asturies va participar na 42 Feria Internacional de Turismu (Fitur) col enfotu de reforzar énte profesionales y visitantes el lideralgu de la comunidá como destín de naturaleza y bienestar, seguro y sostenible. La Cocina de paisaxe y la candidatura de la cultura sidrera a patrimoniu inmaterial de la Unesco van tener tamién el so protagonismu nel estand asturianu.

    La viceconseyera de Turismu, Graciela Blanco, presentó güei los detalles xenerales del espaciu del Gobiernu d’Asturies na feria, que va abrir les sos puertes el miércoles, día 19, y va rematar el domingu 23. L’espaciu crez nesta edición un 30%, hasta algamar 901 metros cuadraos, de cuenta que gana amplitú pal área destinada a los alcuentros profesionales y pa la zona de presentaciones.

    D’acordies col apueste del Principáu pola sostenibilidá y el compromisu medioambiental, l’espositor se construyó y decoró con materiales sostenibles, reciclaos y reciclables. Nel so interior van asocedese más d’una ventena de presentaciones de proyectos, iniciatives y eventos impulsaos por promotores del sector turísticu, tantu públicos como privaos. Ente los actos más destacaos figura la celebración xuna mesa redonda sobro la cultura sidrera y l’esposición de los planes de sosteniblidad turística financiaos con fondos europeos. La gastronomía tamién va ser protagonista, con talleres desenvueltos por embaxadores de Cocina de paisaxe.

    Per otra parte, Asturies va tar presente en dalgunos de los eventos temáticos que s’entamen de forma paralela a la feria, como Fitur MICE, destináu al turismu de xuntes, congresos, eventos ya incentivos pa la contratación especializada nel ámbitu nacional ya internacional. Tres les xornaes dedicaes a profesionales y empreses, mientres la fin de selmana Fitur va abrir les sos puertes al públicu xeneral.

    L’espaciu d’Asturies na feria va ufiertar diverses actividaes d’animación centraes fundamentalmente na gastronomía y realizaes por aciu xuegos y interaccciones colos visitantes

  • La Comarca de la Sidra fae un añu más el tradicional brinde navidiegu

    La Comarca de la Sidra fae un añu más el tradicional brinde navidiegu

    Un añu más, los seis alcaldes de los conceyos que formen la Comarca de la Sidra celebraron el tradicional brinde navidiegu. Los conceyales de los conceyos de Bimenes, Cabranes, Colunga, Nava, Sariegu y Villaviciosa, xuntu col presidente del Conseyu Regulador de la DOP Sidra d’Asturies, Guillermo Guisasola, diéronse cita na plaza del conceyu de Colunga. Un brinde que se llevó a cabu con Sidra Natural Esplumosa DOP Sidra d’Asturies.

  • La campaña de Navidá ‘Asturies Sidra Brut’ entama esti vienres hasta’l 6 de xineru

    La campaña de Navidá ‘Asturies Sidra Brut’ entama esti vienres hasta’l 6 de xineru

    El Conseyu Regulador de la DOP Sidra d’Asturies presentó, esti xueves, la campaña de Navidá «Asturies Sidra Brut». Esta campaña, qu’entama güei y va tar vixente hasta’l 6 de xineru, algama la so décima edición col oxetivu de poner en valor esta sidra ente los asturianos, y dala a conocer ente los miles de visitantes que nos acompañen nestes feches.

    «Tamos mui ilusionaos con esta campaña. Ye una gran oportunidá pa brindar con familiares y amigos con un productu nuestru, sofitando la gastronomía asturiano y los productores de la rexón», destacó’l presidente del Conseyu Regulador de la DOP Sidra d’Asturies, Guillermo Casasola.

    Pola so parte, el presidente d’OTEA, José Luis Álvarez Almeida, y la directora de Desenvolvimientu Rural ya Industries Agraries del Principáu d’Asturies, Begoña López, reforzaron el mensaxe del presidente n’apoyu de los hosteleros y los llagareros, y aguarden qu’esta campaña seya un ésitu.

    Tes comparecer, celebróse na Ruta de los Vinos un brindis popular – con sidra natural espumoso – nel que participaron casi mediu centenar de persones. Per un llau, conmemoróse l’aniciu de la campaña promocional y, tamién, festexóse la reciente candidatura de la Cultura Sidrera Asturiana a Patrimoniu Mundial Inmaterial de la Unesco.

    Hasta’l 6 de xineru va poder prebase, a precios mui económicos, en más de 200 establecimientos de la nuestra rexón. Les sidres participantes d’esta edición son El Gaitero Etiqueta Negra, Pomarina y Valle Ballina y Fernández (El Gaitero), Emilio Martínez (El Gobernador), Poma Áurea (Trabanco), Prau Monga (Angelón), Ramos del Valle (Fran) y Solaya (Quelo). Amás, va haber un refuerzu na canal Alimentación con 9 degustaciones nes principales grandes superficies asturianes y tiendes gourmet.