Etiqueta: EBAU

La EBAU va celebrase n’Asturies los díes 6, 7 y 8 de xunu col mesmu modelu d’exame

La Prueba d’Evaluación de Bachilleratu pal Accesu a la Universidá n’Asturies va desenvolvese, na so convocatoria ordinaria, ente’l martes 6 de xunu y el xueves 8 de xunu, y va facer en 15 sedes, que podríen ampliase a 16 si la matrícula asina l’aconseya. Asina s’alcordó na xunta de la Comisión organizadora de la EBAU caltenida esta mañana, na que tán presentes representantes de la Universidá d’Uviéu, la Conseyería d’Educación y la Conseyería de Ciencia, Innovación y Universidá.

Nesi mesmu alcuentru, alcordóse tamién que la convocatoria estraordinaria va celebrase ente’l 5 y el 7 de xunetu. Les sedes van ser 15: cuatro n’Uviéu (una en Campus d’El Milán, dos na Facultá d’Economía y Empresa y otra na Facultá de Derechu), trés en Xixón (Aulariu Norte, Sur y Edificiu Polivalente de la Escuela Politécnica d’Inxeniería de Xixón), una en Mieres (Escuela Politécnica de Mieres), una en Llangréu (IES Jerónimo González), una en Ribeseya (IES Avelina Cerra), una en Cangas (IES Nuevu Cangas), dos n’occidente (IES Marqués de Casariego, en Tapia y IES Carmen y Severo Ochoa, en L.luarca) y dos n’Avilés (IES Nº5 y IES Ramón Menéndez Pidal), a les que podría sumase’l IES Carreño Miranda si asina lo requier la matrícula.

El modelu d’exame va siguir lo dispuesto na orde ministerial del 25 de xineru pola que se caltien el diseñu y les característiques de prueba d’evaluación de Bachilleratu que s’aplica dende’l cursu 2019-2020, col oxetivu, como diz textualmente, “d’evitar incertidumes na comunidá educativa y arreglar posibles situaciones de desigualdá ente l’alumnáu que tien de realizar esti modelu de prueba per última vegada nel presente cursu y los que lo fixeron nes convocatories darréu anteriores”.

Los estudiantes de Bachilleratu tendrán d’esaminase de les 4 asignatures, que constitúin la fase d’accesu, cursaes en segundu de Bachilleratu según la modalidá ya itinerariu realizáu. Cada exerciciu de la fase d’accesu va calificar de 0 a 10 puntos. La calificación d’esta fase va ser la media aritmética de les calificaciones llograes en caúna de les materies, espresada nuna escala de 0 a 10 puntos con trés cifres decimales y arrondada a la milésima. Esta calificación tendrá de ser igual o superior a 4 puntos pa facer media cola calificación final del bachilleratu.

La nota de la EBAU va calculase en base a un 60% de la calificación final del Bachilleratu (NMB) y un 40% de la calificación de la fase d’accesu de la prueba (CFA). Va entendese qu’un estudiante axunta los requisitos d’accesu cuando la resultancia d’esta fórmula seya igual o superior a 5 puntos. La nota máxima nesta fase ye de 10 puntos.

Aquellos estudiantes que quieran xubir nota p’aportar a los sos estudios universitarios tendrán de presentase amás a la fase d’almisión. Va consistir na evaluación de les materies d’opción del bloque d’asignatures troncales de segundu cursu de Bachilleratu. Les materies d’esta fase nun requir ser cursaes nel bachilleratu pa ser evaluaes na prueba y los estudiantes podrán esaminase d’un máximu de 4 asignatures. La nota final una vegada realizaes dambes fases (accesu y almisión) va algamar un máximu de 14 puntos.

03/02/2023
Les families que perciben el salariu social nun pagarán la EBAU

La Conseyería d’Universidá fadráse cargu del costu de la matrícula na Evaluación del Bachilleratu para l’Accesu a la Universidá (EBAU) de les families que perciban el salariu social básicu. El resolvimientu, publicada nel Boletín Oficial del Principáu (Bopa), escuerre que naide se quede al marxe d’estos exames por razones económiques. El Gobiernu asturianu xustifica esta midida dada la situación escepcional creada pola Covid-19, que punxo de manifiestu situaciones de vulnerabilidá económica en families con menores pendientes de realizar la EBAU. Esta exención aplícase yá na convocatoria d’esti añu y va estendese tamién a les pruebes de 2021.

Nel casu de que se procediera yá al pagu de les pruebes, podrá solicitase la devolución del importe a la Universidá, acreditando la condición de beneficiariu del salariu social. El costu mínimu de les tases ye de 115 euros: 60 d’inscripción, 40 pola fase d’accesu y 15 por asignatura na fase d’almisión. La Conseyería d’Universidá va compensar a la institución académica’l costu de les matrícules del alumnáu que s’acueya a esta exención.

30/06/2020
Los primeros alumnos van volver a les aules el 4 de xunu

La Conseyería d’Educación encamentó a tolos centros sosteníos con fondos públicos a que ufierten la posibilidá de volver a entamar l’actividá lectiva presencial del alumnáu de 2º de Bachilleratu a partir del xueves. Trátase d’un regresu pa clases preparatorias de la EBAU, y de quien cursen ciclos cimeros de FP, para’l módulu integráu de proyectu y formación en centros de trabayu.

Tamién van poder incorporase voluntariamente a les aules estudiantes de 4º d’ESO p’asistir a clases de refuerzu. Los alumnos con derechu a tresporte van tener la posibilidá de llograr ayudes estraordinaries pa esi fin. Los equipos directivos de los centros van entamar la reincorporación de docentes a les aules en función del alumnáu de dalguna de les enseñances citaes qu’allegue al centru de forma voluntaria. Si fuera necesariu combinar les modalidaes d’atención presencial y a distancia, la planificación del trabayu nun va traer un aumentu del horariu del profesoráu.

Asina consta nel resolvimientu de 25 de mayu pola que s’ordena la incorporación presencial de personal docente na fase 2 de la desescalada. La norma establez midíes organizatives, d’hixene y llimpieza. Amás, les instrucciones recueyen que va haber de volver a entamar l’actividá nel aula’l profesoráu designáu pa formar parte de los tribunales y comisiones de les pruebes d’accesu a les distintes enseñances y los exames pal llogru de títulos, según el personal d’orientación y sicopedagoxía para cuestiones rellacionaes cola escolarización.

El personal docente tendrá de siguir los encamientos de seguridá recoyíes nel protocolu de salú pa la prevención d’andada por Covid-19 nel ámbitu llaboral, disponible na intranet de Educastur, y les instrucciones de la mesma conseyería. Pela so parte, l’alumnáu va tener de cumplir toles midíes de protección ya hixene. Les families van xixilar diariamente l’estáu de salú de los sos fíos y van presentar una declaración responsable.

Nun van poder asistir a los centros quien presentes síntomes compatibles cola Covid-19 o fueren diagnosticaos, nin aquelles persones que s’atopen en cuarentena domiciliaria por tener contactu con dalgún infectáu. L’atención presencial al públicu tien de realizase con cita previa y namá para aquellos casos nos que sía puramente necesariu.

28/05/2020
La EBAU yá tien fecha: 30 de xunu y 1 y 2 de xunetu

La convocatoria ordinaria de la prueba d’Evaluación del Bachilleratu pal Accesu a la Universidá (EBAU) va tener llugar los díes 30 de xunu y 1 y 2 de xunetu. Coles mesmes, la Comisión Organizadora de la prueba alcordó que la convocatoria estraordinaria va celebrase los díes 21, 22 y 23 de xunetu.

La EBAU consta de dos fases, una obligatoria pal accesu a la universidá denominada fase d’accesu, y otra voluntaria nomada fase d’almisión. Pa la fase d’accesu les pruebes van tratar sobre les materies xenerales del bloque de les asignatures troncales cursaes en segundu cursu de la modalidá de Bachilleratu escoyida pa la prueba. Pa la fase d’almisión, l’alumnáu que quiera ameyorar la so nota d’almisión va poder esaminase de materies d’opción del bloque de les asignatures troncales de segundu cursu, que pueden ser cursaes o non cursaes.

Na fase d’almisión, los alumnos van poder esaminase de les materies xenerales del bloque de les asignatures troncales de modalidá de segundu cursu non matriculaes na fase d’accesu. La fase d’accesu consta de cuatro materies; cuidao que toes elles tienen la considerancia d’obligatories, si l’alumnu nun se presenta al exame de dalguna materia, va entendese qu’abandona les pruebes.

P’ameyorar la nota d’almisión podrá matriculase d’hasta un máximu de cuatro materies. Al alumnáu que nun se presente al esame de dalguna de les materies matriculaes na fase d’almisión va consideráse-y non presentáu na materia correspondiente y va calificáse-y namá aquella o aquelles materies a les que se presente.

07/04/2020
Educación quier aplazar les oposiciones de Secundaria hasta 2021

La conseyera d’Educación, Carmen Suárez, amosóse güei partidaria de retrasar a 2021 los procedimientos selectivos a los cuerpos docentes de Secundaria. La so realización taba prevista pal mes de xunu. El plazu de presentación p’allegar a les 587 places de nuevu ingresu y 175 de promoción interna concluyó’l 13 de marzu, xusto antes de la declaración del estáu d’alarma.

Esta foi una de les cuestiones abordaes na Conferencia Sectorial d’Educación celebrada per videoconferencia. En conociéndose les postures de les distintes comunidaes, la mayoría d’elles partidaries, como Asturies, d’esti aplazamientu. La decisión última va adoptase nos próximos díes, n’analizando l’asuntu colos sindicatos docentes.

La Conferencia d’Educación tamién alcordó que la prueba d’Evaluación de Bachilleratu pal Accesu a la Universidá (EBAU) se celebre ente’l 22 de xunu y el 10 de xunetu. La convocatoria extraordinaria tendrá llugar antes del 10 de setiembre. El modelu d’exame va ser más flexible y acorde a la escepcionalidá de la situación. Si la evolución de la pandemia permite respetar estos plazos, les calificaciones van publicase antes del 17 de xunetu pa la convocatoria ordinaria y antes del 18 de setiembre nel casu de la estraordinaria. L’asignación definitiva de les places pa los estudios universitarios va celebrase a partir del 25 de setiembre.

Práctiques pal alumnáu de Formación Profesional

Coles mesmes, aprobáronse les midíes alcordaes ayeri na Comisión de Formación Profesional, como la de flexibilizar les práctiques nel centru de trabayu pa superar el cursu, ampliando’l periodu establecíu nel calendariu llimitase de manera escepcional a les 220 hores mínimes recoyíes na normativa básica. Tamién de forma estraordinaria, el módulu de FCT va integrase col de proyectu, pa que puedan abordase los oxetivos acomuñaos a la redolada llaboral. Esta midida va afectar tanto a la FP básica como a les de grau mediu y superior.

A lo último, el ministeriu propunxo que se cancelen les pruebes d’evaluación diagnóstica qu’establez la LOMCE pa terceru y sestu de Primaria y cuartu de la ESO, que tanto Asturies como’l restu de tolos materiales d’enseñanza a distancia y en llinia.

26/03/2020
Educación aplaza la EBAU ensin concretar una nueva fecha

El Gobiernu asturianu aplaza la prueba d’evaluación de Bachilleratu pal accesu a la Universidá (EBAU). Failo de forma coordinada colos ministerios d’Educación y d’Universidaes y en collaboración cola Universidá d’Uviéu col fin d’evitar perxuicios al alumnáu énte la crisis del COVID-19.

Dambos departamentos celebraron una xunta telemática con representantes de les autonomíes pa estudiar la situación. Una comisión va encargase de proponer tanto les feches como’l formatu de les pruebes, col fin d’empezar a trabayar y que cada comunidá defina los nuevos calendarios. P’afitar estes feches, tendrá de modificase la orde ministerial de 17 de febreru de 2020. Esta determina les característiques, el diseñu y el conteníu de la EBAU, y les feches máximes de realización y revisión de les calificaciones.

N’Asturies, la prueba ordinaria de la EBAU taba afitada pa los díes 3, 4 y 5 de xunu, ente que la estraordinaria diba celebrase’l 30 de xunu y el 1 y 2 de xunetu. Los escenarios que s’embaraxen pasen por retrasar dambes convocatories. L’Executivu autonómicu fai un llamamientu a la tranquilidá del alumnáu y encamienta que, na midida de lo posible, siga cola so preparación pa la EBAU. Coles mesmes, estima l’esfuerzu que’l profesoráu de los centros docentes non universitarios ta realizando pa caltener la formación en llínea.

18/03/2020
La Prueba d’Accesu a la Universidá pa mayores de 25 años atrásase al 17 y 18 d’abril

La Prueba d’Accesu a la Universidá pa mayores de 25 años cambia de feches. La vicerrectora d’Estudiantes de la Universidad d’Uviéu, Elisa Miguélez, caltuvo este vienres dos xuntes de coordinación d’estes pruebes. La Comisión d’Organización de la PAU pa mayores de 25 años decidió atrásala. La prueba, que diba a celebrase’l 20 y 21 de marzu, va tener finalmente llugar los díes 17 y 18 d’abril.

Nel casu de la EBAU, esperaráse a la xunta telemática de los ministerios d’Educación y Universidaes programada pal martes. N’ella van participar les Comunidaes Autónomes y la Conferencia de Rectores y analizarán alternatives p’afaer la prueba al nuevu escenariu.

13/03/2020
El 66,57 % de los estudiantes supera la EBAU de xunetu

El 66,57 % del estudiantáu que se presentó a la convocatoria de xunetu de la Prueba d’Evaluación de Bachilleratu para l’Accesu a la Universidá (EBAU) de la Universidá d’Uviéu superó con ésitu los exames. La cifra d’aprobaos xubió a 63,61 % ente les muyeres y a 69,85 % ente los homes. Les pruebes desenvolver del 2 al 4 de xunetu n’Uviéu, Xixón, Avilés, Ribeseya, Cangas y Tapia.

La nota media xeneral d’esta convocatoria de xunetu foi de 5,124, ente que la puntuación más alta asitióse en 9,35. Por asignatures, el mayor índiz d’aprobaos diose en Fundamentos del Arte II, col 85,71 % y una nota media de 5,84, siguida de Química, col 66,27 % d’aprobaos y un 5,96 de nota media, de Matemátiques Aplicaes a les Ciencies Sociales II, con un 64,43 % d’aprobaos y la calificación media de 4,91 y de Bioloxía, con un 63,26 % d’aprobaos y una nota media de 5,57.

Les notes yá tán publicaes na páxina web de la Universidá, y la revisión d’exames podrá solicitase, puramente online, los díes 11, 12 y 15 de xunetu hasta les 14 hores. La xeneración de certificaos dixitales de resultancies definitives, de los alumnos que nun reclamen, va efectuase a partir de les 18 hores del 16 de xunetu, y va ser el 19 de xunetu, a partir de les 19 hores, cuando se publiquen les notes tres les revisiones. Una hora más tarde, podrán xenerase los certificaos dixitales de resultancies definitives de los alumnos con reclamaciones.

10/07/2019
El 92,54% del estudiantáu aprueba la EBAU de xunu

Nueve de cada diez estudiantes que se presentaron a la prueba d’evaluación de bachilleratu para l’accesu a la Universidá (EBAU) n’Asturies na convocatoria de xunu aprobaron. Un total de 3.712 de los 4.125 estudiantes, el 92,54%, llograron la calificación d’aptu. El porcentaxe d’aprobaos foi llixeramente superior nel casu de los homes, un 92,79% ente’l 92,33% de les muyeres.

La nota media xeneral de la prueba EBAU de xunu foi de 7,055, siendo la de xunu del añu pasáu 6,93. La nota más alta llograda nesta convocatoria foi, como l’añu anterior, de 9,95. El númberu d’estudiantes con nota media igual o superior a 9 ye de 383 persones. Por asignatures de la fase d’accesu, en Llingua Castellana y Lliteratura II el porcentaxe de persones aprobaes asitiase nel 88,26%. La nota media ye de 6,81. En cuanto al Inglés, aprueba’l 73,07% con una nota media de 6,29. Nel casu d’Hestoria d’España hai un 73,29% de persones aprobaes y una nota media de 6,38.

Les revisiones de los exames van solicitase puramente online los díes 17, 18 y 19 de xunu

Nes pruebes correspondientes a les materies troncales de modalidá de Bachilleratu, el porcentaxe d’aprobaos en Matemátiques II ye del 64,72 % con una nota media de 5,62. Nel casu de la asignatura de Matemátiques Aplicaes a les Ciencies Sociales II aprobó’l 83,10% con una nota media de 6,55 y en Llatín II, el 61,20% con una nota media de 5,78. El porcentaxe d’aprobaos en Fundamentos del Arte II foi del 88% con una nota media de 7,16. Na fase d’almisión son reseñables les resultancies llograes nes asignatures de Bioloxía, con un 75,23% d’aprobaos y una nota media de 6,36; Física, col 69,88 % y una nota media de 5,95 y en Química’l porcentaxe d’aprobaos ye del 70,36 % con una nota media de 6.

Coles mesmes, realizáronse les pruebes de la fase d’almisión un total de 400 estudiantes, 210 procedentes de ciclos formativos de grau superior y 190 procedentes de bachilleratu (p’ameyorar la so nota anterior).

Les revisiones de los exames van solicitase puramente online los díes 17, 18 y 19 de xunu hasta les 14 hores. La nota revisada va publicase’l día 25 de xunu a partir de les 20 hores, pudiendo xenerar el certificáu dixital de resultancies definitivu pa estudiantes con reclamaciones.

14/06/2019
4.125 estudiantes examínense de la EBAU n’Asturies

Un total de 4.125 estudiantes, 2.295 muyeres y 1.830 homes, van examinase de la Prueba d’Evaluación de Bachilleratu para l’Accesu a la Universidá (EBAU) correspondiente a 2019, que s’empecipia esti martes. Esto supon una medría del 3,02% al respective de 2018, cuando les y los estudiantes convocaos al exame fueron 4.004.

Los exames van desenvolvese hasta’l xueves, día 6. La publicación de les notes va llevase a cabu’l 14 de xunu al traviés de la páxina web de la Universidá d’Uviéu. El tribunal va tar compuestu por 390 persones. El númberu de sedes para l’exame de xunu va ser de trece: cuatro n’Uviéu, tres en Xixón, dos n’Avilés, y una en Mieres, Ribeseya, Cangas y Tapia. Pela so parte, la convocatoria estraordinaria va tener llugar del 2 al 4 de xunetu.

Los estudiantes titulaos de Bachilleratu tendrán d’esaminase de les 4 asignatures, que constitúin la fase d’accesu, cursaes en segundu cursu de bachilleratu según la modalidá ya itinerariu realizáu. Cada exerciciu de la fase d’accesu va calificase de 0 a 10 puntos. La calificación de la fase d’accesu va ser la media aritmética de les calificaciones numbériques llograes en caúna de les materies, espresada nuna escala de 0 a 10 puntos con trés cifres decimales y arrondada a la milésima. Esta calificación tendrá de ser igual o superior a 4 puntos para faer media cola calificación final del bachilleratu.

La nota de la EBAU va calculase sopesando un 60 por 100 de la calificación final del Bachilleratu (NMB) y un 40 por 100 de la calificación de la fase d’accesu de la prueba (CFA). Entenderase qu’un estudiante o una estudiante axunta los requisitos d’accesu cuando la resultancia d’esta ponderación sía igual o superior a 5 puntos.

04/06/2019