Xixón al día

Etiqueta: El Natahoyo

  • Activu otra vegada el protocolu de contaminación na zona oeste de Xixón

    Activu otra vegada el protocolu de contaminación na zona oeste de Xixón

    El Conceyu de Xixón activó güei el nivel 0 del Protocolu d’actuación n’episodios de contaminación del aire na zona oeste de Xixón énte los datos recoyíos poles estaciones de midida calidable del aire.

    Establezse la implementación d’una serie de midíes en materia de control calidable del aire mientres la so activación empobinaes a amenorgar les emisiones contaminantes y a protexer la salú pública.

    Nel nivel 0 preventivu contempla, ente otres midíes, el riego de carreteres y la vixilancia de la circulación de vehículos pesaos que tresporten graneles sólidos pulverulentos na zona d’activación del protocolu con cuenta de comprobar la so llimpieza y la disposición de sistemes d’entoldáu y caxes hermétiques. Amás, prohíbese les quemes de restos vexetales en suelos non urbanos y va avisar a les empreses allugaes na zona y qu’operen baxu xuna autorización ambiental integrada (AAI) o autorización como actividá potencialmente contaminadora de l’atmósfera (APCA) por qu’adopten midíes d’amenorgamientu d’emisiones (les que con calter xeneral establez el Protocolu y les qu’específicamente concrete la so autorización ambiental). Tamién se recueye la necesidá d’estremar los precuros nos procesos industriales susceptibles de xenerar emisiones difuses, incluyida la manipulación y almacenamientu de graneles, nel marcu de les sos autorizaciones ambientales.

  • Valtáu un edificiu en ruines n’El Natahoyo

    Valtáu un edificiu en ruines n’El Natahoyo

    El Conceyu de Xixón actuó énte l’estáu de ruina d’un edificiu de l’Avenida de Galicia númberu 30 pa evitar que se produxeren daños personales y materiales. Trátase d’un inmueble deshabitáu de dos llantes sobro rasante y so cubierta que, finalmente, tuvo que ser valtáu. Un vecín sollertó qu’apreciara dende la so ventana cómo la cubierta del inmueble fundiérase llixeramente. Tres una valoración inicial del Serviciu de Prevención, Estinción de Quemes y Salvamentu, y por precuru, acordonóse la zona y regulóse’l tráficu.

    La Dirección Xeneral d’Urbanismu, xuntu al serviciu d’arquitectura municipal, realizó delles visites al llugar pa la so correspondiente inspección, comprobando que la situación empioraba col pasu del tiempu. Dempués de diseñar una intervención nel teyáu pa evitar la cayida de cascotes a la vía pública y suxetar la fachada principal y medianería por aciu cable d’aceru y tensores, l’informe ellaboráu determinó un fallu estructural de la cubierta. Una de les cerches de madera rompiérase y taba movida del so llugar orixinal. Esto fixo que se produxeren deformaciones nuna de les medianeres y nel bistechu de la fachada principal.

    Amás, reparóse la esistencia de dos resquiebros verticales na medianera derecha del edificiu que, en poques hores, aumentaren el so tamañu nun centímetru. Tou ello, señala, podría producir el colapsu de la cubierta y el desprendimientu de la fachada escontra la cai y escontra la nave allegante, por tanto, ye necesariu dar en la so baltadera en tantu llevar a cabu la so rehabilitación. Comunicada la gravedá de la situación a la propiedá del edificiu, ésta procedió ayeri a la valtadera del inmueble. L’actuación concluyó nel meudía del sábadu.

  • Conceyu y Principáu van ellaborar un plan p’ameyorar la calidá del aire na zona oeste

    Conceyu y Principáu van ellaborar un plan p’ameyorar la calidá del aire na zona oeste

    Un plan d’acción a un plazu curtiu p’ameyorar la calidá del aire na zona oeste de Xixón. La Conseyería de Mediu Ambiente y el Conceyu trabayen na ellaboración d’un protocolu qu’incluya midíes nes industries averaes y el puertu, amás d’actuaciones en movilidá y d’información a la población. Asina lo anunció esti xueves la viceconseyera de Mediu Ambiente y Cambéu Climáticu, Nieves Roqueñí, nuna rueda de prensa xunto al conceyal de Mediu Ambiente, Aurelio Martín.

    Roqueñí señaló que dambes alministraciones son sabedores del problema existente na zona oeste de Xixón tocante a la calidá del aire. Por eso, sorrayó que «nel ánimu de proponer soluciones específiques, alcordemos trabayar a comuña nel diseñu d’esi plan». Roqueñí avanzó que nes selmanes vinientes van llevase a cabu contactos colos axentes «consideraos relevantes pa los oxetivos de meyora». Ente ellos tan l’Autoridá Portuaria; el Ministeriu de Tresportes, Movilidá y Axenda Urbana; ArcelorMittal, y asociaciones de vecinos.

    El documentu inicial va sometese a información pública nos meses vinientes. El plan qu’agora se va ellabora va indicar les midíes a adoptar p’amenorgar el riesgu de superación o la so duración. La calidá del aire del conceyu de Xixón evalúase con seis estaciones y nun tien en cuenta los datos de la estación móvil d’El Lauredal.

  • EMULSA entama un plan especial de llimpieza nos barrios

    EMULSA entama un plan especial de llimpieza nos barrios

    Emulsa quier poner Xixón más guapu. La empresa municipal va desenvolver esti añu un plan especial de de llimpieza de fondura en cais, places y parques. Les actuaciones van llegar a 49 zones de tolos distritos urbanos de la ciudá. Los trabayos entamaron yá esta selmana nel barriu d’El Llano. Una ventena d’operarios van trabayar de llunes a sábadu, per selmanes, en cada una de les distintes zones. Van emplegar una docena de máquines. Con elles repasaránse en fondura los llabores habituales de llimpieza de ceres, baldeos y llaváu de contenedores. Amás, llevarase a cabu la descartelización y desratización, siega, pintura de moblame, revisión de xuegos infantiles y esbroce.

    Les actuaciones van llegar a puntos de tolos barrios, incluyendo Cimavilla, L’Arena, Viesques, Centru, Laviada, Pumarín, El Polígono, Roces, Nuevo Roces, Contrueces, El Coto, La Camocha, El Lauredal, La Calzada, El Natahoyo, Moreda, Tremañes, Xove, Portuarios, Pescadores, Montiana y Somió. L’oxetivu principal del plan ye realizar una repasada en fondura a les necesidaes de llimpieza de los barrios que sirva como ferramienta pa consiguir el compromisu cívicu de los ciudadanos col medioambiente urbanu de Xixón. La empresa municipal quier que los vecinos s’impliquen col caltenimientu de les zones verdes, la medría del reciclaje y l’usu de los Puntos Llimpios.

  • La Selmana Negra vuelve a Xixón

    La Selmana Negra vuelve a Xixón

    Vuelve la Selmana Negra. Del 5 al 14 de xunetu los terrenos del antiguu astilleru Naval Xixón van ser de nuevu la sede del festival lliterariu, cultural, reivindicativu y popular más llonxevu d’España. El cartelu d’esta edición ye obra del dibuxante español Víctor Blanco, conocíu internacionalmente poles sos obres nel cómic con títulos tan significativos como Polar o Filthy Rich.

    [Consulta’l programa completu d’actividaes de la XXXII Selmana Negra]

    Más de cientu venti escritores confirmaron la so participación nes distintes actividaes programaes. Nesta edición destaca la interesante presencia d’autores en llingua inglesa. Tres venti años d’espera vien l’irlandés John Connolly, unos de los maestros mundiales del xéneru negru. Otros recién llegaos al públicu español como Steve Cavanagh, especialista en thrillers llegales, Joseph Knox que col so opera prima Serenes convertir n’una revelación para la crítica lliteraria y Anthony Horowitz, unu de los grandes de la lliteratura xuvenil inglesa amás de ser guionista de series de televisión.

    L’humor y la risa vienen de la mano de Edu Galán y Darío Adanti, los componentes más destacaos de la revista Mongolia. Van presentar La Biblia negra de Mongolia y de Marta Flich, que lo fadrá con Necroeconomía. La poesía tamién tien el so llugar nel festival al traviés de les velaes nocherniegues del sábadu 6 protagonizada por Carlos Salem y de un llargu plantel de poetes: Escandar Algeet, María Nieto, Pablo Cortina y Carolina Sarmiento y la del día 13 conducida por Luis García Montero con Luisa Castro, Martín López Vega, Angels Gregori, Xuan Bello y Kirmen Uribe.

  • Desvíos y retenciones el domingu pola VI Carrera Popular Dona Vida

    Desvíos y retenciones el domingu pola VI Carrera Popular Dona Vida

    El Centru Comuñal de Sangre y Texíos d’Asturies entama esti domingu 2 de xunu la VI Carrera Popular Dona Vida. La prueba, que va salir de la sablera de Poniente a les once de la mañana, va percorrer un total d’ocho mil metros pelos barrios d’El Natahoyo, La Calzada, Moreda y Xove. La carrera celébrase cola oxetivu de recordar a la población la necesidá de llograr donaciones suficientes de sangre, órganos, médula espinal y otros texíos.

    La carrera va salir de la zona de sablera de Poniente pa percorrer l’avenida de Galicia, Cuatrocaminos, l’avenida Eduardo Castro, El Lauredal y Fátima. La circulación del tráficu va vese afectada nestes zones. Los autobuses d’EMTUSA van sufrir esviadures puntuales y retenciones según se desenvuelva la prueba deportiva. La complexidá de la prueba va obligar a torgar y abrir el pasu nes víes afectaes. Les circunstancies de les esviadures van dir variando, pudiendo haber momentos nos que’l serviciu quede atayáu de forma provisional al pasu de los participantes.

    La VI Carrera Popular Dona Vida va cuntar con un sistema de cronometraxe con dosal chip. La participación va poder efectuase en distintes categoríes competitives que van recibir los sos correspondientes premios. Al rematar la entrega de premios realizaráse un sortéu de regalos ente los participantes.

  • Cortes de tráficu’l sábadu pola VI Marcha Popular en Patines

    Cortes de tráficu’l sábadu pola VI Marcha Popular en Patines

    La zona centru y este de Xixón va sufrir cortes de tráficu esti sábadu pola celebración de la VI Marcha Popular en Patines. El pistoletazu de salida va producise a les once de la mañana. Los casi 400 patinadores saldrán del aparcamientu del patinódromu Manuel Fernández López ‘Manolín’. Van percorrer: Escobiu de los Beyos, avenida Juan Carlos I, Marqués de San Esteban, Melquiades Alvarez, sablera de San Llorienzo, avenida de Castilla, Torcuato Fernández Miranda, Calle Sporting y Jesús Revuelta hasta llegar a Les Mestes.

    Los participantes van dir nun bloque continuu y van producise cortes de tráficu’l tiempu mínimu imprescindible. La circulación va quedar abierta al pasu de los patinadores. Depués de casi seis kilómetros peles principales cais de la ciudá, van llegar al Complexu Deportivu de Les Mestes. Ellí va celebrase una ‘folixa’ con carreres de velocidá nel velódromu, discu móvil, xuegos y entrega de trofeos.

    Recorríu de la VI Marcha Popular en Patines.
    Recorríu de la VI Marcha Popular en Patines.

    La celebración d’esta prueba nun va ser la única que va afecta a la circulación del tráficu esti fin de selmana en Xixón. El domingu los cortes van treslladase a la zona oeste mientres la VI Carrera Popular Dona Vida. La prueba, que va salir de la sablera de Poniente, va percorrer un total d’ocho kilómetros pelos barrios d’El Natahoyo, La Calzada, Moreda y Xove.

    Los autobuses d’EMTUSA van sufrir esviadures puntuales y retenciones según se desenvuelva la prueba deportiva. La complexidá de la prueba va obligar a torgar y abrir el pasu nes víes afectaes. Les circunstancies de les esviadures van dir variando, pudiendo haber momentos nos que’l serviciu quede atayáu de forma provisional al pasu de los participantes.

  • Cortes de tráficu pol XI Triatlón Villa de Xixón

    Cortes de tráficu pol XI Triatlón Villa de Xixón

    Cortes de tráficu na zona oeste de la ciudá pola celebración del XI Triatlón Villa de Xixón. Les restricciones van afectar el sábadu pela mañana a delles víes d’El Natahoyo y La Calzada y a la contorna de la sablera de Poniente. Los cortes van durar dende les diez de la mañana hasta les dos de la tarde.

    La prueba en bicicleta va salir del paséu de Poniente pa percorrer l’avenida Juan Carlos I hasta la cai Agustín Argüelles, n’El Cerilleru. La vuelta va ser pela avenida Juan Carlos I hasta Dionisio Fernández-Nespral Aza (Muséu del Ferrocarril). El segmentu de carrera a pie va afectar al paséu de Poniente y cera de Fomentu hasta’l Puertu Deportivu.

    Pa entrar y salir d’El Natahoyo y La Calzada mientres la competición encamiéntase utilizar l’avenida Príncipe d’Asturies. L’accesu a dambos barrios pela cai Rodríguez San Pedro y Carlos Marx va tar cortáu al tráficu. Los vehículos procedentes de la cai Rodríguez San Pedro dirección La Calzada van ser esviaos pela cai Marqués de San Esteban. Amás, va acutase l’accesu de turismos nel tramu de la cai Mariano Pola ente la cai Palafox y l’accesu al Acuariu, permitiéndose namás la entrada y salida de garaxes.

    Coles mesmes, el tráficu procedente de la cai Carlos Marx en dirección a la Plaza del Padre Máximo González va cortase al altor de la Carretera Vizcaina. Va habilitase un carril en Juan Carlos I p’aportar y salir del barriu de Moreda dende l’avenida Príncipe d’Asturies.

    L’estacionamientu tará prohibíu en tol circuitu y namás se permitirá la circulación tresversal en casos d’urxencia vital. Les persones afectaes por estes restricciones pueden contactar cola Policía Local de Xixón nos teléfonos 092 y 985 18 11 00.

  • Huergo: «Queremos facer de Xixón un referente tecnolóxicu n’I+D+i»

    Huergo: «Queremos facer de Xixón un referente tecnolóxicu n’I+D+i»

    Yolanda Huergo, candidata a l’alcaldía de Podemos-Equo Xixón, y Juan Chaves, integrante de la candidatura, caltuvieron esti miércoles una xunta cola Asociación Cluster TIC d’Asturies para presenta-yos les sos propuestes en materia económica y d’empléu con valor añedíu de la coalición. “Esta ciudá tien blimes, tien persones con iniciativa y una Universidá innovadora. Con too ello, la coalición Podemos-Equo Xixón venimos xenerar les polítiques y les sinerxes que faigan de Xixón un referente tecnolóxicu n’I+D+i y dinamizador d’un empléu llimpiu y con valor diferencial”, afirmó Huergo, candidata a l’alcaldía.

    Pa consiguilo, la coalición considera que ye preciso “dar continuidá a la collaboración público-privada de los programes impulsaos pol Conceyu venceyaos con Europa, el Cluster TIC, el Parque Tecnolóxicu y l’Universidá pa crear un texíu social, económicu y empresarial que xenere empléu calidable y de valor añedíu cola implicación de too el texíu tecnolóxico que yá esiste en Xixón y que realiza la so actividá en redol al Cluster TIC”, caltuvo Juan Chaves.

    Asina, el principal oxetivu ye la «xeneración d’oportunidaes d’empléu y autu empléu» pa les persones qu’estudien tantu na Universidá como en centros de formación profesional. El papel de l’alministración nesti sentíu va ser «facilitar les infraestructures que dexen xenerar valor pa la creación d’empléu calidable», dende Xixón, pa intentar evitar la fuga de la mocedá. Un puntu que tien de complementase col sofitu a les empreses locales pa que puedan retrucar los servicios de Xixón n’otres ciudaes fomentando la so internacionalización, señala la coalición nuna nota de prensa.

    Igualmente, la coalición tien por oxetivu desenvolver una base económico-industrial diversificada y d’altu valor añedíu. Nesta llínea va l’apueste pol Parque Tecnolóxicu y del Mar na nueva zona industrial d’El Natahoyo, contemplada nel Plan Xeneral d’Ordenación [PDF]: “Esti desenvolvimientu tien de ponenos na sienda de la economía azul y pa ello pretendemos impulsar la creación d’empreses innovadores por aciu mecanismos d’incubación de xeneración centrífuga (spin-off) nes actividaes de acuicultura, turismu costeru, biotecnoloxía, enerxía oceánica y esplotación de los fondos marinos”, espuso la candidata de Podemos-Equo Xixón. Nel marcu d’esta estratexa, la coalición va encamentar al Principáu a introducir los estudios de Ciencies del Mar nel campus de Xixón.

    La candidatura liderada por Huergo apuesta poles enerxíes llimpies y comprométense a  crear una comercializadora enerxética pública d’enerxía anovable. “Esta comercializadora suministraría, nuna primer fase, a les instituciones municipales, pa abrir dempués a otres entidaes y a la ciudadanía”, señala.

    En sintonía con esta iniciativa diría tamién l’apertura d’una Oficina d’Asesoría Enerxética  coles mires d’ameyorar la eficiencia enerxética, tantu nos ámbitos municipales como de les empreses que quieran sumase al programa. Esta Oficina, amás, va asesorar a la ciudadanía en relación a les grandes suministradores (llectura de factures, potencia contratada, solución de problemes). Al empar, va asumir les xestiones y costos derivaos de que cualquier particular o grupu de particulares qu’exerzan el so derechu al autoconsumo enerxéticu puedan sacar rendimientu económicu venciendo a la cooperativa enerxética’l so escedente de producción.

    Estes apuestes en materia enerxético van dexar afondar nesa collaboración público-privada en cuestiones rellacionaes cola eficiencia enerxética: “Esta collaboración ye la base pa que surdan empreses auxiliares capaces de crear puestos de trabayu calidable”, apunta Chaves.