Xixón al día

Etiqueta: Iniciativa pol Asturianu

  • Iniciativa reclama a Educación que garantice l’enseñu d’asturianu

    Iniciativa reclama a Educación que garantice l’enseñu d’asturianu

    Que nengún alumnu quede ensín clas d’asturianu. Iniciativa pol Asturianu encamienta a la Conseyería d’Educación a facer un esfuerciu pa que nengún alumnu vuelva a quedar ensin clas d’asturianu por falta de profesoráu, como vien siendo habitual hasta agora. La organización llama a evitar la convocatoria de medies xornaes y los retrasos na aprobación de les hores de profesoráu asignaes a los centros concertaos.

    L’asociación ta acabante de presentar una campaña informativa pa promocionar la matriculación n’asignatura de Llingua Asturiana y na de gallego-asturianu nel Eo-Navia. El vocal de Rellaciones Institucionales d’Iniciativa pol Asturianu, Inaciu Galán, dixo que con esta campaña «queremos consiguir que l’idioma siga tresmitiéndose nes nueves xeneraciones de forma más efectiva”. Galán aprovechó pa recordar que la matriculación nesta asignatura ye «un drechu irrenunciable» de los neños.

    Iniciativa pol Asturianu recuerda a los padres que deprender asturianu va poder permitir a los escolinos algamar nel futuru el títulu B2 d’asturianu «como una llingua más». «Esta formación va vali-yos muncho nel futuru, pues ye un elementu que favorez l’estudiu d’otres llingües” apuntó’l vocal de la organización. Galán reclamó a la Conseyería d’Educación y a la Dirección Xeneral de Política Llingüística que nengún alumnu vuelva quedar ensin clas d’asturianu. «Llevamos bien de tiempu denunciando decenes de casos nos que l’alumnáu queda ensin profesoráu y ensin l’asignatura que llibremente escoyeron”.

    La campaña, que se va difundir en redes sociales, ta formada por una ventena cartelos n’asturianu y gallego-asturianu col lema ‘La oportunidá de conocer mundu, el to mundu. Escueyi llingua asturiana al matriculate nel institutu/colexu’. L’asociación recuerda que’l periodu de prematrícula yá ta abiertu polo que reclama un esfuerciu a la Conceyería. «Nun se pue esperar más. La campaña de difusión habría tar yá en marcha y con un especial esfuerciu nestes circunstancies nes que nun pue facese campaña física nos centros educativos”, esplica Galán.

  • «La especialidá docente nun pue esperar»

    «La especialidá docente nun pue esperar»

    Les palabres de la ministra Isabel Celaá sobre la especialidá docente d’asturianu nun gustaron nada a los colectivos que defenden la oficialidá de la llingua. La responsable d’Educación refugó la modificación del decretu d’especialidaes enantes de la reforma estatutaria que-y de a l’asturianu’l rangu d’oficial. Iniciativa pol Asturianu recordó esti xueves que la especialidá docente d’asturianu ye «imprescindible pa iguar d’una vegada la situación del profesoráu d’asturianu».

    El presidente de la organización, Iván Llera, destacó qu’esta propuesta yá se votó na Xunta Xeneral «cola unanimidá de tolos partíos, polo tanto, entendemos que nun habría nengún motivu pa nun facela agora». La organización insiste en que namás fai falta «voluntá» por parte de los responsables políticos «p’acabar cola interinidá y precariedá del profesoráu y dignificar l’asignatura». La ONG va solicitar un conceyu urxente cola Conseyera d’Educación pa tresmitir al Gobiernu astuiranu p’aclarar esta cuestión. «Esta situación nun ye aceptable y vamos reclamar soluciones. Esti tema nun puede esperar pola oficialidá», remató.

    Llera fizo estes declaraciones nuna rueda de prensa pa facer una valoración de los alcuentros que mantuvo la organización con representantes de PSOE, PP, Podemos y Foro nel Congresu de los Diputaos. El presidente agradeció a les diferentes fuercies polítiques la so voluntá p’aconceyar y «tar atentos a les peticiones que-yos ficimos en materia llingüística». Ente les midides puestes enriba la mesa tuvieron una partida pa l’ALLA nos Presupuestos Xenerales del Estáu y l’usu de la toponimia oficial nes carreteres estatales.

    Llera aprovecho tamién p’anunciar qu’Iniciativa pol Asturianu va entamar delles actividaes col Centru Asturianu de Madrid, ente elle, un Día de les Lletres na capital española; un concursu lliterariu n’asturianu y actos en defensa de la oficialidá.

  • Iniciativa pol Asturianu amplía la so presencia na Feria de Muestres

    Iniciativa pol Asturianu amplía la so presencia na Feria de Muestres

    Iniciativa pol Asturianu va participar otra vegada más na Feria Internacional de Muestres d’Asturies y amás va ampliar la so presencia con un espaciu más grande que nes otres ocasiones. Nesta edición van tar presentes once empreses de diferentes sectores qu’utilicen l’asturianu na so actividá comercial. La Feria de Muestres va celebrase del 3 al 18 d’agostu en Xixón,

    Al traviés de la presencia na FIDMA, Iniciativa pol Asturianu quier mostrar «como l’asturianu ye un elementu de creación empresarial y, polo tanto, riqueza«. Amás la organización quier facer ver como la llingua asturiana puede ser un «elementu de diferenciación» y qu’aporta un «valor añadíu» a los productos y servicios qu’ufierten estes empreses.

    Iniciativa pol Asturianu amplia amás el so estand na FIDMA. La organización va contar con un espaciu pa charres, presentaciones de llibros, actos culturales, actos d’empreses y visites institucionales. La organización quier qu’esti espaciu seya un llugar d’alcuentru y un escaparate a la sociedá de la importancia que tien l’asturianu na economía asturiana.

  • Abierta la matrícula pa los cursos d’asturianu a distancia de Iniciativa

    Abierta la matrícula pa los cursos d’asturianu a distancia de Iniciativa

    Yá ta abierta la matrícula pa la nueva convocatoria de cursos d’asturianu a distancia qu’entama Iniciativa pol Asturianu. Los cursos tienen dos niveles: básicu y avanzáu. Van tener una duración de 36 hores llectives y van celebrase dende’l 11 de xunu a finales de xunetu, o más alantre dependiendo de los díes festivos de cada conceyu y de les circunstancies de cada cursu.

    El nivel inicial de los cursos d’asturianu a distancia ta empobináu a persones ensin conocimientos d’asturianu o con nivel baxu de conocencia ya inclúi, pa les persones que lu superen, un diploma de l’Academia de la Llingua Asturiana, entidá reconocida pola Conseyería d’Educación pa la formación del profesoráu. El nivel avanzáu ta empobináu a persones con una conocencia más fonda del idioma, que yá ficieren dalgún cursu enantes.

    La matrícula pa los cursos d’asturianu a distancia pueden facese na propia páxina web de la organización (www.iniciativapolasturianu.org) . El plazu d’inscripción acaba’l vienres 7 de xunu. El cursu va entamar el martes 11 de xunu. Los cursos a distancia tienen un llímite de 50 places, 25 por nivel, ampliable en función del total de matrícules. El preciu de la inscripción ye de 60 euros, 50 pa socios d’Iniciativa pol Asturianu.

  • Uviéu acueye esti fin de selmana’l II Seminariu Oficialidá

    Uviéu acueye esti fin de selmana’l II Seminariu Oficialidá

    El rector de la Universidá d’Uviéu, Santiago García Granda, va inaugurar esti vienres n’Uviéu el II Seminariu ‘Oficialidá, el camín constitucional de futuru pal asturianu’. El presidente d’Iniciativa pol Asturianu, Inaciu Galán, y la vocal de voluntariáu de la organización, Sabel Tuñón, presentaron esti martes n’Uviéu el programa completu d’esta segunda edición que se va celebrar los díes vienres 17 de mayu y el sábado 18 de mayu nel Edificiu Hestóricu de la Universidá d’Uviéu.

    El programa inclúi varies meses redondes con representantes políticos de los partíos que tuvieron responsabilidá de gobiernu, con empresarios y profesionales qu’utilicen l’asturianu na so llabor comercial, con trabayadores de los servicios de normalización, con representantes de sindicatos del sistema educativu, y otra mesa con periodistas. Amás, dientro de la primera xornada, va presentase un nuevu documental baxo’l títulu «El valir económicu d’una llingua» sobre diferentes empreses qu’usen l’asturianu nos sos productos o servicios y nel que van falar tamién economistes desplicando los beneficios que supondría la oficialidá de la llingua asturiana.

    El programa del seminariu.
    El programa del seminariu.

    Tamién hai que destacar les ponencies de Leopoldo Tolivar Alas y Víctor Manuel Vázquez Portomeñe, exconseyeru del Gobiernu del PP de Galicia que va aportar una visión interesante sobre’l desarrollu de la oficialidá na comunidá vecina.

    El seminariu va acabar con una semeya colectiva baxo’l lema ‘La sociedá asturiana axúntase pola oficialidá’ nel patiu del Edificiu Hestóricu de la Universidá d’Uviéu nel que representantes de la sociedá asturiana van sofitar la oficialidá del asturianu.