La primer edición de La Vuelta Femenina va disputar la so etapa final n’Asturies el próximu 7 de mayu. La Conseyería de Cultura, Política Llingüística y Turismu va patrocinar la xornada al traviés de la Viceconseyería de Turismu y la Dirección Xeneral de Deporte. El percorríu va llevar la caravana ciclista dende La Pola Siero hasta los Llagos de Cuadonga, un final d’etapa míticu y hasta agora inéditu nes competiciones femenines. L’itinerariu, de 93,7 kilómetros, va escurrir per Nava y L’Infiestu y va xubir a la collada Moandi (665 metros) antes de llegar a los Llagos.
La viceconseyera de Turismu, Graciela Blanco, y la directora xeneral de Deporte, Aida Nuño, allegaron a la presentación de La Vuelta Femenina, que se celebró esta tarde en Torrevieja. La conseyería sofita la ronda ciclista femenina dientro de les sos acciones estratéxiques de promoción d’Asturies como destín turísticu y nel marcu del so apueste decidíu por fomentar la igualdá y la inclusión nel deporte. Asina, Asturies va patrocinar la etapa final d’esta primer Vuelta Femenina. Amás, Turismu va apurrir el premiu pa la ganadora de cada etapa.
La Vuelta representa un escepcional escaparate de promoción d’Asturies por cuenta del so ampliu impactu nacional ya internacional, ensin escaecer que’l Gobiernu d’Asturies asitió’l cicloturismu como unu de los productos estratéxicos, con un plan d’allugamientu específicu.
De la mesma, la Dirección Xeneral de Deporte sofita l’eventu dientro de les acciones que desenvuelve pa fomentar y promocionar la igualdá dientro de la práctica deportiva.
La llegada de La Vuelta Femenina a los llagos de Cuadonga per primer vegada coincide col 40 aniversariu d’esti final d’etapa na ronda española en 1983. Los llagos convirtiéronse n’unu de los referentes imprescindibles na memoria de profesionales y públicu. Un ascensu de 12 kilómetros con ramples cercanes al 8% de desnivel y tramos históricos como La Güesera.
