Etiqueta: Llangréu

Muerre una muyer nuna quema en La Felguera

Una muyer finó en siendo rescatada por Bomberu del SEPA (Serviciu d’Emerxencies del Principáu d’Asturies) del interior d’una vivienda onde s’aniciara una quema na cai La Unión 32, en La Felguera, Llangréu.

Según los datos facilitaos pol Serviciu d’Atención Médica Urxente (SAMU) la finada ye una muyer de 48 años. Anque l’equipu médicu de la UVI-móvil de Llangréu tuvo practicándo-y maniobres de soporte vital avanzáu mientres una hora, finalmente, namá pudieron confirmar el so fallecimientu. Hasta’l llugar tamién se movió l’equipu d’Atención Primaria de La Felguera cola ambulancia de la zona.

Hasta’l llugar moviéronse una decena d’efectivos de Bomberos d’Asturies de los parques de Samartín del Rei Aurelio, Proaza y La Morgal xuntu al xefe de zona centro-este.

Cuando la primer dotación llegó al llugar, n’entrando al inmueble colos equipos de respiración autónoma, una parte del equipu realizó una primer ventilación del llugar ente qu’otros bomberos realizaben un rastrexu del inmueble onde alcontraron a la muyer. Una vegada rescatada empezaron a practica-y maniobres de reanimación cardiopulmonar hasta la llegada de los equipos sanitarios.

El fueu, que se controló a les 16.37 hores, xamuscó dos habitaciones d’una vivienda que comunicaba con otru pisu amiesto.

El Centru de Coordinación d’Emerxencies del 112 Asturies recibió l’avisu a les 15.48 hores. Esplicaben que taba saliendo fumu d’un inmueble de seis altores, creíen que proveníen del cuartu pisu.

La Sala 112 del SEPA amás d’activar a los bomberos y pasar l’avisu al SAMU informó de lo asocedío a la Policía Local y Nacional de Llangréu.

13/01/2022
Las estudiantes enllenen los siete premios a los meyores espedientes académicos concedíos pol Ayuntamientu de Llangréu

El Conceyu de Llangréu apurrió esti llunes los sos premios al estudiu, destinaos a reconocer a los alumnos y alumnes que llograron los meyores espedientes mientres el cursu académicu 2020-2021 n’enseñances medies y n’estudios universitarios de llicenciatura o grau. L’añu dexa un plenu de muyeres qu’acopen los siete reconocencies nes cuatro categoríes posibles: dos premios para los ciclos formativos, de grau mediu, dos premios pa los ciclos formativos de grau cimeru, dos premios pal bachilleratu y un premiu pa titulaciones universitaries de llicenciatura o grau. Los gallardones, dotaos con 2.800 euros y convocaos pola Conceyalía de Cultura, Educación, Mocedá y Política Llingüística del Conceyu, inclúin tamién una quinta categoría destinada a aplaudir l’esfuerzu de quien completen los sos estudios en circunstancies especialmente meritories y respondíes por por un informe del centru onde tuvieren matriculaos. Por categoríes, asina quedaron los premios nesta edición. Fueron apurríos pola conceyala d’Educación, Pamela Álvarez, y el teniente d’alcalde, Javier Castro.

Meyores espedientes de Ciclu Formativu de Grau Mediu:
– Estela Canga García, CFGM Cuidos Auxiliares d’Enfermería cursáu nel IES
La Quintana con una nota de 10 (200 €).
– Nadia Marqués Fernández, CFGM Xestión Alministrativa cursáu nel IES
Cuenca del Nalón con una nota de 9,73 (200 €).

Meyores espedientes de Ciclu Formativu de Grau Superior:
– Sara Menéndez Redón, CFGS Hixene Bucodental cursáu nel IES La Quintana con
una nota de 10 (400 €).
– María Rojo Fernández, CFGS Hixene Bucodental cursáu nel IES La Quintana con
una nota de 10 (400 €).

Meyores espedientes de Bachilleratu:
– Isabel Menéndez González, Bachilleratu n’Humanidaes y Ciencies Sociales
cursáu nel IES Cuenca del Nalón (300 €).
– Alba Pacios Fernández, Bachilleratu en Ciencies cursáu nel IES Santa Bárbara
(300 €).

Meyor espediente de Grau:
– Elena Álvarez Alonso, Grau n’Alministración y Dirección d’Empreses pola Universidá d’Uviéu (650 €).

Premiu al esfuerzu:
– Osmel Corral Ortega, IES Cuenca del Nalón (350 €). Por compatibilizar los estudios col trabayu y llograr una bona nota media.

28/12/2021
L’Ayuntamientu de Llangréu va habilitar dende’l xueves 16 el tren mineru de Samuño como mediu alternativu d’accesu públicu a La Nueva

El Conceyu de Llangréu va habilitar a partir de mañana, xueves 16 d’avientu, de manera gratuita, el pequenu tren turísticu que davezu tresllada dende El Cadavíu hasta La Nueva a los visitantes del Ecomuséu Mineru del Valle de Samuño como mediu de tresporte públicu provisional y alternativu pa les persones de la zona afectaes pol corte de la carretera LA-7. El desplazamientu d’una escombrera por mor de les intenses agües de les últimes selmanes afectó a la vía y obligó a cerrala al tráficu’l pasáu xueves.

La vía del tren mineru, que nun ta afectada pol argayu, dexa una entrada y salida
alternativa al valle y superar la torga na carretera. El ferrocarril va faer cinco trayectos d’ida y vuelta tolos díes sacante los vienres, nos que la frecuencia va aumentar hasta los
nueve servicios pa compaxinalo col so usu turísticu como mediu d’accesu al Ecomuséu.
Los horarios van tar coordinaos colos del tresporte escolar, de manera que l’alumnáu de primaria y secundaria residente na zona nun tenga demorances al camudar de manera de tresporte (tren y autobús) n’El Cadavíu nos sos desplazamientos escontra los centros escolares nin tampoco nel regresu. Los trenes van ser igualmente gratuitos pa los vecinos que los usen pa llegar a otros medios de tresporte públicu n’El Cadavíu. Los horarios completos pueden consultase nes tables axuntes.

Amás, l’accesu piatonal a les estaciones d’El Cadavíu y el pozu San Luis, en La Nueva, va permanecer abiertu les 24 hores del día por que los vecinos puedan xubir o baxar a cuerpu. El pasu solo va tar cortáu mientres los momentos de circulación de los trenes pa evitar
situaciones de peligru y accidentes. Nos accesos piatonales ta virtiéndose sal pa combatir
la formación de xelu coles baxes temperatures y dexar asina un usu seguru.

«Ye un serviciu esencial que’l Conceyu tien qu’emprestar pa dar respuesta a la situación
na que queden los vecinos de La Nueva hasta que los técnicos puedan reparar
definitivamente la carretera, un procesu que va llevar dalgún tiempu. Pero cola adaptación del tren como mediu de tresporte pueden cubrir les necesidaes d’escolarización de los menores, ayudar a quien precisen una forma de llegar al trabayu y dexar qu’otros vecinos puedan baxar a faer compres o xestiones con cierta normalidá», señala l’alcaldesa, Carmen
Arbesú. «D’esta forma, tamién s’eviten los grandes rodios per carreteres secundaries que, cola LA-7 cortada, son necesarios p’aportar a La Nueva».

Nel usu del tren collabora Sadim, la empresa del grupu Hunosa que, al pie de la consultora
Global, xestiona l’Ecomuséu y el tren mineru por un conveniu col Conceyu, titular de les
instalaciones. La so ayuda va dexar caltener abiertu l’aparcamientu de la estación d’El
Cadavíu por que los vecinos de La Nueva puedan dexar los sos coches nél. Tamién se van encargar de tola señalización necesaria.

16/12/2021
El trail de La Mudrera va volver el próximu sábadu con 250 participantes y va poder siguise en directu al traviés d’una retresmisión en streaming

El Trail de La Mudrera, entamáu por Llangréu Trail Team cola collaboración del Conceyu de Llangréu, torna’l próximu sábadu, 18 d’avientu, con 250 participantes inscritos na so octava edición y cola novedá absoluta de la so retresmisión en directu y en streaming gracies a cámares montaes en drones. La carrera va desenvolvese sobre un percorríu de 15,9 kilómetros y va atropar 1.640 metros de desnivel. La prueba, que de normal s’apuesta en xunetu, camudó les sos feches habituales por mor del andanciu.
«Tamos mui contentos cola respuesta de los participantes. Completamos la inscripción en menos de 48 hores, foi esaxeráu», señala la organización. Aumenta, amás, l’interés ente les atletes. El 25% de quien van tomar la salida son muyeres. «Ye’l mesmu percorríu circular de siempre, pero anguaño, dempués de tolo que llovió y cola barru que va haber, va ser el qu’esixa más técnica de toles ediciones hasta la fecha. Vamos reforzar la seguridá y a poner cuerdes nos sitios más complicaos pa los corredores».
Como siempres, la prueba tien trés categoríes (senior, veteranos A y veteranos B) y premios en metálicu de 100 euros pal casu de que se batan los récords de la prueba, que tán nuna hora y 20 minutos pa los homes y una hora y 45 minutos pa les muyeres.
Alredor de la carrera, van entamase tamién actividaes infantiles, con un pequetrail que va dexar a los menores (hasta los 14 años) correr peles cais del pueblu, pintacaras y la visita de Papa Noel nestes feches cercanes a Navidá.
«Al Conceyu complaz-y enforma sofitar esta carrera porque nella ta tou pensáu por que los corredores tengan la meyor esperiencia. Tanto pola organización como pol escelente tratu dempués de la carrera convirtióse yá nuna prueba de referencia n’Asturies», señaló la conceyala de Deportes, Melania Montes, en participando na presentación del trail.

15/12/2021
El Nuevu Teatru de la Felguera va ser la sede pa la proyección de dos películes del FICX

Llangréu va volver a ser esti añu, el martes 23 y miércoles 24 de payares, una de les sedes del Festival Internacional de Cine de Xixón (FICX). El Nuevu Teatru de la Felguera va acoyer mientres esos díes delles proyecciones incluyíes dientro del programa Extensiones.

La primer proyección va ser esti martes a les 10:30 hores nuna sesión concertada con centros educativos. N’ella, va proyectase Bella y el circu máxicu, una obra noruega na que dos amigos deciden montar un circu na so ciudá, onde asombra cola so maxa. Sicasí, la llegada d’una nueva persona va camudar too.

La segunda proyección va proyectase’l miércoles 24 de payares a les 20:00, con entrada de baldre hasta enllenar l’aforu. Nesta ocasión, trátase de ¡Al abordaxe!, una producción francesa qu’inauguró l’añu pasáu el FICX na que se cunta una hestoria en clave de comedia del pasu a la edá adulta.

23/11/2021
Iniciativa pol Asturianu reclama la presencia del topónimu tradicional na nueva escultura de Llangréu

Iniciativa pol Asturianu encamienta al Conceyu de Llangréu a respetar la toponimia oficial nel nuevu conxuntu escultóricu previstu na reforma de la plaza Merediz de La Felguera. La remodelación d’esti espaciu va incluyir la instalación d’unes lletres a gran escala -conocíes popularmente como ‘lletrones’- col topónimu ‘Langreo’. Por ello, la organización rexistró una reclamación ente l’alcaldía pa recordar la obligación de les alministraciones públiques d’emplegar los nomes tradicionales y oficiales del conceyu, como ye’l casu del topónimu Llangréu.

Pa la entidá, ye importante siguir dando pasos alantre na normalización social de la llingua asturiana y, tamién, col usu de la toponimia tradicional y oficial que, como nel casu del conceyu de Llangréu, ye oficial. Lluis Quelle, vocal d’Iniciativa pol Asturianu, reclamó la presencia del topónimu oficial pa “dar visibilidá a la forma tradicional y oficial del nome del conceyu y porque ye una manera asumible de normalizar l’idioma”.

El conceyu oficializó la toponimia tradicional nel añu 2005. El nome oficial ye Llangréu/Langreo dende esa fecha d’acordies col decretu 73/2005 pol que se determinen los topónimos oficiales del conceyu de Llangréu y en cumplimientu del artículu 15 de la Llei d’Usu y Promoción del Bable/Asturianu. Polo tanto, Iniciativa pol Asturianu reclama l’usu y presencia de la toponimia tradicional na nueva escultura del conceyu.

15/11/2021
El Principáu axunta en Llangréu a representantes de 12 comunidaes y unos 40 especialistes p’analizar la participación de la ciudadanía nes polítiques públiques

El Principáu va acoyer a partir de mañana la XI Conferencia de la Rede Interautonómica de Participación Ciudadana, que va axuntar en Llangréu a unos 40 especialistes y representantes de 12 comunidaes p’analizar les últimes actuaciones de participación de la ciudadanía nos procesos y polítiques públiques desenvueltes nestes rexones.

Mientres dos xornaes, la Pinacoteca Municipal Eduardo Úrculo va ser el foru de debate sobre les novedaes llexislatives na materia. D’esta miente, l’eventu, entamáu pola Dirección Xeneral de Gobernanza Pública, Tresparencia, Participación Ciudadana y Axenda 2030, perteneciente a la Conseyería de Presidencia, incluye un alcuentru mañana con cuatro entidaes de participación y voluntariáu d’Asturies. Col títulu Actividades de promoción de la participación ciudadana y de la Agenda 2030 en el Principado, les organizaciones Cruz Bermeya, Fundación EDES, Asociación El Prial y Movimientu Asturianu pola Paz van esplicar la implicación de la sociedá asturiana nos procesos de participación.

Amás, el xueves, na Casa la Buelga de Ciañu, los participantes nel alcuentru van esponer y van debatir sobre les novedaes llexislatives y el grau d’aplicación de les mesmes, mesmo que sobre los criterios interpretativos y resoluciones xudiciales de relevancia n’España.

Asina mesmo, van ellaborar una declaración común, la Declaración de Llangréu, pa ratificar el compromisu de collaboración y cooperación ente les comunidaes autónomes. Esti documentu va recoyer les principales llinies estratéxiques y mecanismos pa que les alministraciones públiques garanticen, de forma consensuada, la plenitú de la participación ciudadana na ellaboración y apreciación de les polítiques públiques.

Al alcuentru van asistir representantes d’Aragón, Cantabria, Castiella-La Mancha, Castiella y Llión, Cataluña, Euskadi, Estremadura, Galicia, La Rioxa, Navarra y la Comunitat Valenciana, amás d’Asturies.

La Rede Interautonómica de Participación Ciudadana creóse nel 2016 como una canal de reflexón y cooperación ente les rexones pa desenvolver una participación real y efectiva de la ciudadanía nes polítiques publiques.

10/11/2021
La Policía Llocal de Llangréu detien a dos homes en La Felguera y Lada

La Policía Llocal de Llangréu detuvo nos postreros díes a dos homes por conducir baxo al influencia de bebides alcohóliques. Ún d’ellos, amás, circulaba con un vehículu ensin seguru obligatoriu. Dambos conductores tán citaos mañana, 9 de payares, pa la celebración de xuicios rápidos.

La primer detención foi sobre les 20:30 hores del pasáu xueves, 4 de payares, cuando una patrulla s’alcontabra regulando’l tráficu na cai Daniel Álvarez, nel distritu de La Felguera, y dio l’altu a un vehículu. Los axentes comprobaron que nun tenía seguru obligatoriu y que’l so conductor presentaba síntomes de tar embaxo influencies del alcohol. Cuando dio un resultáu positivu tres facer pruebes, arrestáronlu.

La segunda intervención foi la pasada nueche, alredor de la 1:45 del día 8 de payares. Una patrulla que pasaba pela cai El Ponticu, en Lada, paró un vehículu qu’invadía’l carril contrariu de circulación. Tres facer pruebes, l’home dio positivu y los policíes decidieron detenelu.

08/11/2021
Llangréu pon en marcha’l númberu de teléfonu 010 pa información ciudadana

L’Ayuntamientu de Llangréu yá tien a disposición de la ciudadanía’l teléfonu 010 d’atención ya información ciudadana. El serviciu, que ye de baldre pa los usuarios, permite a los vecinos disponer d’un númberu curtiu y facilmente memorizable pa ponese en contactu colos servicios municipales pa esponer consultes, peticiones o quexes. N’Asturies, los conceyos de Xixón y Aviles foron pioneros na so implantación.

Dende 2013, el Gobiernu d’España punxo’l númberu 010 a disposición de les alministraciones llocales pa facilitar el contactu cola ciudadanía. Llangréu va facer agora usu d’él per primer vez. «Ye una forma d’averar l’Ayuntamientu a los vecinos. En vez de recordar un númberu llargu pa ponese en contactu cola centralista, va bastar ún curtiu y facilmente memorizable, al estilu del 112, el 092 o el 016 d’atención a víctimes de violencia machista» destaca l’alcaldesa, Carmen Arbesú. L’Ayuntamientu va situar nun llugar bien visible del so portal web y n’otros llugares d’accesu públicu esi nuevu sistema de contactu pa que los vecinos conozan la so esistencia y pa animalos a usalo.

El 010 va dar accesu a la centralita del Ayuntamientu y va tar atendío pol personal municipal. Foron necesarios dellos trámites con toles empreses operadores de telefonía pa qu’acometieren les adaptaciones nes sos redes de manera que, cada vegada qu’ún de los sos clientes marque’l númberu en Llangréu, la llamada se canalice hacia la casa conceyu.

21/10/2021
Salú amplía l’alerta naranxa a Llangréu y Samartín del Rei Aurelio

La Conseyería de Salú amplió la situación d’alerta naranxa nel valle del Nalón a los conceyos de Samartín del Rei Aurelio y Llangréu. El Gobiernu asturianu yá aplicó esta midida en Llaviana‘l 18 de setiembre. El conseyeru de Salú, Pablo Fernández Muñiz, anunció esta decisión al términu de la xunta del Comité de Siguimientu de la Nueva Normalidá, presidida por Adrián Barbón. Fernández Muñiz esplicó qu’esta midida adóptase al detectase en dambos conceyos una incidencia mayor de casos que la media.

L’alerta naranxa ye una llamada a les instituciones locales, sectores socioeconómicos y a la ciudadanía pa que estremen les midíes de control. Nun implica restricciones, pero intensifica les acciones de protección, vixilancia y seguridá na zona. Amás d’esta declaración, l’Executivu rexonal establez midíes de prevención específiques. Estes midíes adicionales de prevención, contención y coordinación publicáronse nel Boletín Oficial del Principáu d’Asturies (Bopa).

El Gobiernu asturianu encamienta la cancelación o aplazamientu nestos conceyos d’actividaes que nun sían imprescindibles hasta qu’ameyore la situación epidemiolóxica. Amás aconséyase a la ciudadanía que llinde los alcuentros sociales fuera del grupu de convivencia estable y que se llinde les xuntes a un máximu de seis persones. Per otra parte, prohíbese’l consumu en barra nos establecimientos d’hostelería, restauración y terraces. Amás nes meses o agrupaciones de meses acútase’l so usu a un máximu de seis persones.

Nuevos biltos

La Conseyería de Salú comunicó esti miércoles al Ministeriu de Sanidá siete nuevos biltos con un centenar de casos positivos y 153 contactos estrechos entá en siguimientu. N’actualidá, esisten quince biltos activos n’Asturies con una afectación total de 220 positivos y 472 persones que tán inda en siguimientu venceyaos a estos casos.

El Serviciu de Vixilancia Epidemiolóxica confirmó amás 80 positivos por coronavirus diagnosticaos esti martes. Tolos afectaos tán asintomáticos o presenten síntomes leves de la enfermedá y permanecen aisllaos na so casa. Esti martes, dos persones diagnosticaes en díes previos fueron treslladaes a la UCI. Ayeri nun se rexistraron fallecimientos pola Covid. El Serviciu de Salú del Principáu d’Asturies (Sespa) realizó mientres esti martes 3.233 pruebes PCR. La tasa de positividad asitióse nel 2,47%.

25/09/2020