Xixón al día

Etiqueta: sucesos

  • Dos mancaos nun accidente de tráficu en Mieres

    Dos mancaos nun accidente de tráficu en Mieres

    Dos persones, un varón y una muyer, resultaron mancaos graves esti domingu en sufriendo un accidente de tráficu en Mieres. El vehículu nel que circulaben salióse de la vía, por causes que se desconocen, nel AS-375, al altor del puntu kilométricu 17,500, en La Peña, na zona de Los Mallos. Según los datos facilitaos pol Serviciu d’Atención Médica Urxente (SAMU) los dos persones mancaes fueron treslladaes al Hospital Universitariu Central d’Asturies (HUCA). Por cuenta de más pruebes y hasta nueva valoración médica’l so pronósticu ye reserváu.

    El Centru de Coordinación d’Emerxencies recibió’l primer avisu a les 17:06 hores. Na llamada indicóse qu’un coche saliérase de la vía y topetara contra una farola. Darréu movilizáronse cinco efectivos de Bomberos del Serviciu d’Emerxencies del Principáu d’Asturies (SEPA), con base nel parque de Mieres. Una vegada na zona, los efectivos de bomberos escarcelaron a dambos ocupantes. De primeres, pel llau del conductor, estraxeron del interior del coche al varón. De siguío, col equipu d’escarcelación, los bomberos quitaron la puerta del automóvil del llau del copilotu. Cola pinza y el cilindru separador los efectivos de bomberos fixeron buecu nel coche para poder dar en la escarcelación de la muyer mancada. N’inmovilizándola, los efectivos sacar del turismu cola tabla de rescate.

    Los efectivos de bomberos dieron por rematada la intervención a la so llegada a base, a les 17:57 hores. La sala del 112 del SEPA comunicó’l sucesu a la Guardia Civil y al SAMU qu’activó la UVI Móvil de Mieres y la UVI Móvil de Llangréu.

  • Muerre una muyer al cayer na ruta del Cares

    Muerre una muyer al cayer na ruta del Cares

    Una muyer, d’unos 60 años d’edá, morrió en cayendo d’unos 100 metros, en circunstancies que desconocen, cuando realizaba la ruta del Cares, en Cabrales. Los restos mortales fueron alcontraos pol Grupu de Rescate de Bomberos del Serviciu d’Emerxencies del Principáu d’Asturies (SEPA), a bordu del helicópteru medicalizáu, na zona de Los Colladinos. L’afectada cayó per debaxo del antiguu camín del Cares hasta’l ríu. La Guardia Civil fíxose cargu de los trámites para proceder al llevantamientu del cadabre.

    P’aportar al llugar onde s’atopaba la muyer y confirmar el médicu-rescatador el so fallecimientu l’equipu tuvo que realizar dos ciclos de grúa na que s’esplegaron 40 metros de cable. El Centru de Coordinación d’Emerxencies del 112 Asturies recibió l’avisu a les 14.38 hores. Na llamada señalaben que se trataba d’un grupu que taben realizando la ruta del Cares y qu’una muyer cayérase per una fastera de siquier trenta metros de desnivel na vertical col ríu.

  • Deteníu un varón de 21 años por pegar al so padre en Ciares

    Deteníu un varón de 21 años por pegar al so padre en Ciares

    La Policía Local detuvo na tarde del llunes en a un mozu de 21 años en Ciares por pegar al so padre depués d’un discutiniu. Los fechos tuvieron llugar a les 18:25 hores. Tres un fuerte discutiniu nel domiciliu familiar, allugáu na cai Santo Domingo, J.L.R., afrelló al so padre provocándo-y mancadures lleves. El mozu foi arrestáu por un presuntu delitu de violencia nel ámbitu familiar.

  • Deteníu por enseñar el pene en presencia de menores

    Deteníu por enseñar el pene en presencia de menores

    Un mozu de 19 años foi deteníu esti domingu por esibir el so pene en presencia de menores. Los fechos tuvieron llugar alredor de les 11.30 hores. La Policía Local recibió la llamada d’una muyer que comunicaba qu’un mozu asitiárase delantre del so vehículu cuando empecipiaba la marcha na cai Santiso d’Abres y n’actitú obscena amosára-y el so pene.

    La muyer acababa de recoyer a los sos fíos, un ñácaru y un neñu de 7 años. Acordies col so testimoniu, yá detectara primeramente la so presencia y la so actitú sospechosa, polo qu’entainó a cerrar les puertes del vehículu y empecipiar la marcha. Sicasí, tuvo que dar una frenada al ponese delantre el deteníu. Nesi momentu llamó a la Policía Local.

    Personaos los axentes nel llugar, fueron informaos de la descripción del individuu, siendo alcontráu momentos dempués nuna zona prósima, dando en la so identificación y detención. A.J.H. de 19 años d’edá yá fuera deteníu por un fechu similar en mayu d’esti añu.

  • Atropellen a un barrenderu d’EMULSA na cai Ezcurdia

    Atropellen a un barrenderu d’EMULSA na cai Ezcurdia

    A les 07.55 hores de güei llunes, producíase un accidente de circulación nes confluencies de les cais Eladio Carreño y Ezcurdia, cuando un vehículu Renault Trafic conducíu por A.M.N. de 32 años d’edá y vecín d’Uviéu, tres nun respetar una señal de ceda’l pasu, chocaba contra un turismu marca Daewoo modelu Lanos, conducíu por J.L.P.M. de 80 años d’edá y vecín de Xixón. Como consecuencia del choque, el segundu conductor perdió’l control del vehículu xubiéndose a la cera y atropellando a un trabayador d’Emulsa, S.O.F.  de 44 años d’edá y vecín de Xixón, que foi treslladáu n’UVI móvil al Hospital de Cabueñes, anque les mancadures en principiu nun revisten gravedá. L’operariu d’Emulsa emburriaba un carru metálicu con manguera de baldéu, qu’evitó que les mancadures fueren mayores. Nel accidente, tamién resultó mancada de calter leve, l’acompañante del segundu vehículu, M.B.M. de 77 años d’edá y vecina de Xixón.

    Nengún de los implicaos taba baxo los efectos del alcohol o otres sustances.

  • Un incendiu nun coche xamusca una vivienda abandonada en Corvera

    Un incendiu nun coche xamusca una vivienda abandonada en Corvera

    Efectivos de Bomberos escastaron una quema declarada nun turismu y una vivienda abandonada allugada na localidá de Llavandera, en Corvera. El fueu xamuscó por completu’l vehículu. Les llapaes provocaron qu’empezara a amburar la casa abandonada que tamién quemó por completu esbarrumbándose. Nenguna persona resulto afectada.

    El Centru de Coordinación d’Emerxencies del 112 Asturies recibió l’avisu a les 04.20. Foi la Central Operativa de Servicios de la Guardia Civil de Xixón la que contactó cola Sala del SEPA pa preguntar si recibiérase dalgún avisu d’una casa amburando xunto l’autovía. Ellos recibieren una llamada d’un particular y diben mandar una patrulla por si fueren necesarios bomberos. La Sala 112 del SEPA movilizó a efectivos del parque d’Avilés que darréu, dende la zona, confirmen que’l vehículu quemara por completu y la casa hasta’l teyáu.

    A les 06.45 hores actívase una dotación del parque de Llamorgal por qu’allegue al incidente con una autobomba forestal. La autobomba nodriza movida dende’l parque avilesín, al pie de la autobomba urbana y la autoescalera, nun podía aportar hasta’l llugar porque para llegar a la intervención la dotación tuvo que metese per una pista pola que nun había accesu para la nodriza que tuvo que quedar na carretera.

    A les 07.09 parte de la dotación torna a base y na zona permanez, hasta les 09.06 hores que retiren para tornar a base, dos efectivos del parque d’Avilés y unu de La Morgal realizando xeres d’enfriamientu.

  • Una muyer mancada nun accidente de tráficu en Tinéu

    Una muyer mancada nun accidente de tráficu en Tinéu

    Una persona resultó mancada de considerancia en saliéndose de la vía col vehículu que conducía y topetar frontalmente contra la peña nel AS-15, al altor de Calabazos, en Tinéu. Según datos facilitaos pol Serviciu d’Atención Médica Urxente la ferida, una muyer de 20 años d’edá, presentaba, por cuenta de más pruebes y hasta nueva valoración médica, politrauma de calter grave. Foi atendida nun primer momentu, nel llugar del accidente pol equipu d’Atención Primaria de Tinéu y sacupada darréu pol equipu de la UVI-móvil d’Uviéu, que tamién llegó al incidente, al Hospital Universitariu Central d’Asturies (HUCA), n’Uviéu. Hasta’l llugar tamién se movió una ambulancia de soporte vital básicu.

    La ferida tuvo que ser escarcelada del interior del turismu por efectivos de Bomberos del SEPA (Serviciu d’Emerxencies de Principáu d’Asturies) con base nos parques de Tinéu y Cangas. Los bomberos retiraron la puerta del conductor, abrieron buecu y escarcelaron a la muyer, en coordinación con equipu sanitariu, inmovilizada con collarín con ayuda de la tabla de rescate.

    El Centru de Coordinación d’Emerxencies del 112 Asturies recibió l’avisu a les 18.14 hores. Na llamada señalaben qu’un coche saliérase de la vía y nel so interior había una persona atrapada y creía que mancada grave. La Sala 112 del SEPA movilizó a los bomberos de Tinéu y Cangas y activó al Xefe de Zona Suroccidental que tamién allegó al llugar. Paralelamente informó al SAMU qu’unvió los medios yá citaos y a la Guardia Civil de Tráficu. A les 18.37 hores, los bomberos movíos dende’l parque de cuartanu confirmen qu’hai una persona atrapada y dan en la so escarcelación. A les 19.10 hores comuniquen que la ferida yá ta siendo atendida pol equipu médicu. Rematada la escarcelación parte de les dotaciones tornaron a los sos respectivos parques.

  • Deteníu un home por robar nuna tienda de l’avenida Schultz

    Deteníu un home por robar nuna tienda de l’avenida Schultz

    La Policía Local detuvo esta madrugada a un home en llevándose diversos oxetos d’un local comercial y esforcexar cola propietaria del mesmu. El sucesu produció redolada a les 18:45 horas de la tarde d’ayeri. L’home entró nel local comercial allugáu n’avenida Schultz y, dempués de tirar una estantería al suelu, intentó fuxir con diversos oxetos de la tienda. La propietaria del establecimientu intentó evitar l’acción produciéndose una agarradiella nel que recibe un emburrión y acaba nel suelu. El lladrón entamó la fuxida pero los axentes de la Policía Local consiguieron alcontralu nel encruz de la mesma avenida Schultz con Ríu Muni. Ta previstu que pase güei a disposición xudicial por un delitu de robu con violencia o intimidación.

  • Un mancáu nun accidente de tráficu en Ribedeva

    Un mancáu nun accidente de tráficu en Ribedeva

    Una persona resultó mancada de considerancia en saliéndose de la vía col vehículu que conducía y cayer por un desnivel d’unos trés metros en Ribedeva. El sucesu producióse en circunstancies que se desconocen. Los fechos tuvieron llugar ente les localidaes d’Unquera y Colombres, a unos 800 metros de Bustiu.

    Según los datos facilitaos pol Serviciu d’Atención Médica Urxente (SAMU), el mancáu, un varón de 19 años d’edá, foi evacuáu al Hospital Universitariu Central d’Asturies (HUCA), n’Uviéu, con quebra abierta en dambos todíos. Foi atendíu nel llugar del accidente pol equipu d’Atención Primaria de Panes y l’ambulancia de soporte vital básicu de la zona que, darréu, fixo tresferencia cola UVI-móvil de Les Arriondes que lo treslladó al centru hospitalariu uvieín.

    Hasta’l llugar del accidente movióse una dotación de Bomberes del Serviciu d’Emerxencies del Principáu d’Asturies (SEPA) con base nel parque de Llanes. Cuando los bomberos llegaron al llugar el mancáu taba sentáu sobro’l turismu. El so compañeru ayudáralu a salir del interior en quedando atrapáu polos pedales. Los bomberos inmovilizáronlu con una férula y ayudaron a xubilo hasta l’ambulancia.

    El Centru de Coordinación d’Emerxencies del 112 Asturies recibió l’avisu a les 02.20 hores de la madrugada. Indicaben qu’un vehículu cayera por un desnivel d’unos trés metros dende la carretera a unes carbes. Había una persona nel so interior. Amás de pasar l’avisu al SAMU y activar a los bomberos, la Sala del 112 del SEPA informó de lo asocedío a la Guardia Civil de Tráficu. Los bomberos tornaron a base a les 03.39 hores.

  • Seis mancaos, ún d’ellos grave, nun accidente en Morcín

    Seis mancaos, ún d’ellos grave, nun accidente en Morcín

    Seis persones resultaron mancaes de diversa considerancia, cinco de calter leve y una con pronósticu grave, nun accidente de tráficu en Morcín. Nel choque viéronse implicaos trés turismos. El sucesu tuvo llugar na AS-231, a un kilómetru de la localidá de Les Maces. Según los datos facilitaos pol Serviciu d’Atención Médica Urxente (SAMU) tolos mancaos fueron sacupaos al Hospital Universitariu Central d’Asturies (HUCA) n’Uviéu. Por cuenta de más pruebes y hasta nueva valoración médica cinco d’ellos presentaben pronósticu leve, trátase de trés varones de 65, 21 y 30 años d’edá y dos muyeres de 62 y 27 años. El mancáu de mayor considerancia ye un varón de 22 años d’edá que presentaba, a falta de más exames, politrauma de calter grave. L’afectáu foi atendíu pol equipu médicu de la UVI-móvil d’Uviéu que darréu lo treslladó al centru hospitalariu.

    L’home, conductor d’unu de los turismos implicaos nel accidente, tuvo que ser escarceláu del interior del coche por efectivos de Bomberos del Serviciu d’Emerxencies del Principáu d’Asturies (SEPA) con base nel parque de Mieres. Los bomberos tuvieron qu’ablayar el techu del vehículu que taba entornáu sobro’l llateral derechu. N’abriendo güecu inmovilizaron al afectáu con un collarín y escarceláronlu cola tabla de rescate.