Axentes de la Policía Local de Xixón denunciaron esti miércoles a un padre por dexar conducir un vehículo lléctricu al so fíu d’ocho años. Los fechos asocedieron de margar les 17.50 hores de la tarde na escampada colindante a la Escuela de Marina Civil. El menor viaxaba solu nel vehículu mientres so padre grababa en vídeu dende l’esterior. Testigos presenciales sollertaron a los axentes al presenciar la escena. Los testigos de los fechos apurrieron tamién un vídeu onde podíen confirmase los fechos denunciaos. Personaos los axentes de la Policía Local nel llugar, acusaron al padre del menor, como collaborador necesariu, d’un presuntu delitu contra la seguridá vial.
Etiqueta: sucesos
-
Dos mancaos en cayendo al ríu por un desnivel d’unos siete metros en Piloña
Dos persones resultaron mancaes en saliéndose de la vía, en circunstancies que se desconocen. El vehículu nel que viaxaben cayó por un desnivel d’unos siete metros al ríu La Marea cuando circulaben pola AS-254, en La Cueva, Piloña. Según los datos facilitaos pol Serviciu d’Atención Médica Urxente (SAMU) los dos afectaos, un home y una muyer, fueron treslladaos al Hospital de Les Arriondes pa más pruebes. A falta de más exames y hasta nueva valoración médica’l so pronósticu ye leve. Dambos fueron evacuaos n’ambulancia de soporte vital básicu de L’Infiestu.
Hasta’l llugar del incidente movióse una dotación de Bomberes del SEPA (Serviciu d’Emerxencies del Principáu d’Asturies (SEPA) con base nel parque de Piloña. Cuando llegaron, los dos afectaos taben fuera del vehículu. Los bomberos ayudáronlos a xubir hasta la carretera onde los esperaba l’ambulancia. Darréu estabilizaron el turismu, cortaron la corriente y comprobaron que nun se tuviera produciendo nenguna fuga d’aceite o combustible.
El Centru de Coordinación d’Emerxencies del 112 Asturies recibió l’avisu a les 07.07 hores. Na llamada señalaben qu’un turismu con dos ocupantes cayera al ríu al altor de la curva del Canalón, en La Cueva. La Sala 112 del SEPA pasó l’avisu al SAMU y paralelamente activó una dotación d’efectivos de parque de Piloña. Amás, tamién s’informó a la Guardia Civil de Tráficu. Rematada la intervención los bomberos tornaron a la so base a les 08.19 hores.
-
Cinco muyeres, trés d’elles menores, deteníes por sustraer productos nun supermercáu d’El Llanu
La Policía Llocal detuvo ayeri, sobre les 18:30 hores, a cinco muyeres por sustraer productos d’un supermercáu na cai Río d’Oru, nel barriu d’El Llano.
Atoparon a les cinco muyeres na cai Cataluña yá identificaes por un testigu. Cuatro d’elles son vecines de Xixón y una de Mieres, tienen 28 y 27 años, y les restantes son trés menores de 15 años.
Cuando los axentes se personaron nel supermercáu, la encargada del establecimientu confirmó-yos que, momentos enantes, unes cinco moces aportaren al supermercáu con mochiles y, n’enllenándoles de diversos productos, marcharon ensin abonalos. Amás d’estos fechos tamién dio una descripción física de les muyeres y de les ropes que vistíen, amás del modus operandi que suelen emplegar y que consiste en qu’un vehículu les dexa na zona y les recueye cuando consumen los robos.
Delles dotaciones percorrieron la zona y atoparon, na cai Cataluña, a les cinco moces que coincidíen cola descripción facilitada y que portaben mochiles cargaes de distintos productos. Mientres la intervención un testigu indicó-yos que, aparcáu na redolada, atopábase un turismu nel que, momentos enantes, viera a estes muyeres introducir delles bolses.
Atopáu’l vehículu comprobóse que nel maleteru había dellos productos perecederos amás de bolsos, que conteníen documentación personal de les moces.
Tamién se personó nel llugar la encargada del supermercáu qu’aseguró que la mercancía pertenecía a la so empresa, y reconoció a les moces como les autores de los fechos denunciaos.
-
Sigue la busca de la muyer que cayó al mar cuando pescaba n’Arnao
Efectivos d’emerxencies retomaron esta mañana’l dispositivu de rastrexu p’alcontrar a la muyer que cayó al mar cuando taba pescando n’Arnao. El dispositivu, el mesmu que na primer xornada, busca per tierra, mar y aire. Tienen previstu volver rastrexar dende dende’l llugar onde se vio cayer a la muyer, La Pica d’Arnao, hasta’l Cabu Peñes.
A estes hores el Grupu Especial d’Actividaes Subacuátiques (GEAS) de la Guardia Civil tán buciando na zona pela que se vio cayer a la muyer. Per aire dirixióse al llugar l’helicópteru de Salvamentu Marítimu, Helimer. Dirá turnándose a lo llargo de la xornada col helicópteru medicalizáu de Bomberos d’Asturies.
Per tierra’l SEPA, caltién movilizaos a bomberos d’Avilés y Pravia. Amás, hai na zona personal de la ERIE de Cruz Roja, que tamién caltien personal con una embarcación, Guardia Civil, Policía Local y personal del serviciu de salvamentu en sableres con una moto acuática.
-
Busquen a una muyer que cayó al mar cuando pescaba en Castrillón
Efectivos d’emerxencies busquen dende esta nueche a una muyer que cayó al mar cuando taba pescando n’Arnao, Castrillón. El Serviciu d’Emerxencies del Principáu d’Asturies (SEPA) caltien activáu un dispositivu de rastréu nel que participen Salvamentu Marítimu, la Guardia Civil y la Policía Local. A lo llargo de la nueche, efectivos de bomberos, col so l’Helimer y una embarcación de Salvamentu Marítimu, y axentes de la Guardia Civil y Policía Local tuvieron rastrexando tola zona dende’l llugar onde sumió, una antigua fábrica d’una empresa de producción de cinc, hasta la sablera de Salinas.
Ta previstu que a primer hora de la mañana’l Grupu de Rescate del SEPA col helicópteru medicalizáu de’l relevu, pal rastrexu aéreu, al helicópteru de Salvamentu Marítimu. Tamién se movilizaron a efectivos de bomberos d’Avilés y Pravia, a la ERIE (Equipu de Respuesta Inmediata d’Emerxencies) Acuática de Cruz Roja y pidióse a la Guardia Civil qu’activara a los GEAS (Grupu Especial d’Actividaes Subacuátiques) y que’l so helicópteru se sumara a los relevos pal rastrexu per aire.
El Centru de Coordinación d’Emerxencies del 112 Asturies recibió l’avisu a les 02.27 hores d’esta nueche. Na llamada indicaben qu’una muyer que taba pescando colos alertantes cayérase al mar y nun la víen. La Sala 112 del SEPA movilizó a efectivos de bomberos d’Avilés ya informó a Salvamentu Marítimu qu’unvió al llugar el so helicópteru y una embarcación. Tamién se comunicó lo asocedío a la Guardia Civil y a la Policía Local.
-
Rescaten a dos senderiestes desnortiaos en Cabrales
El Grupu de Rescate de Bomberos del Serviciu d’Emerxencies del Principáu d’Asturies (SEPA) rescató a dos senderistes que se desnortiaron y quedaron enriscados cuando faíen una ruta de monte circular, ente Sotres y Tielve, en Cabrales. Los dos afectaos, dos varones vecinos de Santander, fueron alcontraos nuna canal con muncho desnivel, nuna zona con gran verticalidá. Pa la so evacuación realizaronse un total de cuatro grúes cola aeronave na que s’esplegaron unos 30 metros en caúna d’elles. Dambos atopábense en perfectu estáu y fueron sacupaos a la redoma de Tielve.
El Centru de Coordinación d’Emerxencies del 112 Asturies recibió l’avisu a les 17.46 hores. Na llamada, realizada polos mesmos afectaos, esplicaron que taben enriscaos nuna canal. Salieron de Sotres y llevaben cinco hores caminando. Onde s’atopaben víen perfectamente la carretera de Tielve, al otru llau del ríu Duje.
La Sala 112 del SEPA preavisó al Grupu de Rescate col Helicópteru Medicalizado que nesi momentu taba tornando de realizar un treslláu sanitariu. L’equipu tuvo que recargar en Llamorgal y preparar la equipación pa realizar la intervención. Como marca’l protocolu informóse de la intervención a la Guardia Civil y a los 112 de Cantabria y Castiella y Llión. Rematada la intervención l’equipu tornó a la so base en La Morgal a les 20.42 hores.
-
Xamusca un coche aparcáu n’A Veiga
Efectivos de Bomberos escastaron una quema declarada nun vehículu aparcáu na cai Antonio Osorio, númberu 3, n’A Veiga. La quema xamuscó dos turismos. Nenguna persona resultó afectada. La estinción llevar a cabu con una llínea d’espluma. El Centru de Coordinación d’Emerxencies del 112 Asturies recibió l’avisu a les 06.01 hores. Na llamada indicaben que taba quemando un coche que taba aparcáu na cai y había otros vehículos abargana.
La Sala 112 del SEPA movilizó una dotación del bomberos del parque de Barres que se treslladó al llugar con dos autobombas. A les 06.32 hores los bomberos dieron por escastáu’l fueu. Señalaron qu’afectó a dos coches, un terceru qu’había nel llugar consiguió retirar a tiempu. La dotación permaneció nel llugar, realizando xeres d’enfriamientu, hasta les 07.20 hores que retiraron pa tornar a la so base. L’incidente púsose en conocencia de la Guardia Civil.
-
Un mancáu al volcar el quad que conducía en Ribedeva
Un home resultó mancáu de considerancia n’entornando col quad que conducía xubiendo al picu El Paisanu dende la localidá de Noriega, en Ribedeva. El mancáu, un varón de 39 años d’edá, foi atendíu nel llugar del accidente pol mélicu-rescatador del Grupu de Rescate y l’equipu d’Atención Primaria de Colombres. Darréu foi evacuáu nel helicópteru medicalizáu del Serviciu d’Emerxencies del Principáu d’Asturies (SEPA) al Hospital de Les Arriondes. Por cuenta de más pruebes y hasta nueva valoración médica presentaba policontusiones y fuerte golpe nel llombu de pronósticu reserváu.
Hasta’l llugar del accidente tamién se movieron efectivos de Bomberos del SEPA del parque de Llanes qu’amás de collaborar col Grupu de Rescate na evacuación del mancáu treslladó hasta l’incidente al equipu médicu de Colombres.
El Centru de Coordinación d’Emerxencies del 112 Asturies recibió l’avisu a les 12.54 hores. Foi’l mesmu afectáu’l que contactó col serviciu d’emerxencies. Indicó qu’entornara col quad y nun podía movese. Nun había accesu a la zona para una ambulancia.
Amás de pasar l’avisu al SAMU, la Sala 112 del SEPA movilizó al Grupu de Rescate col helicópteru medicalizáu y per tierra una dotación de bomberes del parque llaniscu que treslladaron en touterrén hasta l’incidente al equipu d’Atención Primaria de Colombres. A les 14.28 hores, el Grupu de Rescate indica qu’en 15 minutos va llegar col mancáu al hospital. L’incidente tamién se comunicó a la Guardia Civil.
-
Rescaten ilesos a dos senderites que se desnortiaron cola borrina n’Amieva
L’helicópteru medicalizáu de Bomberos d’Asturies rescató ilesos a dos senderistes que se desnortiaron cola borrina cuando realizaben una ruta dende’l mirador de Ordiales a Vegabaño, n’Amieva. Los dos afectaos, una muyer de 24 años y un varón de 25, fueron alcontraos baxando escontra la presa de La Jocica. L’helicópteru dexó a unos 800 metros de los afectaos, por aciu una maniobra de sofitu de patín, a unu de los bomberos-rescatadores. Este foi a buscar a la pareya y acompañólos de nuevu hasta l’aeronave que los evacuó por aciu la mesma maniobra.
El Centru de Coordinación d’Emerxencies del 112-Asturies recibió l’avisu a les 15.37 hores. Na llamada, los mesmos afectaos esplicaron que por cuenta de la borrina confundiéronse y llegaron a una zona complicada y nun podíen siguir. La Sala 112 del SEPA movilizó al Grupu de Rescate col helicópteru medicalizáu y comunicó l’incidente a la Guardia Civil. A les 17.16 hores l’equipu informa que remató’l rescate y torna a la so base en Llamorgal onde llega a les 17.36 hores.
-
Atopen el cadabre d’un home flotando nel agua en Poniente
Axentes de la Policía Local y Nacional rescataron na nueche del llunes el cuerpu d’un home flotando boca abaxo na agua, na redolada del Acuariu. El sucesu tuvo llugar a les 23.56 hores, mientres el conciertu de Lola Índigo nel escenariu de Poniente. Delles persones alertaron de la presencia d’un cuerpu nel agua. Tratábase de J. P. C., de 58 años y natural de Siero, quien s’atopaba solu pela zona.
Una patrulla de la Policía Local treslladóse darréu al llugar y sacó al varón del agua con ayuda d’una dotación del Cuerpu Nacional de Policía. Realizáron-y maniobres de reanimación hasta la llegada de la UVI móvil que solamente puedo certificar la so muerte, por presuntu afogamientu. El fináu cayera al agua, presuntamente, de forma accidental. El Cuerpu Nacional de Policía quedó encargáu de la investigación del casu.