Xixón al día

Etiqueta: turismu

  • Xixón afítase como referente turísticu nel norte d’España

    Xixón afítase como referente turísticu nel norte d’España

    La cifra de viaxeros agospiaos n’establecimientos hoteleros rexistrada en xunetu en Xixón ye de 49.691 persones, con un incrementu del +8,1% respeuto al mesmu mes del añu caberu. La cifra de nueches d’agospiu algama les 111.255, con un medru del +12,7%. La estancia media afítase en 2,2 nueches y medra un 0,1% respeuto al añu caberu.

    Estos datos remanecen de la Encuesta d’Ocupación Hotelera espublizada güei pol Institutu Nacional d’Estadística y tres los axustes realizaos pola consultora Invesmark p’actualizalos según les places hoteleres disponibles anguaño. L’incrementu rexistráu por Xixón (+8,1%) en númberu de viaxeros asítiase perriba de la media rexonal (+5,5%) y per delantre de los siete principales destinos de la España Verde.

    No tocante al númberu de nueches d’agospiu, l’incrementu ye del +12,7% respeuto a xunetu de 2018. Poro, la cifra afítase como la meyor de la serie hestórica. Esti incrementu ye tamién el más bultable de la España verde. La tasa d’ocupación rexistrada en xunetu asítiase nel 71,6%. Medra un +9,3% respeuto al añu pasáu y afítase como la más bultable de la serie hestórica.

    Acumulao xineru-xunetu

    La cifra total de viaxeros en Xixón nos siete meses primeros del añu xube a les 250.351 persones. Representa un incrementu del +2,5% respeuto al mesmu periodu del añu caberu. La cifra de nueches d’agospiu algama les 491.676, con un incrementu del +5,4%. Tanto una como otra son los valores máximos de la serie hestórica pal semestre primeru del añu.

    La tasa d’ocupación rexistrada nos siete meses primeros del añu algama’l 47,9%, con un incrementu respeuto al añu caberu del +0,6%. Ye la meyor tasa d’ocupación de la serie hestórica pa esti periodu.

  • Xixón cuelga’l cartel de ‘completu’ na Selmana Grande

    Xixón cuelga’l cartel de ‘completu’ na Selmana Grande

    La ocupación hotelera en Xixón na Selmana Grande algamó’l 95,4%. Esti ye’l datu mediu que se rexistra del 9 d’agostu, fecha na que s’inauguró la principal selmana festiva de la ciudá, al 18 d’agostu, según un sondéu ellaboráu güei por Infoxixón ente los 49 hoteles y pensiones de la ciudá asturiana. Nel casu de contabilizar les nueches dende’l 14 d’agostu hasta’l 18 d’agostu, coincidiendo cola ponte festiva, la ocupación llegó al 98,2%. En 2018, la ocupación media na Selmana Grande llegó al 81,3%.

    Por categoríes, los hoteles de 4 estrelles zarraron la Selmana Grande con una ocupación media del 93,1% (97,7% les cuatro nueches de la ponte festiva); los hoteles de 3 estrelles llegaron al 91,2% (95,4% na ponte); los de 2 estrelles algamaron el 98,1% (99,4% na ponte); y los de 1 estrella llenaron y rexistraron una ocupación del 99,3% (100% les cuatro nueches de la ponte).

    No que cinca a los agospios estrahoteleros (apartamentos turísticos, campings, agospios de turismu rural), la ocupación media los 9 díes de Selmana Grande llegó al 79%. Si contabilizamos namái los díes de la ponte festiva, del 14 al 18 d’agostu, la ocupación nesti tipu d’agospios xubió hasta’l 80,5%.

  • El turismu estranxeru raspia’l 20% en Xixón

    El turismu estranxeru raspia’l 20% en Xixón

    La cifra de viaxeros rexistrada en Xixón en xunu ye de 43.274 persones, con un incrementu del +1,1% respeuto al mesmu mes del añu caberu. El datu de nueches d’agospiu xube a 89.021, con un crecimientu del +1,6%, y la estancia media afítase en 2,1 nueches y medra un 0,5% respeuto al añu pasáu. La cifra de viaxeros y la de nueches d’agospiu son les más altes de la serie hestórica, rexistrando medros bultables en fines de selmana (+12,5%) y nel mercáu estranxeru (+65,3%).

    Estos datos remanecen tres realizar l’axuste de los datos espublizaos güei pol Institutu Nacional d’Estadística en función del númberu d’establecimientos y places hoteleres esistentes daveres na ciudá.

    Récor de turistes y nueches d’agospiu nel semestre primeru

    La cifra total de viaxeros nel semestre primeru del añu algama les 200.660 persone. Esti resultáu representa un incrementu del 1,2% respeuto al mesmu periodu del añu caberu. La cifra de nueches d’agospiu algama les 380.421, con un incrementu del +3,4%. Tanto una como otra suponen los valores máximos de la serie hestórica pal semestre primeru del añu.

    El mercáu estranxeru continúa medrando. Failo nun +20,7% respeuto al añu pasáu y algama la cifra de 37.294 viaxeros. Poro, representa’l 18,6% de los turistes agospiaos n’establecimientos hoteleros. La tasa d’ocupación rexistrada nel semestre primeru del añu algama’l 43,1%. Ye la segunda meyor de la serie hestórica pa esti periodu dempués del 44,0% rexistráu l’añu pasáu. Esti datu continúa en niveles máximos y aseméyase a la de 2018 si se tien en cuenta que la planta hotelera medró un 2,0%. En fines de selmana la tasa d’ocupación media pal semestre primeru ye del 56,3%, crez un +4,8%.

  • Berta Piñán Suárez, conseyera de Cultura, Política Llingüística y Turismu

    Berta Piñán Suárez, conseyera de Cultura, Política Llingüística y Turismu

    Berta Piñán Suárez (Cangues d’Onís, 1963) ye la nueva conseyera de Cultura, Política Llingüística y Turismu del Gobiernu d’Asturies. Llicenciada en Filoloxía Española pola Universidá d’Uviéu, desenvolvió’l so llabor profesional como docente en centros educativos públicos d’Asturies y Madrid. Mientres décades tuvo venceyada al movimientu de recuperación de la llingua asturiana y al mundu artísticu de la comunidá. Dende 2008 ye miembru de l’Academia de la Llingua Asturiana ya impulsó diversos proyectos culturales.

    La so obra lliteraria abarca dende la poesía y la narrativa hasta l’ensayu o la lliteratura infantil. Anguaño forma parte de la xunta directiva de Genialogías, asociación de poetes feministes que trabaya pola igualdá y la visibilidá de les muyeres.

  • ALSA–Juliá Tours, nueva axudicataria del autobús turísticu de Xixón

    ALSA–Juliá Tours, nueva axudicataria del autobús turísticu de Xixón

    L’autobús turísticu de Xixón inauguróse n’abril de 2009, en Selmana Santa, y foi el primer autobús turísticu d’Asturies. Foi una concesión municipal a la compañía ALSA. Anguaño, nueve años dempués, axudicóse un contratu nuevu pa la xestión d’esti serviciu. L’axudicatariu ye ALSA – Juliá Tours. El contratu nuevu tien una vixencia de cuatro años, con posibilidá de prórrogues d’un añu, demientres otros cuatro; esto ye, un máximu d’ocho años.

    El percorríu del autobús turísticu de Xixón tien aniciu y final na terminal d’El Fomentín pa percorrer dellos espacios de la ciudad, como’l Muséu del Ferrocarril y l’Acuariu, el parque d’Isabel la Católica, El Molinón, el Xardín Botánicu y la Llaboral. El costu del billete ye de 16 euros per día, 7 euros pa rapaces d’ente 4 y 13 años. Hasta’l 12 de xunetu, los billetes van tener un descuentu del 50%. L’audioguía atópase en 6 idiomes: castellán, inglés, alemán, francés, italianu y portugués. Tamién úfrese’l serviciu de guía n’asturianu.

    El bus turísticu ye accesible a persones con discapacidá y tien dos places accesibles. Cunta con un espaciu pal tresporte de bebés. L’autobús dispón del sellu ECO y cunta con teunoloxía Dual Fuel, que permite ser propulsáu con una mestura de gasoil y gas GLP, calteniendo’l par y la potencia, y algamando’l porcentax hasta’l 40%. La teunoloxía Dual fuel permite reducir un 22% el NOX –reduciendo’l NO2 (dióxido de nitróxenu)-; reducir el CO2 (dióxidu de Carbonu) un 15%; y reducir el consumu d’urea un 20%.

  • Nueves empreses de Xixón xúnense al ‘Compromisu de Calidá Turística’

    Nueves empreses de Xixón xúnense al ‘Compromisu de Calidá Turística’

    60 empreses de Xixón tan acabantes de renovar, col sofitu de Divertia Gijón, el sellu ‘Compromisu de Calidá Turística’. Esti sellu, acreitáu pola Secretaria d’Estáu de Turismu, reconoz l’esfuerciu realizáu poles empreses participantes por ufrir un serviciu de calidá y pol ameyoramientu continuu de los sos negocios.

    Les empreses que van llucir, pela primer vegada y de cara a esti branu, el distintivu nes sos fachaes son les cafeteríes Nani & Co y el Cafetón, dambes dos asitiaes nel centru. Tamién va cuntar con esti distintivu la empresa Lanchas de Pasaje Canteli, de paseos turísticos pela badea de Xixón, que trabaya dende’l Puertu Deportivu.

    Ye preciso añader a estes empreses les doscientes que pasaron pel mesmu procesu a finales del añu caberu, una esbilla d’hoteles, restoranes, sidreríes, comercios, museos, etc. con instalaciones curiaes y atención dilixente, onde van recibir al veceru siempres cola meyor sorrisa, símbolu del Compromisu de Calidá Turística.

    La ciudá entamó a trabayar nesti programa de calidá nacional nel añu 2004 y, de magar, afitóse como líder en númberu d’empreses y servicios distinguíos.

    Sobre’l Sistema de Calidá Turística en Destinos

    El Sistema de Calidá Turística en Destinos (SICTED) ye un programa d’ameyoramientu de los destinos turísticos promovíu pola Secretaría d’Estáu de Turismu (SET) y xestionáu na ciudá asturiana pola estaya de Turismu de Divertia Gijón. Trabaya con empreses/servicios turísticos de 32 oficios diferentes col envís d’ameyorar la esperiencia y satisfaición del turista.

  • Los trenes turísticos van empezar a circular per Asturies en xunetu

    Los trenes turísticos van empezar a circular per Asturies en xunetu

    Asturies va cuntar con tres nuevos trenes turísticos. El conseyeru de Turismu, Isaac Pola, y el presidente de Renfe, Isaías Táboas, soscribieron esti xueves en Xixón un conveniu de collaboración pa ufiertar trés rutes temátiques d’un día que combinen viaxes en tren con visites guiaes. Los trés circuitos ferroviarios van tener un preciu de 45 euros p’adultos y tarifa reducida de 20 pa menores de 4 a 13 años.

    La primera de les rutes llámase Los puertos y cantiles. Les salíes tan programaes pa los díes 13 de xunetu y el 10 d’agostu. El percorríu incluye’l viaxe ente Xixón y Cuideiru, con visites a El Cabo Peñes, al so centru d’interpretación y un paséu pel cantil. La sidra y los dinosaurios parte los díes 20 de xunetu y 24 d’agostu dende Uviéu hasta Les Arriondes. Incluye visites al Muséu del Xurásicu d’Asturies (MUXA), en Colunga, y a instalaciones rellacionaes cola cultura sidrera en Villaviciosa y Nava. La biosfera y la mina, con salíes el 27 de xunetu y el 17 d’agostu, entiende’l trayectu de Xixón a Llaviana. El viaxe incluye visites al Muséu de la Minería y de la Industria (MUMI), en Samartín del Rei Aurelio, y la redolada del Parque de Redes.

    El Gobiernu d’Asturies dio sofitu técnicu a Renfe Viaxeros pal diseñu de les rutes y tamién financia parte del proyectu. La compañía ferroviaria asume les obligaciones y responsabilidaes del tresporte de viaxeros y la contratación de los autobuses necesarios pa complementar cada ruta.

    Apueste pola sostenibilidá y l’equilibriu territorial

    El conseyeru Isaac Pola destacó qu’estes rutes temátiques allíniense «perfectamente» colos oxetivos que recueye’l Programa de Turismu Sostenible d’Asturies 2020. Esplicó que los tres itinerarios «diseñáronse a partir de los productos de cabecera definíos nesi documentu». «El circuitu vinculáu a la sidra garra una relevancia especial cola candidatura de la cultura sidrera como patrimoniu de la Unesco«.

  • Asturies véndese como «un paraísu de clima suave»

    Asturies véndese como «un paraísu de clima suave»

    Asturies quier vendese como un paraísu de clima suave lloñe del calor afogadizu. El Principáu va entamar el branu con una nueva campaña de promoción turística que busca aprovechar el clima del Principáu como reclamu y ventaya competitiva. «La costa asturiana ye un paraísu dientro del paraísu onde esfrutar tol añu de les ventayes d’un clima suave, na meyor contorna imaxinable”, señaló esti llunes el conseyeru de Turismu, Isaac Pola.

    El turismu siguió medrando n’Asturies nel 2019, con un aumentu del 2,8% en pernoctaciones nel primer cuatrimestre

    La campaña turística, que caltien el lema Vuelvi al Paraísu, yá ta en marcha. Va difundise en televisión, radio, cine, soportes de publicidá esterior, medios dixitales y redes sociales hasta la primer quincena de xunetu. L’oxetivu ye aprovechar les primeres foles de calor de la península. «Vamos recordar a los nuestros públicos d’interés que n’Asturies puede escapase del ruíu, la calor y l’estrés de la rutina diaria pa volver alendar, volver comer bien, y volver refrescase». Como novedá principal, inclúyese’l patrociniu de dalgunos de los espacios meteorolóxicos de mayor audiencia en televisión. Otru formatu novedosu va ser la proyección d’imáxenes del Principáu nel interior de los vagones del metro de Madrid.

    L’oxetivu d’esta iniciativa ye, según Pola, da-y un impulsu «a una temporada que se presenta coles meyores perspectives». El turismu siguió medrando n’Asturies nel 2019, con un aumentu del 2,8% en pernoctaciones nel primer cuatrimestre. «Aspiramos a afitar esti branu’l bon enclín de la Selmana Santa, gracies al trabayu del empresariáu, el sector y la propia alministración», amestó.

    Pola realizó estes declaraciones en Muros, na entrega de les banderes azules 2019, qu’anueven la certificación de 12 playes, 5 centros de visitantes y el puertu deportivu de Xixón. Como novedá, d’esta vuelta estrena reconocencia la Sienda de los Miradores, que comparte bandera cola sienda peatonal de la costa d’Artéu y el Cabu Peñes. Hai que recordar, amás, que cuatro sableres d’Asturies estrenen esti branu la prohibición de fumar.

  • Asturies busca turistes en Corea del Sur

    Asturies busca turistes en Corea del Sur

    Asturies participó esti fin de selmana na feria de viaxes más importante de Corea del Sur, la Korea World Travel Fair (Kotfa). Esta foi la primer vez que’l Gobiernu del Principáu participó nesti alcuentru con 34 años d’hestoria. Fízolo con un espaciu personalizáu dientro del estand de Turespaña, encargáu d’asitiar la marca España nel país asiáticu.

    Los atractivos principales qu’Asturies promocionó nesti mercáu ye’l so paisaxe y la so naturaleza, amás de les sos rutes vinculaes al Camín de Santiago. Amás, y pola mor del interés d’estos viaxeros pola gastronomía española y les cocines nueves, la ufierta culinaria de la comunidá ye otru de los aspectos que s’amosaron nesta feria na que participaron alredor de 70 países. L’añu pasáu pasaron per ellí unes 70.000 persones.

    El turismu procedente d’esti país asiáticu ayuda a la desestacionalización del sector. Los viaxeros coreanos desplácense fuera de la temporada alta nacional, fundamentalmente d’ochobre a febreru. Amás, disponen d’una capacidá alta de gastu gracies a la medría importante de la so economía nos postreros 30 años. Les sos estancies duren una media de 7 a 10 díes.

    España recibió la visita de 441.826 visitantes d’esta nacionalidá nel 2017. Corea del Sur convirtióse nel tercer mercáu emisor d’Asia, cuasimente empatáu nel segundu puestu con Xapón -442.132 turistes-, según los últimos datos disponibles de la encuesta Frontur. China ta nel primer puestu con 513.725 turistes. Los destinos españoles principales pa esti mercáu son Barcelona, Mallorca y, nos últimos años, el Camín de Santiago.

  • La costa occidental asturiana, premiu al meyor destín nacional

    La costa occidental asturiana, premiu al meyor destín nacional

    La costa occidental asturiana foi distinguida como meyor destín nacional na XI edición de los Premios Condé Nast Traveler n’España. Consideraos los galardones más importantes del mundu de los viaxes, reconocen la excelencia nes diverses categoríes de la Gold list 2019.

    El director xeneral de Comerciu y Turismu, Julio González Zapico, recoyó anueche en Madrid esti premiu, concedíu por votación de los llectores. El galardón distingue cada añu los destinos, establecimientos turísticos y marques d’estilu de vida preferíos pol públicu. Zapico aseguró que la costa occidental asturiana ye «un paraísu dientro del paraísu», y animó al públicu a «descubrir les sos sableres tranquiles, con unos cantiles d’infartu dende’l cabu Vidíu o’l cabu Bustu, a pasiar poles villes de Castropol, Ḷḷuarca o Cuideiru, y a comer el meyor pescáu en Viavélez o A Veiga«. «Too ello puede facese dende una perspectiva sostenible, respetuosa colos valores de la marca Asturies Paraísu Natural que resulten tamién reconocíos nesti galardón», esplicó.

    L’occidente asturianu algamó’l 10,6% de les pernoctaciones rexistraes nel sistema d’información turística d’Asturies (Sita), según el so últimu informe añal, de 2017. El Gobiernu d’Asturies entamó nos dos últimos años 25 viaxes a esta zona con periodistes y axentes, que se traducieron en reportaxes de televisión, prensa y radio, mesmo que nuna medra de la presencia del occidente asturianu nos programes de turoperadores nacionales ya internacionales. Traveler ye la revista de viaxes del grupu editorial Condé Nast. Cunta col portal d’información especializada en viaxes más lleíu n’España, con 863.000 usuarios únicos, según datos de Comscore.