El presidente del Gobiernu asturianu, Adrián Barbón, señaló esti llunes que la comunidá ta «nun momentu críticu» de la pandemia del coronavirus y que la evolución va depender de les decisiones que se tomen y tamién de la responsabilidá de la ciudadanía. «En función de cómo lo faigamos, vamos poder avanzar o recular, y eso depende de nós y nós», alvirtió. Mientres una visita al Centru de Recepción ya Interpretación del Prerrománicu, n’Uviéu, el xefe del Executivu autonómicu esplicó que les nueves midíes de protección énte la covid-19 alcordaes el vienres nel Conseyu Interterritorial del Sistema Nacional de Salú van entrar a valir «cuanto antes». Barbón adelantó qu’estes midíes se van publicar nel Boletín Oficial del Principáu (BOPA) «probablemente ente güei y mañana».
Sicasí, precisó que dalgunes d’eses midíes yá s’apliquen na comunidá: «Asturies va bien per delantre del restu de comunidaes y delles decisiones qu’agora s’adopten como obligatories yá tán a valir equí y de xuru vamos siguir añediendo munches más», sorrayó. Nesti sentíu, valoró la estratexa qu’aplica la Conseyería de Salú ante la detección de los biltos que se fueron declarando tres el fin del estáu d’alarma. «Yo creo qu’esta respuesta ye la más contundente de toles comunidaes, especialmente cuando alvertimos que puede haber andaes ente la vecería de dalgún establecimientu y faemos llamamientos masivos pa realizar pruebes PCR», indicó.
Al so xuiciu, «una respuesta contundente y antemanao» ye’l meyor remediu pa faer frente a la pandemia, tal como demostró Asturies «antes, mientres y dempués del estáu d’alarma». El presidente refirióse tamién al Hospital del Oriente, onde esta fin de selmana reforzáronse les midíes de protección frente a la covid-19 tres la confirmación de dos andaes ente’l personal sanitario. A esti respectu, aseguró que la situación «paez controlada» y que la Conseyería de Salú ta actuando «con total rigor» pa evitar l’espardimientu del virus.
