‘Agóspiate con descuentu en Xixón’. Esta ye la nueva campaña impulsada per Xixón Turismu nel marcu de la mesa de concertación social, Xixón Reinicia (FADE, UXT, CCOO y Conceyu), y que tien como oxetivu impulsar l’actividá de los agospios turísticos de cara a los meses de seronda. Ye una campaña promocional de descuentu del 40%, onde’l Conceyu asume esta cantidá al traviés de los fondos empobinaos a la recuperación del sector alcordaos nel pautu de Xixón Reinicia.
Esta campaña ñaz “col fin de siguir la reactivación del sector y pensando nes escapaes que puean realizase mientres la seronda”, esplica Daniel Martínez Junquera, director de Xixón Turismu.
Pa facilitar l’accesu al descuentu, afitóse una páxina web www.alojateengijon.es con información de los 40 agospios que participen na promoción. “La idea ye redireccionar al veceru dende www.alojateengijon.es a les páxines webs de los establecimientos. Mientres esti procesu, va xenerase un pop-up col códigu de descuentu, que va permanecer estáticu mientres unos segundos antes de la llegada a la web del establecimientu escoyíu”, esclaria Martínez Junquera.
Ta previstu que les reserves puean realizase dende’l 14 de setiembre al 31 d’avientu y el periodu d’estancia allárgase hasta’l 9 de xineru del añu próximu.
Nesta campaña ‘Agóspiate con descuentu en Xixón’ participen 40 establecimientos de la ciudá y l’envís ye llograr una fauturación total averada a los 400.000€, de los que’l Conceyu, al traviés de los fondos Xixón Reinicia, va apurrir el 40%, lo que supón unos 160.000€.
Promoción y publicidá
P’asoleyar la promoción, Xixón Turismu va desenvolver una campaña de publicidá nel portal de viaxes Tripadvisor. La campaña, empobinada a España y Portugal, ta valorada en 54.000€, va tar activa un mes (14/09-14/10) y espera algamar más de 6 millones d’impautos.
Arriendes d’ello, la campaña xeneral de publicidá qu’asoleya davezu Xixón Turismu na seronda tamién va sirvir pa dar a conocer la promoción ‘Agóspiate con descuentu’. Con una inversión de 50.874,08€, l’envís ye algamar más de 11,5 millones de impautos.
Esta iniciativa sumase, asina, a les campañes impulsaes pola mesa de concertación social de sofitu al sector turísticu tres el parón económicu xeneráu pola pandemia de la Covid-19. En xunu, púnxose en marcha ‘Xixón merezte’, con una ufierta 3×2 nos agospios. Y a lo llargo del branu, Xixón Turismu tuvo promocionando un 50% de descuentu pa la reactivación de les empreses d’actividaes y guíes turísticos.
