Uviéu va allugar l’alcuentru políticu anual de la Plataforma Europea de Rexones de Carbón en Transición. Esti ye’l principal foru d’análisis y d’alderique na Xunión Europea (XE) sobre descarbonización y polítiques de reactivación en rexones onde la minería y la producción térmica tuvieron relevancia especial. Les feches previstes son el 1 y 2 d’avientu, siempre que la evolución de la pandemia de la Covid-19 n’Europa nun desaconseye l’aplazamientu.
Esta va ser la tercer xunta al más altu nivel de la plataforma tres les celebraes nes localidaes de Görlitz (Alemaña) y Katowice (Polonia). Ta prevista l’asistencia de 300 representantes de les 41 rexones comunitaries que formen parte de l’agrupación de territorios vinculaos al carbón. Tamién participen la Comisión y el Parllamentu europeos, autoridaes locales, el Gobiernu d’España y axentes sociales y económicos implicaos nel diseñu de les polítiques de transición enerxética.
El programa provisional inclúi alderiques sobre’l Pactu Verde Européu, los fondos de transición xusta y estratexes de descarbonización
La Plataforma de Rexones de Carbón en Transición ye una iniciativa constituyida n’avientu de 2017 pola Comisión Europea. El so oxetivu ye promover mecanismos de sofitu a les rexones mineres más afectaes pol procesu de transición ecolóxica, sobre manera pol zarru de la minería y de les centrales térmiques de carbón. Anguaño, integra a 41 territorios. Amás del Principáu, que participó en toles sesiones de trabayu, ente la representación española figuren tamién Castiella y Llión, Castiella-La Mancha y Aragón. Tamién ta’l Ministeriu pa la Transición Ecolóxica, l’Institutu pa la Reestructuración de la Minería del Carbón (IRMC), los sindicatos Soma-Fitag-UXT y CC. OO., l’Asociación de Comarques Mineres (ACOM) y Hunosa.
El programa provisional pa les dos xornaes inclúi alderiques sobre’l Pactu Verde Européu, los fondos de transición xusta y les estratexes pa que los procesos de descarbonización garanticen l’actividá industrial y l’empléu. Tamién tán previstes visites técniques a distintos allugamientos industriales asturianos. “La idea d’esta xunta anual ye plantegar un alcuentru en clave de soluciones. Trátase de dar respuestes pa la transición enerxética y reactivación de les cuenques”, señala la directora xeneral d’Enerxía, Minería y Reactivación, Belarmina Díaz.
