El Conceyu de Xixón va abrir a partir del domingu los espacios verdes y parques y les sableres urbanes de San Llorienzo, Poniente y L’Arbeyal. Esta decisión va facilitar los paseos de los neños autorizaos pol Gobiernu central dientro del decretu d’Estáu d’Alarma. Lo que nun se va permitir ye la utilización de les zones de xuegos infantiles y d’actividá física pa persones mayores, que van siguir precintaos.
L’usu de les sableres urbanes va ser esclusivu pa los paseos de los menores. En nengún casu dexaráse l’accesu de los perros a les mesmes. Les salíes de los animales siguen acutaes a la redolada de la casa. El Consistoriu xixonés tomó esta decisión al considerar que «los espacios abiertos son los llugares afayadizos pal esparcimientu de neños, calteniendo siempres les midíes de seguridá esixíes».
Los menores de 14 años van poder salir a la cai una hora al día, ente les nueve de la mañana y les nueve de la nueche. Deberán tar acompañaos en tou momentu por una persona adulta que conviva con ellos. Cada adultu va poder acompañar a un máximu de trés menores. Les salíes de la reciella han de facese respetando’l distanciamientu social, evitando que los neños xueguen ente sí. Tampoco van tar permitíes los conceyos de los adultos que los acompañen.
Los menores que vivan en redolaes rurales van poder salir a pasiar pel campu, respetando igualmente’l distanciamientu. Los menores con síntomes compatibles cola Covid-19 o que s’atopen en cuarentena tendrán de permanecer nes sos cases calteniendo’l confinamientu.
