Entamu Actualidá Xixón va tar conectáu con Parque Principáu mientres les fiestes navidiegues

Xixón va tar conectáu con Parque Principáu mientres les fiestes navidiegues

0

El Consorciu de Tresportes d’Asturies (CTA) va conectar Xixón col centru comercial Parque Principáu, en Siero. El serviciu d’autobuses va ser temporal, dende’l próximu sábadu, 14 d’avientu, hasta’l 11 de xineru, y ta destináu a fomentar l’usu del tresporte públicu en desterciu del vehículu priváu. Esta llinia va cuntar con 13 frecuencies diaries d’ida y vuelta, y el serviciu va tar incluyíu na tarifa CONECTA, que dexa movese per toa Asturies en tresporte públicu por un máximu de 30 euros al mes.

El primer serviciu va salir de Xixón a les 10:00 hores y va repitise cada hora hasta les 22:00. Les salíes dende Parque Principáu tamién van ser cada hora, dende les 11:00 hasta les 23:00. En Xixón va haber dos paraes: la estación d’autobuses y Begoña.

La ufierta de places va superar les 1.500 al día. Les cifres revelen que daqué más del 26% de les persones que visiten Parque Principáu mientres les feches navidiegues vienen de Xixón. El nuevu serviciu nun va operar nos díes festivos y van facelo parcialmente (hasta les 15:00 hores) los díes 24 y 31 d’avientu y el 5 de xineru.

Esta llinia respuende al apueste del Gobiernu d’Asturies por asitiar el tresporte públicu como referente prioritariu, tamién a la d’aportar a destinos con una arribación de públicu intensa y alcontrada.

“Les cifres d’usuarios del tresporte públicu tán creciendo a un ritmu bien relevante. CONECTA ye un ésitu incontestable y el vezu d’utilizar el tresporte públicu ye una realidá diaria pa miles de persones. Queremos que la ufierta del CTA dexe dexar el coche en casa y facer planes n’autobús. Tuvimos una mui bona respuesta esti branu coles llanzaderes a sableres y espacios naturales y siguimos ampliando la ufierta”, destacó’l conseyeru de Fomentu, Alejandro Calvo.

Nun hai comentarios

Dexar respuesta

¡Anda, ho, pon un comentariu!
Por favor, pon el to nome equí

Salir de la versión móvil