Xove abre esti vienres cuatro díes de folixa

0
164

Cuenta atrás pal entamu de les fiestes de Xove. La parroquia xixonesa abre esti vienres cuatro díes de folixa nes que nun van faltar la música, la comida y les actividaes pa la reciella. El grupu Dragón va abrir el vienres el programa de les fiestes a partir de les once de la nueche. La verbena siguirá depués a cargu d’un dj.

El sábadu celebraráse’l día del sociu. A partir de les diez de la mañana repartirase’l bollu y la botella de vinu. Ceferino Otero va encargase d’amenizar la sesión vermú. El programa tamién reserva un espaciu pa la reciella. Despreocúpate Eventos va encargase dende les cinco de la tarde de les actividaes. Va haber folixa y merienda na Cafetería Lauredal. La verbena entamará a les once de la nueche. La programación d’esti añu estrena espectáculu pirotécnicu de magar les doce a cargu de Pirotecnia Morís.

El domingu habrá misa de doce na ilesia de Santa Cruz col Coru de Llastres. Darréu va tener llugar la procesión alredor del templu. La mañana va siguir con una concentración motera con Asturfenix y Magaya Astur. A la una entamará la sesión vermú. Pela tarde habrá actividaes deportives con regalos pa tolos participantes. Y pela nueche, verbena con Tekila y un Dj.

Les fiestes despediránse’l llunes con una gran parrillada de magar les ocho de la tarde y la última de les verbenes, con Assia y Dj.