El conseyeru d’Ordenación de Territoriu, Urbanismu, Vivienda y Derechos Ciudadanos, Ovidio Zapico, destacó esta mañana l’altu grau d’execución del so departamentu en materia de Vivienda, cola llicitación yá de 600 nuevos pisos y el compromisu de llicitar, a lo menos otros 400, este mesmu añu.
Zapico fixo esta valoración mientres la so visita a la construcción d’una promoción de 24 viviendes en La Estación/Lugo de Llanera, que se van destinar a arriendu afayadizu y que, con una inversión de 3,7 millones, van tar remataes en xunu de 2026.
Na visita tamién participaron l’alcalde de Llanera, Gerardo Sanz; el director xeneral de Vivienda, Daniel Sánchez, y conceyales de la corporación municipal.
“Cuando la derecha y la estrema derecha dicen que na Conseyería de Vivienda nun executamos, yo dígo-yos que visiten Asturies, que vengan a Llugo de Llanera, a Llugones, a Xixón, a L’Arena, a Villayón,… que vaigan a tanto sitios d’Asturies onde güei yá tenemos obres empecipiaes”, sorrayó’l conseyeru.
Nesti sentíu aseguró que la execución presupuestaria del so departamentu pa esti exerciciu “va ser peralta” y adelantró que la Dirección Xeneral de Vivienda trabaya pa cumplir los presupuestos y llicitar anguaño a lo menos otros 400 pisos, que se van construyir principalmente nel conceyu d’Uviéu.
El conseyeru tamién se refirió al grau d’execución de les ayudes al arriendu y esplicó que nun añu, dende mayu de 2024, la conseyería resolvió 3.883 espedientes, de los cualos 2.438 fueron favorables. Un total de 10.357.687 euros nestes ayudes “en solo un añu”, de los que 3.382.000 euros fueron executaos estos primeros meses de 2025. “Yera un problema pergrande cuando llegamos a la conseyería y del que güei los medios yá nun falen”, sentenció.
“Tamos demostrando que somos xente serio, de palabra, dando respuesta a les necesidaes de la clase trabayadora, de los mozos, de les persones más vulnerables no que se cinca al accesu a una vivienda digna, afayadiza y algamadiza, y favoreciendo con polítiques públiques el cumplimientu del derechu a la vivienda”, amestó Zapico.
La llei de Vivienda va llegar anguaño al Parlamentu
Per otra parte, adelantró que, coincidiendo col ecuador de la llexislatura, la so conseyería quier dar un impulsu a la producción lexislativa. Asina, anunció que la futura Llei de Vivienda d’Asturies va ser unviada a la Xunta Xeneral pa la so tramitación nel segundu semestre d’anguaño.
Sobre’l conteníu d’esti proyectu lexislativu, dio dos pincelaes sobre los sos oxetivos: recoyer el derechu suxetivu a la vivienda y consagrar el calter permanente de vivienda protexida.
