El Grupu Folklóricu L’Allegría de Porceyo anuncia la celebración d’una nueva edición de «La Esfoyaza», un eventu tradicional asturianu que busca caltener y compartir les costumes rurales d’Asturies. L’eventu va tener llugar nel emblemáticu Tendayu del Muséu del Pueblu d’Asturies.
«La Esfoyaza», que tradicionalmente consistía na xunta de vecinos para esfoyar les panoyas de maíz y preparar les «riestras», convirtióse n’una festividá que combina esti llabor ancestral con música, baille y gastronomía local. La celebración ta programada pal próximu sábadu 8 de payares, a partir de les 17:00 hores. L’eventu, abiertu a tol públicu, va cuntar cola presentación de Laude Martinez TPA y va esfrtuase de cantar asturianu, monologista, pequeñu teatru asturianu, amás de bailles y xuegos tradicionales. Tamién va entregase la Panoya d’Oru a Juaco López, director del Muséu d’Asturies, pa esfrutar d’un final de fiesta a la lluz de la sidra y l’actuación de Ferla Megia.
Los asistentes van poder esfrutar de productos típicos de la seronda, como sidra duce, tortos con picadiellu, castañes frisuelos, farrapes nun ambiente festivu y familiar.
«Tamos mui ilusionaos de revivir esta tradición un añu más nuna redolada tan especial como’l Tendayu», comenta Maria Soledad Martin, presidenta del Grupu Folklóricu L’Allegría de Porceyo. «El nuesu oxetivu ye que les nueves xeneraciones conozan y valoren los nuesos raigaños, y ‘La Esfoyaza’ ye la oportunidá perfecta pa facelo d’una manera risondera y participativa».
