Les Xornaes Internacionales d’Estudiu de l’Academia de la Llingua Asturiana punxeron el ramu ayeri a la so edición númberu 39. A les 4 de la tarde, intervino Vicent Josep Escartì, profesor de la Universidá de Valencia, cola ponencia «De la traducción al original: De la Asturias del siglo XXI a la Valencia del siglo XV». Darréu, dos profesores de la Universidá d’Uviéu, Cristina Valdés y Gonzalo Llamedo, presentaron les comunicaciones: «La torna de testos non lliterarios nun enfoque ecolóxicu de la traducción» y «La didáctica de la intercomprensión románica como estratexa pal fomentu y el deprendimientu del asturianu». A les 17.45 los cantadores y estudiosos de l’asturianada Carlos Rubiera y Héctor Braga ufiertaron un diálogu alredor d’esti xéneru y los sos estudios y propuestes de futuru.
La conferencia que peslló estes Xornaes, foi a cargu de Simona Georgescu, profesora de la Universidá de Bucarest, que faló de «Las aportaciones de la lengua asturiana a la etimología románica».
Rematen asina trés díes d’actividá académica internacional, nos que l’asturianística volvió a amosar la so importancia dientro de la romanística y la calidá y diversidá de los enfoques, con una participación de más de 60 persones.
