El presidente del Gobiernu asturianu, Adrián Barbón, aseguró esti martes que «Asturies ganó una batalla al coronavirus, pero non la guerra». La comunidá ye la primera d’España en superar un ciclu completu d’incubación del virus ensin rexistrar una andada. El xefe del Executivu realizó estes declaraciones n’una entrevista realizada nel programa ‘Espejo Público’, d’Antena 3.
Barbón señaló qu’estos datos «nun pueden llevanos a la euforia y a pensar que yá nun hai riesgos, sinón tolo contrario. Nun puede ser un mensaxe trunfalista porque tamos viendo qu’hai biltos nuevos perdayuri». Pa evitalos, el presidente incidió na necesidá de cumplir trés normes básiques: usar el mázcaru, guardar la distancia de seguridá y caltener la hixene de manos. Amás, alvirtió de que, «si hubiera un rebrote, aplicaríamos midíes contundentes, como fiximos hasta agora, y confinaríamos lo que fora necesario porque lo que tenemos qu’evitar ye una andada a nivel comuñal».
Destín turísticu «apetecedor»
Pa Barbón, la comunidá salió reforzada tres la crisis sanitaria. «Asturies convirtióse nun destín turísticu apetecedor precisamente pol control que fiximos de la epidemia. El presidente foi más allá y aseguró que «hai xente que vive en Madrid y qu’agora teletrabaya que se ta plantegando volver a Asturies». En relación a la vuelta a les aules, en setiembre, Barbón esplicó que’l Gobiernu asturianu va establecer midíes de seguridá que se tán analizando, sol marcu establecíu na Conferencia Sectorial d’Educación, con los directores de los centros educativos con mayor númberu d’alumnos.
El presidente recordó que los bonos datos d’Asturies fueron posibles por antemanase a los fechos. «Partíamos con cierta desventaya porque Asturies ye de les comunidaes autónomes más avieyaes y con patoloxíes previes pulmonares pola so hestoria minera. Yéramos de les comunidaes más vulnerables y eso fixo poner n’alerta, adelantranos y adoptar midíes, como’l llevantamientu d’hospitales de campaña antes de tener riesgu de colapsu sanitariu y el zarru de colexos», manifestó. Amás, incidió nel apueste de la comunidá pola sanidá, a la que se destina un 40% del presupuestu, el segundu porcentaxe per cápita más eleváu, por detrás del País Vascu.
